लुका 22 - Dhimal NT

यहुदाको खाङधुरिघात पाका

¹ यहुदिगेलाइको आखिमिरि तोलेको पार्बा भेरपाङ लोका हिघाहि, इङकोहेङ निस्तार पार्बा बुङ दोअ्खे।

² मुलि पुजारिगेलाइ कालाउ व्यवस्था धिरपाका द्‍याङगेलाइ येसुहेङ सेअ्लि दाउगेलाइ भोगिल्घाखे, कालाउ ओबालाइ चाहि द्‍याङगेलाइसो थिघाहि।

³ येसुको तेन्हे चात्यागेलाइ मध्येसो एमिको मिङ यहुदा हिघाहि जाइहेङ यहुदा इस्कोरियत दोअ्घाखे। साइतान वाको लिता दुल्हि कालाउ वासेहेङ मारेम्का काम पालि तोङपाहि।

⁴ ओबालाइको खुरता वासेहेङ हेसा रिम्चापालि दोअ्तेङ मुलि पुजारिगेलाइ कालाउ कप्तानगेलाइकोता हानितेङ वा साल्लाहा पाहि। यहुदा इम्बालाइ दोफा येसुहेङ सुम्पिप्याङका दोअ्का बारेता काथा पासुहि।

⁵ इङको काथा हिङतेङ मुलि पुजारिगेलाइ मेनाङ लेङचाहि। जेसापा यहुदा येसुहेङ रिम्पाहेपानु ओबालाइ ताका पिलि केरा चाहि।

⁶ यहुदा किहि, इङको काथाता कालाउ जेर मान्थुका बेला वासेहेङ रिम्पालि दाउगेलाइ भोगिल्लि तेङहि।

आम्तिम भोज

⁷ इङको आखिमिरि तोले चाका दिना लोहि, जेदोङ दिना यहुदिगेलाइ निस्तार पार्बाता भेडा सेअ्तेङ भोग चाढाइलि गोइघाहि।

⁸ येसु दोङ पतरुस कालाउ युहान्नाहेङ दोअ्हि, हानेसु कालाउ केलाइको भाअ्सिङ निस्तार पार्बाको भोज तियार पासु।

⁹ पतरुस कालाउ युहान्‍ना येसुहेङ हिअ्हि, नाअ् केलाइहेङ हिसो भोज तियार पाका मन पाखेन्हा? येसु ओबालाइहेङ दोअ्हि,

¹⁰ हिङसु, “जेलाउ नेलाइ सहर हानिस्वाना इन्ता नेलाइ एमि द्‍याङहेङ ए घाल्से चि चुम्तेङ लोका दुसुस्वाना। वाको लेसारा पिताइसु, वा एनोङ साअ्ता दुल्लावा कालाउ नेलाइ बुङ इन्ताङ दुल्सु।

¹¹ इङको साअ्को गिह्रिहेङ दोअ्सु गुरु ज्यु वा कालाउ वाको चात्यागेलाइ दोफा निस्तार पार्बाको भोज हिसो चालि दोअ्तेङ हिअ्लि दिङगिल्हि।

¹² कालाउ उङको द्‍याङ ताइको साअ्को ह्रुताको कोठा साजाइतेङ ताअ्का बार्का कोठा तिङप्यावा, इङको कोठा दोङ नेलाइको भाअ्सिङ तियार पाप्याङ। निस्तार पार्बाको चाका-आम्का इन्ताङ तियार पासु।”

¹³ कालाउ जेदोङ येसु दोअ्का हिघाहि गोताङ काथागेलाइ इन्सिकाङ जेङका तिङहि, कालाउ ओबालाइ इन्ताङ दोङ निस्तार पार्बाको चाका-आम्का तियार पाहि।

¹⁴ जेलाउ भोज चाका बेला जेङका हिघाहि, येसु तेन्हे वाको चात्यागेलाइ दोफा भोज चालि योमहि।

