लुका 7 - Dhimal NT

कप्तानको खाङधुरि

¹ जेलाउ येसु ताइको गोताङ काथा द्‍याङगेलाइहेङ हिङपालि दोतेङ वा कर्फनहुम सहरता हानिहि।

² कर्फनहुम सहरता एमि कप्तान हिघाहि वाको एमि मायारु बान्धाइति मासाधितेङ सिलिना हिलि जेङका हिघाहि।

³ जेलाउ येसुको बारेता वा हिङहि, कालाउ वाको बान्धाइतिहेङ एल्पा प्याको दोअ्तेङ कप्तान मुलि यहुदिगेलाइको आगुवागेलाइहेङ बिन्ति पालि दिङगिल्हि।

⁴ उङको द्‍याङगेलाइ येसुकोता हानिहि, कालाउ उङको कप्तानहेङ साघाइपि दोअ्तेङ सेउपाहि कालाउ दोअ्हि उङको कप्तान नाङको साघाइका निङलि जातिङ भारि योग्यको हि।”

⁵ वा केलाइको द्‍याङगेलाइहेङ प्रेम पाखे कालाउ केलाइको भाअ्सिङ चाउघारा साअ् बुङ धाम्पिका हि।

⁶ येसु उङको द्‍याङगेलाइ दोफा हानिहि, वा साअ् थुकालि दुरे दोङ हिलाउ कप्तान ताइको सानाइतिगेलाइहेङ वाको दोफा एसा दोअ्लि दोअ्तेङ सेउपालि दिङगिल्हि, हे प्रभु, नाअ् काङको साअ्ता लोलि दुख मापापि नाअ् भाइका द्‍याङहेङ काङको साअ्ता खोकोइ टेकि पालि सोबाइका का मान्थुघा।

⁷ ओदोङ भाअ्सिङ का ताइमिङ बुङ नाङको दोफा मान इज्‍जत भाइपा हानिलि सोबाइका मान्थुघा, नाअ् आग्या खिनिङ पि काङको चाकारिया एलावा।

⁸ इदोइ का गिखा कि हाइपालिपानु का बुङ बार्का आधिकारिगेलाइको खाबाराता हिघा। कालाउ काङको खाबाराता सिपालाइ हि। का एमिहेङ हाने दोअ्खा कालाउ वा हानिखे, कालाउ भेनेङहेङ लौउ दोनु कालाउ वा लोखे। काङको चाकारियाहेङ एसा पाअ्‌ दोअ्खा कालाउ वा पाखे।

⁹ जेलाउ इङको काथा हिङहि, येसु आवाइ तुअ्हि, कालाउ ताइको दोफा लोकालाइहेङ घुरितेङ दोअ्हि, जातिङ भारि का नेलाइहेङ दोअ्खा का इसिका इस्राएल सारभिता बुङ इदोइ झोको बार्का खाङधुरि तिङका मान्थुघा जेदोङ इदोइ गैर-यहुदिकोता हि।

¹⁰ येसुहेङ काइलि हानिका झाराङ द्‍याङगेलाइ साअ् भारि घुरिहि, इम्बालाइ उङको बान्धाइतिहेङ एल्लि दोका निङहि।

के सिकाको चान सिन्हुहि

¹¹ कालाउ न्हु दिना येसु नाइन दोअ्का नगर हानिहि, वाको चात्यागेलाइ कालाउ हेन्जा द्‍याङगेलाइको जेर वाको दोफाङ हानितेङ हिघाहि।

¹² जेलाउ येसु सहरको फिनु भेरपा थुकाहि, वा सिका द्‍याङको चानचाउलिहेङ चुम्पुकाताङ पाका तिङहि। उङको सिका वाजान चाहि एमि के सिका बेबालको एमि खिनिङ चान हिघाहि, उङको बेबाल दोफा मालामि हानिकालाइ सहरको हेन्जा द्‍याङगेलाइ हिघाहि।

¹³ जेलाउ प्रभु येसु उङको के सिका बेबालहेङ तिङहि, येसु दायाहोइ पोङघातेङ कालाउ वासेहेङ दोअ्हि माखार।

