लुका 4 - Dhimal NT

येसुको परिक्स्या

¹ येसु यर्दन झोरासो घुरिहि वा पबित्तरो आत्मासो पोङघातेङ हिघाहि, वासेहेङ चाका-मान्दा थामे भारि चुम्पुहि।

² इन्ता न्हे कुरि न्हिसिन न्हे कुरि नितिम थेकापा येसु हाइ बुङ चाका-आम्का मान्थुघाहि, साइतान येसुहेङ न्हे कुरि दिना थेकापा जाचिहि, ओदोङ भाअ्सिङ येसु ओसारापाङ म्हितुहि।

³ साइतान वासेहेङ दोअ्हि, नाअ् परमेस्वरको चान हिना पानु इदोइ उन्ठुइगेलाइहेङ तोले जेनाको दोअ्तेङ आग्या पितेङ प्रामानित पाअ्‌ कालाउ नाअ् इङको तोले चालि द्वाना।

⁴ येसु साइतानहेङ जोबाफ पिहि, धर्मसास्तरता इसिका लेखेका हि, तोले चाअ्तेङ खिनिङ द्‍याङ सिन्हुतेङ माहिखे।

⁵ कालाउ साइतान येसुहेङ एनोङ झाउका थामेता चुम्पुहि, कालाउ एघुरिङताङ सुमिङको गोताङ राइजिगेलाइ तिङपातेङ दोअ्हि।

⁶ कालाउ साइतान येसुहेङ दोअ्हि, का इदोइ गोताङ राइजिगेलाइको खाबारा इङको धन-सम्पति कालाउ सरबुङगेलाइ प्याङका इदोइ गोताङ कासेहेङ सुम्पिका हि, कालाउ का जाइहेङ इच्छा पाखा वासेहेङ प्याङका,

⁷ नाअ् कासेहेङ तुघुरतेङ आराधाना पान्हा पानु कालाउ का नासेहेङ इदोइ गोताङ आनेमाने प्याङका।

⁸ येसु जोबाफ पिहि, धर्मसास्तरता इसिका लेखेका हि: नाअ् परमप्रभु नाङको परमेस्वरहेङ खिनिङ सेउपालि कालाउ बाखिन पालि गोइखे, कालाउ वाको खिनिङ सेवा पालि गोइखे!

⁹ कालाउ इङको साइताइन आरोङ येसुहेङ यरुसेलेमता चुम्पुतेङ मुन्दिरको टुप्पाता जाअ्पाहि कालाउ साइतान येसुहेङ दोअ्हि, जेसापा नाअ् दोङ परमेस्वरको चान हिना पानु इतासो लेता धाअ्सितेङ प्रमानित पाअ्‌, कि नासेहेङ चोट मालागियाङ,

¹⁰ हाइपालिपानु धर्मसास्तरता इसिका लेखेका हि, वा दोङ ताइको स्वर्गदुतगेलाइको जिम्माता नासेहेङ प्यावा,

¹¹ कालाउ ओबालाइ दोङ नासेहेङ ताइको खुर-खुरता खोअ्तावा, माकुनुते नाङको खोकोइ उन्ठुइता थुन्हावा।

¹² येसु जोबाफ पिहि, “धर्मसास्तरता एसा दोअ्का हि, प्रभु नाङको परमेस्वरहेङ माजाचे।”

¹³ साइतान येसुहेङ गोताङ परिक्स्या पालि दोतेङ आले सोमोइको भाअ्सिङ वाहेङ लाअ्तेङ हानेहि।

¹⁴ येसु पबित्तरो आत्माको सरबुङता गालिल जिल्लाता घुरिहि। कालाउ वाको बारेता काथागेलाइ द्‍यापाहाङ चार-चाराइहि।

¹⁵ येसु यहुदिगेलाइको चाउघारा साअ्गेलाइता सिक्स्या पिलि तेङहि, कालाउ झाराङ वाको बाखिन पाघाहि।

नासरत देराता येसुहेङ मासुइकार हि

¹⁶ येसु ताइमि हुर्किका नासरत देराता घुरिहि। कालाउ परमेस्वरको पबित्तरो दिनाता यहुदिगेलाइको चाउघारा साअ्ता हानिहि। कालाउ वा ताइको मुन्धुम आन्सार इन्ता धर्मसास्तरसो पढेलिको भाअ्सिङ जाअ्हि।

