लुका 19 - Dhimal NT

जक्कैको साअ्ता येसु

¹ येसु यरिहो सहर पातेङ हानिदोङघाखे।

² उङको सहरता एमि जक्कै मिङ पाका द्‍याङ हिघाहि, वा पोत ल्होपाकाको हाकिम हिघाहि कालाउ धनि हिघाहि।

³ वा येसुहेङ खाङलि भोअ्घाखे, जक्कै एकदम पतोका हिनाङ वा द्‍याङगेलाइको जेरसो येसुहेङ खाङलि मादोअ्घाखे।

⁴ वा येसुहेङ खाङलि आगा-आगा धाअ्तेसाङ हानितेङ एनोङ आन्जिरको सिङ ह्रुता ताङहि। येसु ओदोङ दामा पातेङ लोघाखे।

⁵ येसु सिङको भेरपा लोहि जेता जक्कै हिघाहि, येसु सिङ ह्रुता म्हाल्तेङ जक्कैहेङ दोअ्हि, ओइ जक्कै धेमाङ लेता खुअ्तेङ लौउ, नानि का नाङको साअ्ता हिलि आवस्यक हि।

⁶ कालाउ जक्कै धेमाङ सिङसो लेता खुअ्तेङ लोहि, कालाउ वा येसुहेङ ताइको साअ्ता लेङचातेङ स्‍वागत पाहि।

⁷ झाराङ द्‍याङगेलाइ इङको तिङहि, इम्बालाइ एसा दोअ्तेङ गुनगुनाइहि। खाङसु येसु इसिका पापि द्‍याङको साअ्ता बासा हिलि हानिखे।

⁸ चालि योमलाउ जक्कै प्रभु येसुहेङ जाअ्तेङ दोअ्हि, का गरिबगेलाइहेङ काङको आधा सम्पति प्याङका, जेसापा का हासुहेङ बुङ ठगेका हिघा पानु ओबालाइहेङ द्‍यागुना घुरि पाप्याङका।

⁹ कालाउ येसु वासेहेङ दोअ्हि, नानि इदोइ साअ्को द्‍याङगेलाइता मुक्ति लोका हि, हाइपालिपानु या बुङ आब्राहामको हारागुटिया दोङ हि।

¹⁰ हाइपालिपानु का द्‍याङको चान राम्का द्‍याङगेलाइहेङ भोअ्लि कालाउ आनान्त दन्डसो बान्चिपालि लोका हिघा।

सोनाको थुरिको निङपिका

¹¹ जेलाउ द्‍याङगेलाइ इङको काथा हिङतेङ हिघाहि, कालाउ येसु ताइको काथा दोअ्काताङ इम्बालाइहेङ एनोङ निङपिकासो दोअ्हि। हाइपालिपानु वा यरुसेलेम सहरको भेरपा हिघाहि, द्‍याङगेलाइ सोचेहि कि परमेस्वरको सासन लोलि तोम्का हि।

¹² वा दोअ्हि, एमि हिकाचाका द्‍याङ हेन्जा दुरे सारभिता हानितेङ राजा जेङतेङ घुरिलि बिचार पाहि।

¹³ ओदोङ भाअ्सिङ वा ताइको तेमि चाकारियागेलाइहेङ ए थामे जोम्पाहि। वा झाराङहेङ एनोङ-एनोङ सोनाको थुरि पिहि, कालाउ वा दोअ्हि, का घुरितेङ मालोपा भरि इदोइ नेलाइ ब्यापार पातेङ नाफा कामाइसु।

¹⁴ कालाउ ताइको सारभिता हिका आरु द्‍याङगेलाइ वासेहेङ मन्दा माताघाहि। कालाउ इम्बालाइ आधे ताइको सुसमाचार पिगिल्कालाइ एसा दोअ्लि दिङगिल्हि, केलाइ इदोइ द्‍याङहेङ राजा बानाइलि मन्दा मातानाखे।

¹⁵ कालाउ बुङ उङको द्‍याङहेङ राजा बानाइहि, जेलाउ वा ताइको सारभि घुरिहि वा दोअ्हि, उङको चाकारियागेलाइहेङ काइसु जाइ दोफा काङको ताका हि। का गिलि खाङखा इम्बालाइ इङको ताकासो हेथे थेकापा कामाइहि।

¹⁶ एतेङ लोका चाकारिया दोअ्हि, गिह्रि, नाङको एनोङ सोनाको थुरि पिकासो आरोङ ते सोनाको थुरि ताका कामाइघा।

¹⁷ गिह्रि चाकारियाहेङ दोअ्हि, स्याबास, नाअ् आसल चाकारिया हिना नाअ् म्हुइका काथाता खाङधुरि यग्यो हिना ओदोङ भाअ्सिङ का काङको तेलोङ सहरको सासन पालि नासेहेङ ताअ्ताङका।

¹⁸ न्हेतेङ चाकारिया लोतेङ दोअ्हि, गिह्रि, का नाङको पिका ए सोनाको थुरिसो का नालोङ सोनाको थुरि आरु कामाइघा।

¹⁹ गिह्रि उङको चाकारियाहेङ दोअ्हि, नाअ् बुङ नालोङ सहरगेलाइता सासन पाअ्‌।

²⁰ कालाउ न्हुसो भेनेङ चाकारिया लोतेङ गिह्रिहेङ दोअ्हि, खाङ नाङको पिका एनोङ सोनाको थुरि इता हि, का थुरिहेङ धाबाहोइ लुम्तेङ म्होतेङ ताअ्का हिघा।

²¹ का नाअ् दोफा मेनाङ थिघा, हाइपालिपानु नाअ् राङका द्‍याङ हिना। नाअ् दोङ माथिङसिङ चेखेना ताइमि माकामाइका बुङ चुम्पुखेना नाअ् दोङ चालाइ माबिसिङ सेका चेखेना।

²² कालाउ न्हुसो गिह्रि वासेहेङ दोअ्हि, नाअ् बेइमान चाकारिया हिना। का नासेहेङ नाङकोङ काथासो न्याय पाङका, नाअ् दोअ्न्हा कि का राङका द्‍याङ कालाउ माकामाइसिङ ह्रेखेना, कालाउ जेदोङ थिङका मान्थुन्हा इन्तासो सेका पेखेना।

²³ एन्सा पानु काङको ताका नाअ् ब्याजता हाइ पालि मालाघाइना? ब्याजता लागाइ पिनु का घुरितेङ लोलाउ हाइ दोङ माकोलाउ बुङ ब्याजते निङधाङका।

²⁴ कालाउ न्हुसो गिह्रि इन्ता जाअ्तेङ हिकालाइहेङ दोअ्हि, वाकोसो थुरि घिङतेङ ओदोङ तेलोङ थुरि हिकाहेङ पि।

²⁵ द्‍याङगेलाइ दोअ्हि, नेउ वाको दोफाते तेलोङ थुरि हिदोङ हि।

²⁶ का नेलाइहेङ दोअ्खा, जाइ दोफा हि वासेहेङ आझाइ हेन्जा प्याङ, कालाउ जाइ दोफा मान्थु वाको दोफा हिका आतुइसा बुङ धिनावा।

²⁷ का राजा जेङका खाङलि माकिका काङको सतुरुगेलाइहेङ इता चुमासु, कालाउ काङकोङ आगाताङ इम्बालाइहेङ सेअ्सु।

यरुसेलेम सहरता येसुको स्‍वागत

²⁸ या निङपिकासो येसु इदोइ काथा दोअ्लि दोअ्तेङ वा यरुसेलेम सहरता ताइको चात्यागेलाइता हानिहि।

²⁹ वा जैतुन मिङ हिका तिकार भेरपाको बेथफागे कालाउ बेथानिया देराता थुकाहि। वा ताइको न्हेमि चात्यागेलाइहेङ काइहि कालाउ,

³⁰ इम्बालाइहेङ दोअ्हि, इङको भेरपाको देराता हानेसु, देराता दुल्नासाङ नेलाइ हेलाउ बुङ हासु बुङ माधोल्का गधाको एनोङ चान धेउका तिङस्वाना। इङकोहेङ खाइतेङ चुमासु।

³¹ हासु बुङ हाइ पालि नेलाइ गधा खाइसुखेना? दोअ्तेङ नेलाइहेङ हिअ्नु, प्रभुहेङ याको खाचो हि, दोअ्सु।

³² उङको न्हेमि चात्यागेलाइ हानिहि, कालाउ वा जेसा इम्बालाइहेङ दोअ्का हिघाहि इन्सिकाङ निङहि।

³³ जेलाउ चात्यागेलाइ गधाको जोरोमदि खाइघाखे, गधाको गिह्रि चात्यागेलाइहेङ हिअ्हि, हाइ पालि नेलाइ गधा खाइसुखेन्हा?

