मत्‍ति 24 - Dhimal NT

न्हुसोको दिनाको चिन्हागेलाइ

¹ कालाउ येसु मुन्दिरसो बाहार हानिलि तेङलाउ वाको चात्यागेलाइ वासेहेङ मुन्दिरको आक्रितिगेलाइ तिङपालि लोहि।

² येसु इम्बालाइहेङ दोअ्हि, इदोइ बारका साअ्गेलाइ जेदोङ नेलाइ एला खाङसुखेना, जातिङ भारि का नेलाइहेङ दोअ्खा एनोङ उन्ठुइ ह्रुता भेनेङ उन्ठुइ बुङ बाकि माह्याङ गोताङ ह्राप्यावा।

³ आले सोमोइ न्हुसो येसु जैतुनको तिकारता हानितेङ योम्हि। कालाउ चात्यागेलाइ एकुन्हाता लोतेङ हिअ्हि, गुरु ज्यु केलाइहेङ दोअ्पि इदोइ काथा हेलाउ जेनाङ? कालाउ नाङको आगमनता सुमिङको आन्ता जेनाङ दोअ्तेङ हेसा केलाइ थाहा गिलि द्वाङ?

⁴ येसु इम्बालाइहेङ जोबाफ पिहि, “चङख हिसु! हासु बुङ नेलाइहेङ धाताइलि मानिनाको।” हेन्जा द्‍याङगेलाइ काङको मिङ पातेङ ल्वावा। इम्बालाइ द्वावा, “का ख्रिस्ट दोङ” हिघा।

⁵ इम्बालाइ हेन्जाङ द्‍याङगेलाइहेङ काङको मिङता का ख्रिस्ट दोअ्तेङ ल्वाङ कालाउ ताइमिता खाङधुरि पापालिको भाअ्सिङ धोका प्यावा।

⁶ जेलाउ नेलाइ धुम कालाउ धुमगेलाइको जोग्रेकालाइ हिङस्वाना कालाउ इङको बेला माअ्थिसु, इङको गोताङ घाटानागेलाइ जेङलि आवस्यक दोङ हि कालाउ सुमिङको आन्त चाहि एन्सालाउ दोङ माजेनाङ।

⁷ एनोङ जातिको बिरोधता भेनेङ जातिको द्‍याङगेलाइ बिरोध पावा कालाउ एनोङ सारभि भेनेङ सारभिको बिरोध पावा। जोसो-ओसोङ भुइचाल हानावा कालाउ लालाइगिल्लावा इदोइ ते कस्टको सुरुआत खिनिङ, जेसा कि चानको जोलोम जेङलि खाङलाउ लाम्फा तु निन्चालाउ जिसिका जेङखे इन्सिकाङ जेनावा। कालाउ या खान्तेङ बुङ हेन्जाङ कस्टगेलाइ लोलि बाकि हि।

⁸ इदोइ गोताङ आमेने तु निन्चाका ब्याथा जेङका भाइपाङ आइ लाग्यावा।

⁹ कालाउ न्हुसो नेलाइहेङ द्‍याङगेलाइ बिरोध पावा, द्‍याङगेलाइ नेलाइहेङ साताइयावा कालाउ सेअ्तावा। काङको मिङ ह्रुता खाङधुरि पाकानाङ गोताङ जातिको द्‍याङगेलाइसो नेलाइ घ्रिनित जेङस्वाना।

¹⁰ इङको बेला हेन्जाङ खान्धुराइगेलाइ का ह्रुता खाङधुरि पालि लाअ्तावा। इम्बालाइता-ताइमिता धोका पावा कालाउ मन्दा माताकावा।

¹¹ हेन्जाङ धातुवा आगमबक्तागेलाइ ल्वावा, कालाउ हेन्जा द्‍याङगेलाइहेङ धोका प्यावा।

¹² कालाउ जोसो-ओसोङ दुस्ट बढेयाङ कालाउ इम्बालाइता-ताइमिता प्रेम मापाङ।

¹³ जाइ चाहि ताइको जिबन लास्ता थेकापा दोङ का ह्रुता खाङधुरि पातेङ हिकालाइहेङ चाहि बान्चि पावा।

¹⁴ सुमिङ भरि दोङ परमेस्वरको सासनको बारेता सुसमाचार हिम्पाङ, कालाउकि गोताङ सारभिको द्‍याङगेलाइ इङको सुसमाचार खाङधुरि पालि द्वाको। कालाउ सुमिङको आन्त जेनावा।

¹⁵ ओदोङ भाअ्सिङ जेलाउ नेलाइ दानिएल परमेस्वरको बक्तासो दोअ्का बिनासकारि सिकाका कालाउ थिलि गोइका पबित्तरो थामेता जाअ्तेङ हिका तिङस्वाना। जाइको कारनहोइ मुन्दिरहेङ लाअ्तावा। इदोइ काथा पढेका द्‍याङ याको माने बुझिलि गोइखे।

¹⁶ इङको बेला यहुदिया जिल्लाता हिका द्‍याङगेलाइ रा भारि खाअ्ताको।

¹⁷ चाङघा साअ्ता हिकालाइ लेता खुतेङ ताइको सम्पति नानि साअ् लिता मादुलाको।

¹⁸ मिलिङता हिकालाइ होङका ताइको धाबा बुङ नानि साअ् लिता मादुलाको।

¹⁹ इङको सोमोइ उङको बेबालाइको भाअ्सिङ थिलि गोइका सोमोइ जेनाङ जाइ गान्धि तेअ्का हि कालाउ ओबालाइको भाअ्सिङ जाइ दोङ जामालहेङ दुदु चुपाका हि! ओबालाइ खाअ्लि हेन्जा मुसकिल जेनावा।

²⁰ परमेस्वरको पबित्तरो दिना कालाउ चुङ दिनाको बेला एन्सा खाअ्लि मागोइयाको दोअ्तेङ परमेस्वर दोफा प्रार्थाना पासु।

²¹ हाइपालिपानु एन्सालाउ ओसारापा दुख जेनावा सिरजाइकाको लाम्फासो एला थेकापा सुमिङता इसिका खालको दुख जेङका मान्थु, न्हुसो हेलाउ बुङ इन्सिका दुख माल्वाङ।

²² परमेस्वर इङको माहा कस्ट कालाउ दुखको दिना आसा पोतो पाका हि जेसापा वा मापोतो पानु कालाउ बढेपानु हिदोइ बुङ द्‍याङ बान्चिलि मादोधाङ, कालाउ बुङ ताइको साल्कालाइको भाअ्सिङ इङको दिना पोतो पावा।

²³ इङको सोमोइ जेसापा हासु बुङ नेलाइहेङ दोअ्हे पानु, ख्रिस्ट इन्ता हि माकुनु उता हि उसो हि दोनु नेलाइ इङको काथाता खाङधुरि मापासु।

²⁴ हाइपालिपानु धाताइका ख्रिस्टगेलाइ कालाउ धाताइका बक्तागेलाइ ल्वावा, बारका चिन्हागेलाइ कालाउ भारभुसाइका कामगेलाइ परमेस्वरको साल्का द्‍याङगेलाइहेङ धोका पिलिको भाअ्सिङ पावा।

²⁵ खाङसु फोम ताअ्सु का नेलाइहेङ लाम्फासोङ दोअ्का हिघा।

²⁶ हासु बुङ दोअ्हे पानु ख्रिस्ट चाका-मान्दा थामे भारि हि। इन्ता मानेसु कालाउ कोठा लिता हि दोलाउ बुङ खाङधुरि मापासु।

²⁷ जेलाउ का द्‍याङको चानको लोका दिना गोताङ द्‍याङगेलाइ तिङलि निनावा। इङको बेला नुहेता चिल्काका आकास दिहेता तिनावा।

²⁸ जेता सिघुनगेलाइ जोम्तेङ हिखे, इन्ता ते सिका गाइ पिया हिखे।

²⁹ इङको दिनागेलाइता माहा दुखगेलाइको न्हुसो सान्हे कितिकितितावा, कालाउ तालि बुङ ताइको फाइसालामका माप्यावा, फुरुगेलाइ बादेलसो लेता हुलावा, कालाउ आकासता हिका गोताङ सरबुङहोइ आकासको गोताङ आनेमानेगेलाइ हेङगालाइन्हावा।

³⁰ इङको बेला आकासता द्‍याङको चानको चिन्हागेलाइ देखाल जेनाङ कालाउ प्रिथिबिको गोताङ जातिगेलाइ जिउधाइ ल्होपाङ खारावा। झाराङ द्‍याङगेलाइ का द्‍याङको चानहेङ आकासता लोका तिनावा। द्‍याङको चान आकासता सरबुङ कालाउ माहान महिमा चुम्तेङ लोका तिनावा।

³¹ द्‍यापाहाङ आकासको एनोङ थामेसो भेनेङ ओताका थामे थेकापा परमेस्वरसो साल्का द्‍याङगेलाइहेङ जोम्पावा कालाउ द्‍याङको चान सानाइको बार्का गाला दोफाङ स्वर्गदुतगेलाइहेङ दिङगिल प्याङ।

³² कालाउ लाब्राको सिङसो नेलाइ सिक्स्या धिरसु जेलाउ सिङको दालेङगेलाइ ल्हे भार्लि तोमावा कालाउ दोरका तिङतेङ नेलाइ गिस्वाना भेम्का सोमोइ भेरपाङ लोका हि।

³³ एन्साङ पातेङ जेलाउ नेलाइ इदोइ गोताङ काथागेलाइ जेङका तिङस्वाना, कालाउ नेलाइहेङ या थाहा जेनाको कि इदोइ सुमिङको आन्त भेरपाङ हि। कालाउ इदोइ धेमाङ जेनाङ।

³⁴ का नेलाइहेङ जातिङ भारि दोअ्खा, इदोइ पुस्ताको द्‍याङगेलाइ जेलाउ थेकापा बान्चितेङ ह्यावा कालाउ इदोइ गोताङ घाटानागेलाइ घतियावा।

³⁵ आकास कालाउ प्रिथिबि माअ्तेङ हानावा, जेलाउलाउको भाअ्सिङ माह्याङ कालाउ का जेदोङ दोअ्का हिघा इङको जेलाउलाउको भाअ्सिङ ह्यावा।

³⁶ इङको काथागेलाइ हिदोइ सोमोइ कालाउ हिदोइ दिना जेनाङ या हासुहेङ बुङ थाहा मान्थु, ना ते स्वर्गदुतगेलाइहेङ का चानहेङ बुङ थाहा मान्थु, आबाहेङ खिनिङ इङको दिना कालाउ सोमोइ थाहा हि।

³⁷ का द्‍याङको चान लोलाउ, इङको बेला इन्सिकाङ स्थिति जेनाङ जेसाङ नुहाको सोमोइता जेङका हिघाखे।

³⁸ इङको बेला चिप्रलय जेङलि खान्तेङ लाम्फा द्‍याङगेलाइ चाकाताङ आमकाताङ पाघाखे बिहु पादोङघाखे नुहा नाउता मादुल्पा धाउ,

³⁹ द्‍याङगेलाइ हाइ जेङदोङखे दोअ्तेङ थाहा मागिघाखे। कालाउ ओदोङ बेला चिप्रलय जेङहि कालाउ गोताङ होइहि। का द्‍याङको चानको आगमन बुङ एसाङ जेनाङ।

⁴⁰ न्हेमि द्‍याङगेलाइ मिलिङता काम पाकाताङ ह्यावा। एमिहेङ तोलितेङ चुम्पावा कालाउ भेनेङहेङ लाअ्ध्यावा।

⁴¹ न्हेमि बेबालाइ सिमता से उम सुतेङ ह्यावा, एमिहेङ चुम्पावा कालाउ भेनेङहेङ लाअ्ध्यावा।

⁴² ओदोङ भाअ्सिङ जेलालाउ बुङ तियार जेङतेङ हिसु, हेथे पहर नेलाइको परमप्रभु ल्वाङ दोअ्तेङ नेलाइहेङ थाहा गिलि मादोस्वाना।

⁴³ थाहा गिसु जेसापा साअ्को गिह्रि चोर हेथे बेला ल्वाङ दोअ्का थाहा गिनु वा तियार जेङतेङ हिधावा। कालाउ वा सर्तक जेङतेङ चोरहेङ साअ् लिता दुल्लि मापिघ्यावा।

⁴⁴ ओदोङ भाअ्सिङ नेलाइ बुङ तियार जेङतेङ हिसु। का द्‍याङको चान हिदोइ सोमोइता ल्वाङका जाइको नेलाइ आस पाका मान्थुस्वाना।

इमान्दार चाकारिया कालाउ दुस्ट चाकारिया

⁴⁵ एनोङ इमान्दार कालाउ बुद्दिमान चाकारिया इसिका हिखे: जाइहेङ साअ्को गिह्रि आरु चाकारियागेलाइहेङ खाङलि नियुक्त पाखे। गिह्रि वासेहेङ दोअ्खे इम्बालाइहेङ ठिक-ठिक सोमोइता चालि-आम्लि प्यावाको।

⁴⁶ जेलाउ गिह्रि लोखे कालाउ चाकारियाहेङ पिका काम पातेङ हिका निङनु उङको चाकारिया धन्यको हि।

⁴⁷ जातिङ भारि का नेलाइहेङ दोअ्खा, उङको गिह्रि वासेहेङ ताइको दोफा हिका गोताङ सम्पति वाको खुरता जिम्मा लागाइयावा।

⁴⁸ कालाउ चाकारिया दोङ दुस्ट हिनु कालाउ ताइको ग्रिह्रि बेलोम्पा ल्वाङ दोअ्तेङ सम्झिखे पानु,

⁴⁹ कालाउ ताइमि दोफा काम पाका चाकारियाहेङ दानाइका कालाउ म्हाकालाइ दोफा चाअ्लि कालाउ आम्लि तेङहि पानु।

⁵⁰ उङको चाकारियाको गिह्रि वा मासोचिका दिना कालाउ थाहा मागिका पहरता घुरितेङ ल्वाङ।

⁵¹ कालाउ वाको गिह्रि वासेहेङ राङका दन्ड प्यावा, कालाउ वासेहेङ कपटिगेलाइ दोफा थाइगिल्यावा, कालाउ इन्ता वा खारावा कालाउ तासिङ जितावा।