¹⁵ येसु ताइको बारेता चात्यागेलाइहेङ दोअ्हि, का दुख कालाउ सिलि खान्तेङ लाम्फा दोङ नेलाइ दोफा योमतेङ निस्तार पार्बाको भोज चालि-आम्लि मन नेलाइ दोफा पाका हिघाखा।

¹⁶ हाइपालिपानु का नेलाइहेङ दोअ्खा, भबिस्यता परमेस्वरको सासनता याको आर्था पुर्न माजेङपा भरि का इदोइ निस्तार पार्बाको भोज माचाङका।

¹⁷ कालाउ वा ए जाम बात्ति आङगुरको जुस चुम्तेङ परमेस्वरहेङ धन्यबाद पिहि। कालाउ वा दोअ्हि इदोइ चुम्पुतेङ ता-ताइमिता बाख्राइसु।

¹⁸ हाइपालिपानु का नेलाइहेङ दोअ्खा, का परमेस्वरको सासन मालोपा भरि एला हेलाउ बुङ आङगुरको रस माआमाङका।

¹⁹ कालाउ न्हुसो येसु तोले चुम्तेङ, वा तोलेको भाअ्सिङ परमेस्वरहेङ धन्यबाद पिहि कालाउ पोङहि। वा इङको तोले चात्यागेलाइहेङ पिहि कालाउ वा दोअ्हि, इदोइ काङको जिउ। जेदोङ का नेलाइहेङ पिखा, कासेहेङ फोम पालिको भाअ्सिङ एसा पासु।

²⁰ एसापाङ चाअ्लि दोअ्तेङ, येसु बात्ति तोल्हेतेङ दोअ्हि, या बात्तिको माने नेलाइको भाअ्सिङ होपाका काङको हितिता परमेस्वर कालाउ वाको द्‍याङगेलाइको माझाता एनोङ नावा बाचा हि।

²¹ येसु दोअ्हि, नेलाइ मध्येसो हासु बुङ एमि कासेहेङ रिम्चापावा वाको खुर का दोफाङ चाङचाउकिता हि।

²² परमेस्वर जेदोङ योजाना बानाइका हि ओदोङ का द्‍याङको चान हानिलि गोयाङ कालाउ धिक्कार हि, जाइ कासेहेङ सेअ्लिको भाअ्सिङ रिम्पाखे।

²³ कालाउ न्हुसो चात्यागेलाइ ता-ताइमिता काथा पालि तेङहि, केलाइ मध्येसो हासु चाहि येसुहेङ एन्सा पाङ वाला?

²⁴ कालाउ ओबालाइ मध्येसो हासु चाहि झाराङ खान्तेङ माहान वाला दोअ्तेङ चात्यागेलाइता-ताइमिता नाइसुलि तेङहि।

²⁵ येसु ओबालाइहेङ दोअ्हि, सुमिङको राजागेलाइ ताइको प्रजागेलाइ ह्रुता सासन पावा, जेदोङ खाबारा चालाइकालाइ ताइमिहेङ उपकार दोअ्लि लागाइखे।

²⁶ कालाउ नेलाइ चाहि इन्सिका माजेङसु। नेलाइ मध्येसो जाइ बार्का हि, उङको म्हुइका दोङ जेनाको, कालाउ जाइ आगुवा हिकालाइ चाहि सेवा पाको।

²⁷ हाइपालिपानु चालि योम्का गिह्रि कालाउ चालि पिका चाकारियाता गिह्रि बार्का हि। कालाउ का ते नेलाइको माझाता चाकारिया भाइकाङ जेङका हिघा।

²⁸ नेलाइ चाहि काङको जाचता का दोफा हिसुना।

²⁹ जेसाङ काङको आबा कासेहेङ सासन पिका हि, कालाउ का बुङ नेलाइहेङ सासन पालि खाबारा प्याङका।

³⁰ कालाउकि काङको सासनता नेलाइ काङको दोफा योम्तेङ चास्वाना कालाउ आमस्वाना, कालाउ इस्राएल सारभिको तेन्हे कुलको न्याय पातेङ सिङहासनगेलाइता योमस्वाना।

