मत्‍ति 16 - Dhimal NT

परमेस्वरको चिन्हा ह्रेका

¹ फारिसिगेलाइ कालाउ सदुकिगेलाइ लोहि कालाउ येसुहेङ जाचिलिको भाअ्सिङ दोअ्हि, केलाइको इच्छा हि, कि नाअ् केलाइहेङ एनोङ स्वर्गसो चिन्हा तिङपा पि।

² येसु दोअ्हि, “जेलाउ नेलाइ बेला दुबिलि तोम्का तिङस्वाना, कालाउ दोअ्स्वाना, आकास इ:का हि, दिना रेम्काङ जेनाङ।”

³ कालाउ ह्रिमा नेलाइ दोअ्स्वाना नानि आकास इ:का हि, नानि दुर भेरमा ल्वाङ। इदोइ दिनाको सङकेतगेलाइ। जेलाउ नेलाइ आकास खाङतेङ इङको सङकेत बुझिसुखेना, एलाङ हाइ जेङदोङखे इङको नेलाइ बुझिलि गोइखे। इदोइ सङकेत या, कालाउ इदोइ सोमोइको सङकेतगेलाइको माने नेलाइ मागिसुखेना।

⁴ दुस्ट कालाउ कासिबिरि पुस्ता चिन्हा भोखे, कालाउ परमेस्वरको बक्ता योनाको चिन्हा बाहेक आरोङ चिन्हा वासेहेङ मापियाङ। कालाउ वा ओबालाइहेङ लाअ्तेङ हानिहि।

फारिसि कालाउ सादुकिगेलाइको साउरि

⁵ येसु कालाउ वाको चात्यागेलाइ गालिल समुन्द्रको ओदोइ पार हानेहि। चात्यागेलाइ ताइ दोफा तोले चुम्पुलि निल्हि।

⁶ येसु इम्बालाइहेङ इसिका दोअ्तेङ चेताउनि पिहि, ताइमिहेङ बान्चिपासु। फारिसिगेलाइ कालाउ सदुकिगेलाइको साउरिको चालसो ताइमिहेङ जोगाइतेङ हिसु।

⁷ चात्यागेलाइता-ताइमिता काथा पालि तेङहि। केलाइ ताइमि दोफा तोले चुमाका मान्थुनाङ येसु इसिका दोअ्का वाला।

⁸ चात्यागेलाइको एसापा काथा पाका येसु गितेङ कालाउ वा ओबालाइहेङ दोअ्हि, “हाइ पालि तोलेको बिसोइता नेलाइ काथा पातेङ हिसुखेना? नेलाइ दोफा आतुइसा खिनिङ खाङधुरि हि।

⁹ नेलाइ हाइ पालि एलाउ बुङ मागिसुखेना? नालोङ तोले ना हाजार द्‍याङगेलाइहेङ चापाघा न्हुसो नेलाइ हेथे दाल्हो जोम्पाका हिघासुना नेलाइहेङ फोम मान्थु?

¹⁰ कालाउ एसापा दोङ द्‍या हाजार द्‍याङगेलाइहेङ न्हि लोङ तोले चापालाउ नेलाइ दाइका पोङनाका तोले हेथे दाल्हो नेलाइ जोम्पासुना, नेलाइहेङ थाहा मान्थु?

¹¹ का नेलाइहेङ तोलेको बिसोइता दोअ्का माको दोअ्तेङ नेलाइ हाइ पालि माबुझिसुखेना? का नेलाइहेङ फारिसिगेलाइ कालाउ सदुकिगेलाइको साउरिसो थिसु दोअ्खा।

¹² कालाउ ओबालाइ बुझिहि, वा तोलेको साउरिसो माको, फारिसिगेलाइ कालाउ सदुकिगेलाइको धिरपाकासो नेलाइ थिसु।

पतरुस किका

¹³ जेलाउ येसु कैसरिया-फिलिप्पिको सहरको भेरपाको देराता हानिहि। वा ताइको चात्यागेलाइहेङ हिअ्हि, का द्‍याङको चानहेङ द्‍याङगेलाइ कासेहेङ हासु हाइ दोअ्खे?”

¹⁴ चात्यागेलाइ जोबाफ पिहि, “आधिमि नासेहेङ बप्तिस्ता पिका युहान्‍ना दोअ्खे, आधिमि नासेहेङ एलिया दोअ्खे। कालाउ आधिमि नासेहेङ यर्मिया कालाउ हिदोइ बुङ परमेस्वरको बक्तागेलाइसो एमि दोअ्खे।”

¹⁵ कालाउ येसु ताइको चात्यागेलाइहेङ आरोङ दोअ्हि, “कालाउ नेलाइ चाहि का हासु दोअ्तेङ खाङधुरि पासुखेना कुनु?”