¹⁷ यासाइया परमेस्वरको बक्तापाहासो लेखेका किताप वासेहेङ पिका हिघाहि, कालाउ वा किताप पल्ति पातेङ कालाउ एनोङ थामेता इसिका काथा लेखेका निङहि:

¹⁸ प्रभुको आत्मा काङको ह्रुता हि, हाइपालिपानु गरिबगेलाइहेङ प्राचार पालिको भाअ्सिङ कासेहेङ आबिसेक पाका हि। कैदिगेलाइहेङ लाअ्पालिको भाअ्सिङ, कालाउ कान्हाँगेलाइहेङ तिङपालि दोपालि, हेन्जाङ आत्याचारता परिकालाइहेङ लाअ्पालिको भाअ्सिङ,

¹⁹ कालाउ घोसाना पालि कि ताइको द्‍याङगेलाइहेङ बान्चिपालि परमप्रभुको ठिक सोमोइ लोका हि।

²⁰ कालाउ न्हुसो येसु किताप बन्द पातेङ सेवकहेङ घुरिपाहि कालाउ योम्हि। यहुदिगेलाइको चाउघारा साअ्ता हिका गोताङ द्‍याङ वासेहेङ खाङतेङ हिघाखे।

²¹ येसु ओबालाइहेङ दोअ्हि, नानि धर्मसास्तरको इदोइ बचन नेलाइ हिङका-हिङकाताङ पुरा जेङका हि।

²² गोताङ द्‍याङगेलाइ येसुको बाखिन पाहि, वाको आनुग्रहोइ भरिका बचन हिङतेङ ओबालाइ भारभुसाइहि। ओबालाइ दोअ्हि, हाइ याते योसेफको चान माको रो?

²³ येसु ओबालाइहेङ दोअ्हि, का गिखा कि नेलाइ कासेहेङ या निङपिकासो दोअ्स्वाना, ओइ बैधे! ताइमिहेङ एल्पा। नाअ् जेदोङ कर्फनहुम सहरता पान्हा ओदोङ केलाइ हिङन्हाहि। एला नाअ् ताइको देराता बुङ एन्साङ पाअ्‌।

²⁴ कालाउ न्हुसो येसु दोअ्हि, का नेलाइहेङ जातिङ भारि दोअ्खा, परमेस्वरको बक्ताहेङ ताइको देरागेलाइता कालाउ सहरता हेलाउ बुङ स्‍वागत माजेङखे।

²⁵ काङको काथा हिङसु या जातिङको हि कि परमेस्वरको बक्ता एलियाको पालाता गोताङ इस्राएल सारभिता हेन्जाङ के सिका बेबालाइ हिघाहि, ओदोङ बेला सुम बासार-आधा थेकापा आकाससो वाइ मालोहि, इता थेकापा कि पुराङ इस्राएल सारभिता बार्का आनिकाल जेङका हिघाहि।

²⁶ कालाउ बुङ एलियाहेङ इस्राएल सारभिता हिदोइ बुङ के सिका बेबालकोता मादिङगिल्हि, कालाउ सिदोन सहरको सारपात देराता एलियाहेङ एमि गैर-यहुदिको के सिका बेबालाइको साअ्ता दिङगिल्हि।

²⁷ कालाउ परमेस्वरको बक्ता एलिसाको सोमोइता इस्राएल सारभिता इस्तु रोग्या खोअ्कागेलाइ हिघाहि, कालाउ इम्बालाइ मध्ये सिरिया सारभिको नामान दोअ्का गैर-यहुदि द्‍याङ बाहेक हासुहेङ बुङ माएल्पाहि।

²⁸ गोताङ द्‍याङगेलाइ जाइ यहुदिगेलाइको चाउघारा साअ्ता हिघाहि, इङको काथागेलाइ हिङहि कालाउ मारफाङ चेर ताम्पाहि।

²⁹ इम्बालाइ ल्होहि कालाउ येसुहेङ सहरसो बाहार ओल्ला पातेङ जेदोङ राता इम्बालाइको सहर बानाइका हिघाहि, इङको राको टुप्पाता चुम्पुतेङ वासेहेङ लेता धाअ्कालाइतेङ सेअ्लि खाङघाखे।

³⁰ कालाउ बुङ वाते द्‍याङगेलाइको जेरसो सिरितेङ ताइको दामा हानिहि।

भुत-आत्मा धेल्का द्याङ

³¹ येसु गालिल जिल्लाको कर्फनहुम सहरता हानिहि, कालाउ वा परमेस्वरको पबित्तरो दिना द्‍याङगेलाइहेङ सिक्स्या पिलि तेङहि।

³² इम्बालाइ येसुको धिरपाकाता भाङ-भाङहि। हाइपालिपानु वा खाबारासो धिरपाघाखे।

³³ यहुदिगेलाइको चाउघारा साअ्ता एमि भुत-आत्मा साताइन्हाका द्‍याङ इन्ता हिघाहि उङको द्‍याङ एसा दोअ्काताङ ह्रिकाइहि,

³⁴ ओइ नासरत देराको येसु, केलाइहेङ नाअ् दोफा हाइ सोरोकार हि? नाअ् हाइ पालि केलाइहेङ नासा पालि लोन्हा? का नासेहेङ नाल्खा, नाअ् परमेस्वरको जन हिना।

³⁵ कालाउ बुङ येसु इङको भुत-आत्माहेङ चेरतेङ दोअ्हि, सिकापा हि, उङको द्‍याङसो बाहार ओल्लेतेङ हाने। उङको द्‍याङहेङ भोनोइता फेन्हापातेङ उङको द्‍याङहेङ हाइ दोङ हान्ति मापासिङ भुत-आत्मा ओल्लेतेङ हानिहि।

³⁶ गोताङ द्‍याङगेलाइ भारभुसाइहि कालाउ ओबालाइता-ताइमिता काथा पाहि, इदोइ हाइ खाल्को सिक्स्या? “इदोइ हिदोइ बुङ नावा खाल्को खाबाराको सिक्स्या हिलि गोयाङ! याते खाबारा कालाउ सरबुङता हुकुम पाखे, कालाउ भुत-आत्मागेलाइ बुङ वाको काथा बुङ साअ्खे।”

³⁷ कालाउ न्हुसो इङको थामेको गोताङ थामेता येसुको नावाइ चार-चाराइहि।

³⁸ येसु यहुदिगेलाइको चाउघारा साअ् लाअ्तेङ वा सिमोनको साअ्ता हानिहि। सिमोनको जुबे ओसारापाङ मिसा लोतेङ सिधाउताङ थाला जेङतेङ हिघाहि, ओबालाइ वाको भाअ्सिङ हाइ दोङ पापिलि दोअ्तेङ येसु दोफा सेउपाहि।

³⁹ येसु वाको भेरपा हानिहि कालाउ मिसाहेङ इन्तासो हाने दोअ्तेङ चेरहि कालाउ मिसा लाअ्तेङ हानिहि, कालाउ वा ल्होहि इम्बालाइहेङ साम्हेर्लि तेङहि।

⁴⁰ बेल्हाका पहर यहुदिगेलाइ परमेस्वरको पबित्तरो दिना दोतेङ द्‍याङगेलाइ हेन्जा खाल्को मासाधेका द्‍याङगेलाइहेङ येसुकोता चुमाहि। येसु झाराङ मासाधेकालाइहेङ साइतेङ एल्पाहि।

⁴¹ हेन्जाङ द्‍याङगेलाइसो भुत-आत्मागेलाइ बाहार ओल्लेतेङ हानिहि भुत-आत्मागेलाइ आहुतेङ हिघाहि, नाअ् परमेस्वरको चान हिना। कालाउ येसु भुत-आत्मागेलाइहेङ सिकापा हिलि आग्या पाहि, येसु दोङ ख्रिस्ट हि दोअ्तेङ भुत-आत्मागेलाइ गिका हिघाहि।

⁴² ह्रिमा जेङतेङ येसु चाका-मान्दा हिका थामेता हानिहि। कालाउ एनोङ बार्का हुदागेलाइ वासेहेङ भोकाताङ वाकोता लोहि, कालाउ केलाइहेङ लाअ्तेङ मान्हे दोअ्तेङ रोकिलि कोसिस पाघाखे।

⁴³ कालाउ येसु इम्बालाइहेङ दोअ्हि, का भेनेङ सहरगेलाइता बुङ परमेस्वरको सासनको बारेता सुसमाचारगेलाइ प्राचार पालि गोइका हि, याकोङ भाअ्सिङ कासेहेङ दिङगिल्का हि।

⁴⁴ कालाउ येसु यहुदिगेलाइको चाउघारा साअ्गेलाइता सिक्स्या पिलि तेङहि।