लुका 5 - Dhimal NTयेसुको लाङति चात्यागेलाइ ( मति 4:18-22 ; मर्कु 1:16-20 ; युहा 1:40-42 ) 1 येसु एनि गेनेसरेत समुन्द्रको (या गालिल समुन्द्र भेनेङ मिङ) काम्भेता जाअ्तेङ हिघाहि, वाको द्यापाहाङ द्याङगेलाइ चेसुमेसुपा जोमदोङघाखे, इम्बालाइ परमेस्वरको बचन हिङलि खाङघाखे। 2 येसु समुन्द्रको काम्भे भेरपा न्हेनोङ नाउ तिङहि हाया माङकालाइ नाउसो ओल्लेतेङ इम्बालाइको हाया माङका जालेगेलाइ झाघाखे। 3 वा एनोङ नाउता धोल्हि, जेदोङ सिमोनको हिघाहि, कालाउ वा इङको नाउहेङ आसा फारापा काम्भेको भेरपा चुम्पुलि आराइहि, कालाउ वा इन्ता योम्तेङ द्याङगेलाइहेङ सिक्स्या पिलि तेङहि। 4 जेलाउ येसु ताइको काथा जेरगेलाइहेङ दोअ्लि दोतेङ, वा सिमोनहेङ दोअ्हि, नाउहेङ वाङखाराका चि भारि चुम्पु कालाउ हाया माङलि ताइको जाले आअ्। 5 सिमोन जोबाफ पिहि, प्रभु केलाइ नानि झेङपाङ हाया माङनाहि कालाउ बुङ एनोङ बुङ हाया रिम्लि मादोन्हाहि, कालाउ बुङ नाअ् दोअ्न्हा, का जाले आताङका। 6 जेलाउ सिमोन कालाउ वाको सानाइतिगेलाइ जाले चिता आहि, इम्बालाइको जाले भरि हाया देतेङ जालेदोङ थेअ्लि तोम्का हिघाहि। 7 इम्बालाइ आरु नाउता हिका सानाइतिगेलाइहेङ बुङ साघाइलि लोसु दोअ्तेङ काइहि, कालाउ सानाइतिगेलाइ लोतेङ न्हेनोङ नाउता दोङ वथे हेन्जा हाया लादेहि कि, इम्बालाइ दोङ दुबिलि तोम्हि। 8 जेलाउ इदोइ तिङतेङ येसुको खोकोइता तुघुरतेङ सिमोन पतरुस दोअ्हि, हे प्रभु, काङकोसो एलाङ दोङ दुरे हाने हाइपालिपानु का पापि द्याङ हिघा। 9 हाइपालिपानु वथे हेन्जा हाया रिम्का तिङतेङ सिमोन कालाउ वाको सानाइतिगेलाइ झाराङ भारभुसाइहि। 10 एन्सा पातेङ वाको आरु सानाइति जब्दियाको चानगेलाइ याकुब कालाउ युहान्ना बुङ भारभुसाइहि। जेलाउ येसु सिमोनहेङ दोअ्हि, थिलि मागोइस्वाना एला उसो नेलाइ द्याङगेलाइहेङ का ह्रुता खाङधुरि पाका बानाइस्वाना। 11 इम्बालाइ ताइको नाउगेलाइ समुन्द्रको काम्भे भेरपा चुमाहि, कालाउ इम्बालाइ इङको गोताङ लाअ्तेङ येसु दोफा हानिहि। रोग्या खोका द्याङ ( मति 8:1-4 ; मर्कु 1:40-45 ) 12 जेलाउ एनि येसु एनोङ सहरता हिघाहि, इन्ता एमि रोग्या खोका दुखि द्याङ बुङ हिघाहि, जेलाउ वा येसुहेङ तिङहि, वा येसुको खोकोइता हानितेङ तुघुरतेङ दोअ्हि, हे प्रभु, नाअ् मन पानु कासेहेङ एल्पालि द्वाना। 13 येसु उङको द्याङहेङ खुर चातेङ दोअ्हि, का मन पाखा, नाअ् एल कालाउ ओदोङ घुरि वाको दुन्दिया रोग्या खोअ्का एल्हि। 