लुका 17 - Dhimal NT

पाप खाङधुरि कालाउ माफ

¹ येसु ताइको चात्यागेलाइहेङ दोअ्हि, जातिङ भारि द्‍याङगेलाइहेङ पापता फासिपाका काथागेलाइते आइपरिखे कालाउ नेलाइको भाअ्सिङ हेथे थिलि गोइका हि, पापता फासिपाका द्‍याङगेलाइहेङ।

² येसु आरोङ दोअ्हि, हासुहेङ बुङ ताइको निर्घाता जान्ता तोइतेङ समुन्द्रता थाल्लि मारेम्का साजाइ दोङ हि। कालाउ जेसापा हासु बुङ काङको ह्रुता खाङधुरि पाका इदोइ म्हुइकालाइको मध्ये एमिहेङ बाधा पिनु वासेहेङ इदोइ खान्तेङ मारेम्का साजाइ जेनावा।

³ ओदोङ भाअ्सिङ चङख हिसु, कि नाअ् हाइ पाखेना “हिदोइ बुङ द्‍याङ पाप पाहे पानु वासेहेङ चेर, कालाउ जेसापा वा पाप पालि लाअ्हे पानु नाअ् वासेहेङ स्यामा पि।

⁴ जेसापा हिदोइ बुङ द्‍याङ दिनाता न्हिखे नाङको बिरोधता पाप पाहे पानु, कालाउ वा न्हिखे दोङ नाङकोता घुरितेङ का पाप पालि लाअ्ताङका दोअ्नु, नाअ् वासेहेङ स्यामा पि।”

⁵ छाल्का चात्यागेलाइ प्रभु येसुहेङ दोअ्हि, “केलाइको खाङधुरि बाढेपापि।”

⁶ प्रभु येसु दोअ्हि, “जेसापा नाङकोता पासाइको चालाइ झोको बुङ आतुइसा खाङधुरि हिहे पानु, नेलाइ इदोइ मिचकिरिको सिङहेङ दोअ्लि दोअ्स्वाना, नाअ् ताइमिङ उन्हातेङ समुन्द्रता थिङन्हालि हाने, दोअ्नु बुङ, कालाउ इङको सिङ नेलाइको आग्या केमावा।

चाकारियाको कर्तब्य

⁷ जेसापा नाङको चाकारिया मिलिङ चोइतेङ माकुनु भेडा घोतेङ सिता लोखे, कालाउ नाअ् धेमाङ लोतेङ चालि योम दोअ्ताना रो?

⁸ कालाउ नाअ् ताइको चाकारियाहेङ दोअ्ताना, ‘काङको भाअ्सिङ चाका-आम्का तियार पाअ्‌, कालाउ काङको सेवा पालि तियार जेङ। जेलाउ का चालि-आम्लि दोअ्काङका कालाउ नाअ् चाअ् आम।’

⁹ नाअ् ताइको चाकारियाहेङ इङको काम पाकाता धन्यबाद माप्याना जेदोङ काम नाअ् आराइका हिघाखेना!

¹⁰ एन्साङ पातेङ नेलाइ बुङ ताइमिहेङ पालि दोअ्का गोताङ काम पालि दोतेङ नाअ् दोङ दोअ्लि गोयाना, ‘केलाइते आयोग्य चाकारिया खिनिङ हिनाहि, ताइमि पालि गोइका काम खिनिङ पाका हिनाहि।’”

तेमि रोग्या खोअ्कालाइ

¹¹ जेलाउ येसु कालाउ वाको चात्यागेलाइ यरुसेलेम सहर हानिका दामा हानिदोङघाहि, वा सामारिया जिल्ला कालाउ गालिल जिल्लाको सिमाना पाहासो हानिहि।

¹² येसु एनोङ देराता थुकाहि, इन्ता वासेहेङ तेमि दुन्दिया रोग्या खोका द्‍याङ तिङहि। उङको द्‍याङगेलाइ येसुको भेरपा लोलि मादोहि, कालाउ ओबालाइ दुरेसोङ जाअ्तेङ खाङहि।

¹³ बार्का तिराराइका गालाहोइ दोअ्हि, “हे येसु गुरु ज्यु, केलाइ ह्रुता दाया पाअ्‌।”

¹⁴ जेलाउ येसु उङको द्‍याङगेलाइहेङ तिङहि, वा ओबालाइहेङ दोअ्हि, “हानेसु, कालाउ पुजारिकोता हानितेङ ताइमिहेङ तिम्पासु।” जेलाउ उङको तेमि द्‍याङगेलाइ दामाता हानिकाताङ पालाउ एल्हि।

¹⁵ जेलाउ एमि द्‍याङ ताइमि एल्का थाहा निङहि, वा घुरितेङ येसुकोता हानिहि, कालाउ वा बार्का गालाहोइ परमेस्वरको बाखिन पाहि।

¹⁶ उङको येसुको खोकोइता पोम्भेलेतेङ धन्यबाद पिहि, उङको द्‍याङ एमि सामारि हिघाहि।

¹⁷ येसु दोअ्हि, “तेमि द्‍याङगेलाइ दोङ एल्हि माको रो? आरु क्वाहामि हिसो हि?”

