मत्‍ति 15 - Dhimal NT

सुद्द कालाउ आसुद्द

¹ कालाउ न्हुसो आधेमि फारिसिगेलाइ कालाउ व्यवस्था धिरपाका द्‍याङगेलाइ येसुकोता हानिहि। ओबालाइ यरुसेलेम सहरसो लोका हिघाहि कालाउ दोअ्हि,

² नाङको चात्यागेलाइ हाइ पालि केलाइको पुर्खासोङ लोका मुन्धुम माकेम्खे? चालि खान्तेङ लाम्फा इम्बालाइ खुर माझाखे।

³ येसु ओबालाइहेङ जोबाफ पिहि, नेलाइ बुङ हाइ पालि ताइको मुन्धुमको भाअ्सिङ परमेस्वरको आग्या बिगिरपासुखेना?

⁴ जेसाङ परमेस्वरको आग्या हि, ताइको आमाइ-आबाको आदार पाअ्सु। कालाउ जाइ ताइको आबा-आमाइगेलाइको आपमान पाखे वासेहेङ सेअ्लि गोइखे

⁵ कालाउ नेलाइ दोअ्सुखेना, हासु बुङ ताइको आमाइ-आबाहेङ पिलि गोइका इङको केलाइ परमेस्वरहेङ चढाइका हिनाहि दोअ्नु, वा दोङ ताइको आमाइ-आबाहेङ आदार पालि मागोइयाङ दोअ्का धिरपाखे।

⁶ एसा दोङ नेलाइ व्यवस्थाको भाअ्सिङ परमेस्वरको आदेसहेङ एपाहा खेङसुखेना।

⁷ नेलाइ कपटिगेलाइहेङ यासाइया परमेस्वरको बक्ता नेलाइको बारेता ठिक दोअ्हि। यासाइया दोअ्का हिघाहि,

⁸ उङको द्‍याङगेलाइहेङ यासाइया परमेस्वरको बक्ता दोअ्का हि, काङको बारेता सभ्य धुइसुखेना, कालाउ बास्ताबिक का दोफा प्रेम मापा सुखेना।

⁹ कासेहेङ तुघुरतेङ आराधाना पाका ओबालाइको ब्यर्थ हि। ओबालाइ ताइमिङ बानाइका नियमगेलाइ खिनिङ केम्लि धिरपाखे।

¹⁰ येसु झाराङ द्‍याङगेलाइहेङ ताइ दोफा काइहि कालाउ वा दोअ्हि, का नेलाइहेङ हाइ दोअ्लि गोइका इङको दोअ्ताङका, “हिङसु, कालाउ गिसु।

¹¹ जेदोङ झोको काथा नुइलिता दुल्खे, इङको द्‍याङहेङ आसुद्द मापाखे। कालाउ बुङ जेदोङ नुइसो बाहार ओल्लेखे, इङकोहोइ दोङ द्‍याङहेङ आसुद्द बानाइखे।

¹² जेलाउ चात्यागेलाइ येसुकोता लोहि कालाउ वासेहेङ दोअ्हि, हाइ नासेहेङ थाहा जेङहि? नाङको दोअ्का काथासो फारिसिगेलाइ चेर ताम्पाहि।

¹³ येसु दोअ्हि, स्वर्गता हिका काङको आबा माथिङका हिदोइ बुङ सिङ उन्हाताङ।

¹⁴ इम्बालाइहेङ लाअ्पिसु, इम्बालाइ द्‍याङगेलाइहेङ ठोङनुते थोङखे, कालाउ बुङ इम्बालाइको थोङका चाहि एमि कान्हाँ भेनेङ कान्हाँहेङ थोङका भाइका खिनिङ जेङखे। कालाउ जेलाउ एमि कान्हाँ भेनेङ कान्हाँहेङ थोङखे कालाउ न्हेमि दोङ खाराता वालातावा।”

¹⁵ पतरुस दोअ्हि, आन्चा नाअ् द्‍याङगेलाइहेङ निङपिका काथाको ब्याख्या केलाइहेङ पाअ्पि।

¹⁶ येसु हिअ्हि, “हाइ एला बुङ नेलाइ बोगेलाइ भाइपा आबुझदोङ जेङका हिसुना?

¹⁷ नेलाइ या मागिसुखेना, कि नुइसो चाअ्का आमेने हामुता थुकाखे, कालाउ न्हुसो जिउसो जेदोङ आमेने बाहार हानिखे। इङको काम मालागिका जेङखे।”

¹⁸ नुइ पाहासो ओल्लेका जेदोङ बुङ काथा हृदयता हिखे, कालाउ इङको दोङ द्‍याङहेङ आसुद्द बानाइखे। एसापा येसुको दोअ्का आर्थ चाहि इदोइ हिघाहि कि गोताङ चाअ्का आमेने परमेस्वरको आगाता सुइकार हि।

¹⁹ हाइपालिपानु द्‍याङको हृदयसो मारेम्का बिचार, मारा पाका, उलिगिल्का, कासिबिरि, खुगिल्का, धाताइका साक्सि, कालाउ बोमिहेङ मन्दा माताका काथागेलाइ बाहार ओल्लिखे।

²⁰ इदोङ काथागेलाइहोइ द्‍याङहेङ आसुद्द बानाइखे। भरु खुर माझासिङ चालाउ बुङ द्‍याङहेङ आसुद्द माबानाइखे।

