मत्‍ति 11 - Dhimal NT

बप्तिस्ता पिका युहान्नाको प्रस्न

¹ जेलाउ येसु ताइको तेन्हे चात्यागेलाइहेङ आदेस पिहि, येसु इन्तासो गालिल जिल्लाको देरागेलाइता द्‍याङगेलाइहेङ सिक्स्या पिलि कालाउ सुसमाचार पालि हानिहि।

² बप्तिस्ता पिका युहान्‍ना झ्यालखानाता हिघाहि, ख्रिस्टको पाका कामगेलाइको बारेमा गोताङ काथागेलाइ वा हिङहि। कालाउ युहान्‍ना ताइको चात्यागेलाइहेङ येसुकोता दिङगिल्हि।

³ युहान्नाको चात्यागेलाइ येसुहेङ हिअ्हि, हाइ केलाइ आस पाका ख्रिस्ट नादोङ हिना? जाइहेङ परमेस्वर दोङ दिङगिल्का बाचा पाका हिघाखे। कि केलाइ आरोङ भेनेङको दामा खाङलि गोइका हि?

⁴ येसु जोबाफ पिहि, “युहान्नाकोता हानेसु, जेदोङ हिङका कालाउ तिङका काथागेलाइ दोअ्सु।

⁵ कान्हाँगेलाइ तिङदोङखे, लेङग्रागेलाइ तेदोङखे, रोग्या खोअ्कालाइ एल्दोङखे, बैरागेलाइ हिङदोङखे, कालाउ सिकालाइ आरोङ सिन्हुतेङ ल्होदोङखे, कालाउ गरिब द्‍याङगेलाइहेङ प्राचार पादोङखे।

⁶ जेसापा हिदोइ बुङ द्‍याङ कासेहेङ साङखा मापाखे उङको धन्यको हि।”

येसुसो युहान्नाको साम्मान

⁷ युहान्नाको चात्यागेलाइ ताइको दामाता हानिकाताङ पालाउ, येसु द्‍याङगेलाइहेङ युहान्नाको बारेता काथा दोअ्लि तेङहि, नेलाइ चाका-मान्दा थामेता हाइ खाङलि हानिसुना? हाइ भेरमाहोइ हेङगालाइन्हाका निगालोहेङ?

⁸ कालाउ माकुनु नेलाइ हासुहेङ खाङलि हानेसुना हुनु? माको हाइ जाङका-जाङका धाबा होङका द्‍याङगेलाइहेङ? जाङका-जाङका धाबा होङका द्‍याङगेलाइते राजाको दरबारता कि हिखे।

⁹ एन्सा माकुनु हासुहेङ खाङलि नेलाइ बाहार ओल्लेसुना ह? हाइ एमि परमेस्वरको बक्ताहेङ खाङलि हानिसुन्हा? कालाउ का नेलाइहेङ दोअ्खा, एमि परमेस्वरको बक्ता खान्तेङ बुङ माहानहेङ।

¹⁰ हाइपालिपानु धर्मसास्तरता युहान्नाकोङ बारेता एसापा दोअ्का हि कि: खाङसु का काङको बानाल चुम्पुका नाङको लाङ-लाङ दिङगिल्लाङका, जाइ नाङको दामा तियार पावा।

¹¹ जातिङ भारि का नेलाइहेङ दोअ्खा, बप्तिस्ता पिका युहान्‍ना प्रिथिबिता जोलोम जेङका गोताङ द्‍याङगेलाइ खान्तेङ माहान हि। कालाउ परमेस्वरको सासनता जाइ झाराङ खान्तेङ आतुइका हि, कालाउ बुङ वा युहान्‍ना बप्तिस्ता पिका खान्तेङ माहान हि।

¹² कालाउ बप्तिस्ता पिका युहान्‍ना सुसमाचार पाका सोमोइसोङ एला थेकापा परमेस्वरको सासन दिनाङ-दिनाङ जोडहोइ बाढेका हि, कालाउ बिरोध पाकालाइ चाहि हान्ति पालि भोखे।

¹³ बप्तिस्ता पिका युहान्नाको पाला थेकापा मोसाको व्यवस्था कालाउ गोताङ परमेस्वरको बक्तागेलाइ परमेस्वरको सासनको बारेता आगमबानि पाका हिघाहि।

¹⁴ उङको परमेस्वरको बक्तागेलाइ कालाउ मोसाको व्यवस्थासो दोअ्का काथाता नेलाइ खाङधुरि पासुना पानु, परमेस्वरको बक्त्ता ल्वाङ दोअ्का एलिया चाहि युहान्‍ना दोङ।

