लुका 2 - Dhimal NTयेसुको जोलोम ( मति 1:18-25 ) 1 इङको दिनाता रोमि साम्रात आगसतस दोङ ताइको गोताङ रोमि राइजि भरि झाराङ द्याङगेलाइको जनगरना पालि हुकुम पिहि। 2 इदोइ इङको बेला जेङहि जेलाउ कुरेनियस सिरिया प्रदेसको आधिकारि हिघाहि। या जनगरना चाहि लाङ पल्ति जेङका हिघाहि। 3 गोताङ द्याङगेलाइ ताइको पुर्खाको सहरगेलाइता मिङ लेखेपालि हानिहि। 4 योसेफ राजा दाउदको हारागुटियासो हिनाङ, वा गालिल जिल्लाको नासरत देरासो यहुदिया जिल्लाको बेथेलेहेम देराता हानिहि। हाइपालिपानु राजा दाउद इदोङ थामेता जोलोम जेङका हिघाहि। 5 योसेफ ताइको हामु तेअ्का बे मरियम दोफा मिङ दर्ता पालि हानिहि। 6-7 जेलाउ इम्बालाइ बेथलेहेमको देराता हिघाहि, इन्ता इम्बालाइको भाअ्सिङ हिदोइ बुङ हिका साअ् खालि मान्थुघाहि जेता पाक पिकालाइ हिलि द्वाको। ओदोङ भाअ्सिङ इम्बालाइ एनोङ ग्वालेङता हानितेङ हि। जेलाउ मरियमको तु निन्चाका बेला लोहि कालाउ वा एमि जामालको जोलोम पिहि। वा वासेहेङ चेन्थ्राता पोम्हि कालाउ वासेहेङ दोङगोता जिम्पाहि, जेता द्याङगेलाइ गपुसगेलाइको भाअ्सिङ नारा ह्वापिघाहि। लाखुरियागेलाइ कालाउ स्वर्गदुतगेलाइ 8 कालाउ बेथलेहेम देराको एनोङ चाउरता आधिमि लाखुरिगेलाइ भेडा ह्रुम्काताङ झेम्पाङ हिघाहि, 9 परमप्रभुको एमि स्वर्गदुत ओबालाइको आगाता तिङचाल्हाहि कालाउ परमप्रभुको महिमा ओबालाइको द्यापाहाङ चिल्का हि। कालाउ लाखुरिगेलाइ मारफाङ थिहि। 10 कालाउ उङको स्वर्गदुत ओबालाइहेङ दोअ्हि, माअ्थिसु! हाइपालिपानु का गोताङ द्याङगेलाइको भाअ्सिङ आनान्द पिका प्राचार चुमातेङ नेलाइकोता लोका हिघा। 11 हाइपालिपानु नानि दोङ राजा दाउदको सहर बेथेलेहेमता नेलाइको भाअ्सिङ एमि मुक्ति दाताको जोलोम जेङका हि, वा दोङ ख्रिस्ट प्रभु हि। 12 इदोइ चिन्हा सो नेलाइहेङ या थाहा जेनावा कि उङको जामाल हासु: नेलाइ जामालहेङ चेन्थ्राहोइ पोम्तेङ दोङगोता जिम्तेङ हिका निङस्वाना। 13 कालाउ आचानक इस्तुङ स्वर्गदुत दोफा स्वर्गदुतको दलगेलाइ तिङचाल्हाहि कालाउ परमेस्वरको बाखिन पातेङ ले लेलि तेङहि: 14 सर्बच्चा स्वर्गिय परमेस्वरहेङ महिमा, कालाउ प्रिथिबिता जेदोङ द्याङगेलाइ दोफा परमेस्वर खुसि हि, नेलाइहेङ सान्ति ज्याको। 15 जेलाउ उङको स्वर्गदुतगेलाइ लाखुरियागेलाइहेङ लाअ्हि कालाउ स्वर्ग भारि धुरितेङ हानिहि, कालाउ लाखुरिगेलाइ ता-ताइमिता दोअ्लि तेङहि, एला केलाइ बेथेलेहेम देराता हानाइने, कालाउ हाइ जेङका हि खानाइने, जाइको बिसोइता प्रभु केलाइहेङ दोअ्का हि। 16 कालाउ इम्बालाइ मा-मार्फा हानिहि इन्ता मरियम कालाउ योसेफहेङ दुसुहि, कालाउ उङको जामाल दोङगोता जिम्तेङ हिका तिङहि। 17 लाखुरियागेलाइ जामालहेङ तिङहि, कालाउ इम्बालाइ उङको जामालको बिसोइता स्वर्गदुत जेदोङ दोअ्का हिघाहि इङकोङ झाराङहेङ हिङपाहि। 