¹⁴ येसु चानचाउलिको भेरपा थुकाहि कालाउ चानचाउलिहेङ साइहि, सिका वाजानहेङ चुम्पुतेङ हानिका मालामिगेलाइ थिङगापा जाअ्हि, वा उङको सिका वाजानहेङ दोअ्हि, ओइ वाजान, का नासेहेङ दोअ्खा ल्हो।

¹⁵ कालाउ एन्सालाउ दोङ उङको सिका वाजान ल्होतेङ योम्हि कालाउ काथा दोअ्लि तेङहि, येसु उङको वाजानहेङ वाको आमाइकोता सुम्पिपिहि।

¹⁶ झाराङ द्‍याङगेलाइ भारभुसाइहि कालाउ एसा दोअ्काताङ परमेस्वरको बाखिन पाहि, एमि माहान परमेस्वरको बक्ता केलाइको माझाता लोका हि। कालाउ ओबालाइ बुङ दोअ्दोङघाखे, परमेस्वर ताइको प्रजागेलाइहेङ साघाइलि लोका हि।

¹⁷ येसुको बिसोइता इदोइ सुसमाचार सारा यहुदिया जिल्ला कालाउ इन्ताको भेरपाङ प्रदेसता बुङ चार-चाराइहि।

युहान्‍ना येसुको बारेता काथा बुझिलि दिङगिल्हि

¹⁸ युहान्नाको चात्यागेलाइ इदोइ गोताङ कामगेलाइको बिसोइता वासेहेङ दोअ्पिहि, युहान्‍ना ताइको चात्यागेलाइ माझासो न्हेमि चात्याहेङ काइहि।

¹⁹ युहान्‍ना ताइको चात्यागेलाइ माझासो न्हेमिहेङ प्रभु येसु दोफा हिअ्लि दिङगिल्हि, एमि जाइ लोलि खाङका हिघाहि, उङको नाअ् दोङ हिना कि? माकुनु आरोङ भेनेङहेङ दोङ ह्रुम्लि गोयाङ कि?

²⁰ कालाउ न्हुसो द्‍याङगेलाइ येसुकोता लोहि, इम्बालाइ दोअ्हि। बप्तिस्ता पिका युहान्‍ना केलाइहेङ इदोइ हिअ्लि नाङकोता दिङगिल्हि, हाइ लोलि खाङका नाअ् दोङ हिना कि? माकुनुते केलाइ आरोङ भेनेङ दामा खाङलि गोइका हि?

²¹ ओदोङ बेला येसु हेन्जा द्‍याङगेलाइहेङ इम्बालाइको मिसा एल्पा पिहि कालाउ इम्बालाइसो भुत-आत्मा लाअ्पापिहि, वा हेन्जा कान्हाँ द्‍याङगेलाइहेङ बुङ मिसियाँ तिङपालि दोपाका बानाइहि।

²² येसु युहान्नाको चात्यागेलाइहेङ जोबाफ पिहि, हानेसु जेदोङ हिङका कालाउ तिङका काथागेलाइ दोअ्सु। कान्हाँगेलाइ तिङदोङखे, बैरागेलाइ हिङदोङखे, कालाउ रोग्या खोअ्कालाइ एल्दोङखे। सिकालाइ आरोङ सिन्हुतेङ ल्होदोङखे, लेङग्रागेलाइ तेदोङखे, कालाउ गरिब द्‍याङगेलाइहेङ प्राचार पादोङखे।

²³ जेसापा हिदोइ बुङ द्‍याङ कासेहेङ साङखा मापाखे उङको धन्यको हि।

²⁴ कालाउ न्हुसो युहान्नाको चात्यागेलाइ हानिलि दोतेङ येसु द्‍याङगेलाइहेङ युहान्नाको बारेता काथा दोअ्लि तेङहि, नेलाइ चाका-मान्दा थामेता हाइ खाङलि हानिसुना? हाइ भेरमाहोइ हेङगालाइन्हाका निगालोहेङ? माको इङको खाङलि हानेका।

