लुका 14 - Dhimal NT

येसु एमि फारिसिको साअ्ता

¹ एनि परमेस्वरको पबित्तरो दिनाता, येसु एमि आगुवा फारिसिको साअ्ता उम चालि हानिहि। इन्ता हिका द्‍याङगेलाइ वासेहेङ हिदोइ बुङ दुसिका निनाङबे दोअ्तेङ दाउ भोघाखे।

² इन्ता एमि खुर-खोकोइ इम्का द्‍याङ हिघाहि।

³ येसु फारिसिगेलाइहेङ कालाउ व्यवस्था धिरपाका द्‍याङगेलाइहेङ हिअ्हि, “परमेस्वरको पबित्तरो दिनाता केलाइको व्यवस्था आन्सार द्‍याङगेलाइहेङ एल्पालि आनुमति हि कि मान्थु?”

⁴ कालाउ इम्बालाइ हाइ दोङ माअ्दोहि। ओदोङ भाअ्सिङ येसु उङको द्‍याङ ह्रुता ताइको खुर ताअ्तेङ एल्पा पिहि कालाउ हानिलि पिहि।

⁵ कालाउ येसु इम्बालाइहेङ दोअ्हि, “जेसापा नेलाइको चान माकुनु पिया एनोङ च्वाता वाल्लानु परमेस्वरको पबित्तरो दिनाता इङकोहेङ झटै माओल्ला पास्वाना रो?”

⁶ कालाउ इम्बालाइ हाइ बुङ दोअ्लि मादोअ्हि।

⁷ जेता आदारनिय द्‍याङगेलाइ भोजता योम्खे इन्ता, लोका बान्सालाइ साम्मानको थामे साल्तेङ हिका तिङतेङ येसु निङपिकासो एनोङ काथा दोअ्हि।

⁸ जेलाउ हासु बुङ नासेहेङ बिहुको भातियारता नेउता पिनु साम्मानको थामेगेलाइ साल्तेङ मायोम्सु। उङको द्‍याङ नेलाइ खान्तेङ बुङ आदारनिय द्‍याङहेङ नेउता पिका हिलि द्वाङ।

⁹ कालाउ जेसापा नाअ् साम्मानको थामेता योम्तेङ हिना पानु नेउता पिका द्‍याङ नासेहेङ दोअ्तावा, “इङको थामे आदारनिय द्‍याङहेङ पि दोअ्तेङ योम्तेङ हिका थामेसो ल्होपावा। इङको बेला नाअ् लेदेरतेङ झाराङ खान्तेङ लेता योम्लि गोयाना।

¹⁰ ओदोङ भाअ्सिङ जेलाउ हिदोइ बुङ द्‍याङ नासेहेङ नेउता पिहे पानु झाराङ खान्तेङ लेता योम। जेलाउ नेउता पिका द्‍याङ लोतेङ दोअ्तावा ‘ए सानाइति नाअ् सम्मानको थामेता योम।’ ओदोङ बेला झाराङ बानसालाइ नासेहेङ बार्का आदार पावा।

¹¹ हाइपालिपानु हासु बुङ ताइमिहेङ बार्का बानाइखे, वासेहेङ लेता हु्ल्पावा, कालाउ ताइमिहेङ लेता हुल्पाका चाहि बार्का बानाइयावा।”

¹² कालाउ न्हुसो येसु, वासेहेङ नेउता पिकालाइहेङ बुङ दोअ्हि, जेलाउ हिदोइ बुङ दिना नेलाइ ह्रिमा माकुनु बेलालाउ भोज चापालि मन पासुन्हा पानु, एन्सालाउ ताइको सानाइतिगेलाइ, दादा-ओनेगेलाइ, ताइकोगेलाइ, कालाउ धनि देरागेलाइहेङ खिनिङ माकाइ। माकुनुते इम्बालाइ बुङ खिल्का तिरिलि नासेहेङ बुङ भोजता काइयावा।

¹³ जेलाउ हिदोइ बुङ इन्सिका भोज नाअ् पाना, उङको गरिब, खुर-खोकोइ माचोलिका, लेङग्रा, कालाउ कान्हागेलाइहेङ काइसु।

¹⁴ कालाउ न्हुसो नाअ् धन्यको जेनाना, हाइपालिपानु खिल्का तिरिलि इम्बालाइ दोफा हाइ दोङ मान्थुवावा। जेलाउ धर्मि द्‍याङ स्यावा कालाउ सिकासो सिन्हुतावा, एन्सालाउ परमेस्वर वासेहेङ इनाम प्यावा।

बार्का भोजको निङपिका

¹⁵ येसु दोअ्लि दोअ्तेङ वाको दोफाङ चालि योम्का द्‍याङगेलाइ मध्येसो एमि द्‍याङ दोअ्हि, जाइ परमेस्वरको सासनता भोज चालि निनावा “उङको धन्यको जेनावा।”

¹⁶ येसु उङको द्‍याङहेङ दोअ्हि, हिदोइ बुङ एमि द्‍याङ दिलिमा एनोङ बार्का भोज जुराइका हिघाहि, वा हेन्जा द्‍याङगेलाइहेङ नेउता पिहि।

¹⁷ जेलाउ भोज चाका बेला जेङहि, उङको द्‍याङ ताइको चाकारिगेलाइहेङ नेउता पिकालाइहेङ काइलि दिङगिल्हि, लोसु गोताङ आनेमाने तियारि हि।

