मत्‍ति 18 - Dhimal NT

परमेस्वरको सासनता झाराङ खान्तेङ बार्का हासु?

¹ एन्सालाउ दोङ चात्यागेलाइ येसु दोफा लोतेङ हिअ्हि, परमेस्वरको सासनता झाराङ खान्तेङ बार्का माहान हासु वाला?

² येसु एमि म्हुइका जामालहेङ ताइ दोफा काइतेङ कालाउ चात्यागेलाइको आगाता जाअ्पाहि।

³ कालाउ दोअ्हि, जातिङ भारि का नेलाइहेङ दोअ्खा, जेसापा नेलाइ आतुइका जामाललाइ भाइपा मन परिबतन माजेङसुन्हा पानु नेलाइ हेलाउ बुङ परमेस्वरको सासन लिता दुल्लि मादोअ्स्वाना।

⁴ ताइमिहेङ इदोइ आतुइका जामाललाइ भाइपाङ मोनोइ बानाइलि दोअ्खे वा परमेस्वरको सासनता माहान जेनावा।

⁵ कासेहेङ खाङधुरि पाका इसिका जामाललाइहेङ हासुलाउ बुङ ग्रहन पानु, वा कासेहेङ बुङ ग्रहन पाका ह्यावा।

⁶ कालाउ जेसापा काङको ह्रुता खाङधुरि पाका इदोइ म्हुइकालाइ मध्येसो एमिहेङ पाप पालि लागाइखे पानु, भरु वाको निर्घाता बार्का जान्ता तोइतेङ वासेहेङ वाङखाराका समुन्द्रता दुबिपालि रेम्का जेनावा।

⁷ सुमिङको भाअ्सिङ हेथे थिलि गोइका हि! हाइपालिपानु सुमिङताते द्‍याङगेलाइहेङ पापता फासिपाका काथागेलाइ हि। इसिका काथागेलाइ आइपरिखे दोङ कालाउ थिलि गोइका हि उङको द्‍याङहेङ जाइ आरुहेङ पापता फासिपाखे।

⁸ जेसापा नाङको खुर माकुनु खोकोइ नासेहेङ पाप पालि लागाइखे पानु इङको पोतेङ थाइगिल्पि। न्हेनोङ दोङ खुर कालाउ खोकोइ सुधाङ आनान्तको मेता थाल्लानु खान्तेङ भरु लुला माकुनु लेङग्रा जेङतेङ जिबनता दुल्लि नाङको भाअ्सिङ रेम्का जेनाङ।

⁹ जेसापा नेलाइ पाप पालिको भाअ्सिङ ताइको मिसियाँहेङ पाप पालि लागाइलि सोचितेङ हिका हिसुना पानु इङकोहेङ ओल्ला पातेङ थाइगिल्पि। न्हेनोङ मिसियाँ नरकता हानिका खाङतेङ भरु कान्हाँ जेङतेङ परमेस्वरको सासनता दुल्लि हेन्जाङ रेम्काङ जेनाङ।

राम्का भेडा मेसाको निङपिका

¹⁰ “खाङसु, कासेहेङ खाङधुरि पाका इदोइ आतुइकालाइ मध्येसो एमिहेङ बुङ नेलाइ हेला मापासु। हाइपालिपानु का नेलाइहेङ दोअ्खा, इम्बालाइहेङ सामाराइका स्वर्गदुतगेलाइ स्वर्गता हिका काङको आबा परमेस्वर दोफा जेलाउ बुङ हितेङ ह्यावा।”

¹¹ हाइपालिपानु का द्‍याङको चान राम्कालाइहेङ भोलि कालाउ बान्चिपालि लोका हिघा।

¹² “नेलाइ हाइ बिचार पासुखेना?” एसाइ भेडा हिका द्‍याङको एनोङ भेडा राम्हे पानु वा हाइ पावा? वा दोङ आरु उनान्साइ भेडाहेङ इन्ताङ तिकारता लाअ्तेङ, राम्काहेङ भोअ्लि मान्हावा रो?

¹³ जेलाउ वा राम्का भेडा निङहे पानु, जातिङ भारि का नेलाइहेङ दोअ्खा, इङको उनान्साइहेङ खान्तेङ वा इङको एनोङको भाअ्सिङ हेन्जा लेङचावा।

¹⁴ एसाङ दोङ स्वर्गता हिका नेलाइको आबा परमेस्वरको इसिका इच्छा हि, कि इदोइ खाङधुरि पाका आतुइकालाइसो एमि बुङ मारामाको।

आपाराध पाका ओने

¹⁵ जेलाउ नाङको खाङधुरि सानाइति नाङको बिरोधता आपाराध पाकानु वासेहेङ एकलाङ हानितेङ सम्झाइ। कालाउ वा नाङको काथा हिङहि कालाउ पाप पालि लाअ्हि पानु, नाअ् नाङको खान्धुराइ सानाइतिहेङ घुरिपातेङ चुमाना।

¹⁶ जेसापा वा नाङको काथा माहिङपिनु, ताइ दोफा आरु एमि-न्हेमिहेङ चुम्तेङ सम्झाइ, हाइपालिपानु मोसाको व्यवस्था आन्सार गोताङ झागाडागेलाइ मिलि पालि न्हेमि माकुनु सुमि साक्सि चुम्पुलि गोइखे।

¹⁷ जेसापा वा खान्धुराइगेलाइको काथा बुङ हिङलि माकिनु, मन्डलिता हानितेङ गोताङ काथा खोलिपि कालाउ इम्बालाइको काथा बुङ माहिङपिनु वासेहेङ पोत ल्होपाका कालाउ गैर-यहुदि भाइपाङ ब्याभार पासु।

