लुका 15 - Dhimal NT

राम्का भेडाको निङपिका

¹ एखे पोत ल्होपाकालाइ कालाउ पापि दोअ्न्हाका द्‍याङगेलाइ हेन्जा जोसो येसुको सिक्स्या हिङलि लोहि।

² कालाउ इदोइ द्‍याङते पापिगेलाइहेङ स्‍वागत पाखे, कालाउ ओबालाइ दोफा चाखे दोअ्तेङ फारिसि कालाउ व्यवस्था धिरपाका द्‍याङगेलाइ गनगनाइलि तेङहि।

³ कालाउ येसु ओबालाइहेङ या निङपिकासो दोअ्हि,

⁴ “नेलाइ मध्ये हिदोइ द्‍याङ वाला, जाइको एसाइ भेडा मध्ये एनोङ भेडा राम्लाउ उनान्साइ भेडाहेङ चारिका थामेताङ लाअ्तेङ एनोङ राम्का भेडाहेङ मानिङपा धाउ इङकोहेङ भोअ्तेङ माह्यावा रो?

⁵ राम्का भेडा निङलि दोतेङ लेङचाकाताङ वा इङकोहेङ ताइको कान्धेता फाकावा।

⁶ कालाउ ताइको सिता लोतेङ वा ताइको सानाइतिगेलाइ कालाउ देरागेलाइहेङ काइयावा, कालाउ ओबालाइहेङ दोअ्तावा, का दोफा लेङचासु, हाइपालिपानु का ताइको राम्का भेडा निङका हिघा,

⁷ का नेलाइहेङ दोअ्खा, स्वर्गता मेनाङ आनान्द जेनावा जेलाउ एमि द्‍याङ पाप पालि लाअ्खे कालाउ उनान्सय इसिका द्‍याङगेलाइ जाइ ताइमिहेङ धर्मि सम्झिखे। जाइहेङ पासाताइलि आवस्यक मान्थु।

राम्का थुरिको निङपिका

⁸ आरोङ येसु भेनेङ निङपिकासो दोअ्हि, जेसापा एमि बेबाल दोफा तेलोङ चान्दिको थुरि हिघाहि कालाउ वा मध्येसो एनोङ राम्पाहि। कालाउ वा गेसा जोलाइतेङ, इङको मानिङपा भरि साअ्ता फेकावा कालाउ थुरि मानिङपा धाउ भोतेङ ह्यावा।

⁹ राम्का थुरि निङलि दोतेङ वा ताइको सानाइतिगेलाइ कालाउ देरागेलाइहेङ काइतेङ दोअ्तावा, का दोफा लेङचासु, ‘हाइ पानु का काङको राम्का चान्दिको थुरि निङघा।’

¹⁰ एसाङ दोङ का नेलाइहेङ दोअ्खा, ‘जेलाउ एमि पापि पाप पालि लाअ्खे कालाउ परमेस्वरको स्वर्गदुत स्वर्गता लेङचास्वावा।

राम्का चान

¹¹ कालाउ न्हुसो येसु आरोङ निङपिकासो दोअ्हि, एमि द्‍याङको न्हेमि चानगेलाइ हिघाहि।

¹² कान्सा चान ताइको आबाहेङ दोअ्हि, आबा केलाइको सम्पतिता काङको भागता जेथे आङस परिखे एला कासेहेङ पि। कालाउ आबा ताइको धन सम्पति उङको न्हेमि चानगेलाइहेङ बाखाराइ पिहि।

¹³ आले दिना न्हुसो कान्सा चान ताइको गोताङ सम्पति जोम्पाहि कालाउ वा दुरेको सारभिता हानिहि, इन्ता वा कु-कामता ताइको गोताङ ताका दोपाहि।

¹⁴ ताइमि दोफा जेथे हिघाहि गोताङ दोपाहि कालाउ इङको सारभिता आनिकाल जेङहि। कालाउ वाको दोफा चालिको भाअ्सिङ हाइ दोङ मान्थुघाहि।

¹⁵ कालाउ इन्ताको सारभिको एमि द्‍याङकोता काम पालि हानिहि। कालाउ वा वासेहेङ मिलिङता पायागेलाइ घोलि दिङगिल्हि।

¹⁶ उङको वाजान मेनाङ म्हितुनाङ वा पायाको आहार चालिको भाअ्सिङ बुङ खुसि हिघाखे। कालाउ बुङ वासेहेङ हासु बुङ हाइ बुङ मापिघाहि।

¹⁷ जेलाउ वाको बुद्दि लोहि कालाउ वा दोअ्हि, काङको आबाको हेन्जा ज्यालाता काम पाका चाकारियागेलाइ हि। ओबालाइ दोफा गेनेगेल्पा उम हि कालाउ का चाहि इता म्हितुपाङ सिलि तोमहोइघा।

