लुका 13 - Dhimal NT

पाप पालि लाअ्सु माकुनु बिनास

¹ येसुहेङ इङको बेला आधिमि गालिलि जिल्लाको द्‍याङगेलाइको बिसोइता हिङपालि लोहि, जाइको हिति पिलातस इम्बालाइको भोग जेङतेङ हिका गपुसको हिति दोफा मिसालाइ पिका हिघाहि।

² कालाउ येसु इम्बालाइहेङ जोबाफ पिहि, हाइ नेलाइ सोचिसुखेना कि इङको गालिलिगेलाइ खान्तेङ आरु झाराङ गालिलिगेलाइ हेन्जा पापि हिघाहि? हाइपालिपानु इम्बालाइ ह्रुता इसिका बिपति परिहि।

³ का नेलाइहेङ दोअ्खा, एन्सा माको, भरु नेलाइ दोङ ताइको पाप पालि मालासुन्हा पानु नेलाइ झाराङ एन्साङ दोङ हान्ति जेङस्वाना।

⁴ सिलोआमको धरहरा इम्बालाइ ह्रुता हुल्लाउ तेक्वा झना सिलाउ द्‍याङगेलाइको बिसोइता नेलाइ हाइ सोचि सुखेन्हा? हाइ नेलाइ इम्बालाइहेङ यरुसेलेम सहरको आरु द्‍याङगेलाइ खान्तेङ हेन्जा आपाराधि सम्झि सुखेन्हा?

⁵ का नेलाइहेङ दोअ्खा, एन्सा माको, भरु नेलाइ दोङ ताइको पाप पालि मालासुन्हा पानु नेलाइ झाराङ एन्साङ दोङ हान्ति जेङस्वाना।

फल मासेका सिङ

⁶ कालाउ येसु एनोङ निङपितेङ दोअ्हि, एमि द्‍याङको एनोङ लाब्राको सिङ हिघाहि। इङको सिङहेङ वा ताइकोङ आङगुरको बारिता थिङका हिघाहि। उङको द्‍याङ फल सेहिबे दोअ्तेङ बासार किपाङ खाङलि लोहि, कालाउ इन्ता हाइ बुङ मानिङहि।

⁷ इङको लाब्राको बारिता काम पालि ताअ्का चाकारियाहेङ दोअ्हि, का सुम बासारसोङ इदोइ लाब्राको सिङता फल सेका हिबे दोअ्तेङ का दामा खाङतेङ हिघाखा कालाउ फल मासेहि। यासिहेङ पाल्पि, हाइपालिपानु या रेम्का मिलिङ खेर हानिका हि?

⁸ कालाउ चाकारिया जोबाफ पिहि, गिह्रि, आरोङ ए बासार या सिङहेङ ताअ्ताइने कासेहेङ याको कोरपाहाङ तोतेङ मल लागाइलि पि।

⁹ जेङलि, दोअ्हे पानु लोका बासार इदोइ सिङ आवस्यकबुङ फल प्याङ, जेसापा एन्सालाउ थेकापा बुङ फल मासेनु नाअ् इङको सिङहेङ पाल्पि।

परमेस्वरको पबित्तरो दिनाता एल्पाका

¹⁰ परमेस्वरको पबित्तरो दिना येसु एनोङ यहुदिगेलाइको चाउघारा साअ्ता सिक्स्या पिकाताङ हिघाहि।

¹¹ कालाउ चाउघारा साअ्ता एमि बेबाल हिघाहि, भुत-आत्मासो वासेहेङ तेक्वा बासार थेकापा कुकुरुका पाका हिघाहि, कालाउ वा सोझा जाअ्लि मादोअ्घाखे।

¹² जेलाउ येसु वासेहेङ तिङहि ताइको दोफा काइतेङ दोअ्हि, ओइ बेबाल, नाअ् नाङको बेथासो एल्होइना।

¹³ कालाउ येसु वाको ह्रुता खुर ताअ्हि, कालाउ वा ओदोङ घुरि सोझाका जेङतेङ परमेस्वरको बाखिन पाहि।

¹⁴ परमेस्वरको पबित्तरो दिना येसु उङको बेबालहेङ एल्पानाङ यहुदिगेलाइको चाउघारा साअ्को सासक येसु दोफा चेर ताम्पाका हिघाहि। वा इन्ता जोम्का द्‍याङगेलाइहेङ दोअ्हि, आथारता तुनि काम पान्हाखे। ओदोङ भाअ्सिङ इदोइ तुनि दिनाता लोतेङ एल्सु, परमेस्वरको पबित्तरो दिनाता माको।

¹⁵ प्रभु येसु वासेहेङ जोबाफ पिहि, ओइ कपटिगेलाइ, नेलाइको गाइ, पिया कालाउ गधाहेङ खाइतेङ चि आम्पालि परमेस्वरको पबित्तरो दिनाता माचुम्पु सुखेन्हा रो?

¹⁶ उङको बेबाल जाइ आब्राहामको हारागुटियासो हिघाहि, वासेहेङ साइतान तेक्वा बासार थेकापा बन्धनता ताअ्हि। हाइ परमेस्वरको पबित्तरो दिनाता वासेहेङ बन्धनसो लाअ्पाका काम ठिक मान्थुघाखे रो?

