मत्‍ति 19 - Dhimal NT

बिहुको खाति पोका

¹ इदोइ गोताङ हिङपालि दोअ्तेङ येसु गालिल जिल्लासो ओल्लेतेङ यर्दन झोराको ओदोइ पार यहुदियाको जिल्लाता हानिहि।

² जाइ द्‍याङगेलाइ येसु दोफा लोहि, येसु मेसा लोका द्‍याङगेलाइहेङ एल्पा पिहि।

³ आधे फारिसिगेलाइ येसुकोता लोतेङ वासेहेङ जाचिलिको भाअ्सिङ हिअ्हि, “हाइ मोसाको व्यवस्थाता हिदोइ बुङ निउता हासु बुङ ताइको बे हेङ लाअ्लि एल रो?”

⁴ येसु जोबाफ पिकाताङ दोअ्हि, “हाइ नेलाइ धर्मसास्तरता पढेका मान्थुसुना? जेलाउ परमेस्वर सुमिङहेङ सिरजाइहि, वा वाजान कालाउ बेजान बानाइहि।

⁵ कालाउ परमेस्वर दोअ्हि, ओदोङ भाअ्सिङ द्‍याङ ताइको आबा-आमाइहेङ लाअ्तेङ ताइ बे दोफा मिलितेङ हिखे। एसाङ इदोइ न्हेमि द्‍याङ एनोङ जिउ जेनावा।

⁶ कालाउ उङको न्हेमि माको कालाउ एनोङ दोङ जिउ जेङखे, ओदोङ भाअ्सिङ परमेस्वर जाइहेङ ए-दोफाङ गासिका हि, इम्बालाइहेङ हिदोइ बुङ द्‍याङ मालाअ्पाको।”

⁷ फारिसिगेलाइ येसुहेङ दोअ्हि, “मोसा हाइ पालि बिहुको खाति पोका कालाउ लाअ्का पात्तारा पितेङ बे हेङ लाअ्पिका आग्या पिहि?”

⁸ येसु इम्बालाइहेङ दोअ्हि, “नेलाइको ह्रदय राङका हिनाङ, मोसा दोङ बे हेङ लाअ्का आनुमति नेलाइहेङ पिका हि। कालाउ लाम्फासो चाहि इसिका मान्थुघाखे।

⁹ का नेलाइहेङ दोअ्खा, जाइ कासिबिरि बाहेकसो ताइ बे हेङ लाअ्तेङ आरोङ भेनेङ दोफा बिहु पाखे, वा कासिबिरि पाखे। कालाउ जाइ दोङ लाअ्पिका बेबालहेङ बिहु पाखे, वा बुङ कासिबिरि पावा।”

¹⁰ चात्यागेलाइ येसुहेङ दोअ्हि, “के कालाउ बे को सामान्दा इसिका दोङ जेङतेङ हिनुते, बिहु मापासिङ हिलि रेम्का जेनावा।”

¹¹ येसु इम्बालाइहेङ जोबाफ पिहि, “गोताङ द्‍याङगेलाइ या काथा ग्रहन पालि मादोखे, इम्बालाइ खिनिङ द्वावा जाइहेङ परमेस्वर एन्साङ पातेङ हिलि स्यामाता पिका हि।

¹² हाइपालिपानु आधिमिको जोलोम दोङ नपुङसक हिखे। आधिमिहेङ चाहि द्‍याङगेलाइ दोङ बानाइका नपुङसक हिखे। कालाउ आधिमि चाहि ता-ताइमि दोङ परमेस्वरको सासनको भाअ्सिङ बिहु मापासिङ हिखे। जाइ इदोइ बुझिलि दोअ्खे वा इदोइ काथा मानियाको।”

येसु म्हुइका जामालाइहेङ आसिरबाद पिका

¹³ येसु ताइको खुर ताअ्तेङ प्रार्थाना पातेङ आसिस प्याको दोअ्तेङ द्‍याङगेलाइ ताइको जामाललाइहेङ वाकोता चुमाहि। या तिङतेङ चात्यागेलाइ उङको द्‍याङगेलाइहेङ नाइहि।

¹⁴ कालाउ येसु दोअ्हि, “उङको जामाललाइहेङ काङको दोफा लोलि पिसु। इम्बालाइहेङ मागोराइसु हाइपालिपानु परमेस्वरको सासन इसकालाइको दोङ हि।”

¹⁵ कालाउ जामाललाइको ह्रुता खुर ताअ्तेङ वा इन्तासो हानिहि।

धनि वाजान

¹⁶ एनि एमि द्‍याङ येसुकोता लोतेङ दोअ्हि, हे आसल गुरु ज्यु, का परमेस्वरसो आनान्त जिबन निङलिको भाअ्सिङ हाइ रेम्का काम पालि गोइखे?