¹⁸ का एला इतासो आबाकोता हानाङका, कालाउ का दोङ वासेहेङ दोअ्ताङका, हे आबा! का परमेस्वर कालाउ नाङको आगाता पाप पाघा।

¹⁹ का एला नाङको चान दोअ्लि सोबाइका मान्थुघा, कासेहेङ नाङकोङ एमि ज्याला पाका चाकारिया भाइपाङ ताअ्।’”

²⁰ एसापा उङको वाजान इङको सारभिसो घुरितेङ ताइको आबाहेङ भेतिलि हानिहि। जेलाउ निकोङ दुरेसो वाको आबा तिङहि, कालाउ वाको हृदय दायाहोइ भरिहि कालाउ वा ताइको चानहेङ भेतिलि धाअ्तेसाङ लोहि, कालाउ लेङचातेङ चानहेङ खोम्तेङ चुमाइ चाहि।

²¹ वाको चान वासेहेङ दोअ्हि, हे आबा, का परमेस्वर कालाउ नाङको आगाता पाप पाका हिघा। का नाङको चान दोअ्लि एला योग्यको मान्थुघा।

²² कालाउ वाको आबा ताइको चाकारियागेलाइहेङ काइतेङ आराइहि, मारफा! यासेहेङ रेम-रेम्का लोखोन धाबा चुमासु कालाउ यासेहेङ होङपासु। आङगुलिता आङखुति बुङ सुम्पासु, कालाउ खोकोइता जुत्ता बुङ सुम्पासु।

²³ कालाउ भोजको भाअ्सिङ तोइका गुपुस चुमासु, इङकोहेङ सेअ्सु, कालाउ केलाइ चातेङ खुसि मानिपाइने।

²⁴ हाइपालिपानु इदोइ काङको चान सिका भाइका हिघाहि, कालाउ एला वा बान्चितेङ घुरितेङ लोका भाइका हि। वा राम्का हिघाहि, कालाउ एला वासेहेङ निङका हि। ओदोङ भाअ्सिङ इम्बालाइ भोजको तियार पालि तेङहि।

²⁵ ओदोङ बेला वाको जेथा चान मिलिङता काम पाघाखे, वा सिता घुरितेङ लोलाउ वा तुन्जाइ धुइपाअ्तेङ न्हाका तोङका हिङहि।

²⁶ ओदोङ भाअ्सिङ जेथा चान एमि चाकारियाहेङ काइतेङ हिअ्हि, इदोइ गोताङ हाइ जेङतेङ हि हा।

²⁷ चाकारिया जोबाफ पिहि, नाङको ओने घुरितेङ साअ्ता लोका हि, नाङको आबा भोजको भाअ्सिङ तोइका गुपुस सेअ्लि लागाइका हि, हाइपालिपानु नाङको ओने रेम्फाङ घुरितेङ लोकाता वा मेनाङ लेङचाका हि।

²⁸ उङको जेठा चान इङको हिङतेङ हेन्जा चेर ताम्पाहि कालाउ साअ् लिता मानिहि। ओदोङ भाअ्सिङ वाको आबा लोतेङ वासेहेङ साअ्ता लिता लोलि बिन्ति पालि तेङहि।

²⁹ उङको चान आबाहेङ जोबाफ पिहि, का वथे हेन्जा बासार थेकापा चाकारिया भाइपाङ नाङको सेवा पाघा। नाङको पिका गोताङ आग्यागेलाइ केम्घा कालाउ नाअ् काङको भाअ्सिङ हेलाउ बुङ काङको सानाइतिगेलाइ दोफा भोज मानिपालि एनोङ बुङ पान्ठा मापिन्हा।

³⁰ उङको नाङको चान ताइको गोताङ धन-सम्पति कासिबिरिगेलाइको सङगतता लागितेङ गोताङ होइपाहि, कालाउ वा साअ् घुरितेङ लोलाउ चाहि तोइका गुपुस सेअ्तेङ भोज लागाइन्हा।

³¹ “कालाउ आबा चानहेङ दोअ्हि, ‘ओइ चान, नाअ् ते दिनाङ का दोफाङ हिना, काङकोता हिका गोताङ धन-सम्पति नाङको दोङ हि।

³² कालाउ केलाइ झाराङ लेङचाइने कालाउ भोज चाइने हाइपालिपानु नाङको इदोइ ओने सिका भाइका हिघाहि, कालाउ एला वा बान्चितेङ घुरितेङ लोका भाइका हि, वा राम्का हिघाहि, कालाउ एला वासेहेङ निङका हिनाहि।’”