14 येसु वासेहेङ थाङका आग्या पिहि, “हासुहेङ बुङ माअ्दो, हाने मुलि यहुदि पुजारिगेलाइकोता तिङपा कालाउ मोसाको आग्या आन्सार पाका भेति चढाइ कालाउ द्याङगेलाइहेङ प्रमानित ज्याको।” 15 कालाउ येसुको बिसोइता झन सुसमाचार जेङकाताङ हानिहि, इस्तु द्याङगेलाइ वाकोता सिक्स्या हिङलि लोघाखे कालाउ मासाधेकागेलाइ एल्लि लोघाखे। 16 कालाउ येसु हेन्जा जोसो हासु बुङ मान्थुका एकोन्हाता प्रार्थाना पाघाखे। दुन्दिया खोअ्का द्याङ एल्हि ( मति 9:1-8 ; मर्कु 2:1-12 ) 17 एनि येसु द्याङगेलाइहेङ सिक्स्या पिदोङघाखे, फारिसिगेलाइ कालाउ व्यवस्था धिरपाका द्याङगेलाइ बुङ इन्ताङ योम्तेङ हिघाहि। इम्बालाइ यरुसेलेम सहर, यहुदिया जिल्ला कालाउ गालिल जिल्लाको हेन्जा जोसो देरागेलाइसो लोका हिघाहि, कालाउ प्रभु दोङ येसुहेङ एल्पाका सरबुङ पिका हिघाखे। 18 द्याङगेलाइ एमि गाइल्हि खोअ्का द्याङहेङ धोक्रा सुधाङ चुम्तेङ लोहि कालाउ इम्बालाइ लिता चुमालि कालाउ येसुको आगाता ताअ्लि खाङघाखे। 19 इन्ता बिरुबिरुपा द्याङगेलाइ हिघाहि उङको मासाधेकाहेङ लिता चुम्पुलि हिदोइ बुङ दामा मानिङहि ओदोङ भाअ्सिङ इम्बालाइ चाल्हा ह्रुता ताङहि, कालाउ इम्बालाइ चाल्हा आतेङ उङकोहेङ धोक्रा सुधाङ येसुको आगाता खुअ्पाहि। 20 इम्बालाइको ओसारापाङ खाङधुरि तिङतेङ येसु दोअ्हि, ओइ द्याङ, नाङको पापगेलाइ स्यामा जेङहोइ। 21 जेलाउ मोसाको व्यवस्था धिरपाका द्याङगेलाइ कालाउ फारिसिगेलाइ मन-मन्ता प्रस्न पालि तेङहि, इदोइ परमेस्वरहेङ निन्दा पाका द्याङ हासुको? वाको जेदोङ दोअ्का परमेस्वरहेङ मन्दा माताका काथा दोअ्खे परमेस्वर बाहेक हासु बुङ पापगेलाइ स्यामा पालि माद्वाङ! 22 कालाउ येसु इम्बालाइको प्रस्न थाहा गितेङ इम्बालाइहेङ जोबाफ पितेङ दोअ्हि, नेलाइ ताइको ह्रदयता हाइ पालि प्रस्नगेलाइ पासुखेना? 23 एला हाइ दोअ्लि सोबाइयाङ कुनु, नाङको पाप पाका स्यामा जेङहोइ दोअ्लि नाअ् इतासो, ल्हो कालाउ तेअ् दोअ्लि? 24 का चाहिखा कि नेलाइ गिसु कि का द्याङको चानहेङ प्रिथिबिता द्याङगेलाइको पाप स्यामा पालि खाबारा हि। कालाउ वा गाइल्हि खोअ्का द्याङहेङ दोअ्हि, का नासेहेङ दोअ्खा नाअ् ल्हो, नाङको धोक्रा चुम्तेङ सिता हाने। 25 झाराङको आगाता उङको गाइल्हि खोअ्का द्याङ ओदोङ घुरि जुरुजारापा ल्होहि कालाउ ताइको धोक्रा चुम्तेङ हानिहि कालाउ परमेस्वरको महिमा पातेङ साअ् भारि हानिहि। 