¹⁷ जेलाउ येसु एसापा दोअ्हि, वाको बिरोधिगेलाइ लेदेरहि। कालाउ द्‍याङगेलाइको जेरसो येसु माहान काम पाका तिङतेङ हाउसाइहि।

पासाइको चालाइ कालाउ साउरि

¹⁸ कालाउ न्हुसो येसु दोअ्हि, “परमेस्वरको सासन इदोइ प्रकारसो तुलाना पालि द्वाङ।

¹⁹ परमेस्वरको सासन हिदोइ बुङ द्‍याङ ताइको बारिता पासाइको चालाइ बिखे, कालाउ इङको चालाइ योतेङ बाराखे कालाउ गोताङ सारसिङगेलाइ खान्तेङ बार्का सिङ जेङहि। कालाउ आकासको जिहाँ-जुइलेङगेलाइ वाको दालेङगेलाइता भाअ्सा जोखे।”

²⁰ येसु आरोङ दोअ्हि, का परमेस्वरको सासनहेङ हाइ दोफा तुलाना पालि एला?

²¹ इङको खमिर भाइका, जेदोङ एमि बेबाल आतुइसा साउरि चुम्तेङ सुम पाथि झोको तोलेता मिसालाइखे कालाउ गोताङ तोले साउरि जेङखे। एन्साङ पातेङ परमेस्वरको सासनको प्रभाब आधे द्‍याङगेलाइ पाहासो पुराङ सुमिङता चार-चाराइखे।

चेसुमेसुका फिनु

²² येसु ताइको चात्यागेलाइ दोफा गोताङ देरा-देरा कालाउ सहर-सहरगेलाइता द्‍याङगेलाइहेङ सिक्स्या पिकाताङ यरुसेलेम सहर हानिघाखे।

²³ एमि वासेहेङ दोअ्हि, “हे प्रभु” हाइ परमेस्वर आधिमि द्‍याङगेलाइहेङ खिनिङ आनान्त कालको दन्डसो बान्चि पावा? कालाउ येसु वासेहेङ दोअ्हि,

²⁴ चेका फिनुसो परमेस्वरको सासनता दुल्लि कोसिस पासु, हाइपालिपानु का नेलाइहेङ दोअ्खा, इतासो हेन्जा द्‍याङगेलाइ दुल्लि कोसिस पाखे, कालाउ बुङ दुल्लि मादोखे।

²⁵ जेलाउ परमेस्वर जेदोङ साअ्को ग्रिह्रि ताइको साअ्को फिनु गि:का हिनु नाअ् बाहार जाअ्तेङ फिनु ढ्कढ्क पाकाताङ बिन्ति पातेङ दोअ्ताना, प्रभु, केलाइको भाअ्सिङ फिनु हेअ्पि कालाउ उङको दोअ्तावा, का मानाल्खा, नेलाइ हिसोसो लोका हिसुना।

²⁶ कालाउ नेलाइ दोअ्लि तेङस्वाना, केलाइ ए दोफाङ चानाहि आम्न्हाहि, कालाउ दामागेलाइता नाअ् धिरपाना।

²⁷ कालाउ वा आरोङ दोअ्हि, का नेलाइहेङ मानाल्खा, नाअ् हिसोसो लोका हिना? कासो दुरे हाने। नेलाइ झाराङ दुस्ट काम पासुखेना।

²⁸ “नेलाइ परमेस्वरको सासनता आब्राहाम, इसाहाक, याकुब कालाउ गोताङ परमेस्वरको बक्तागेलाइहेङ भेतिस्वाना। कालाउ बुङ ताइमिहेङ बाहार थाइल्गिका तिङस्वाना। कालाउ इन्ता इम्बालाइ जिउधाइ ल्होपाङ खाराङ कालाउ तासिङ जिताङ।

²⁹ जेलाउ द्‍याङगेलाइ सुमिङ भरिसोङ, ल्वावा कालाउ परमेस्वरको सासनता इम्बालाइ वाको दोफा योम्तेङ भोज चालि योमावा।

³⁰ खाङसु, न्हुसो लोकालाइ चाहि लाम्फा जेनावा, कालाउ लाम्फा लोकालाइ चाहि न्हुसो जेनावा।”

³¹ ओदोङ घुरि आधिमि फारिसिगेलाइ येसुकोता लोहि कालाउ दोअ्हि, इदोइ थामे लाअ्तेङ भेनेङ थामे हाने, हाइपालिपानु नासेहेङ राजा हेरोद सेअ्लि खाङखे।

³² येसु इम्बालाइहेङ दोअ्हि, हानेसु कालाउ उङको द्‍याङहेङ दोअ्पि जाइ एमि स्याइले भाइपा चतुराइ हि, नानि कालाउ जुम्नि द्‍याङगेलाइता हिका भुत-आत्मागेलाइ दिङगिल्लाङका कालाउ मासाधेका मिसा लोकालाइहेङ एल्पाका काम पाङका, कालाउ सुम्निको दिना, काङको गोताङ काम दोपाङका।

³³ कालाउ नानि, जुम्नि कालाउ इतिनि का काङको पाक पालि आगा साराइलि गोयाङ, हाइपालिपानु एमि परमेस्वरको बक्ता यरुसेलेम सहरता सेअ्न्हाङ।

यरुसेलेम सहरको भाअ्सिङ येसु मन तुपाका

³⁴ ओइ यरुसेलेम, सहरको द्‍याङगेलाइ! नाअ् परमेस्वरको बक्तागेलाइहेङ सेअ्सुखेना, कालाउ परमेस्वरको दिङगिल्कालाइहेङ उन्ठुइहोइ तोअ्सुखेना। जेसाङ कियाको भुन्दि किचानगेलाइहेङ पोमावा का बुङ नाङको चान-चामिन्दिगेलाइहेङ बान्चिपालि खाङघा कालाउ नाअ् माकिन्हा।

³⁵ खाङसु, नाङको साअ् भाइ भाइयावा का नासेहेङ दोअ्ताङका, जेलाउ थेकापा नादोङ धन्यको प्रभुको मिङता लोका मादोअ्ताना एन्सालाउ थेकापा नाअ् कासेहेङ मातिनाना।