²⁵ माकुनु नेलाइ हाइ खाङलि हानेसुना कुनु? माको हाइ जाङका धाबा होङका द्‍याङगेलाइहेङ? जाङका-जाङका धाबा होङका कालाउ मोज मज्जाता हिका द्‍याङगेलाइते राजाको दरबारता कि हिखे।

²⁶ एन्सा माकुनु हाइ खाङलि नेलाइ बाहार ओल्लेसुना ह? हाइ एमि परमेस्वरको बक्ताहेङ खाङलि हानिसुन्हा? कालाउ का नेलाइहेङ दोअ्खा, नेलाइ युहान्नाहेङ तिङसुन्हा जाइ एमि परमेस्वरको बक्ता खान्तेङ माहान हि।

²⁷ युहान्‍ना जाइको बिसोइता इसिका लेखेका हि, खाङसु, का काङको बानाल चुम्पुका नाङको लाङ-लाङ दिङगिल्लाङका, जाइ नाङको दामा तियार पावा।

²⁸ का नेलाइहेङ दोअ्खा, प्रिथिबिता जोलोम जेङका गोताङ द्‍याङगेलाइ खान्तेङ युहान्‍ना माहान हि। जाइ परमेस्वरको सासनता म्हुइका हि, कालाउ बुङ वा खान्तेङ माहान हि।

²⁹ जेलाउ इम्बालाइ येसुको सिक्स्या हिङहि, गोताङ द्‍याङगेलाइ इता थेकापा, कि पोत ल्होपाकालाइ बुङ घोसाना पाहि, कि परमेस्वर धर्मि हिका हि हाइपालिपानु इम्बालाइ युहान्नासो बप्तिस्ता ह्रुहि।

³⁰ कालाउ बुङ फारिसिगेलाइ कालाउ व्यवस्था धिरपाका द्‍याङगेलाइ परमेस्वरको योजनागेलाइ हाइ दोङ काम मालागिका थानितेङ युहान्नासो बप्तिस्ता माह्रुहि।

³¹ एलाको द्‍याङगेलाइहेङ का हासु दोफा तुलाना पालि? इम्बालाइते हाते-बाजारता योम्तेङ हिका जामाललाइ भाइका खिनिङ हि, जाइ दोङ एमिसो भेनेङगेलाइको बारेता काथा पोखे।

³² केलाइ नेलाइको भाअ्सिङ बासुरि धुइपान्हाहि, कालाउ बुङ नेलाइ मान्हासुन्हा केलाइ मन आउलिका ले, लेन्हाहि कालाउ बुङ नेलाइ माखारसुन्हा।

³³ बप्तिस्ता पिका युहान्‍ना लोहि, दाखरस माआम्का कालाउ हेन्जा जोसो बारितेङ हिका कालाउ नेलाइ दोअ्सुखेना, यासिहेङ भुत-आत्मा धेल्का हि।

³⁴ का द्‍याङको चान बुङ आदेरमादेरका द्‍याङगेलाइ भाइपा चागिल्घा आमगिल्घा कालाउ नेलाइ कासेहेङ जिहुका, म्हाका पोत ल्होपाकालाइको कालाउ पापिगेलाइको सानाइति दोअ्तेङ दुसि सुखेना।

³⁵ कालाउ बिबेक नेलाइको सान्तानसो सत्ये साबित जेनावा।

येसु सिमोनको साअ्ता हानिहि

³⁶ फारिसिगेलाइ मध्येसो एमि येसुहेङ चालि काइहि, कालाउ वा फारिसिको साअ्ता हानिहि कालाउ चालि योम्हि।

³⁷ इङको सहरता एमि मारेम्का जिबन जियाइका बेजान हिघाहि, वा येसुहेङ फारिसिको साअ्ता चालि लोका हि दोअ्तेङ हिङहि, कालाउ वा एनोङ सिङगमरमरको बोतलता मेनाङ जाङका आत्तर चुम्तेङ लोहि।

³⁸ उङको बेजान येसुको न्हु पाहा जाअ्तेङ खारकाताङ येसुको खोकोइहेङ मितिहोइ भिजाइलि तेङहि, कालाउ ताइको पुसुङहोइ मोकाताङ वाको खोकोइता चुमाइतेङ कालाउ वाको खोकोइता आत्तर मलिपिहि।

³⁹ येसुहेङ नेउता पाका फारिसि इङको तिङतेङ मन मनता एसा दोअ्लि तेङहि, जेसापा येसु परमेस्वरको बक्ता हिनुते वासेहेङ साइका बेलाल हासु कालाउ हाइखालको बेजान दोअ्तेङ वा गिधावा, हाइपालिपानु इदोइ ते पापिनि बेजान कि वा।

⁴⁰ येसु वाको बिचार गितेङ फारिसिहेङ दोअ्हि, ओइ सिमोन, नासेहेङ हाइ दोङ दोअ्लि हि। वा दोअ्हि, गुरु ज्यु।

⁴¹ जेलाउ येसु इदोइ निङपिका दोअ्हि, इन्ता न्हेमि द्‍याङ हिघाहि, न्हेमि दोङ एनोङ दोङ गिह्रिको रिन ह्रुका हिघाहि, एमि नासाइ चान्दिको थुरि, कालाउ भेनेङ चाहि न्हे कुरि तेताका चान्दिको थुरि ह्रुका हिघाहि।

⁴² इम्बालाइकोता हेन्जा ताका मान्थुघाखे, ओदोङ भाअ्सिङ इम्बालाइ ताइको रिन चुक्ता पालि मादोहि। कालाउ गिह्रि ओबालाइ न्हेमिकोङ रिनमिन्हा पापिहि, उङको न्हेमि मध्येसो हासु चाहि उङको गिह्रिहेङ हेन्जा मायारु पाघाखे वाला?

⁴³ सिमोन दोअ्हि, काङको बिचारता जाइ हेन्जा स्यामा निङका हिघाहि वा दोङ वासेहेङ हेन्जा मायारु पाघाखे वाला। कालाउ येसु सिमोनहेङ दोअ्हि, नाङको काथा ठिक हि।

⁴⁴ कालाउ न्हुसो वा उङको बेजान भारि घुरितेङ सिमोनहेङ दोअ्हि, नाअ् उङको बेजानहेङ तिङन्हा? जेलाउ का नाङको साअ्ता लोघा, नाअ् केलाइको मुन्धुम आन्सार काङको खोकोइ झालि चि बुङ मापिन्हा। कालाउ वाते काङको खोकोइगेलाइ वाको मितिहोइ भिझाइतेङ कालाउ ताइको पुसुङहोइ योपिहि।

⁴⁵ नाअ् मुन्धुम आन्सार कासेहेङ माचुमाइन्हा, कालाउ वाते का लोकासोङ काङको खोकोइता चुमाइ चालि लाअ्का मान्थु।

⁴⁶ नाअ् काङको पुरिङता चुइति मामोपिन्हा, कालाउ वाते काङको खोकोइता मेनाङ जाङका आत्तरहोइ मोपिहि।

⁴⁷ ओदोङ भाअ्सिङ का नेलाइहेङ दोअ्खा कि उङको बेबालको हेन्जा पापगेलाइ स्यामा जेङका हि, एसापा गिखे कि वा हेन्जा प्रेम तिङपाहि जाइहेङ आधे पाप स्यामा पापिखे वा आतुइसा मायारु बाखाराइखे।

⁴⁸ कालाउ न्हुसो येसु उङको बेजानहेङ दोअ्हि, नाङको पापगेलाइ स्यामा जेङका हि।

⁴⁹ चालि योमकालाइ ता-ताइमिता दोअ्लि तेङहि, इदोइ द्‍याङ हासुको पाप स्यामा पाका? हाइपालिपानु परमेस्वर खिनिङ पाप स्यामा पालि दोअ्खे।

⁵⁰ येसु उङको बेजानहेङ दोअ्हि, परमेस्वर नासेहेङ बान्चिपाहि हाइपालिपानु नाअ् का ह्रुता खाङधुरि पान्हा, सान्तिसो सिता हाने।