18 जेलाउ इम्बालाइ लाखुरियागेलाइको काथा हिङहि, कालाउ इम्बालाइ झाराङ सक्क परिहि। 19 कालाउ मरियम इदोइ गोताङ काथागेलाइ ताइकोङ ह्रदयता ताअ्हि, कालाउ इङको बिसोइता सोचितेङ हि। 20 लाखुरिगेलाइ स्वर्गदुतको दोअ्का काथा भाइकाङ हिङलि कालाउ तिङलि निङकाता परमेस्वरको बाखिन पाकाताङ कालाउ महिमाता लेकाताङ ताइको भेडागेलाइ हिका थामेता घुरिहि। मुन्दिरता येसुको आरपन 21 जेलाउ जामाल येसु येए दिनाको जेङहि, वाको खाताना पाहि, कालाउ येसु मिङ ताअ्पिहि। इङको मिङ दोङ जेलाउ जामाल हामुता लोका लाम्फा दोङ स्वर्गदुत दोअ्का हिघाहि। 22 मोसाको व्यवस्था आन्सार जेलाउ मरियमको सुद्द जेङका दिना दोहि, योसेफ कालाउ मरियम जामाल येसुहेङ प्रभुको आगाता समरपन पापालि यरुसेलेम मुन्दिरता हानिहि। 23 प्रभुको व्यवस्थाता इसिका लेखेका हि, जेसापा हिदोइ बुङ जाहानता लाम्फोरतिको सान्तान वाजान चान जोलोम जेङनु वासेहेङ खेङतेङ प्रभुको भाअ्सिङ समरपन पालि गोइखे। 24 कालाउ ए जोरि कुर्जा माकुनु ए जोरि धाना पारेउ चढाइलि गोइखे। ओदोङ भाअ्सिङ इम्बालाइ प्रभुको व्यवस्था आन्सार इदोइ भोग पिलि यरुसेलेम मुन्दिर हानिहि। 25 इङको सोमोइता सिमियोन मिङ पाका एमि द्याङ यरुसेलेम मुन्दिरता हिघाहि, वा भक्त कालाउ धर्मि द्याङ हिघाहि। वा इस्राएल सारभिको द्याङगेलाइहेङ बान्चिपाका ख्रिस्ट ल्वाङ दोअ्का आस पातेङ ह्रुम्तेङ हिघाहि, जाइहेङ परमेस्वर दिङगिल्लि बाचा पाका हिघाहि कालाउ पबित्तरो आत्मा वाको दोफा हिघाखे। 26 प्रभु ख्रिस्टहेङ मातिङपा थेकापा नाअ् मासिस्वाना दोअ्तेङ वासेहेङ पबित्तरो आत्मा दोअ्का हिघाहि। 27 इङको दिना पबित्तरो आत्माको आगुवाइ निङतेङ सिमियोन मुन्दिरता हानिहि, कालाउ मोसाको व्यवस्थाको मुन्धुम आन्सार पुरा पालि मरियम कालाउ योसेफ जामाल येसुहेङ मुन्दिरता चुमाहि। 28 सिमियोन जामाल येसुहेङ कोल्हेता बाअ्हि कालाउ परमेस्वरहेङ बाखिन पाकाताङ दोअ्हि, सिमियोनको बाखिन 29 एला हे प्रभु, नाङको बाचा आन्सार का नाङको बान्धाइतिहेङ सान्ति दोफा सिलि पि। 30 हाइपालिपानु का उङको मुक्तिदाताहेङ तिङघा जाइहेङ नाअ् दोङ गोताङ द्याङगेलाइहेङ बान्चिपालिको भाअ्सिङ दिङगिल्का हिना। 31 जेदोङ नाअ् दोङ गोताङ द्याङगेलाइको आगाता तियार पान्हा। 32 वा दोङ गैर-यहुदिगेलाइको भाअ्सिङ परमेस्वरहेङ देखाल पाका फाइसालामका हिका हि। कालाउ इस्राएल सारभिको द्याङगेलाइको महिमा हिका हि। 33 जेलाउ जामाल येसुको बिसोइता सिमियोनसो इसिका दोअ्का काथा हिङहि कालाउ येसुको आमाइ कालाउ आबा भाङ-भाङहि। 34 कालाउ न्हुसो सिमियोन इम्बालाइहेङ आसिरबाद पितेङ वाको आमाइ मरियमहेङ दोअ्हि, इदोइ जामाल इस्राएल सारभिता हेन्जाङको उद्दार कालाउ पतनको कारन जेनावा। वासेहेङ परमेस्वर दोङ एनोङ चिन्हाको रुपता दिङगिल्का हि, कालाउ हेन्जाङ द्याङगेलाइ वाको बिरोध पावा। 