येसु पतरुसहेङ सम्झाइहि

³¹ कालाउ न्हुसो येसु दोअ्हि, सिमोन ओइ सिमोन, हिङ नेलाइ झाराङहेङ साइतान परमेस्वर दोफा जाचिलि आनुमति ह्रेका हि, रेम्कासो मारेम्का खेनावा, जेसाङ एमि किसान बुङ गहमसो पिताना खेनावा।

³² कालाउ का प्रार्थाना पाका हिघा कि, नाङको खाङधुरि का ह्रुता नेलाइको खाङधुरि मागुमाइयाको दोअ्तेङ पाप पालि लाअ्सु कालाउ का दोफा घुरितेङ लोलाउ नाअ् इम्बालाइको का ह्रुता खाङधुरि पालि दादा-ओनेगेलाइहेङ बल्लियाका बानाइ।

³³ कालाउ पतरुस येसुहेङ दोअ्हि, हे प्रभु, का नाङको दोफा झ्यालखानाता हानिलि तियार हिघा, का नाअ् दोफाङ दोङ सिलि बुङ तियार हिघा,

³⁴ कालाउ येसु पतरुसहेङ दोअ्हि, “जातिङ भारि का नासेहेङ दोअ्खा, नानिङ न्हिसिन्ता धाङगाइ किया ओलि खान्तेङ लाम्फा दोङ, नाअ् कासेहेङ सुम्खे इन्कार मापाधाउ जुम्नि ह्रिमा धाइगाइकिया माओकाङ।”

³⁵ कालाउ येसु, चात्यागेलाइहेङ दोअ्हि, जेलाउ का नेलाइ द्‍याङगेलाइहेङ सुसमाचार हिङपालि, सिपि माकोसिङ, झोला कालाउ जुत्ता माकोसिङ दिङगिल्घा, हाइ नेलाइहेङ हाइको कमि जेङहि? चात्यागेलाइ जोबाफ पिहि केलाइ दोफा हाइ दोङ कमि माजेङहि।

³⁶ येसु ओबालाइहेङ दोअ्हि, कालाउ एला द्‍याङगेलाइ केलाइको बिरोधता हि। ओदोङ भाअ्सिङ सिपि हिकालाइ इङको चुम्पुसु, झोला हिकालाइ झोला चुम्पुसु, कालाउ दाब्बिया मान्थुनु बाहार होङका ताइको कोट पिसु कालाउ एनोङ दाब्बिया चोल्सु।

³⁷ का नासेहेङ या दोअ्ताङका हाइपालिपानु धर्मसास्तरता परमेस्वरको बक्ता काङको बारेता जेदोङ लेखेका हिघाहि इङको पुरा जेङलि गोयाङ: कालाउ द्‍याङगेलाइ वासेहेङ आपाराधि भाइपा ब्यभार पाहि। काङको बारेता जेदोङ लेखेका हि बास्ताबता इङको पुरा जेङका हि।

³⁸ चात्यागेलाइ दोअ्हि, हे प्रभु, खाङसु! इता न्हेनोङ दाब्बिया हि। येसु इम्बालाइहेङ दोअ्हि, इङको झोकोनु जेनाङ।

जैतुन तिकारता येसुको प्रार्थाना

³⁹ येसु यरुसेलेम सहर लाअ्तेङ कालाउ आरु बेला भाइपाङ दिनाङ जोसो जैतुन तिकार भारि हानिहि, वाको चात्यागेलाइ बुङ वाको दोअ्फाङ हानिहि।

⁴⁰ जेलाउ येसु इङको थामेता थुकाहि, वा चात्यागेलाइहेङ दोअ्हि, नेलाइ प्रार्थाना पातेङ हिसु, कालाउ जाचिकाता मापरेसु।

⁴¹ कालाउ येसु ओबालाइसो आसा दुरे हानिहि, कालाउ वा तिरु थोअ्तेङ प्रार्थाना पाहि,

⁴² हे आबा, जेसापा इदोङ नाङको मन हिनु, इदोइ कस्टको पहर काङकोसो हानिपापि। इदोइ नाङको मन बमोजिम ज्याको काङको इच्छा भाइका माको।

