लुका 23 - Dhimal NT

येसु पिलातसको आगाता

¹ कालाउ न्हुसो चाउघारा साअ्को गोताङ सदस्यगेलाइ लोहि, कालाउ येसुहेङ पिलातसकोता चुम्पुहि।

² इम्बालाइ येसुहेङ दुसिलि तेङहि, कालाउ दोअ्हि इदोइ द्‍याङ केलाइको सारभिको द्‍याङगेलाइहेङ केउपालि खाङका हि, केलाइ निङनाहि। या द्‍याङ रोमि साम्रातहेङ पोत मातिरिलि दोअ्तेङ केलाइहेङ रोकिहि, ताइमि दोङ का एमि ख्रिस्ट, राजा दोअ्खे।

³ पिलातस येसुहेङ हिअ्हि, हाइ नाअ् यहुदिगेलाइको राजा दोङ? येसु जोबाफ पिहि एइ, “इदोइ ते नाअ् दोङ दोअ्खेना।”

⁴ कालाउ न्हुसो पिलातस मुलि पुजारिगेलाइ कालाउ जेरगेलाइहेङ दोअ्हि, का या द्‍याङसो हाइ बुङ दुसिका मानिङघा।

⁵ कालाउ बुङ इम्बालाइ ह्रिकाइतेङ दोअ्हि, वाते यहुदिया जिल्लासो गोताङ द्‍याङगेलाइको माझाता ताइको सिक्स्यासो दङगको कारन जेङका हि। या दोङ गालिल जिल्लासो सुरु पाहि कालाउ एला इता लोका हि।

⁶ इदोइ हिङतेङ पिलातस उङको द्‍याङहेङ हिअ्हि, गालिल जिल्लासो लोका द्‍याङ या दोङ माको रो?

येसु राजा हेरोदको आगाता

⁷ पिलातस थाहा गिहि कि येसु चाहि राजा हेरोद सासनको प्रदेससो लोका हि। ओदोङ बेला राजा हेरोद यरुसेलेम सहरता दोङ हिनाङ, पिलातस येसुहेङ राजा हेरोदकोता दिङगिल्हि।

⁸ जेलाउ राजा हेरोद येसुहेङ तिङहि, वा मेनाङ लेङचाहि। राजा हेरोद येसुको बिसोइता गोताङ काथागेलाइ हिङका हिघाहि। ओदोङ भाअ्सिङ वा येसुहेङ हेन्जा सोमोइसो भेतिलि मन हिघाहि, येसु भारबुसाइका काम तिङपावा कि दोअ्तेङ राजा हेरोद आस पाका हिघाहि।

⁹ राजा हेरोद वासेहेङ हेन्जा काथा हिअ्हि, कालाउ येसु हाइ दोङ जोबाफ मापिहि।

¹⁰ मुलि पुजारिगेलाइ कालाउ व्यवस्था धिरपाका द्‍याङगेलाइ इन्ताङ जाअ्का हिघाहि। इम्बालाइ येसुहेङ हेन्जाङ काथागेलाइहोइ बिरोधता दुसितेङ हिघाहि।

¹¹ जेलाउ राजा हेरोद कालाउ वाको सिपालाइ येसुहेङ खुजालाइतेङ आपमान पाहि, इम्बालाइ येसुहेङ राजाको धाबा होङपातेङ वासेहेङ मेनाङ खुजालाइहि। कालाउ न्हुसो राजा हेरोद आरोङ वासेहेङ पिलातसकोता दोङ दिङगिल्हि।

¹² इङको दिना थेकापा राजा हेरोद कालाउ पिलातसको माझाता सतुरुता हिघाहि, कालाउ इङको दिनासो उधिन्हेमिको सानाइति सुरु जेङहि।

येसुहेङ सिका दन्ड पिहि

¹³ पिलातस मुलि पुजारिगेलाइ, कालाउ यहुदि आगुवागेलाइको गोताङ द्‍याङगेलाइहेङ जोम्पाहि।