26 झाराङ द्याङगेलाइ भाङ-भाङहि, कालाउ परमेस्वरको महिमा पालि तेङहि, कालाउ हेन्जा थितेङ इम्बालाइ एसापा दोअ्हि, नानि केलाइ आचाम्माको काथा तिङन्हाहि। येसु लेबिहेङ काइहि ( मति 9:9-13 ; मर्कु 2:14-17 ) 27 कालाउ न्हुसो येसु बाहार हानिहि कालाउ पोत ल्होपाका थामेता एमि लेबि मिङ हिका, पोत ल्होपाका द्याङहेङ योम्तेङ हिका तिङहि, कालाउ वासेहेङ दोअ्हि, का दोफा लोसु कालाउ काङको चात्या जेङसु। 28 कालाउ उङको लेबि ल्होहि कालाउ गोताङ आनेमाने लाअ्तेङ येसुको चात्या जेङहि। 29 कालाउ लेबि येसुको भाअ्सिङ ताइको साअ्ता बार्का भोज जुराइहि। इन्ता पोत ल्होपाका द्याङगेलाइ कालाउ आरु द्याङगेलाइ बुङ एनोङ बार्का जेर बुङ इङको इम्बालाइ दोफाङ योम्तेङ चाघाखे। 30 फारिसि दोअ्का समुहगेलाइ कालाउ व्यवस्था धिरपाका द्याङगेलाइ वाको चात्यागेलाइको बिरोधता एसा दोअ्तेङ गुनगुनाइलि तेङहि, कालाउ दोअ्हि, हाइ पालि नाअ् पोत ल्होपाका कालाउ पापि द्याङगेलाइ दोफा योम्तेङ चाखेना? 31 येसु इम्बालाइहेङ जोबाफ पिहि, जेदोङ द्याङगेलाइ निरोगि हि ओबालाइहेङ ओसेरे पैति मागोइखे कालाउकि जाइ रोगाइका द्याङगेलाइहेङ खिनिङ गोइखे। 32 इसिकाङ का बुङ पापिगेलाइहेङ बान्चिपालि लोघा वासेहेङ माको जाइ द्याङ ताइमिहेङ धर्मि सम्झिखे। पाप पालिसो लाअ्पालिको भाअ्सिङ लोका हिघा। बारिका को बारेता प्रस्न ( मति 9:14-17 ; मर्कु 2:18-22 ) 33 इम्बालाइ येसुहेङ दोअ्हि फारिसिगेलाइ भाइपाङ युहान्नाको चात्यागेलाइ बुङ बेला-बेलाता बारिघाहि कालाउ प्रार्थाना पाघाखे। कालाउ नाङको चात्यागेलाइते जेलाउ बुङ चाखे-आम्खे। 34 येसु इम्बालाइहेङ दोअ्हि, बिहुको बेला जाइ दारादोफा हिखे, कालाउ जेलाउ वाको बेला लोखे। एन्सालाउ ओबालाइसो दाराहेङ खेङखे। कालाउ ओबालाइको मन तुखे, कालाउ इम्बालाइ बारिखे। 35 एन्सालाउ ओबालाइसो दारा लाअ्न्हावा। कालाउ ओबालाइको मन तुकावा, इङको दिनागेलाइता इम्बालाइ बारिखे। 36 येसु इम्बालाइहेङ इदोइ निङपिहि हिदोइ बुङ द्याङ नावा धाबाता थेअ्तेङ पुर्ना धाबा मातालाइखे। हाइ पालि? हाइपालिपानु एन्सा पाहे पानु नावा धाबा बिगिरखे, कालाउ तालाइका पुर्ना धाबा दोफा नावा धाबा मामिलिखे। 37 हासु बुङ नावा दाखरस पुर्ना धालेको झोलाता माह्वातावा ओदोङ भाअ्सिङ माकुनुते इङको नावा दाखरसहोइ फुलियावा कालाउ पुर्ना धालेको झोला थेअ्तावा, कालाउ दाखरस धालेको झोलाता नासातावा। कालाउ नावा दाखरस चाहि नावा धालेको झोलाता दोङ ह्वाखे। 38 द्याङगेलाइ जेलालाउ बुङ नावा दाखरसहेङ नावा धालेको झोलाता ताअ्खे। 39 हासु बुङ पुर्ना दाखरस आम्लि दोअ्तेङ न्हुसो नावा दाखरस आम्लि माभोखे। हाइपालिपानु वा द्वावा, पुर्ना दाखरसदोङ रेम्का हि। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation