लुका 12 - Dhimal NT

कपटिको बिरुद्ता चेताउनि

¹ हाजार दोङ हाजार द्‍याङगेलाइ ए दोफाङ जोम्घाहि, इम्बालाइ ओसारा हेन्जा हिघाहि कि इम्बालाइ एमिसो भेनेङहेङ याङघाखे। द्‍याङगेलाइहेङ सेउपालि खान्तेङ लाम्फा येसु वाको चात्यागेलाइहेङ दोअ्हि, नेलाइ फारिसिगेलाइको साउरिसो थिसु। काङको दोअ्लि खाङका माने इम्बालाइको कपटिसो चङख जेङजेङ हिसु।

² जेदोङ म्होनाका काथा हि देखाल जेनावा। कालाउ कुन्हाता म्होतेङ हिका गोताङ काथागेलाइ देखाल जेनावा।

³ इङको जेदोङ बचनगेलाइ नेलाइ कितिकितिकाता दोअ्का हिसुना इङको सार्बाजानिक थामेता दोअ्सु। नेलाइ कोठा लिता न्हातोङता दोअ्का काथा हिना इङको साअ्को चाल्हेसो सुसमाचार पाअ्‌।

⁴ कालाउ न्हुसो येसु द्‍याङगेलाइहेङ दोअ्हि, का नेलाइहेङ दोअ्खा, ओइ काङको सानाइतिगेलाइ! द्‍याङगेलाइसो माअ्थिसु। द्‍याङगेलाइ जिउहेङ खिनिङ सेअ्लि द्वावा, इङको खान्तेङ हेन्जा इम्बालाइ हाइ बुङ पालि मादावा।

⁵ हासु दोफा थिलि गोइखे, का नेलाइहेङ दोअ्ताङका नेलाइ वा एमि खिनिङ दोफा थिलि गोइखे जाइ दोफा सेअ्तेङ नरकता थाइगिलका सरबुङ हि, वा एमि खिनिङ हि जाइ दोफा नेलाइ थिलि गोइस्वाना।

⁶ नालोङ सारन्हायाको दाम न्हे पाइसाता खिनिङ मापिखे रो? कालाउ परमेस्वर इङको मध्येसो एनोङ बुङ मानिल्लावा।

⁷ परमेस्वर दोङ नेलाइको जिबनको गोताङ थोक गिखे, वा या बुङ गिखे कि नेलाइको पुरिङता हेअ्नोङ पुसिङ हि। ओदोङ भाअ्सिङ माअ्थिसु! नेलाइ इङको सारन्ह्यागेलाइ खान्तेङ हेन्जा महत्वको हिसुना।

⁸ का नेलाइहेङ दोअ्खा, जाइ दोङ कासेहेङ द्‍याङगेलाइको आगाता का द्‍याङको चानहेङ सुइकार पाखे पानु, का बुङ एन्साङ परमेस्वरको स्वर्गदुतगेलाइको आगाता काङको चात्या दोअ्तेङ सुइकार पाङका।

⁹ जेसापाहिदोइ बुङ द्‍याङ कासेहेङ द्‍याङगेलाइको आगाता सुइकार मापानु का बुङ वासेहेङ काङको परमेस्वरको स्वर्गदुतगेलाइको आगाता चात्या माको दोअ्ताङका।

¹⁰ जेसापा हासु बुङ का द्‍याङको चानको बिरोधता काथा पाहे पानु वासेहेङ स्यामा जेनावा, कालाउ हिदोइ बुङ द्‍याङ पबित्तरो आत्माको बिरोधता मन्दा माताकालाइहेङ मिधुलाउ बुङ स्यामा माजेनाङ।

¹¹ जेलाउ द्‍याङगेलाइ नेलाइहेङ यहुदिगेलाइको चाउघारा साअ्गेलाइता हिका सासक कालाउ आधिकारिको आगाता ताअ्हे पानु ताइमिहेङ बान्चिपालिको भाअ्सिङ हेसा हाइ दोअ्लि गोइका हि इङकोता माअ्थिसु।

¹² इङको बेला पबित्तरो आत्मा दोङ नासेहेङ नाअ् दोअ्लि गोइका काथागेलाइ धिरपावा।

एमि धनि द्याङको निङपिका

¹³ जेरसो एमि द्‍याङ येसुहेङ दोअ्हि, हे गुरु, केलाइको आबाको धनसम्पतिको आङसा-बान्डा पालि काङको दादाहेङ दोअ्पि नि।

¹⁴ कालाउ येसु वासेहेङ दोअ्हि, का नेलाइको आबाको धन-सम्पति नाअ् न्हेमिको माझाता बाखाराइपिलि गोयाङ दोअ्तेङ हासु कासेहेङ नियुक्त पाहि?

¹⁵ आरोङ येसु इम्बालाइहेङ दोअ्हि, चङख जेङतेङ हिसु कालाउ गोताङ खालको दिका गेलाइसो ताइमिहेङ जोगाइसु। हासुहेङ बुङ गोइका सम्पति खान्तेङ हेन्जा हिलि द्वावा, कालाउ बुङ वासेहेङ सत्ये जिबन माप्यावा।

¹⁶ कालाउ वा इसिका निङपिकासो एनोङ काथा दोअ्हि, हिदोइ बुङ सोमोइता एमि धनि द्‍याङ हिघाहि, वाको मिलिङता रेम्फा कालाउ प्रसस्त उब्जाइ जेङहि।

¹⁷ उङको द्‍याङ ताइमिङ सोचिघाखे कि, कासेहेङ थाहा मान्थु का हाइ पालि? काङको दोफा हिका वथे हेन्जा से उम ताअ्का थामे बुङ मान्थु।

¹⁸ कालाउ उङको धनि द्‍याङ दोअ्हि, का गिखा का हाइ पालि गोइका हि, का काङको भाकारगेलाइ ह्राताङका कालाउ इङकोहेङ आसा बार्का बानाइ याङका। इङको नावा भाकारगेलाइता का आन्न कालाउ आरु बुङ आनेमानेगेलाइ ताअ्ताङका।

¹⁹ कालाउ न्हुसो का ताइमिहेङ दोअ्ताङका, नाअ् दोफा गेनेगेल्पा हेन्जाङ बासार थेकापा पुगिका आनेमानेगेलाइ हि, एला सुकापा चातेङ आम्तेङ हि।

²⁰ कालाउ परमेस्वर उङको द्‍याङहेङ दोअ्हि, नाअ् आनाइ हिना, नानि न्हिसिन्ता दोङ नाअ् स्याना, कालाउ नाअ् ताइकोङ भाअ्सिङ जोम्पाका आनेमाने हासुको जेनावा?

²¹ ओदोङ भाअ्सिङ धन-सम्पति थुबाराइका द्‍याङ कालाउ परमेस्वरको नजरता धनि मान्थुका द्‍याङको आबास्था इसिकाङ जेनाङ।

चिन्ता मापासु

²² येसु ताइको चात्यागेलाइहेङ दोअ्हि, ओदोङ भाअ्सिङ का नेलाइहेङ दोअ्खा, ताइमि बान्चिलिको भाअ्सिङ हाइ चालि, हाइ आम्लि, हाइ होङलि दोअ्तेङ इङको बिसोइता पिर मापासु।

²³ निसित रुपता जिबन चाका-आम्का खान्तेङ हेन्जाङ मुल्यवान हि।

²⁴ कावागेलाइहेङ खाङसु ना ते इम्बालाइ चालाइ दोङ बिखे, ना ते सिसा दोङ चेखे ना ते भाकार दोङ हि, कालाउ बुङ आबा परमेस्वर इम्बालाइहेङ चापाखे-आम्पाखे नेलाइ जिहाँ-जुइलेङ खान्तेङ हेन्जा जाङका दामको हिसुन्हा।

²⁵ नेलाइ मध्येसो हासु बुङ चिन्ता पातेङ ताइको आयु आतुइसा बुङ थोअ्पिलि माद्वावा, कि वा हेलाउ थेकापा बान्चिलि द्वावा।

²⁶ जेसापा नेलाइ म्हुइ-म्हुइका कामगेलाइ दोङ पालि मादोसुखेना पानु जिबनको आरु बिसोइको हाइ पालि फिकिरि पासुखेना?

²⁷ खाङसु, इङको लिलि ल्हेहेङ, इङको हेसा बाराखे। वाते नाअ् मेहेनत पाखे, ना ते वा धाबा दोङ थिर्खे। कालाउ बुङ का नेलाइहेङ दोअ्खा, राजा सोलोमोन वाको वथे हेन्जा धन-सम्पति हिलाउ बुङ इङको लिलि ल्हेगेलाइ भाइपा लोखोन धाबा मालागाइहि।

²⁸ ओदोङ भाअ्सिङ परमेस्वर दोङ मिलिङको घासि, जेदोङ नानि हि, जुम्नि मेता जुगिल्न्हावा पानु इसिका घासिहेङते परमेस्वर साजाइतेङ ताअ्खे, झन परमेस्वर नेलाइहेङ निसित रुपता रेम्फा सामाराइयावा। हाइ पालि नेलाइको खाङधुरि कमि हि?

²⁹ ओदोङ भाअ्सिङ नेलाइ हाइ चालि कालाउ हाइ आम्लि दोअ्तेङ पिर मापासु इङको बिसोइता हिदोइ बुङ चिन्ता मापासु।

³⁰ सुमिङको झाराङ द्‍याङगेलाइ इदोइ आमेनेगेलाइको लेसारा पिताइखे, कालाउ नेलाइको आबा परमेस्वर गिखे, कि नेलाइहेङ इदोइ गोताङ गोइखे।

³¹ ओदोङ भाअ्सिङ नेलाइ लाम्फा परमेस्वरको सासन भोसु, कालाउ इङको गोताङ आमेनेगेलाइ नेलाइहेङ प्यावा।

स्वर्गता जोम्का धन

³² नेलाइ म्हुइका भेडाको हुलगेलाइ भाइका जेङ, माअ्थिसु, हाइपालिपानु नेलाइको भाअ्सिङ आबा परमेस्वर नेलाइहेङ सासन पिलि लेङचाखे।

³³ ताइकोता हिका गोताङ सम्पति पितेङ जाइहेङ गोइका हि इम्बालाइहेङ ताका पिसु। धन इदोइ सुमिङता स्थाइ माहिखे बुङ भरु स्वर्गता जोम्पाका भाकार निङलि कोसिस पासु, इङको जोम्पाका भाकार जेलाउ बुङ ह्यावा। स्वर्गको भाकारता जोम्पाका चोरगेलाइ बुङ खुलि माद्वावा, ना ते पेसा दोङ पेतावा।

³⁴ हाइपालिपानु जेता नाङको धन हिखे, इन्ता नाङको मन बुङ ह्यावा।

दिनाङ तियार हिसु

³⁵ कालाउ न्हुसो येसु दोअ्हि, जेलाउ बुङ सेवा पालि तियार जेङतेङ हिसु कालाउ नाङको गेसा झेम्पाङ जोल्तेङ ह्याको। का लोलि खाङकाता तियार हिसु।

³⁶ नेलाइ बिहुको भातियारता घुरितेङ लोका गिह्रिको दामा खाङतेङ हिका चाकारियागेलाइ भाइपाङ जेङसु। गिह्रि लोतेङ फिनु ढकढक पातेङसाङ ओबालाइ फिनु हेअ्पिखे।

³⁷ धन्य उङको चाकारियागेलाइ जाइ गिह्रि घुरितेङ लोलाउ ह्रुम्तेङ हिका निङखे जातिङ भारि का नेलाइहेङ दोअ्खा, ताइको गिह्रि एनोङ सेवकको भाइपा लोखन धाबा लागाइतेङ उङको चाकारियागेलाइ सुकापा योम्पातेङ चापाखे कालाउ सेवा पावा।

³⁸ जेसापा गिह्रि बेलोम्तेङ आधा न्हिसिन्ता माकुनु ह्रिमा लोलाउ बुङ ताइको चाकारियागेलाइ वाको भाअ्सिङ तियार हितेङ हिका तिङहेपानु वा झन हेन्जाङ स्याबासि प्यावा कालाउ इम्बालाइ झन लेङचावा।

³⁹ थाहा गिसु: जेसापा साअ्को गिह्रि चोर हेथे बेला ल्वाङ दोअ्का गिनु वा तियार जेङतेङ हिधावा। कालाउ वा सर्तक जेङतेङ चोरहेङ साअ् लिता दुल्लि मापिघ्यावा।

⁴⁰ ओदोङ भाअ्सिङ नेलाइ बुङ तियार जेङतेङ हिसु। का द्‍याङको चान हिदोइ सोमोइता ल्वाङका जाइको नेलाइ आस पाका मान्थुस्वाना।

खाङधुरि योग्य सेवक हासु?

⁴¹ पतरुस दोअ्हि, हे प्रभु! इदोइ निङपिका नाअ् केलाइहेङ खिनिङ कि आरु झाराङहेङ इदोइ काथा दोअ्खेना?

⁴² कालाउ प्रभु दोअ्हि, एनोङ इमान्दार कालाउ बुद्दिमान चाकारिया इसिका हिखे: जाइहेङ साअ्को गिह्रि आरु चाकारियागेलाइहेङ खाङलि नियुक्त पाखे। गिह्रि वासेहेङ दोअ्खे ओबालाइहेङ ठिक-ठिक सोमोइता चालि-आम्लि प्यावाको। कालाउ न्हुसो ह्रिङका दामा चाहि।

⁴³ जेलाउ गिह्रि लोखे कालाउ चाकारियाहेङ पिका काम पातेङ हिका निङनु उङको चाकारिया धन्यको हि।

⁴⁴ जातिङ भारि का नेलाइहेङ दोअ्खा, उङको गिह्रि वासेहेङ ताइको दोफा हिका गोताङ सम्पति वाको खुरता जिम्मा लागाइयावा।

⁴⁵ जेसापा चाकारिया कालाउ ताइको ग्रिह्रि धेमाङ माघुरियाङ दोअ्तेङ सोचिहि पानु, कालाउ उङको चाकारिया आरु भेनेङ चाकारिया वाजान कालाउ बेबालाइहेङ दानाइहि पानु कालाउ चातेङ-आम्तेङ म्हातेङ हिलि तेङनु।

⁴⁶ उङको चाकारियाको गिह्रि वा मासोचिका दिना कालाउ थाहा मागिका पहरता घुरितेङ ल्वाङ। कालाउ वाको गिह्रि वासेहेङ थाङका दन्ड प्यावा, कालाउ वासेहेङ खाङधुरि मापाकालाइ भाइका जेनावा।

⁴⁷ कालाउ ताइको गिह्रिको इच्छा गितेङ बुङ तियार माहिका कालाउ वाको इच्छा बमोजिम मापाका बान्धाइति चाहि हेन्जा द्वालिहोइ म्हेनावा।

⁴⁸ मागिका कालाउ दानाइ निन्चाका योग्यको काम पाका, आतुइसा साजाइ निनाङ। हेन्जा निङकालाइसो हासुलाउ बुङ वाकोसो हेन्जा ह्रेकाङ। वासेहेङ हेन्जा जिम्माबारि पिका हि पानु वा दोङ ओदोङ झोको हेन्जा बुझाइलि गोयावा।

सान्ति माको फेअ्सुपालि

⁴⁹ येसु दोअ्हि: का प्रिथिबिता मे धोअ्पिलि लोका हिघा, इङको लाम्फासोङ सोल्काइन्हाका हिनुते रेम्का जेन्धावा।

⁵⁰ कालाउ का धेमाङ दोङ बार्का कस्ट भोगिलि गोयाङ, कालाउ का इङको दुख थेकापा हेन्जा चिन्ताता हिघा।

⁵¹ नेलाइ सम्झिसुखेना वाला कि प्रिथिबिहेङ सान्ति चुमालि लोघा दोअ्तेङ मासम्झे। भरु सान्ति चुमालि माको, का ते लाअ्पालि लोका हिघा।

⁵² जेसापा एनोङ साअ्को जाहानता नामिता लाअ्न्हास्वावा, सुमिता जाइ का ह्रुता खाङधुरि मापाखे, इम्बालाइ न्हेमिको बिरोध पावा जाइ का ह्रुता खाङधुरि पाखे। एसापा दोङ न्हेमि सुमिको बिरोधता ल्होकावा।

सोमोइको चिन्हा

⁵³ आबा चानको कालाउ चान आबाको बिरोधता ह्यावा, आमाइ चामिन्दिको बिरोधता कालाउ चामिन्दि आमाइको बिरोधता ह्यावा। जुबे ताइको नामाको बिरोधता कालाउ नामा जुबेको बिरोधता ह्यावा।

⁵⁴ कालाउ येसु द्‍याङगेलाइहेङ दोअ्हि, जेलाउ नेलाइ नुहेता बादेल दाकिलकिलका तिङस्वाना, कालाउ नेलाइ दोअ्स्वाना, वाइ ल्वाङ कालाउ इन्सिकाङ जेनावा।

⁵⁵ एन्साङ दोङ, जेलाउ माहेसो भेरमा लोलि तेनावा कालाउ नेलाइ दोअ्स्वाना, एलाते भेमका दिना ल्वाङ कालाउ इन्सिका जेनाङ।

⁵⁶ नेलाइ कपटि हिसुन्हा! नेलाइ गिसुखेना हेसा आकास कालाउ प्रिथिबिको इसारागेलाइ दोअ्पिलि दोअ्सुखेना कालाउ बर्तमान सोमोइता परमेस्वर हाइ पाखे इङको को ब्याख्या पालि मादोसुखेना।

ताइको समस्या ताइमिङ सुल्झाइ

⁵⁷ हिदोइ काथा चाहि ठिक हि, दोअ्तेङ हाइ पालि नेलाइ निर्नय पालि माअ्दो सुखेना।

⁵⁸ नेलाइको उजुरि वाला दोफा हाकिमकोता हानिलाउ, दामाताङ वाको दोफा मिलिसु, माकुनुते वा नासेहेङ न्यायधिसकोता तानितेङ चुम्पावा, कालाउ न्यायधिस नासेहेङ सिपालाइको खुरता जिम्मा प्यावा, कालाउ सिपालाइ नासेहेङ झ्यालखानाता ह्वातावा।

⁵⁹ का नेलाइहेङ दोअ्खा कि, जेलाउ थेकापा नाअ् गोताङ जरिमाना मातिरियाना, जेदोङ रिन नाअ् तिरिलि गोइका हिना, एन्सालाउ थेकापा नाअ् इङको झ्यालखानासो ओल्लेलि माद्वाना।