¹⁸ जातिङ भारि का नेलाइहेङ दोअ्खा, जेलाउ नेलाइ इदोइ प्रिथिबिता न्यायको भाअ्सिङ धेउस्वाना कालाउ इङको न्याय स्वर्गता परमेस्वरको न्याय जेनावा। जेलाउ नाअ् इङको प्रिथिबिता हासुहेङ बुङ माफ प्याना कालाउ इङको माफ परमेस्वरको माफ जेनावा।

¹⁹ आरोङ का नेलाइहेङ दोअ्खा, इदोइ प्रिथिबिता हिदोइ बुङ काथाको बारेता नेलाइसो न्हेमि मिलितेङ सहमति जेङतेङ ह्रेस्वाना पानु इङको स्वर्गको काङको आबा परमेस्वरसो नेलाइको भाअ्सिङ प्यावा।

²⁰ हाइपालिपानु न्हेमि वा सुमि का ह्रुता खाङधुरि पातेङ जोम्सुन्हा पानु, का नेलाइको माझाता ह्याङका।

माफ मापिका चाकारियाको निङपिका

²¹ कालाउ पतरुस येसुकोता लोतेङ हिअ्हि, “हे प्रभु, काङको खान्धुराइ सानाइति हेखेप काङको बिरोधता आपाराध पाहे पानु का वासेहेङ हे पोन्ति स्यामा पिलि? हाइ का न्हिखे थेकापा वासेहेङ स्यामा पिलि?”

²² येसु पतरुसहेङ उत्तारा पिहि, न्हिखे माको, भरु सतरि गुना न्हि खेप थेकापा नाअ् वासेहेङ स्यामा पिलि गोइखे।

²³ हाइपालिपानु परमेस्वरको सासन एमि राजा भाइका हि, जाइ ताइको चाकारियागेलाइसो हिसाब-किताप ह्रुलि खाङखे।

²⁴ जेलाउ राजा ताइको हिसाब किताप ह्रुलि खाङलाउ एमि द्‍याङहेङ वाको आगाता चुमाहि जाइ चाहि, ते हाजार सोनाको थुरिको बोराको रिनि हिघाहि।

²⁵ कालाउ उङको द्‍याङ दोफा रिन तिरिलि पुगिका ताका मान्थुघाहि। ओदोङ भाअ्सिङ उङको राजा वासेहेङ भए भरको जेथा, बे, चान-चामिन्दि कालाउ ताइमिहेङ सुधाङ पिइतेङ रिन चुक्ता पाअ्‌, दोअ्का हुकुम पिहि।

²⁶ कालाउ उङको चाकारिया राजाको खोकोइता तुघुरतेङ सेउपाहि, काङको भाअ्सिङ आतुइसा सोमोइ ह्रुम्पि। कालाउ कासेहेङ लागेका जेथे रिन हि का तिरियाङका।

²⁷ इङको काथा हिङतेङ राजाहेङ चाकारिया ह्रुता दाया जेङहि। कालाउ वा वासेहेङ रिन तिरिलि मागोइयाङ दोअ्हि कालाउ वासेहेङ रिन स्यामा जेङतेङ हानिलि पिहि।

²⁸ कालाउ उङको चाकारिया हानिहि कालाउ वा ताइमि दोफा काम पाका भेनेङ चाकारिया सानाइतिहेङ दुसुहि। उङको सानाइति वाको दोफा एसाइ चान्दिको थुरि रिन ह्रुका हिघाहि। वा झाअ्मिरितेङ वाको निर्घाता एरेतेङ दोअ्हि, एला, चाका रिन एलाङ दोङ तिरे!

²⁹ कालाउ वाको सानाइति चाकारिया तुघुरतेङ वासेहेङ सेउपाहि, आले दिना थेकापा ह्रुम्पि का नासेहेङ गोताङ रिनगेलाइ तिरियाङका।

³⁰ कालाउ वाकोङ चाकारिया सानाइति बुङ माकिहि, कालाउ हानितेङ रिन मातिरिपा धाउ वासेहेङ झ्यालखानाता ह्वाहि।

³¹ भेनेङ चाकारियागेलाइ इङको घाटाना तिङहि। इम्बालाइ हेन्जा दुखि जेङहि, कालाउ इम्बालाइ ताइको राजाहेङ इङको गोताङ घाटानाको बिसोइता हिम्पाहि।

³² जेलाउ राजा चाकारियाहेङ काइहि कालाउ दोअ्हि, ओइ ना ते दुस्ट चाकारिया हिना! नाङको बिन्ति हिङतेङ का नाङको गोताङ रिन स्यामा पापिका हिघाखा।

³³ का नासेहेङ दाया पाघा कालाउ नाङको रिन माफ पापिका हिघाखा। नाअ् बुङ चाकारिया सानाइतिको रिन माफ पापिलि मागोइधाना रो?

³⁴ कालाउ राजा मारफाङ चेर ताम्पाहि कालाउ दन्ड पिलिको भाअ्सिङ उङको चाकारियाहेङ झ्यालखानाता ह्वाहि। गोताङ रिन मातिरिपा भरि वा झ्यालखानाता हिलि गोइहि।

³⁵ कालाउ न्हुसो येसु चात्यागेलाइहेङ दोअ्हि, “नेलाइ ताइको ह्रदयसो खान्धुराइ सानाइतिगेलाइहेङ स्यामा मापिस्वाना पानु स्वर्गिय आबा परमेस्वर बुङ नेलाइहेङ एन्साङ पाङ।”