¹⁴ पिलातस इम्बालाइहेङ दोअ्हि, नेलाइ इदोइ द्‍याङहेङ काङकोता चुमासुना। नेलाइ दोअ्सुन्हा कि इदोइ द्‍याङ, द्‍याङगेलाइहेङ केउपाखे। का यासेहेङ नेलाइको आगाता केरकार पाघा। कालाउ बुङ नेलाइ वासेहेङ न्याय पाका दुसिका हिदोइ बुङ का वाकोता मानिङघा।

¹⁵ राजा हेरोद बुङ वाकोता हिदोइ बुङ खालको दुसिका मानिङहि। ओदोङ भाअ्सिङ येसुहेङ केलाइकोता घुरिपापिहि। खाङसु, वा सिका दन्ड निङका हिदोइ बुङ आपाराध पाका मान्थु।

¹⁶ ओदोङ भाअ्सिङ का वासेहेङ द्वालिहोइ म्हेतेङ लाअ्प्याङका।

¹⁷ निस्तार पार्बाको सोमोइता यहुदिगेलाइको भाअ्सिङ पिलातस एमि कैदिहेङ लाअ्पिलि गोइघाखे।

¹⁸ कालाउ झाराङ द्‍याङगेलाइ आहुहितेङ ह्रिकाइहि, वासेहेङ सेअ्लि गोयाङ। भरु बारब्बाहेङ लाअ्पिसु।

¹⁹ बारब्बाहेङ चाहि सहरता बार्का धुम पातेङ द्‍याङगेलाइहेङ सेअ्नाङ वासेहेङ रिम्तेङ झ्यालखानाता थुनितेङ ताअ्का हिघाहि।

²⁰ येसुहेङ लाअ्पिलि मन पातेङ पिलातस आरोङ ओबालाइहेङ सम्झाइहि।

²¹ कालाउ बुङ द्‍याङगेलाइ एसा दोअ्तेङ ह्रिकाइलि तेङहि, “क्रुस्टा तोइसु, वासेहेङ क्रुस्टा तोइसु।”

²² वा सुम्खे थेकापा ओबालाइहेङ दोअ्हि, “हाइ पालि?” इदोइ द्‍याङ हाइ मारेम्का पाका हि रो? का ते यासेहेङ सिलि गोइका हिदोइ बुङ निउगेलाइ मानिङघा ओदोङ भाअ्सिङ का यासेहेङ आतुइसा साजाइ पितेङ लाअ्प्याङका

²³ ओबालाइ बार्का गालाहोइ र्ह्रिकाइतेङ वासेहेङ क्रुस्टा तोइलि गोयाङ दोअ्तेङ सेउपाहि, “कालाउ ओबालाइको माग पुरा जेङहि।”

²⁴ कालाउ ओबालाइ एसा दोअ्काताङ ह्रिकाइहि कि इङको पुरा पापिलि पिलातस मुन्जुरि पाहि कालाउ फाइसाला बुङ हिङपापिहि।

²⁵ द्‍याङगेलाइ बाराब्बाहेङ लाअ्पिलि मन पाघाखे, “बाराब्बा द्‍याङगेलाइहेङ सेअ्का कालाउ बार्का धुम पानाङ वासेहेङ ओदोङको आरोपता झ्यालखानाता ताअ्का हिघाखे। पिलातस बाराब्बाहेङ लाअ्पिहि ओबालाइको इच्छा जेदोङ हिघाहि, इन्सिकाङ ओबालाइहेङ वा येसुहेङ सुम्पिपिहि।”

येसुहेङ क्रुसता तोइका

²⁶ येसुहेङ चुम्पुकाताङ पालाउ इम्बालाइ कुरेनि सहरको सिमोनहेङ दुसुहि, वा देराभारिसो सहर भारि लोदोङघाहि। इम्बालाइ वासेहेङ रिम्तेङ कालाउ येसुको क्रुस फाअ्लि लागाइहि।

²⁷ द्‍याङगेलाइको बार्का जेर येसुको न्हु-न्हु हानिहि, इन्ता बेबालाइ बुङ हिघाहि, इम्बालाइ जिउधाइ ल्होपाङ कालाउ खारकाताङ हिघाखे।

²⁸ कालाउ इम्बालाइ भारि घुरितेङ येसु दोअ्हि, ओइ यरुसेलेम सहरको चामिन्दिगेलाइ, काङको भाअ्सिङ माखारसु, भरु नाअ् दोफा कालाउ नाङको चान-चामिन्दि दोफा जेदोङ जेङलि तोम्तेङ हि, इङको को भाअ्सिङ खारसु।