¹⁷ येसु वासेहेङ दोअ्हि, “आसल हाइ इङको को बिसोइता नाअ् कासेहेङ हाइ पालि हिअ्खेना? आसलते एमि खिनिङ हि। जेसापा नाअ् जिबनता दुल्लि खाङना पानु आग्यागेलाइ केम्लि गोइखे।”

¹⁸ वा येसुहेङ दोअ्हि, हिदोइ आग्या चाहि कुनु? येसु वासेहेङ दोअ्हि नाअ् मारा मापा, नाअ् कासिबिरि मापा, नाअ् माखु, नाअ् धाताइका साक्सि मापि।

¹⁹ “ताइको आबा आमाइको आदार पाअ्‌, कालाउ ताइको देरागेलाइहेङ ताइमिङ भाइपाङ प्रेम पाअ्‌।”

²⁰ उङको धाना वाजान येसुहेङ दोअ्हि, “इदोइ गोताङते का केम्का हिघा। एला का दोफा हाइ बाकि हि रो? आरोङ एला का हाइ पालि गोयाङ?”

²¹ येसु वासेहेङ दोअ्हि, “नाअ् सिद्द हिलि खाङनु, हानितेङ नाङको दोफा हिका गोताङ आनेमाने पिइतेङ ताका गरिबगेलाइहेङ पि, कालाउ स्वर्गको धन निनाना कालाउ लोतेङ काङको चात्या जेङ।”

²² जेलाउ उङको धाना वाजान निरास जेङहि कालाउ ओसारापाङ बार्का पिर परितेङ हानिहि हाइपालिपानु वाको दोफा इस्तु धन-सम्पति हिघाहि।

²³ कालाउ येसु ताइको चात्यागेलाइहेङ दोअ्हि, “जातिङ भारि, का नेलाइहेङ दोअ्खा, परमेस्वरको सासनता धनि द्‍याङगेलाइ दुल्लि हेन्जा मुसकिल जेनावा।”

²⁴ आरोङ का नेलाइहेङ दोअ्खा, एनोङ उटहेङ बिन्दुको कानासो दुल्लि मुसकिल माजेङखे भरु, “एमि धनि द्‍याङहेङ परमेस्वरको सासनता दुल्लि हेन्जा मुसकिल हि!”

²⁵ इङको काथा हिङतेङ चात्यागेलाइ मेनाङ आवाइतुहि कालाउ हिअ्हि, “हासु चाहि मुक्ति निङलि द्वावा?”

²⁶ येसु इम्बालाइहेङ खाङतेङ दोअ्हि, इदोइ द्‍याङगेलाइको भाअ्सिङ आसम्भब काम हि, कालाउ परमेस्वरको भाअ्सिङ आसम्भब मान्थु, हाइपालिपानु परमेस्वरको भाअ्सिङ गोताङ काम सम्भब हि।

²⁷ कालाउ पतरुस वासेहेङ दोअ्हि, “हिङपि केलाइते गोताङ आमेनेगेलाइ लाअ्तेङ नाङको दोफा लोका हिनाहि। केलाइ चाहि हाइ निनाङ कुनु?”

²⁸ येसु ओबालाइहेङ दोअ्हि, जातिङ भारि का नेलाइहेङ दोअ्खा, नेलाइ हासु बुङ काङको दोफा लोका हिसुना पानु, नेलाइ नावा सिरजाइका हिसुन्हा। जेलाउ का द्‍याङको चान ताइको महिमाको सिङहासनता योमाङका, कालाउ नेलाइ बुङ तेन्हे कुल ह्रुता हिस्वाना, कालाउ इस्राएल सारभिको तेन्हे कुलहुता न्याय पास्वाना।

²⁹ “हिदोइ बुङ द्‍याङ जाइ काङको मिङको भाअ्सिङ साअ्, दादा-ओने कालाउ बाइ-बेजान ओने, कालाउ आबा-आमाइ कालाउ चान-चामिन्दि कालाउ मिलिङ लाअ्का हि, वा साइ गुना निनावा, कालाउ आनान्त जिबनको खाबारा निनावा।

³⁰ हेन्जा जसो जाइ लाम्फा हि न्हुसो जेनावा, कालाउ न्हुसो जेङकागेलाइ चाहि लाङति जेनावा।”