¹⁸ कालाउ इम्बालाइ झाराङ ए खाल्को बाहाना बानाइहि। लाम्फाको द्‍याङ दोअ्हि, का आन्चा खिनिङ एनोङ मिलिङ चोल्का हिघा मिलिङ खाङलि का हानिलि गोयाङ दाया पातेङ माफ पि।

¹⁹ भेनेङ द्‍याङ दोअ्हि, का आन्चा खिनिङ ना जोर पिया चोल्का हिघा, ओदोङ भाअ्सिङ का इम्बालाइहेङ काम धिरपालि हानिलि गोयाङ। कासेहेङ दाया पातेङ माफ पि।

²⁰ सुम्तेङ द्‍याङ दोअ्हि, का आन्चा खिनिङ बिहु पाका हिघा, का लोलि मादाङका।

²¹ कालाउ न्हुसो उङको चाकारिया घुरिहि, वा ताइको गिह्रिहेङ गोताङ काथागेलाइ हिङपाहि, गिह्रि मेनाङ चेर ताम्पाहि कालाउ दोअ्हि, मार्फा हानेसु सहरको कुन्हा, कापचा चेका दामा भारि कालाउ गरिब द्‍याङगेलाइहेङ, लेङग्रा, कालाउ कान्हाँ, माकुनु खुर खोकोइ माचोलिकालाइहेङ चुमासु।

²² कालाउ उङको चाकारिया गिह्रिहेङ दोअ्हि, गिह्रि मालिक, नाअ् जेदोङ दोअ्का हिघाखेन्हा, इङको का पाघा कालाउ बुङ आरोङ आरु द्‍याङगेलाइहेङ योम्पाका थामे हि।

²³ “गिह्रि चाकारियाहेङ दोअ्हि, ‘मुल दामा भारि कालाउ देराको दामा भारि हानेसु द्‍याङगेलाइहेङ इता लोलि दोअ्सु कालाउकि साअ् पोङघाताको का नेलाइहेङ दोअ्खा।

²⁴ हाइपालिपानु का नेलाइहेङ दोअ्खा, काङको भोजता जाइहेङ लाम्फा नेउता पिका हिघाहि इम्बालाइ मध्ये हासु बुङ का दोफा भोज चाखिलि मानिनाङ।’”

चात्यागेलाइ तिरिलि गोइका मोल

²⁵ एनि द्‍याङगेलाइको बार्का जेर येसु दोफाङ दामाता हानिदोङघाखे वा दोङ इम्बालाइहेङ घुरितेङ दोअ्हि,

²⁶ जेसापा हासु बुङ द्‍याङ का दोफा लोहे पानु, कालाउ कासेहेङ खान्तेङ हेन्जा वाको आबा, आमाइ, बे, चान-चामिन्दि, दादा-ओने, कालाउ बाइ-बेजान ओनेगेलाइहेङ प्रेम पाहे पानु, उङको द्‍याङ काङको चात्या जेङलि मादावा।

²⁷ जेसापा हासु बुङ ताइको क्रुस माफासिङ कासेहेङ पिताइनु उङको द्‍याङ काङको चात्या जेङलि मादावा।

²⁸ जेसापा नाअ् एनोङ धरहरा बानाइलि भोखेना पानु, नाअ् लाम्फा ताका थेमाङबे-माथेमाङ योम्तेङ हिसाब पालि गोइखे, हेथे खार्चा लागिखे, गोताङ हिसाब लाम्फा दोङ पालि मागोइखे रो?

²⁹ जेसापा वा एन्सा मापाहि पानु, उङको द्‍याङ जग योम्पावा कालाउ धरहरा दोपालि सक्स्यम माजेनावा।

³⁰ इम्बालाइ दोअ्तावा, इदोइ द्‍याङ धरहरा धाम्लि तेङहि कालाउ पुरा पालि चाहि मादोहि।

³¹ जेसापा हिदोइ बुङ राजा ते-हाजार द्‍याङगेलाइ दोफा भेनेङ ए कुरि हाजार द्‍याङगेलाइ हिका राजा दोफा धुम पालि लोनु वा झाराङ खान्तेङ लाम्फा सभाता योम्तेङ फाइसाला पावा, कि वा भेनेङ राजाको सामाना पालिको भाअ्सिङ वा सरबुङसाइका हि या मान्थु।

³² जेसापा वा उङको राजाहेङ जितिलि मादोअ्नु वा ताइको द्‍याङगेलाइहेङ राजाकोता मिलिलि द्वाङबे दोअ्तेङ बुझिलि दिङगिल्खे।

³³ एन्साङ दोङ नेलाइ मध्ये जाइ काङको भाअ्सिङ गोताङ काथागेलाइ मालाअ्खे वा दोङ काङको चात्या जेङलि माद्वाङ।

माताइका देसे

³⁴ देसेते एनोङ आवस्यक आमेने दोङ हि, कालाउ देसे दोङ चेचेका जेङनु हाइहोइ ताइका बानाइलि, कालाउ देसेको दोङ ताइको स्वाद राम्हे पानु इङको बेकामको जेनावा, कालाउ इङकोहेङ आरोङ ताइका बानाइलि मादोखे।

³⁵ इङको ना ते मिलिङहेङ मलको भाअ्सिङ काम लागिखे। द्‍याङगेलाइ इङकोहेङ एन्साङ बाहार थाइगिल्खे। जाइ काङको या काथा हिङदोङखे, वा इङको काथाहेङ ध्यान पितेङ हिनाको।