²⁹ हाइपालिपानु कस्टको दिनागेलाइ लोदोङखे, जेलाउ द्‍याङगेलाइ दोअ्तावा, धन्य उङको बेबालाइ जाइको जामाल मान्थुघाहि, जाइ दोङ हेलाउ बुङ जामालको जोलोम माजेङहि, कालाउ जाइ हेलाउ बुङ जामालहेङ दु:दु माचुपाहि।

³⁰ इङको बेला द्‍याङगेलाइ तिकारगेलाइहेङ दोअ्तावा, केलाइ ह्रुता हुल, कालाउ राहेङ दोअ्तावा केलाइहेङ ठुम दोअ्लि तेनावा।

³¹ जेसापा हिदोइ बुङ धर्मि द्‍याङ दोफा इसिका जेङखे पानु कालाउ कल्पाना पाअ्‌ कि उङको द्‍याङगेलाइ दोफा हाइ जेनावा जाइ या दन्ड निङलि योग्य हि।

³² न्हेमि आपाराधिगेलाइहेङ बुङ येसुको दोफाङ सिपालाइ सेअ्लि चुम्घाहि।

³³ येसु कालाउ उङको न्हेमि आपाराधिगेलाइहेङ खप्पर दोअ्का थामेता चुम्पुहि। कालाउ सिपालाइ येसुहेङ काटि ताराइतेङ क्रुस्टा तोइहि, कालाउ येसुको भेरपा उङको न्हेमि आपाराधिहेङ बुङ तोइहि, एमिहेङ येसुको दाम्पाहा कालाउ भेनेङहेङ केपाहा तोइहि।

³⁴ येसु दोअ्हि, हे आबा इम्बालाइहेङ स्यामा पि हाइपालिपानु ओबालाइ हाइ पातेङ हि इङको मागिखे। कालाउ इम्बालाइ वाको धाबागेलाइ भाग पातेङ चिट्ठा लागाइहि।

³⁵ द्‍याङगेलाइ येसुहेङ जाअ्तेङ खाङतेङ हिघाहि। यहुदि सासकगेलाइ वासेहेङ मेनाङ खुजालाइतेङ दोअ्हि, “खाङसु वा आरुहेङ बान्चिपाहि जेसापा या दोङ परमेस्वरको साल्का ख्रिस्ट दोङ नु ताइमिहेङ बुङ बान्चि पाको।”

³⁶ कालाउ सिपालाइ बुङ येसुहेङ चुक युपितेङ एसा दोअ्तेङ खुजालाइहि,

³⁷ उङको सिपालाइ दोअ्हि, जेसापा नाअ् यहुदिगेलाइको राजा नु, ताइमिङहेङ बान्चिपा।

³⁸ या यहुदिगेलाइको राजा दोङ दोअ्का दुसिका पात्तारा लेखेतेङ वाको पुरिङ ह्रुता तोइका हिघाहि।

³⁹ येसु दोफाङ तोइन्हाका न्हेमि आपाराधि मध्ये एमि येसुहेङ मेनाङ मारेमफा आपमान पातेङ खुजालाइहि कालाउ दोअ्हि, “हाइ नाअ् ख्रिस्ट माको रो? एन्सा पानु नाअ् ताइमिहेङ बान्चिपा कालाउ केलाइहेङ बुङ बान्चिपा।”

⁴⁰ कालाउ भेनेङ आपाराधि वासेहेङ चेरहि कालाउ दोअ्हि, नाअ् परमेस्वरहेङ थिलि गोयाना, हाइपालिपानु नाअ् बुङते वाको भाइपाङ दन्ड भोगितेङ हिना।

⁴¹ केलाइको दन्डते न्याय उचित हि, हाइपालिपानु केलाइको काम आन्सार उचित दन्ड निङन्हाहि। कालाउ वाते हिदोइ बुङ मारेम्का काम पाका मान्थुघाहि।

⁴² कालाउ न्हुसो भेनेङ आपाराधि येसुहेङ दोअ्हि, हे येसु जेलाउ नाअ् राजा जेङतेङ सासन पाना इङको बेला कासेहेङ फोम पाअ्‌।

