मत्‍ति 20 - Dhimal NT

दाखबारिको निङपिका

¹ येसु दोअ्हि, परमेस्वरको सासन इदोइ निङपिका भाइका हि: एह्रिमाङ एमि गिह्रि ताइको आङगुरको बारिता काम पाका खेतालागेलाइहेङ भोलि बाजार भारि ओल्लेहि।

² कालाउ खेतालागेलाइ दोफा ए दिनाको निङका ज्याला चान्दिको ए थुरि प्याङका दोअ्तेङ खेतालागेलाइहेङ आङगुरको बारिता काम लागिहि।

³ ह्रिमा क्वाहा बजेको सोमोइ आरोङ बाजारता हानिलाउ वा आधिमि खेतालागेलाइहेङ काम मान्थुतेङ मेनाङ जागिल्का तिङहि।

⁴ कालाउ वा इम्बालाइहेङ दोअ्हि, नेलाइ बुङ काङको आङगुरको बारिता हानेसु, का नेलाइहेङ निङलि गोइका ज्याला प्याङका। कालाउ इम्बालाइ बुङ काम पालि हानिहि।

⁵ आरोङ वा नितिमाको तेन्हे बजेको पहर कालाउ बेल्हाकाको सुम बजेको सोमोइ बाहार एन्साङ पातेङ आरु खेतालागेलाइहेङ बुङ कामता लागाइहि।

⁶ आरोङ ना बजेको सोमोइ वा आधिमि खेतालागेलाइहेङ काम माकोसिङ एन्साङ बाजारता जाअ्गिल्तेङ हिका तिङहि, कालाउ वा ओबालाइहेङ हिअ्हि, नेलाइ हाइ पालि इता लिपाङ मेनाङ जाअ्तेङ हिसुखेना?

⁷ कालाउ खेतालागेलाइ वासेहेङ दोअ्हि, केलाइहेङ हासु बुङ ज्यालाता काम लागाइका मान्थु। कालाउ वा इम्बालाइहेङ दोअ्हि, “एन्सा पानु नेलाइ बुङ काङको आङगुरको बारिता काम पालि हानेसु कुनु।

⁸ जेलाउ बेल्लाका पहर जेङहि, आङगुरको बारिको गिह्रि ताइको काम पाकालाइको नाइकेगेलाइहेङ दोअ्हि, खेतालागेलाइहेङ काइतेङ ओबालाइको काम पाका ज्याला पिसु। ज्याला झाराङ खाङतेङ न्हुसो लोकालाइसो सुरु पातेङ आम्तिमता लोकालाइसो लाम्फा लोकालाइहेङ बुङ इम्बालाइको ज्याला पि।

⁹ कालाउ नाइके ना बजेको सोमोइता काम सुरु पाकालाइहेङ लाम्फा काइतेङ झाराङहेङ ए दिनाको निङका पुरा ज्याला चान्दिको एनोङ-एनोङ थुरि पिहि।

¹⁰ इङको बेला जाइ एह्रिमाङ काम पाकालाइ चाहि हेन्जाङ निनाङ वाला दोअ्तेङ बिचार पाहि। कालाउ बुङ इम्बालाइ ए दिनाको निङका पुरा ज्याला चान्दिको एनोङ-एनोङ थुरि खिनिङ निङहि।

¹¹ कालाउ ज्याला निङलि दोअ्तेङ मिलिङको गिह्रिको बिरोधता इम्बालाइ गनगन पालि तेङहि।

¹² इम्बालाइ दोअ्लि तेङहि, इदोइ ना बजे लोकालाइ ए घान्टा खिनिङ काम पाहि, केलाइते लिपाङ चेराका सान्हेता काम पान्हाहि। कालाउ नाअ् ते इम्बालाइहेङ बुङ केलाइ झोकोङ ए दिनाको निङका पुरा ज्याला पिना।

¹³ कालाउ गिह्रि इम्बालाइसो एमिहेङ जोबाफ पिहि। सानाइति का नासेहेङ हाइ दोङ आन्याय पाका मान्थुघा। हाइ नाअ् ते का दोफा चान्दिको एनोङ थुरि लिपाङ काम पालि राजि जेङका माको रो?

¹⁴ नाअ् नाङको निङलि गोइका ज्याला चुम्तेङ सिता हाने। का या न्हुसो कामता लोकालाइहेङ बुङ नासेहेङ हेथे पिघा ओदोङ झोको प्याङका।

¹⁵ कासेहेङ खाबारा हि, कि काङको ताका ताइको इच्छा आन्सार खार्चा पालि द्वाङका। का दानि जेङकाता नेलाइहेङ डाहा जेङलि माएल।

¹⁶ ओदोङ भाअ्सिङ न्हुसोको लाङ जेनावा कालाउ लाम्फाको न्हु जेनावा।”

येसु ताइको सिकाको सुम्तेङ आगमबानि पाका

¹⁷ यरुसेलेम सहर भारि हानिकाताङ पालाउ येसु ताइको तेन्हे चात्यागेलाइहेङ खेङतेङ दामाता ओबालाइहेङ दोअ्हि,

¹⁸ खाङसु, केलाइ यरुसेलेम सहर भारि हानिन्हाखे। एला का द्‍याङको चानहेङ मुलि पुजारिगेलाइ कालाउ व्यवस्था धिरपाका द्‍याङगेलाइको खुरता रिम्पातेङ सुम्पि प्यावा। कालाउ इम्बालाइ कासेहेङ सेअ्लि गोयाङ दोअ्तेङ गैर-यहुदिगेलाइको जिम्माता सुम्पि प्यावा।