³⁴ चात्यागेलाइ दोअ्हि, प्रभुहेङ या गधा गोइका हि।

³⁵ चात्यागेलाइ गधा येसुकोता चुमाहि, कालाउ ताइको धाबागेलाइ गधाको गान्धेता दाअ्हि, कालाउ येसुहेङ गधा ह्रुता धोल्पाहि।

³⁶ येसु गधा ह्रुता धोल्तेङ यरुसेलेम सहर भारि हानिहि। द्‍याङगेलाइ येसुको भाअ्सिङ ताइको धाबागेलाइ दामाता दाअ्पिहि।

³⁷ जेलाउ येसु यरुसेलेम सहरको भेरपाङ जैतुन तिकारको दोलाता थुकाहि। चात्यागेलाइको गोताङ जेर, ताइमिङ तिङका गोताङ सरबुङसाइका कामगेलाइको भाअ्सिङ हाउसाइकाताङ, परमेस्वरको बाखिन पाकाताङ बार्का गालाहोइ ह्रिकाइलि तेङहि,

³⁸ परमप्रभुको मिङता लोका राजा हेथे धन्यको हि, स्वर्गता सान्ति ज्याको कालाउ परमेस्वरको महिमा ज्याको।

³⁹ द्‍याङगेलाइको जेरसो फारिसिगेलाइ येसुहेङ दोअ्हि, गुरु ज्यु नाङको चात्यागेलाइहेङ सिकापा हिलि दोअ्।

⁴⁰ येसु जोबाफ पिहि, का नेलाइहेङ दोअ्खा, जेसापा काङको चात्यागेलाइ इङको काथा मादोअ्हे पानु उन्ठुइगेलाइ काङको महिमा पालि भाअ्सिङ र्ह्रिकाइयावा।

यरुसेलेम सहरको भाअ्सिङ येसु खारहि

⁴¹ जेलाउ येसु यरुसेलेम सहरको भेरपा लोहि, कालाउ वा इङको सहरको द्‍याङगेलाइहेङ तिङतेङ खारहि।

⁴² कालाउ वा दोअ्हि, जेसापा नादोङ इदोइ काथागेलाइ गिका नु रेम्का जेङधावा, जाइ नासेहेङ सान्तिमय बानाइखे, कालाउ एला नाअ् मातिनाना।

⁴³ हाइपालिपानु नाअ् ह्रुता इन्सिका दिना ल्वाङ, जेलाउ नाङको सतुरुगेलाइ नाङको कोरपाहाङ बेरेम धामावा कालाउ खोराइयावा कालाउ नासेहेङ गोराइयावा गोताङ थामे पाहासो थुनितेङ ताअ्तावा।

⁴⁴ नाङको सतुरुगेलाइ नासेहेङ पुर्न रुपता नासा पावा कालाउ नाङको गोताङ द्‍याङगेलाइहेङ सेअ्तावा। इम्बालाइ एनोङ उन्ठुइ ह्रुता भेनेङ उन्ठुइ बुङ बाकि मातातावा। हाइपालिपानु परमेस्वर नासेहेङ बान्चिपालि लोका सोमोइ वासेहेङ मानाल्न्हा।

येसु मुन्दिरता

⁴⁵ जेलाउ येसु परमेस्वरको मुन्दिरता हानिहि, कालाउ वा मुन्दिरता चोल्कालाइ कालाउ पिकालाइहेङ एसापा दोअ्काताङ दिगिल्हि,

⁴⁶ येसु इन्ता हिका द्‍याङगेलाइहेङ दोअ्हि, धर्मसास्तरता इसिका लेखेका हि, काङको साअ् प्रार्थाना पाकाको साअ्। कालाउ नेलाइ चाहि परमेस्वरको साअ्हेङ डाकागेलाइको आरडाङ बानाइसुन्हा।

⁴⁷ वा दिनाङ परमेस्वरको मुन्दिरको सालेङता सिक्स्या धिरपाका ताङ हिघाहि। कालाउ मुलि पुजारिगेलाइ, कालाउ व्यवस्था धिरपाका द्‍याङगेलाइ कालाउ जनताको बार्का द्‍याङगेलाइ वासेहेङ सेअ्लि खाङघाखे।

⁴⁸ इम्बालाइ वासेहेङ सेअ्लि हिदोइ बुङ उपाय निङलि मादोहि, हाइपालिपानु गोताङ द्‍याङगेलाइ येसुको काथाता ध्यान पातेङ हिङतेङ हिघाहि।