⁴³ कालाउ स्वर्गसो एमि स्वर्गदुत वासेहेङ बल कालाउ सहिलि दोका सरबुङ पिहि।

⁴⁴ येसु ब्याकुल जेङतेङ आरोङ हेन्जा प्रार्थाना पाहि, कालाउ वाको भेम्ति हितिको थोपा भाइपाङ भोनोइता ह्यातेङ हिघाहि।

⁴⁵ प्रार्थाना पातेङ लोलाउ येसु चात्यागेलाइहेङ मेनाङ सोक जेङनाङ हेन्जा निन्धा धुलाइतेङ जिम्तेङ हिका निङहि।

⁴⁶ येसु ओबालाइहेङ दोअ्हि, नेलाइ हाइ पालि जिम्तेङ हिसुन्हा? ल्होसु कालाउ जाचिकाता मापरिसु ओदोङ भाअ्सिङ प्रार्थाना पासु।

येसुहेङ रिम्का

⁴⁷ जेदोङ बेला येसु काथा पाकाताङ पालाउ, ए हुल द्‍याङगेलाइ इन्ता लोहि। तेन्हे चात्यागेलाइ मध्येसो एमि जाइहेङ यहुदा दोअ्घाखे, वा येसुको भेरपाङ वासेहेङ चुमाइ चालि लोहि।

⁴⁸ कालाउ येसु वासेहेङ दोअ्हि, ओइ यहुदा, का द्‍याङको चानहेङ चुमाइ चातेङ रिम्चापाखेना।

⁴⁹ येसुको चात्यागेलाइ बुङ इन्ता भेरपाङ जाअ्तेङ हिघाहि। इम्बालाइहेङ हाइ जेङदोङखे दोअ्का बुझिहि। कालाउ चात्यागेलाइ येसुहेङ हिअ्हि, हे प्रभु, हाइ केलाइ द्‍याङगेलाइ दोफा धुम पालि दाब्बिया चालाइलि गोयाङ?

⁵⁰ कालाउ ओबालाइ मध्येसो एमि चात्या वाको दाब्बिया होतेङ प्राधान पुजारिको चाकारियाको दामपाहाको न्हातोङ पुक्कापा पाल्पिहि।

⁵¹ येसु दोअ्हि, या लाअ्पि दोअ्तेङ उङको द्‍याङको न्हातोङ साइतेङ एल्पा पिहि।

⁵² येसु मुलि पुजारिगेलाइहेङ, मुन्दिरको पालेगेलाइहेङ कालाउ यहुदि आगुवागेलाइ दोअ्हि, हाइ का डाकु नेलाइ कासेहेङ खुकालाइ भाइपा लाठि, दाब्बिया चुम्तेङ कासेहेङ रिम्लि लोसुन्हा?

⁵³ का लिपाङ नेलाइ दोफाङ योम्तेङ मुन्दिरता धिर्पालाउ हाइ पालि मारिम्सुना कालाउ एला नेलाइको बेला हि, कालाउ दाकिलकिलकाको सासन चालाइका सोमोइ इदोइ दोङ।

पतरुस येसुहेङ मानाल्खा दोअ्का

⁵⁴ इम्बालाइ येसुहेङ रिम्तेङ चुम्पुहि, कालाउ वासेहेङ झाराङ खान्तेङ बार्का प्राधान पुजारिको साअ्ता चुम्पुहि। कालाउ पतरुस चाहि दुरेसोङ वाको न्हु-न्हु हानिहि।

⁵⁵ इन्ता सालेङको माझाता मे धोअ्तेङ द्‍याङगेलाइ मे एमलि जोम्तेङ हिघाहि। पतरुस बुङ ओबालाइ दोफाङ योम्हि।