कनानि बेबालको खाङधुरि

²¹ येसु इङको थामे लाअ्तेङ कालाउ टुरोस कालाउ सिदोन सहरको इलाका भारि हानिहि।

²² इङको इलाकाको एमि कनानि बेबाल येसुकोता लोहि। कालाउ वा खारकाताङ दोअ्हि, “परमप्रभु, राजा दाउदको चान, का ह्रुता दाया पाअ्‌। काङको चामिन्दिहेङ भुत-आत्मा धेल्का हि, काङको चामिन्दिहेङ ओसारापाङ भुत-आत्मा साताइका हि।”

²³ कालाउ इङको बेबालहेङ येसु जोबाफ मापिहि। कालाउ येसुको चात्यागेलाइ वाकोता लोतेङ सेउपालि तेङहि, नेउ या बेबालहेङ दिङगिल्पि, या केलाइको लेसारा पिताइतेङ ह्रिकाइतेङ हि।

²⁴ येसु दोअ्हि, इस्राएल सारभिता राम्का भेडा मेसाको भाअ्सिङ खिनिङ हानिलि दोअ्तेङ परमेस्वर कासेहेङ दिङगिल्हि।

²⁵ येसुकोता उङको बेबाल आरोङ लोहि। कालाउ येसुको आगाता पोम्भेलेतेङ वा दोअ्हि, प्रभु, कासेहेङ साघाइपि।

²⁶ येसु जोबाफ पिहि हिदोइ बुङ, माकुनुते इसिका जेनाङ चान-चामिन्दिकोसो तोले घिङतेङ खियाहेङ पिलि।

²⁷ उङको बेबाल दोअ्हि, “एइ प्रभु, इङकोते थिकोङ हि! कालाउ खियागेलाइ बुङ ताइको गिह्रिको चाङचाउकिसो लेता होपाका राइनाकागेलाइ हुल्का चाखे।”

²⁸ कालाउ इन्तासो येसु दोअ्हि, ओइ बेबाल नाङकोता बार्का खाङधुरि हि। नाअ् हाइ भोखेना का इङकोङ पापियाङका। कालाउ वाको चामिन्दि एन्सालाउ दोङ एल्हि।

येसु द्या हाजारहेङ चापाहि

²⁹ कालाउ येसु न्हुसो इङको, थामे लाअ्तेङ गालिल समुन्द्रको काम्भेता हानेहि। कालाउ येसु तिकारता ताङतेङ इन्ताङ योम्हि।

³⁰ बारका द्‍याङगेलाइको जेर येसुकोता लोहि, इम्बालाइ लेङग्रा, कान्हाँ, लाता, बैइरा कालाउ आरु हेन्जा द्‍याङगेलाइहेङ चुमाहि कालाउ वाको आगाता ताअ्पिहि कालाउ येसु इम्बालाइहेङ एल्पा पिहि।

³¹ लाटागेलाइ नुइ धुइलि दोअ्का जेङहि मासाधेकालाइ बल्याहि, तेलि मादोकालाइ आरोङ तेलि दोका जेङहि। कालाउ कान्हाँगेलाइ आरोङ तिङलि दोका जेङहि इसिका भाङ-भाङका तिङतेङ इङको द्‍याङगेलाइ भारभुसाइहि। लाम्फा इसिका हेलाउ बुङ तिङका माहिघाखा दोअ्तेङ इस्राएल सारभिको परमेस्वरहेङ धन्यबाद पिहि।

³² येसु ताइको चात्यागेलाइहेङ काइतेङ दोअ्हि, “इदोइ द्‍याङगेलाइहेङ तिङतेङ का मेनाङ दायाघा। हाइपालिपानु एबालाइ का दोफा हिका सुम्नि जेङहोइ। एला इम्बालाइको चाका-आम्का दोका हि। का ओबालाइहेङ म्हितुपाङ सिता दिङगिल्घा पानुते ओबालाइ दामाता झाका लोनाङ।”

³³ चात्यागेलाइ येसुहेङ हिअ्हि, “या थामे चाका-मान्दा हि, झाराङको भाअ्सिङ थेम्का इदोइ झोको तोले हिसोसो चुमातेङ चापालि ला?

³⁴ येसु हिअ्हि, नेलाइ दोफा हेनोङ तोले हि?” “चात्यागेलाइ जोबाफ पिहि, केलाइ दोफा न्हि लोङ तोले कालाउ म्हुम्हुइका हाया हि।”

³⁵ येसु झाराङहेङ जाबाराता योम्लि दोअ्हि।

³⁶ येसु न्हि लोङ तोले कालाउ हायागेलाइ खुरता चुम्तेङ इङको को भाअ्सिङ परमेस्वरहेङ धन्यबाद पिहि। कालाउ वा इङको तोले टुक्रा-टुक्रा पोङतेङ चात्यागेलाइहेङ पिहि। ओबालाइ द्‍याङगेलाइहेङ बाखाराइ पिहि।

³⁷ झाराङ द्‍याङगेलाइ घाइपाङ चाहि, कालाउ घाइहि। कालाउ चात्यागेलाइ चाअ्लि मादोका दाइका टुक्रागेलाइ जोम्पाहि इङको न्हि दाल्हो पोङघाहि।

³⁸ इन्ता आतुइसा दोअ्लाउ बुङ द्‍या हाजार द्‍याङगेलाइ हिघाहि। इङकोता बेबाल कालाउ जामाललाइ बुङ हिघाहि।

³⁹ जेलाउ इम्बालाइ चाअ्हि, येसु इम्बालाइहेङ ता-ताइमिको साअ् भारि दिङगिल्हि। कालाउ वा एनोङ नाउता धोल्तेङ मगदानको इलाका भारि हानेहि।