35 ओदोङ भाअ्सिङ हेन्जा द्याङगेलाइको ह्रदयको बिचारगेलाइ थाहा जेनावा, कालाउ हेन्जाङ दुख भाइका एनोङ चुपि नाङको ह्रदयता बान्हातेङ हानावा। 36 इङको मुन्दिरता एमि हान्ना मिङ हिका बेराङ बेबाल वा एमि परमेस्वरको बक्तानि हिघाहि। वा आसेर कुलको फनुएलको चामिन्दि हिघाहि। वाको बिहु जेङका न्हि बासारताङ के सिहि। 37 एला वा द्या कुरि द्या बासारको हिघाहि, वा मुन्दिरता हिलि मालाअ्घाखे भरु बारिखे कालाउ प्रार्थाना पातेङ झेम्पाङ लिपाङ आराधाना पाघाखे। 38 वा बुङ मरियम कालाउ युसुफको भेरपा लोतेङ परमेस्वरहेङ धन्यबाद चढाइहि, वा चाहि यरुसेलेम सहरको द्याङगेलाइहेङ लाअ्पाका ख्रिस्टहेङ दिङगिल्लाका परमेस्वरहेङ ह्रुम्तेङ हिघाहि। 39 युसुफ कालाउ मरियम मोसाको व्यवस्था आन्सार गोताङ काम दोपाहि कालाउ इम्बालाइ गालिल जिल्लाको ताइकोङ नासरत देराता हानिहि। 40 जामाल येसु बाराकाताङ हानिहि कालाउ बल, बुद्दिहोइ पोङघातेङ हानिहि कालाउ परमेस्वरको आनुग्रह वाको दोफा हिघाहि। मुन्दिरता जामाल येसु 41 निस्तार पार्बाको बेला बासार किपाङ येसुको आमाइ कालाउ आबा यरुसेलेम सहरता हानिघाखे। 42 जेलाउ येसु तेन्हे बासारको जेङहि, वाको आमाइ-आबा दोफा पार्बाको मुन्धुम आन्सार मानाइलि हानिहि। 43 जेलाउ पार्बा दोहि इम्बालाइ साअ् भारि घुरिलाउ, कालाउ जामाल येसु चाहि यरुसेलेमताङ हि, वाको बिसोइता आमाइ-आबाहेङ बुङ हाइ दोङ थाहा माजेङहि। 44 ओबालाइ सोचिहि कि वाते जेरगेलाइ दोफा हि, ओदोङ भाअ्सिङ ओबालाइ लिपाङ तेतेङ हि, कालाउ वासेहेङ ताइको सानाइति कालाउ ताइको द्याङगेलाइ भारि भोलि तेङहि। 45 कालाउ मरियम कालाउ योसेफ वासेहेङ ओबालाइको माझाता मातिङलाउ ओबालाइ येसुहेङ भोलि यरुसेलेम भारि घुरिहि। 46 सुम दिनाता ओबालाइ वासेहेङ मुन्दिरको सालेङता निङहि, येसु मुन्दिरता गुरुज्युगेलाइ दोफा काथागेलाइ हिङकाताङ कालाउ प्रस्न पाकाताङ योम्तेङ हिघाखे। 47 कालाउ वा जेथे बुङ हिङहि, वाको ग्यान, बुद्दि कालाउ उत्तारा तिङतेङ झाराङ भाङ-भाङघाहि। 48 जेलाउ वाको आमाइ-आबा वासेहेङ निङहि कालाउ ओबालाइ भाङ-भाङहि। येसुको आमाइ वासेहेङ दोअ्हि, “चान, हाइ पालि नाअ् केलाइहेङ एसा पान्हा? नाङको आबा कालाउ का नासेहेङ भोलाउ मारफाङ दुखि हिघानाखे।” 49 कालाउ येसु इम्बालाइहेङ दोअ्हि, नेलाइ कासेहेङ हाइ पालि भोतेङ हिसुखेना? हाइ नेलाइ थाहा मागिसुखेना कि काङको आबाको साअ् जेता जेङखे का इन्ताङ हिलि गोयाङका। 50 कालाउ बुङ येसु दोङ दोअ्का काथाको आर्था इम्बालाइ बुझिलि मादोहि। 51 कालाउ येसु ओबालाइ दोफाङ नासरत देराता हानिहि। वा ताइको आमाइ-आबाको दोअ्का गोताङ काथागेलाइ किहि। वाको आमाइ इङको गोताङ काथागेलाइ मनता सोचितेङ ताअ्हि। 52 येसु सारिरिक रुपता कालाउ बुद्दिता बाराकाताङ हिघाहि, कालाउ परमेस्वर कालाउ द्याङगेलाइसो आनुग्रह निङतेङ हुर्कितेङ हानिहि। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation