मत्‍ति 2 - Dhimal NT

नुहेसो येसुको दर्सन पालि लोका

¹ जेलाउ राजा हेरोद यहुदिया जिल्लाता सासन पातेङ हिघाहि, कालाउ इङको सोमोइता येसुको जोलोम इङको जिल्लाको बेथेलेहेम देराता जेङहि। बुद्दिमान वाबालाइ जाइ फुरुगेलाइको बारेता आध्यान पाखे, नुहेको सारभिसो यरुसेलेम सहरता लोहि कालाउ हिलि तेङहि,

² “उङको जामाल हिसो हि, जेदोङ यहुदिगेलाइको राजा जेङलिको भाअ्सिङ जोलोम जेङका हि? हाइपालिपानु केलाइ वाको जोलोमको बिसोइता थाहा गिपाका फुरुहेङ नुहे भारि तिङन्हाहि कालाउ केलाइ वासेहेङ तुघुरतेङ आराधाना पालि लोका हिन्हाहि।

³ यहुदिगेलाइको राजाको जोलोमको बिसोइता हिङतेङ राजा हेरोद थिहि, कालाउ वाको दोफा यरुसेलेम सहरको हेन्जा जोसो द्ययाङगेलाइ बुङ थिहि।

⁴ कालाउ राजा हेरोद गोताङ मुलि पुजारिगेलाइ कालाउ व्यवस्था धिरपाका द्‍याङगेलाइहेङ जोम्पातेङ ओबालाइहेङ हिअ्हि, ख्रिस्टको जोलोम जेङका थामेको बिसोइता परमेस्वरको बक्ता हाइ दोअ्खे कि वाको जोलोम हिसो जेनाङ?”

⁵ ओबालाइ राजा हेरोदहेङ दोअ्हि, ख्रिस्टको जोलोम इदोइ यहुदिया जिल्लाको बेथेलेहेम देराता जेनाङ। हाइपालिपानु परमेस्वर दोअ्का काथा परमेस्वरको बक्ता मिका हेन्जाङ सोमोइ लाम्फा लेखेका हिघाहि:

⁶ ओइ यहुदिया जिल्लाको बेथेलेहेम देराको द्‍याङगेलाइ, नेलाइ यहुदिया जिल्लाको सासकगेलाइ खान्तेङ माहान हिसुना, हाइपालिपानु नेलाइको माझासो एमि द्‍याङ ल्वाङ जाइ दोङ सासक जेनाङ, जाइ दोङ काङको प्रजा इस्राएल सारभिको द्‍याङगेलाइहेङ लाखुरिया भाइपाङ सामाराइयावा।

⁷ कालाउ राजा हेरोद उङको जोलोम जेङका जामालको उमेर थाहा निङलिको भाअ्सिङ उङको बुद्दिमान वाबालाइहेङ ए-कुन्हाता काइतेङ फुरु देखाल जेङका ठिक पहर ओबालाइसो पाट्ता लागाइहि।

⁸ राजा हेरोद बुद्दिमानि वाबालाइहेङ एसा दोअ्तेङ बेथेलेहेम देराता दिङगिल्हि, “हानेसु, कालाउ रेम्फा उङको जामालहेङ भोसु। वासेहेङ निङतेङ काङकोता घुरितेङ लोसु कालाउ नेलाइ जेदोङ तिङका हिसुना इङको काथागेलाइ कासेहेङ दोअ्सु, कालाउ का बुङ वासेहेङ तुघुरतेङ आराधाना पाङका।”

^9-10 कालाउ ओदोङ भाअ्सिङ ओबालाइ हानिहि, कालाउ दामाता इम्बालाइ ओदोङ फुरु तिङहि जेदोङ ओबालाइ नुहे भारि तिङका हिघाखे। जेलाउ इम्बालाइ फुरु तिङहि, कालाउ हेन्जा लेङचाहि इङको फुरु ओबालाइको लाङ-लाङ हानिहि, कालाउ उङको जामाल हिका साअ्ता थुकातेङ आरिहि।

¹¹ कालाउ इङको साअ्ता थुकातेङ इम्बालाइ लिता दुल्हि कालाउ ओबालाइ जामालहेङ वाको आमाइ मरियमको कोल्हेता तिङहि। कालाउ इम्बालाइ वासेहेङ तुघुरतेङ आराधाना पाहि, कालाउ ता-ताइको सिपि खाइतेङ वासेहेङ सोना, मालामालाका धुमाना कालाउ मुर्रा दोअ्का ओसेरे चढाइहि।

¹² कालाउ इम्बालाइ न्हुसो सोपन्ता राजा हेरोदकोता घुरितेङ मानेसु दोअ्का परमेस्वरको चेताउनि निङहि, कालाउ इम्बालाइ भेनेङ दामा पाहासो ताइको सारभिता घुरिहि, कालाउ इम्बालाइ राजा हेरोदहेङ हाइ दोङ मादोअ्हि।

योसेफ ताइको जाहान चुम्पुतेङ मिस्रोता खाअ्हि

¹³ उङको बुद्दिमान वाबालाइ हानिलि दोतेङ, योसेफ सोपन्ता प्रभुको एमि स्वर्गदुतहेङ तिङहि कालाउ स्वर्गदुत योसेफहेङ दोअ्हि, ल्हो, धेमाङ जामाल कालाउ वाको आमाइहेङ चुम्पुतेङ मिस्रो सारभिता खाअ्सु। कालाउ का दोङ घुरितेङ मालो दोअ्पा धाउ नेलाइ इन्ताङ हिसु, हाइपालिपानु राजा हेरोद जामालहेङ भोतेङ हि कालाउ वासेहेङ सेअ्लि खाङखे।

¹⁴ कालाउ योसेफ दोङ कोकोङ न्हिसिन्ता ल्होतेङ जामाल कालाउ वाको आमाइहेङ चुम्पुतेङ मिस्रो सारभिता खाअ्हि।

¹⁵ कालाउ इम्बालाइ राजा हेरोद मासिपा भरि मिस्रो सारभिताङ हि। ओदोङ भाअ्सिङ परमेस्वर ताइको बक्ता होसे पाहासो हेन्जा लाम्फा दोअ्का काथा पुरा जेनाको, “का दोङ मिस्रो सारभिसो ताइको चानहेङ काइघा।”

राजा हेरोद जामालाइहेङ सेअ्लि लागाइहि

¹⁶ राजा हेरोद चेर ताम्पातेङ राङहि, जेलाउ वा थाहा गिहि कि बुद्दिमान वाबालाइ वासेहेङ धोका पिहि। राजा हेरोद सिपालाइहेङ दिङगिल्हि कि ओबालाइ बेथेलेहेम देराता कालाउ इङको कोरपाहाङको थामेको गोताङ चानगेलाइहेङ सेअ्लि लागाइहि। जाइ चाहि न्हे बासार कालाउ वा खान्तेङ म्हुइका हिकालाइहेङ। या बुद्दिमान वाबालाइ पाहा फुरुको झाराङ खान्तेङ लाम्फा तिङका आधारता हिघाहि।

¹⁷ या ओदोङ भाअ्सिङ जेङहि कालाउकि धर्मसास्तरता परमेस्वरको बक्ता यर्मिया पाहासो दोअ्का काथा सत्ये जेनाको।

¹⁸ रामाको देराता द्‍याङगेलाइ एमि बेबालको खार्का गाला हिङहि, खार्का कालाउ जिउधाइ ल्होपाङ कापाल थेतेङ लोताइका, हाइपालिपानु राहेलको गोताङ जामाललाइ खारतेङ हिघाहि, वासेहेङ हासु बुङ सिकापा हिपालि मादोहि, हाइपालिपानु गोताङ जामाललाइ सिलि दोका हिघाहि।

¹⁹ योसेफ, मरियम कालाउ जामाल येसु एला थेकापा मिस्रो सारभिता हिघाहि। राजा हेरोद सितेङ, परमेस्वरको एमि स्वर्गदुत योसेफहेङ सोपन्ता देखाल जेङतेङ दोअ्हि,

²⁰ “ल्हो, जामाल कालाउ वाको आमाइहेङ चुम्पुतेङ इस्राएल सारभिता घुरिसु, हाइपालिपानु राजा हेरोद कालाउ वाको द्‍याङगेलाइ सिहोइ जाइ जामालहेङ सेअ्लि भोघाहि।”

²¹ कालाउ योसेफ ल्होहि, जामाल कालाउ जामालको आमाइहेङ चुम्पुतेङ इम्बालाइ मिस्रो सारभि लाअ्तेङ इस्राएल सारभिता हानिहि।

²² कालाउ जेलाउ योसेफ इसिका हिङहि कि, आख्रिलाउस ताइको आबा राजा हेरोदको थामेता यहुदिया जिल्लाता सासन पातेङ हि। योसेफ इन्ता हानेलि थिहि, कालाउ आरोङ सोपन्ता परमेस्वरसो चेताना निङतेङ, ओबालाइ गालिल जिल्लाता हानिहि।

²³ कालाउ ओबालाइ नासरत देराता हानितेङ हि। ओदोङ भाअ्सिङ इङको बचन पुरा जेङहि, जेदोङ चाहि परमेस्वरको बक्तागेलाइ येसुको बारेता दोअ्का हिघाहि: “वासेहेङ नासरि दोअ्न्हाहि।”