मत्‍ति 28 - Dhimal NT

सिकासो येसु सिन्हुका

¹ परमेस्वरको पबित्तरो दिना न्हुसो, आइताबारको दिना झेङका पहरता मग्दल देराको मरियम कालाउ भेनेङ मरियम तोम खाङलि लोहि।

² बारका भुइचाल हानेहि, हाइपालिपानु परमप्रभुको एमि स्वर्गदुत स्वर्गसो लेता खुहि, कालाउ लोतेङ तोमको उन्ठुइ लाअ्पातेङ इङको ह्रुता योम्हि।

³ वाको ह्राइ बिजुलि भाइपा कालाउ लागाइका धाबा हिउ भाइका जे:का हिघाहि।

⁴ वासेहेङ थितेङ पालेगेलाइ लुकुकुपा फिरहि, कालाउ सिनाङ भाइहि।

⁵ कालाउ स्वर्गदुत उङको बेबालाइहेङ दोअ्हि, नेलाइ माअ्थिसु, हाइपालिपानु कासेहेङ थाहा हि, नेलाइ क्रुस्टा तोइन्हाका येसुहेङ भोसुखेना,

⁶ वा इता मान्थु, हाइपालिपानु वाको दोअ्का बमोजिम वा सिन्हुतेङ ल्होका हि। मासानु लोसु वासेहेङ ताअ्का थामे खाङसु।

⁷ एला मार्फा हानेतेङ वाको चात्यागेलाइहेङ बानाल पिसु, हाइ पानु वा सिकासो सिन्हुतेङ ल्होका हि, कालाउ खाङसु वा नेलाइ खाङतेङ आगा गालिल जिल्लाता हानाङ इन्ता नेलाइ वासेहेङ तिङस्वाना। खाङसु का नेलाइहेङ दोअ्का दोङ हिघा।

⁸ थितेङ बेबालाइ हातार पातेङ कालाउ रामाइतेङ तोमसो ओल्लेतेङ हानिहि, कालाउ वाको चात्यागेलाइहेङ इन्ताको घाटानाको बारेता तिङतेङ बानाल पिलि धाअ्पुहि।

⁹ आचानाक येसु ओबालाइहेङ दुसुतेङ दोअ्हि, सान्ति नेलाइहेङ। ओदोङ घुरि इम्बालाइ येसुको भेरपा लोतेङ वाको खोकोइता तुघुरतेङ आराधाना पाहि।

¹⁰ कालाउ येसु इम्बालाइहेङ दोअ्हि, माअ्थिसु, नेलाइ हानेतेङ काङको ओनेगेलाइहेङ गालिल जिल्लाता हानिलि दोपिसु, कालाउ इन्ता ओबालाइ कासेहेङ तिनावा।

पालेगेलाइको बानाल

¹¹ एन्सालाउ उङको बेबालाइ चात्यागेलाइहेङ इङको बानाल दोअ्लि हानिघाहि, आधिमि पालेगेलाइ चाहि सहरता हानेतेङ मुलि पुजारिगेलाइहेङ इन्ता जेङका काथागेलाइको बारेता बानाल पिहि।

¹² कालाउ मुलि पुजारिगेलाइ कालाउ यहुदि आगुवागेलाइ जोम्तेङ इम्बालाइ साल्हा पाहि, कालाउ सिपालाइहेङ एसा दोअ्तेङ हेन्जाङ घुस पिहि।

¹³ नेलाइ द्‍याङगेलाइहेङ एसापा दोअ्सु, कि केलाइ जिम्तेङ हिलाउ येसुको चात्यागेलाइ लोतेङ वाको लासहेङ खुतेङ चुम्पुहि।

¹⁴ नेलाइ पाले हिका बेला जिम्लाउ इदोइ काथा हाकिमको न्हातोङता थुकालाउ बुङ नेलाइ चिन्ता मापासु, केलाइ वासेहेङ मानेपातेङ नेलाइहेङ बान्चेपाङ।

¹⁵ कालाउ इम्बालाइ इङको ताका ह्रुतेङ, जेसाङ धिर्पाहि एन्साङ दोअ्हि, इदोइ काथा चाहि यहुदिगेलाइको माझाता एला थेकापा बुङ चार-चाराइका हि।

आम्तिम सन्‍देस

¹⁶ उङको तेए झना चात्यागेलाइ गालिल जिल्लाको ओदोइपारको तिकारता हानिहि, इङकोङ थामेता हानेसु दोअ्तेङ येसु इम्बालाइहेङ आग्या पिका हिघाहि।

¹⁷ इम्बालाइ वासेहेङ तिङतेङ तुघुरतेङ आराधाना पाहि, आधिमिहेङ चाहि साङखा जेङहि कि येसु सिन्हुहि।

¹⁸ कालाउ येसु इम्बालाइ दोफा लोतेङ दोअ्हि, “स्वर्ग कालाउ प्रिथिबिको गोताङ खाबारा कासेहेङ पिका हि।

¹⁹ ओदोङ भाअ्सिङ हानिसु, कालाउ गोताङ सारभिको द्‍याङगेलाइहेङ चात्या बानाइसु, कालाउ आबा, चान कालाउ पबित्तरो आत्माको मिङता इम्बालाइहेङ बप्तिस्ता पिसु।

²⁰ का नेलाइहेङ आग्या पिका गोताङ काथागेलाइ पालि इम्बालाइहेङ धिरपासु। खाङसु, का युगको दोका थेकापा नेलाइ दोफा का ह्याङका।”