¹⁶ सिमोन पतरुस जोबाफ पिहि, “नाअ् चाहि बान्चिका परमेस्वरको चान ख्रिस्ट हिना परमेस्वर पाहासो दिङगिल्का।”

¹⁷ येसु दोअ्हि नाअ् धन्यको हिना, ओइ योनाको चान सिमोन। हिदोइ बुङ द्‍याङ नासेहेङ इदोइ धिरपाका माको। स्वर्गता हिका काङको परमेस्वर आबा नासेहेङ तिङपा पिका हि।

¹⁸ कालाउ का नासेहेङ दोअ्खा, नाअ् पतरुस हिना। कालाउ का काङको मन्डलि या उन्ठुइ ह्रुता बानाइ याङका, कालाउ नरकको गोताङ सरबुङगेलाइहोइ बुङ यासेहेङ जितिलि मादावा।

¹⁹ का परमेस्वरको सासनको ताल्चा नेलाइहेङ प्याङका जेलाउ नेलाइ इदोइ प्रिथिबिता न्यायको भाअ्सिङ जिङस्वाना कालाउ इङको न्याय स्वर्गता परमेस्वरको न्याय जेनावा। जेलाउ नाअ् इङको प्रिथिबिता हासुहेङ बुङ माफ प्याना कालाउ इङको माफ परमेस्वरको माफ जेनावा।

²⁰ कालाउ एन्सालाउ येसु ताइ चात्यागेलाइहेङ थाङका आग्या पिहि हासुहेङ बुङ मादोअ्सु इता बान्चिपाका ख्रिस्ट हि दोअ्तेङ।

येसु ताइको सिकाको बारेता लाङ आगमबानि

²¹ एन्सालाउ सोङ एसापा येसु ताइको चात्यागेलाइहेङ ताइमि भोगिलि गोइका गोताङ काथा प्रस्ट पापिहि कि, का यरुसेलेमता हानितेङ यहुदिगेलाइको आगुवा, मुलि पुजारिगेलाइ कालाउ व्यवस्था धिरपाका द्‍याङगेलाइसो हेन्जाङ कस्ट भोगिलि गोयाङका, सिलि गोयाङका कालाउ सुम्निता सिकासो सिन्हुतेङ ल्होकाङका।

²² पतरुस येसुहेङ एक्लाङ एपाहा चुम्पुतेङ सम्झाइहि, परमेस्वर नासेहेङ इसिका कामसो बान्चि पाको, प्रभु नाअ् ह्रुता इसिका काथागेलाइ हेलाउ बुङ माल्वाङ।

²³ कालाउ येसु ताइको ह्राइ घुरिपाहि कालाउ चात्याभारि खाङतेङ पतरुसहेङ दोअ्हि, “ओइ साइतान नाअ् काङकोसो दुरे हाने! हाइपालिपानु नाअ् काङको भाअ्सिङ बाधा हिना, हाइपालिपानु नाअ् परमेस्वरको काथाता माको कालाउ द्‍याङगेलाइको काथाता मन पिखेना।”

²⁴ कालाउ न्हुसो येसु ताइको चात्यागेलाइहेङ दोअ्हि कालाउ “एसापा नेलाइ काङको चात्या जेङलि खाङसुखेना पानु ताइको इच्छा लाअ्लि गोइखे। वा क्रुस फाअ्लि इस्सुक हिलि गोइखे कालाउ खिनिङ का दोफा लोसु कालाउ काङको चात्या जेङसु।”

²⁵ हाइपालिपानु या सुमिङता जाइ दोङ ताइको प्रानहेङ बान्चिपालि खाङखे, वा इङको मोअ्पावा, कालाउ इम्बालाइ जाइ दोङ ताइको प्रानहेङ काङको भाअ्सिङ कालाउ सुसमाचारको भाअ्सिङ जातिङको जिबन मोअ्पाखे कालाउ वा निनावा।

²⁶ जेसापा द्‍याङगेलाइ सुमिङहेङ दोङ ताइको बानाइलाउ बुङ ताइको आनान्त प्रान गुमाइ पानु वासेहेङ हाइ फाइदा जेनावा रो? कालाउ एमि द्‍याङ परमेस्वरहेङ हाइ पिलि द्वावा जाइ दोङ वाको आनान्त प्रान चोल्पिखे? हाइ बुङ माको!

²⁷ ताइ आबाको महिमा दोफाङ का द्‍याङको चान ताइ स्वर्गदुतगेलाइ दोफा ल्वाङ। एन्सालाउ द्‍याङको चान गोताङ द्‍याङगेलाइहेङ ताइको काम आन्सारको इनामगेलाइ प्यावा।

²⁸ जातिङ भारि का नेलाइहेङ दोअ्खा, “इता जाअ्तेङ हिकालाइ मध्ये हेथेते का द्‍याङको चान ताइको सासनता लोतेङ हिका मातिङपा भरि मासियाङ।”