¹⁸ या गैर-यहुदि द्‍याङ खिनिङ परमेस्वरहेङ धन्यबाद पिलि घुरिहि, आरु हासु बुङ माघुरिहि।

¹⁹ कालाउ येसु उङको गैर-यहुदिहेङ दोअ्हि, “ल्हो, कालाउ हाने, हाइपालिपानु नाअ् खाङधुरि पानाङ एल्ना।”

परमेस्वरको सासन

²⁰ आधिमि फारिसिगेलाइ येसुहेङ हिअ्हि, परमेस्वरको सासन हेलाउ ल्वाङ? कालाउ येसु ओबालाइहेङ दोअ्हि, परमेस्वरको सासन एसापा ल्वाङ कि नाअ् ताइको मिसियाँहोइ तिङलि माद्वाना।

²¹ ना ते द्‍याङगेलाइ दोअ्तावा, “खाङसु, परमेस्वरको सासन इता हि याते इन्ता हि। हाइपालिपानु परमेस्वरको सासन नेलाइकोङ माझाता हि।”

²² वा चात्यागेलाइहेङ दोअ्हि, इङको सोमोइ ल्वाङ, जेलाउ नेलाइ का द्‍याङको चानहेङ हिदोइ बुङ दिना खाङलि मन पास्वाना, कालाउ बुङ नेलाइ खाङलि मानिङस्वाना।

²³ द्‍याङगेलाइ नेलाइहेङ दोअ्तावा, खाङसु, ख्रिस्ट ओसो हि, माकुनु खाङसु, उङको इता हि। कालाउ इङको बेला नेलाइ इम्बालाइको लेसारा मापिताइसु।

²⁴ हाइपालिपानु का द्‍याङको चानको लोका दिनाता आकासता बिजुलि चिल्काका भाइका जेनावा, जेदोङ बादेल एकुन्हासो भेनेङ कुन्हाको थेकापा बिजुलि चिल्काका भाइका देखाल जेनावा।

²⁵ कालाउ या खाङतेङ लाम्फा, का द्‍याङको चान हेन्जा दुख कस्टगेलाइ सोहिलि गोयाङ कालाउ या पुस्ताको द्‍याङगेलाइसो कासेहेङ इन्कार पावा।

²⁶ का द्‍याङको चान लोलाउ बुङ एन्साङ जेनावा जेदोङ केलाइको पुर्खा नुहाको सोमोइता जेङका हिघाहि।

²⁷ नुहाको सोमोइता, जेलाउ थेकापा नुहा नाउता मादुल्पा भरि द्‍याङगेलाइ चाघाखे, आम्घाखे, बिहु पादोङघाखे, कालाउ ले, लेघाखे, जेलाउ बाने लोहि कालाउ गोताङ नासा हि।

²⁸ या बुङ एसा पातेङ केलाइको पुर्खा लोतको सोमोइता भाइपाङ जेनाङ। जाइ सदोम सहरता हिघाखे कालाउ द्‍याङगेलाइ चादोङघाखे, आम्दोङघाखे, चोल्दोङघाखे, पिदोङघाखे, थिङदोङघाखे कालाउ ताइकोङ भाअ्सिङ साअ्गेलाइ धामदोङघाखे।

²⁹ इङको दिना जेलाउ लोत सोदोम सहर लाअ्हि द्‍याङगेलाइ इदोइ गोताङ पादोङघाखे। जेलाउ आकाससो मे कालाउ गन्धक हुल्हि कालाउ गोताङ सहरको द्‍याङगेलाइ नासा हि।

³⁰ जेलाउ का द्‍याङको चान थाहा माजेङका सोमोइता आरोङ ल्वाङका।

³¹ या इङको दिना भाइका जेनावा चाङघा साअ्ता हिकालाइ आनेमाने नानि लिता मान्हाको। एन्साङ हासु बुङ द्‍याङ मिलिङता हिहे पानु वा बुङ साअ् भारि माघुरियाको।

³² फोम पासु, लोतको बे हेङ हाइ जेङका हिघाखे।

³³ जेदोङ द्‍याङ ताइको प्रान बान्चिपालि खाङखे वा इङको मोअ्पावा। भरु हासु बुङ ताइको जिबन मोअ्पाखे वा इङको बान्चि पावा।

³⁴ का नेलाइहेङ दोअ्खा इङको बेला एनोङ चौकिता न्हेमि द्‍याङगेलाइ ए दोफाङ जिम्तेङ ह्यावा, एमिहेङ चुम्पावा कालाउ भेनेङहेङ लाअ्ध्यावा।

³⁵ न्हेमि बेबाल ए दोफाङ सिमता से उम सुतेङ ह्यावा, एमिहेङ चुम्पावा कालाउ भेनेङहेङ लाअ्ध्यावा।

³⁶ न्हेमि द्‍याङ मिलिङता ह्यावा, एमिहेङ चुम्पावा, भेनेङहेङ चाहि लाअ्ध्यावा।

³⁷ कालाउ चात्यागेलाइ येसुहेङ हिअ्हि, “इदोइ हिसो जेनाङ प्रभु?” येसु जोबाफ पिहि “जेथा सिका गाइ पिया हिखे, इन्ताङ सिघुनगेलाइ जोम्खे।”