¹⁹ ओबालाइ कासेहेङ खुजालाइयावा थोअ्तावा द्वालिहोइ म्हेतावा कालाउ सेअ्तावा कालाउ क्रुस्टा तोइयावा आरोङ का सिकासो सुम्निता सिन्हुतेङ ल्होकाङका।

आमाइको सेउपाखा

²⁰ जेलाउ जब्दियाको चानगेलाइको आमाइ ताइको चानगेलाइहेङ दोफाङ चुमातेङ येसुको आगाता तिर्हु थोतेङ वाको दोफा बिन्ति पाहि।

²¹ येसु वासेहेङ हिअ्हि, “नाअ् हाइ भोखेना? वा येसुहेङ दोअ्हि, आग्या पि कालाउ नाङको सासनता, काङको इदोइ न्हेनोङ चानगेलाइ एमि नाङको दाम पाहा खुर भारि, कालाउ भेनेङ चाहि नाङको केपाहा खुर भारि योम्लि निनाको।”

²² कालाउ येसु जोबाफ पिहि, नेलाइ हाइ ह्रेसुखेना इङको नेलाइ मागिसुखेना। हाइ नेलाइ इङको दुख ल्होपालि दोस्वाना? जेदोङ का ल्होपालि हानिखा हाइ नेलाइ सेअ्न्हालि तियार हिसुना जेसापा का सेअ्न्हाङका?

²³ इम्बालाइ जोबाफ पिहि, एइ केलाइ पालि द्वाङ। कालाउ येसु इम्बालाइहेङ दोअ्हि, नेलाइ बुङ दुख ल्होपास्वाना जेसाङ का दुख ल्होपाङका नेलाइ सेअ्न्हास्वाना जेसाङ का बुङ सेअ्न्हाङका। कालाउ कासेहेङ इदोइ काम पालि खाबारा मान्थु, कि हासु काङको दाम्पाहा कालाउ केपाहा कालाउ हासु इङको सम्मानको थामे निनावा। परमेस्वर ताइमिङ इङको थामेगेलाइ तियार पाका हि। जाइहेङ वा दोङ छाल्का हि वासेहेङ प्यावा।

²⁴ इदोइ काथा हिङतेङ आरु तेमि चात्यागेलाइ दादा-ओनेगेलाइ दोफा मेनाङ चेर ताम्पाहि।

²⁵ कालाउ येसु दोङ इम्बालाइ झाराङहेङ एनोङ थामेता काइतेङ दोअ्हि, नेलाइहेङ थाहा हि, कि जाइ इदोइ सुमिङता सासन पालि गिखे, ओबालाइ ताइको खाबाराको प्रयोग ताइको आधिनता हिकागेलाइ ह्रुता चालाइखे। वाको आगुवागेलाइहेङ ताइको दोअ्का काथा साअ्पालिको भाअ्सिङ इम्बालाइको ह्रुता ताइको खाबारा प्रयोग पाखे।

²⁶ कालाउ नेलाइता चाहि इसिका हिलि माएल, कालाउ जाइ नेलाइ मध्येसो बार्का जेङलि खाङकालाइ झाराङको चाकारिया जेङलि गोइखे कालाउ सेवा पालि गोइखे।

²⁷ कालाउ नेलाइता चाहि इसिका हिलि माएल, कालाउ जाइ नेलाइ मध्येसो लाङ जेङलि खाङकालाइ झाराङको बान्धाइति जेङलि गोइखे कालाउ सेवा पालि गोइखे।

²⁸ जेसाङ का द्‍याङको चान, बोगेलाइको सेवा पालि इदोइ सुमिङता लोघा। कालाउ का एसापा लोका माको कि बोगेलाइ दोङ काङको सेवा पाको। का हेन्जाङ झनाहेङ काङको पापसो लाअ्पालि दोअ्तेङ ताइको जिउ पिलि लोका हिघा।

न्हेमि कान्हाँ द्याङ

²⁹ ओबालाइ यरुसेलेम सहर हानिकाताङ पालाउ येसु कालाउ वाको चात्यागेलाइ यरिहो सहर थुकाहि, एनोङ बार्का जेर वाको न्हु हानिहि।

³⁰ दामाको आलि भारि योम्तेङ हिका न्हेमि कान्हाँगेलाइ येसु इदोइ दोङ दामा हानिदोङखे दोअ्का हिङतेङ एसा दोअ्तेङ ह्रिकाइहि, “हे प्रभु, राजा दाउदको चान, केलाइहेङ दाया पासु।”

³¹ इङको जेरगेलाइ ओबालाइहेङ सिकापा हिसु दोअ्तेङ चेरहि। कालाउ बुङ ओबालाइ झन इसिका दोअ्तेङ बल पातेङ ह्रिकाइहि। “हे प्रभु, राजा दाउदको चान, केलाइहेङ दाया पा।”

³² जेलाउ येसु टक्क जाअ्हि कालाउ ओबालाइहेङ काइतेङ दोअ्हि, “नेलाइ हाइ भोसुखेना? का नेलाइको भाअ्सिङ हाइ पापिलि?”

³³ ओबालाइ वासेहेङ दोअ्हि, “हे प्रभु, केलाइको मिसियाँ हेअ्पि।”

³⁴ येसु ओबालाइको मिसियाँ साइपिहि, कालाउ ओदोङ घुरि ओबालाइ मिसियाँ तिङहि, कालाउ ओबालाइ वाको दोफा हानिहि।