⁴³ कालाउ येसु वासेहेङ दोअ्हि, जातिङ भारि का नासेहेङ दोअ्खा नानि दोङ नाअ् का दोफा स्वर्गता ह्याना।

येसुको सिका

⁴⁴ आधा दिना जेङका हिघाहि, ओदोङ सोमोइसोङ सुम बजे थेकापा गोताङ सारभि भरि दोङ कितिकितिहि।

⁴⁵ सान्हे बुङ फाइसालामका मापिहि, सुम बजे मुन्दिर लिताको पार्दा ह्रुतासो लेता थेकापा न्हे पाना जेङतेङ थेअ्हि।

⁴⁶ येसु बार्का गालाहोइ ह्रिकाइतेङ दोअ्हि, हे आबा, का काङको आत्मा नाङको खुरता पिदोङखा। इङको झोको दोअ्तेङ वा ताइको प्रान लाअ्हि।

⁴⁷ रोमि सिपालाइको कप्तान इन्ता जेङका गोताङ घाटानागेलाइ तिङहि, वा परमेस्वरको बाखिन पाकाताङ दोअ्हि, जातिङ भारि इदोइ द्‍याङ निसित दोङ धर्मि द्‍याङ हिघाहि।

⁴⁸ हेन्जा द्‍याङगेलाइ येसुहेङ सेअ्का खाङलि लोका हिघाहि, कालाउ इम्बालाइ इन्ता जेङका गोताङ घाटाना तिङहि, कालाउ ता-ताइको तुमता थेअ्तेङ साअ् भारि घुरिहि, इदोइ तिम्पालि कि इम्बालाइ हेन्जा दुखि हिघाहि।

⁴⁹ कालाउ वाको गोताङ सानाइतिगेलाइ कालाउ गालिल जिल्लासो वाको न्हु-न्हु लोका बेबालाइ बुङ इन्ताङ हिघाहि, ओबालाइ दुरेसोङ जाअ्तेङ जेदोङ जेङतेङ हिघाखे इङको घाटानागेलाइ खाङतेङ हिघाहि।

येसुहेङ तोम्ता लिका

⁵⁰ योसेफ मिङ हिका एमि द्‍याङ रेम्का स्भाबको हिघाहि, वा धर्मि द्‍याङ कालाउ साल्लाहाकार हिघाहि।

⁵¹ वा इम्बालाइको साल्लाहा कामता सहमति पिका मान्थुघाहि। वा यहुदिगेलाइको आरिमाथिया देराको द्‍याङ हिघाहि, वा परमेस्वरको सासनको दामा खाङतेङ हिघाहि।

⁵² वा पिलातसकोता येसुको सिका जिउ ह्रेलि हानिहि पिलातस वासेहेङ येसुको सिका जिउ पिलि राजि जेङहि।

⁵³ कालाउ योसेफ क्रुससो जिउहेङ लेता खुअ्पाहि कालाउ एनोङ मेनाङ जाङका धाबाहोइ लुन्धाइहि। कालाउ वा येसुको सिका जिउ चुमाहि, एनोङ आरडाङता बानाइका तोमता सिका जिउ ताअ्हि। इङको तोमता लाम्फाङ हासुहेङ बुङ लिका मान्थुघाखे। ओदोङ तोअ्तेङ ताअ्का घाराता येसुको सिका जिउ ताअ्हि।

⁵⁴ इङको तियारिको दिना हिघाहि, परमेस्वरको पबित्तरो दिना सुरु जेङलि तोम्का हिघाहि।

⁵⁵ गालिल जिल्लासो येसु दोफाङ लोका बेबालाइ योसेफहेङ लेसारा पिताइहि, इम्बालाइ तोम कालाउ इङको लिता सिका जिउ हेसा ताअ्का हिघाहि इङको तिङहि।

⁵⁶ कालाउ न्हुसो येसुको सिका जिउता लागाइलिको भाअ्सिङ इम्बालाइ मालामालाका मासालागेलाइ कालाउ आत्तर तियार पाहि, कालाउ परमेस्वरको पबित्तरो दिनाता मोसाको व्यवस्था आन्सार इम्बालाइ माइसा चाहि।