⁵⁶ एमि चाकारिया बेजान मेको फाइसालामकाता वासेहेङ योमतेङ हिका तिङतेङ रेम्फा खाङहि, कालाउ दोअ्हि, “इदोइ द्‍याङ बुङ वाको दोफाङ हिघाहि।”

⁵⁷ कालाउ पतरुस एसा दोअ्तेङ इन्कार पाहि ओइ बेजान, “का वासेहेङ मानाल्खा।”

⁵⁸ एघुरिङता आरोङ भेनेङ बेजान वासेहेङ तिङतेङ दोअ्हि, नाअ् बुङ इम्बालाइ मध्येसो एमि। कालाउ पतरुस दोअ्हि, ओइ द्‍याङ, का माको।

⁵⁹ लगभग ए घान्टा न्हुसो भेनेङ एमि द्‍याङ दोअ्हि, निसित दोङ हि, इदोइ द्‍याङ वाको दोफाङ हिघाहि। हाइपालिपानु या बुङ गालिल जिल्लाको द्‍याङ दोङ हि।

⁶⁰ कालाउ पतरुस दोअ्हि, ओइ द्‍याङ नाअ् हाइ दोअ्तेङ हिना, का मागिखा, कालाउ वा काथा दोअ्काताङ पालाउ धाङगाइ किया ओहि।

⁶¹ कालाउ प्रभु घुरितेङ पतरुसहेङ खाङहि। कालाउ पतरुसहेङङ प्रभुको दोअ्का काथागेलाइ फोम जेङहि धाङगाइ किया ओलि लाम्फाङ कासेहेङ सुम्खे नाअ् कासेहेङ मानाल्लाना।

⁶² कालाउ न्हुसो पतरुस बाहार हानितेङ मन थुर्पातेङ खारहि।

येसुको आपामान

⁶³ जेलाउ येसुहेङ रिम्का द्‍याङगेलाइ वासेहेङ खुजालाइहि, कालाउ दानाइहि,

⁶⁴ वाको मिसियाँ थुम्पितेङ वासेहेङ हिअ्हि, “नासेहेङ दानाइकालाइ हासु? ते नाअ् परमेस्वरको बक्तानु दोअ्।”

⁶⁵ ओबालाइ वासेहेङ हेन्जा मन्दा माताका आरु हेन्जाङ काथागेलाइहोइ दोअ्हि।

येसु चाउघाराता साअ्को आगाता

⁶⁶ न्हु दिना झेङलि दोअ्का पहर इन्ता जोम्तेङ हिका द्‍याङगेलाइको मुलि पुजारिगेलाइ द्‍याङगेलाइको आगुवा, व्यवस्था धिरपाका द्‍याङगेलाइ ए दोफाङ लोहि। ओबालाइ येसुहेङ ताइको माहासभाता चुम्पुहि।

⁶⁷ नाअ् दोअ्, जेसापा नाअ् दोङ ख्रिस्ट हिना पानु, केलाइहेङ सत्ये दोअ्पि। येसु ओबालाइहेङ दोअ्हि, का दोअ्नु बुङ नेलाइ कासेहेङ खाङधुरि मापास्वाना।

⁶⁸ जेसापा का दोङ ख्रिस्ट हासु दोअ्तेङ हिअ्घा पानु? नेलाइ जोबाफ मापिस्वाना।

⁶⁹ कालाउ एला उसो, का द्‍याङको चान परमेस्वरको सरबुङको सिङहासनको साम्मानको थामेता योमाङका।

⁷⁰ कालाउ ओबालाइ झाराङ दोअ्हि, “एन्सा पानु हाइ नादोङ परमेस्वरको चान हिना?” येसु ओबालाइहेङ उत्तारा पिहि, “नेलाइ हाइ दोअ्सुखेना ओदोङ सहि हि।”

⁷¹ ओबालाइ दोअ्हि, केलाइहेङ एला आरोङ हाइको खाचो हि रो? हाइपालिपानु केलाइ नाङकोङ नुइसो हिङन्हाहोइ हिदोइ बुङ साक्सि मागोइयाङ।