मत्‍ति 10 - Dhimal NT

तेन्हे झना चात्यागेलाइको काम

¹ येसु वाको तेन्हे चात्यागेलाइहेङ काइहि, कालाउ वा भुत-आत्मागेलाइ ओल्लेपाका खाबारा इम्बालाइहेङ पिहि। कालाउ वा गोताङ खाल्को बेथा कालाउ मिसागेलाइ एल्पालि दोका खाबारा इम्बालाइहेङ पिहि।

² कालाउ उङको तेन्हे साल्न्हाका चात्यागेलाइको मिङ एसा पाहि सिमोन जाइहेङ पतरुस बुङ दोअ्खे, कालाउ वाको दादा आन्द्रियास, जब्दियाको न्हेमि चानगेलाइ याकुब कालाउ युहान्‍ना,

³ फिलिप, कालाउ बारथोलोमाइ, थोमा, कालाउ पोत ल्होपाका मति, कालाउ आल्फायासको चान याकुब, कालाउ थेदियास

⁴ सिमोन कनानि कालाउ यहुदा इस्कोरियत, उङकोङ द्‍याङ हिघाहि जाइ येसुहेङ रिम्चापाहि।

⁵ येसु इङको तेन्हे चात्यागेलाइहेङ एसा दोअ्तेङ आदेस पिहि, कालाउ वा सासनको बिसोइता सुसमाचार पालि दिङगिल्हि, कालाउ येसु दोअ्हि। गैर-यहुदिगेलाइको माझाता मान्हेसु, कालाउ सामारिगेलाइको सहरता बुङ मादुल्सु।

⁶ भरु इस्राएल सारभिको द्‍याङगेलाइकोता हानेसु, इम्बालाइ राम्का भेडा मेसा भाइका हि।

⁷ जेलाउ नेलाइ हानिस्वाना, परमेस्वरको सासन लोलि तोम्का हि, दोअ्तेङ सुसमाचार पासु।

⁸ मिसा लोकालाइहेङ एल्पासु, सिकालाइहेङ सिन्हुपासु, रोग्या खोअ्कालाइहेङ ओसेरे पैति पासु, द्‍याङगेलाइसो भुत-आत्मा दिगिल्पिसु। का नेलाइहेङ एन्साङ या खाबारागेलाइ प्याङका जेसाङ नेलाइ बुङ एन्साङ पासु।

⁹ नेलाइ ताइको दोफा सोना, चान्दि कालाउ तामाको थुरि, हाइ दोङ माचुम्पुसु,

¹⁰ दामाको भाअ्सिङ झोला, न्हेनोङ धारि, जुत्ता, लाठि, माचुम्पुसु। हाइपालिपानु खेताला वाको ज्याला निङलि गोयावा।

¹¹ जेलाउ नेलाइ हिदोइ बुङ देरा कालाउ सहर भारि हानिस्वाना इन्ता एनोङ ना एनोङ सोबाइका द्‍याङहेङ भोसु, कालाउ इन्तासो माघुरिपा भरि इङको थामे मालासु, कालाउ वाकोङ साअ्ता हिसु।

¹² नाअ् साअ् लिता दुल्तेसाङ वासेहेङ दोअ् नासेहेङ सान्ति जेनाको।

¹³ इङको साअ् सोबाइका हिनु, नेलाइको सान्ति इङको साअ्ता सान्ति ल्वाको। जेसापा इङको साअ् सान्ति मान्थुनु, नेलाइको सान्ति नेलाइ दोफाङ घुरितेङ ल्वाको।

¹⁴ जेसापा हिदोइ बुङ थामेता थुकालाउ द्‍याङगेलाइ नेलाइहेङ स्‍वागत मापानु, कालाउ नेलाइको काथा माहिङपिनु चेताउनि पिकाताङ इङको साअ् कालाउ इङको सहरसो बाहार ओल्लेलाउ ताइको खोकोइको बाला ह्रिसु। कालाउ इङको देरा लाअ्सु। उङको द्‍याङगेलाइहेङ परमेस्वर दोङ पालि गोइका न्याय पावा।

¹⁵ नेलाइहेङ का जातिङ भारि दोअ्खा, न्यायको दिनाता इम्बालाइको बेथा सोदोम सहरको कालाउ गमोराको खान्तेङ सहिलि दोका जेनाङ।