¹⁵ जाइ काङको या काथा हिङदोङखे, वा इङको काथाहेङ ध्यान पितेङ हिनाको।

¹⁶ एलाको द्‍याङगेलाइहेङ का हासु दोफा तुलाना पालि? इम्बालाइते हाते-बाजारता योम्तेङ हिका जामाललाइ भाइका खिनिङ हि, जाइ दोङ एमिसो भेनेङगेलाइको बारेता काथा पोखे। इम्बालाइ एसापा दोअ्खे,

¹⁷ नेलाइको भाअ्सिङ केलाइ लेङचाका पोदोको धुन धुइपानाहि कालाउ बुङ नेलाइ मान्हासुन्हा। कालाउ केलाइ मन थुरका ले लेनाहि कालाउ बुङ नेलाइ माखारसुना।

¹⁸ हेन्जा जोसो बारितेङ हिका कालाउ दाखमद माआम्का युहान्नाहेङ नेलाइ भुत-आत्मा धेल्का द्‍याङ दोअ्सुन्हा।

¹⁹ का द्‍याङको चान बुङ द्‍याङगेलाइ भाइपा चागिल्घा आमगिल्घा कालाउ इम्बालाइ कासेहेङ जिहुका, म्हाका पोत ल्होपाकालाइको कालाउ पापिगेलाइको सानाइति दोअ्तेङ दुसिखे। कालाउ हिदोइ बुङ द्‍याङको कामहोइ या साबित पाखे कि वा बुद्दिमानि हि।

खाङधुरि मापाका सहरगेलाइहेङ चेताउनि

²⁰ जेदोङ सहरगेलाइता येसु हेन्जाङ भारबुसाइका कामगेलाइ पाका हिघाहि। इङको सहरको द्‍याङगेलाइ ता-ताइको पाप पालि मालाअ्हि। ओदोङ भाअ्सिङ येसु इङको सहरको द्‍याङगेलाइहेङ थाङका आग्याता एसापा दोअ्हि,

²¹ हे कोराजिन सहर कालाउ बेथसेदा देराको द्‍याङगेलाइ, नेलाइहेङ परमेस्वर हेन्जा साजाइ प्याङ! नेलाइको माझाता का जेदोङ सरबुङसाइका कामगेलाइ पाका हिघाखा, इङको काम टुरोस कालाउ सिदोन सहरता पाअ्कानु इन्ताको द्‍याङगेलाइ लाम्फा दोङ पाप लाअ्का तिङपालि बोराको लोखोन होङतेङ कालाउ बुसिरि उधावा।

²² कालाउ का नेलाइहेङ दोअ्खा, न्यायको दिनाता इम्बालाइको बेथा टुरोस कालाउ सिदोन सहरको खान्तेङ सहिलि दोका जेनाङ।

²³ ए कर्फनहुम सहरको द्‍याङगेलाइ, हाइ नेलाइ सोचिसुखेना स्वर्गता साम्मानित जेङस्वाना माको नेलाइ साम्मानित माजेङस्वाना। नाअ् नरकता हुलाना हाइपालिपानु सोदोम सहरता बुङ नेलाइहेङ भाइपाङ सरबुङसाइका कामगेलाइ तिङपाकानु सोदोम सहर एला थेकापा हिधावा।

²⁴ कालाउ का नेलाइहेङ दोअ्खा, न्यायको दिनाता इम्बालाइको बेथा सोदोम सहरको खान्तेङ सहिलि दोका जेनाङ।

माइकालाइहेङ आराम

²⁵ एन्सालाउ दोङ येसु दोअ्हि, हे परमेस्वर आबा स्वर्ग कालाउ प्रिथिबिको प्रभु, का नासेहेङ धन्यबाद पिखा, हाइपालिपानु बुद्दिमान कालाउ बाठा द्‍याङगेलाइसो म्होनातेङ ताअ्का काथा साधारन द्‍याङगेलाइहेङ बुझाइ पिका हिना।

²⁶ एइ आबा इसिका पालि नासेहेङ मन जेङहि।

²⁷ काङको आबा कासेहेङ गोताङ काथाको जिम्मा पिका हि। आबा बाहेक चानहेङ हासु बुङ मानाल्खे कालाउ चान बाहेक आबाहेङ हासु बुङ मानाल्खे। कालाउ चान दोङ नाल्पालि खाङकालाइहेङ चाहि आबाहेङ नाल्खे।

²⁸ “ओइ गोताङ परिस्रोम पाकालाइ कालाउ ल्हिकाहोइ थेचाराइ न्हाकालाइ, नेलाइ झाराङ का दोफा लोसु, कालाउ का नेलाइहेङ माइसा चालि प्याङका।

²⁹ काङको जुवा फाअ्सु कालाउ काङकोसो धिरसु, हाइपालिपानु का दायालु कालाउ मोनोइ हिघा, कालाउ नेलाइ ताइको प्रानता माइसा निङस्वाना।

³⁰ हाइपालिपानु काङको जुङगले सुकाका हि कालाउ बोझा चाहि होम्का हि।”