लोलि तोम्का दुखको बारेता

¹⁶ हिङसु, का नेलाइहेङ स्याइलेको माझाता भेडा भाइपा दिङगिल्लाङका, इङको भाअ्सिङ पुय्याँ, भाइपा आगाल धाअ् कालाउ कुर्जा भाइपा सोझा जेङ।

¹⁷ द्‍याङगेलाइसो होसियार हिसु, इम्बालाइ नेलाइहेङ रिम्मावा कालाउ माहासभाता चुम्पावा, कालाउ इम्बालाइ नेलाइहेङ यहुदिगेलाइको चाउघारा साअ्ता चुम्पुतेङ नेलाइहेङ द्वालिहोइ म्हेतावा।

¹⁸ ओबालाइ नेलाइहेङ बार्का हाकिम कालाउ सासकगेलाइको आगाता न्यायको भाअ्सिङ जाअ्पावा। कालाउ नेलाइ सासक, कालाउ गैर-यहुदिगेलाइको आगाता काङको साक्सि जेङस्वाना।

¹⁹ जेलाउ नेलाइ रिम-निन्चास्वाना, कालाउ हेसा नुइ धुइलि, हेसा पातेङ दोअ्लि, दोअ्तेङ इन्सिका काथाता पिर मापासु। इङको काथा एन्सालाउ दोङ नेलाइहेङ धुइलि गोइका, काथा नेलाइहेङ दोअ्पियावा।

²⁰ हाइपालिपानु जेदोङ काथा दोअ्लि गोइका नेलाइ मादोस्वाना, परमेस्वरको आत्मा दोङ नेलाइ पाहासो वा धुइयावा।

²¹ एमि ओने भेनेङ-ओनेहेङ सेअ्लिको भाअ्सिङ रिम्पावा। आमाइ-आबा बुङ ताइको चान चामिन्दिहेङ, चान चामिन्दि ताइकोङ आमाइ-आबाहेङ सेअ्लि लागाइयावा। हाइपालिपानु इम्बालाइ कासेहेङ खाङधुरि पाकानाङ।

²² हाइपालिपानु नेलाइ काङको ह्रुता खाङधुरि पास्वाना नेलाइहेङ झाराङ थोअ्तावा। कालाउ जाइ का ह्रुता खाङधुरि पातेङ हि कालाउ जाइ चाहि ताइको जिबन आम्तिम थेकापा दोङ का ह्रुता खाङधुरि पातेङ हिकालाइहेङ चाहि बान्चि पावा।

²³ जेलाउ द्‍याङगेलाइ नेलाइहेङ परमेस्वरको बचन सुसमाचार पाहि दोअ्तेङ एनोङ सहरता साताइनु भेनेङ सहरता खाअ्तेङ हानेसु। का नेलाइ दोफा जातिङको दोअ्खा, का द्‍याङको चान, मालोसिङ नेलाइ परमेस्वरको बचन सुसमाचार पालि इस्राएल सारभिको गोताङ सहरको द्‍याङगेलाइहेङ मादोस्वाना।

²⁴ हासु बुङ चात्या गुरु खान्तेङ माबाराखे ना ते हिदोइ बुङ चाकारिया गिह्रि खान्तेङ बाराखे।

²⁵ ओदोङ भाअ्सिङ चात्या ताइको गुरु सामान जेङकाता सोन्तोस मानियाको, चाकारिया एन्साङ पातेङ गिह्रि सामान जेङलि निङकाता सोन्तोस मानियाको। जेसापा इम्बालाइ ग्रिहिहेङ साइतान दोअ्नु मारेम्का ब्यभार पावा, इम्बालाइ झन ताइको चाकारिया दोफा मारेम्का ब्यभार पावा।

हासुसु थिलि?

²⁶ ओदोङ भाअ्सिङ द्‍याङगेलाइसो माअ्थिसु। जेदोङ म्होनाका काथा हि देखाल जेनावा। कालाउ कुन्हाता म्होतेङ हिका गोताङ काथागेलाइ देखाल जेनावा।

²⁷ जेदोङ बुङ परमेस्वर नेलाइहेङ कितिकितिकाता दोअ्का हि, इङको काथा नेलाइ माअ्थिसिङ सार्बाजानिक थामेता दोअ्सु। न्हातोङता हिङका काथा साअ्को चाल्हेसो प्रचार पासु।

²⁸ द्‍याङगेलाइसो माअ्थिसु, ओबालाइ नाङको जिउहेङ खिनिङ सेअ्तावा कालाउ प्रानहेङ सेअ्लि मादावा। नेलाइ वासेहेङ खिनिङ थिलि गोइस्वाना जेदोङ परमेस्वर नाङको जिउ कालाउ प्रानहेङ नरकता चुम्पुखे।

²⁹ कालाउ खाङ, न्हेनोङ सारन्ह्याको दाम ए पाइसा खिनिङ मापिखे रो? कालाउ एनोङ बुङ सारन्हयाहेङ नेलाइको परमेस्वर आबाको इच्छा माकोसिङ भोनोइता माहुलावा।

³⁰ परमेस्वर नेलाइको जिबनको बारेता गोताङ गिखे, वा या बुङ गिखे कि नेलाइको पुरिङता हेनोङ पुसिङ हि।

³¹ ओदोङ भाअ्सिङ माअ्थिसु! नेलाइ इङको सारन्ह्यागेलाइ खान्तेङ हेन्जा महत्वको हिसुना।

येसुहेङ सुइकारलि या मासुइकारलि

³² जाइ कासेहेङ द्‍याङगेलाइको आगाता सुइकार पाखे, वासेहेङ का बुङ स्वर्गता हिका परमेस्वर आबाको आगाता काङको चात्या दोअ्तेङ सुइकार पाङका।

³³ कालाउ जेसापा द्‍याङगेलाइको आगाता कासेहेङ सुइकार मापानु, का बुङ स्वर्गता हिका आबा परमेस्वरको आगाता दोअ्ताङका कि या काङको चात्या माको।

सान्ति माको कालाउ फेअ्सुपालि

³⁴ का प्रिथिबिता द्‍याङगेलाइको माझाता सान्ति चुमालि ल्होघा दोअ्तेङ मासम्झे। भरु सान्ति चुमालि माको, कालाउ का ते फेअ्सुपालि लोका हिघा।

³⁵ हाइपालिपानु का ते चानहेङ ताइकोङ आबासो लाअ्पालि, चामिन्दिहेङ आमाइसो लाअ्पालि कालाउ नामागेलाइहेङ जुबेसो लाअ्पालि।

³⁶ कालाउ द्‍याङको दुस्मन चाहि ताइकोङ जाहान लिता सोङ ल्वावा।

³⁷ हासु बुङ कासेहेङ खान्तेङ हेन्जा ताइको आबा-आमाइहेङ प्रेम पाखे, उङको काङको चात्या जेङलि योग्य माजेनाङ। एसाङ पातेङ कासेहेङ खान्तेङ हेन्जा ताइको चान-चामिन्दिहेङ प्रेम पाखे, उङको बुङ काङको चात्या जेङलि योग्य माजेनाङ।

³⁸ हासु बुङ ताइको क्रुस फाअ्तेङ काङको दोफा मालोखे, उङको काङको चात्या जेङलि योग्य मान्थु।

³⁹ हाइपालिपानु जाइ दोङ या सुमिङता ताइको प्रानहेङ बान्चिपालि खाङखे, “वा इङको मोअ्पावा, कालाउ इम्बालाइ जाइ दोङ ताइको प्रानहेङ काङको भाअ्सिङ कालाउ सुसमाचारको भाअ्सिङ जातिङको प्रान मोअ्पाखे कालाउ वा निनावा।”

चात्यागेलाइ निङलि गोइका इनाम

⁴⁰ नेलाइहेङ जाइ स्‍वागत पाखे, कासेहेङ बुङ स्‍वागत पावा, जाइ दोङ कासेहेङ स्‍वागत पाखे। कालाउ कासेहेङ दिङगिल्काहेङ बुङ आदार पावा।

⁴¹ जाइ परमेस्वरको बक्ताहेङ स्‍वागत पाखे, या गितेङ कि वा दोङ परमेस्वरको बचन दोअ्खे, परमेस्वर वासेहेङ इनाम प्यावा जेसाङ परमेस्वरको बक्ता दोङ निनाङ। एसापा दोङ जाइ दोङ धर्मि द्‍याङहेङ ग्रहन पाखे वासेहेङ बुङ परमेस्वर ओदोङ इनाम प्यावा जेदोङ धर्मि द्‍याङ निनाङ।

⁴² सत्ये का नेलाइहेङ दोअ्खा, “जाइ दोङ उङको आतुइका कालाउ म्हुइका मध्येसो एमिहेङ काङको चात्या मानितेङ ए लोटा तिरका चि खिनिङ पिलाउ बुङ, वा ताइको निङलि गोइका इनाम निसित काङकोसो बारका निनावा।”