लुका 11 - Dhimal NT

येसुको धिरपाका प्रार्थाना

¹ एनि येसु एनोङ थामेता प्रार्थाना पातेङ हिघाहि जेलाउ प्रार्थाना पालि दोहि, वाको चात्यागेलाइ मध्येसो एमि वासेहेङ दोअ्हि, युहान्‍ना जेसाङ ताइको चात्यागेलाइहेङ प्रार्थाना हेसा पालि गोइखे दोअ्तेङ धिरपाहि, हे प्रभु केलाइहेङ बुङ प्रार्थाना पालि धिरपापि।

² येसु चात्यागेलाइहेङ दोअ्हि, जेलाउ नेलाइ प्रार्थाना पास्वाना, एसा दोअ्तेङ प्रार्थाना पासु, हे स्वर्गता हिका केलाइको आबा परमेस्वर, नाङको मिङ जेलाउलाउ बुङ पबित्तरो जेनाको, नाङको सासन ल्वाको।

³ केलाइहेङ दिनाङ गोइका चाका-आम्का केलाइहेङ पि।

⁴ केलाइको पापगेलाइ स्यामा पापि, हाइपालिपानु केलाइ बुङ जेसाङ केलाइको बिरोधता पाप पाकालाइहेङ स्यामा पिका हिनाहि। कालाउ केलाइहेङ जाचिकाता माताअ्पि।

⁵ कालाउ वा इम्बालाइहेङ दोअ्हि, एनोङ काथा नेलाइको मध्येसो हासुको बुङ एमि सानाइति हि, वा आधा न्हिसिन्ता वाकोता हानितेङ दोअ्तावा, सानाइति कासेहेङ सुमलोङ तोले खिल्लि पि।

⁶ हाइपालिपानु काङको एमि सानाइति काङको साअ्ता लोका हि, कालाउ वासेहेङ चाका पिलि का दोफा हाइ बुङ मान्थु।

⁷ नाङको सानाइति लितासो दोअ्तावा, कासेहेङ मानाङघापा फिनु आन्चाङ गिअ्होइका का कालाउ काङको चान चामिन्दिगेलाइ का दोफा सिधाउता हि, का ल्होतेङ नासेहेङ हाइ बुङ पिलि माद्वाङका।

⁸ का नेलाइहेङ दोअ्खा, हाइपालिपानु सानाइति सोम्झितेङ मापिनु बुङ नाअ् दोङ लागातार र्हेतेङ हिनु वा ल्होकावा कालाउ नासेहेङ जेथे आवस्यक हि ओदोङ झोको प्यावा।

⁹ आरोङ का नेलाइहेङ दोअ्खा, जेदोङ गोइका हि इङको परमेस्वर दोफा ह्रेसु कालाउ वा नेलाइहेङ प्यावा, भोसुते कालाउ नेलाइ निङस्वाना, ढकढकाइसु नेलाइको भाअ्सिङ फिनु हेअ्प्यावा।

¹⁰ हाइपालिपानु जाइ ह्रेखे वा दोङ निनावा, जाइ भोखे वा दोङ निङखे, जाइ ढकढकाइखे, वाको भाअ्सिङ हेअ्नावा।

¹¹ नेलाइ मध्येसो हिदोइ चाहि आबा वाला जाइको चान तोले र्हेनु वासेहेङ उन्ठुइ माप्यावा। एन्साङ पातेङ ताइको चानहेङ हाया ह्रेलाउ बिस हिका पुय्याँ माप्यावा।

¹² माकुनु तुइ र्हेनु वासेहेङ चिम्ताङ प्यावा रो?

¹³ नेलाइ मारेम्का जेङतेङ बुङ ताइको चान-चामिन्दिगेलाइहेङ रेम्का आनेमानेगेलाइ पिलि गिसुखेना पानु, झन स्वर्गता हिका नेलाइको परमेस्वर आबा वाको दोफा ह्रेकालाइहेङ झन हेथे रेम्फा पबित्तरो आत्मा प्यावा।

येसु कालाउ साइतान

¹⁴ एमि द्‍याङहेङ भुत-आत्मा लाता बानाइका हिघाहि। कालाउ येसु वाको लिता हिका भुत-आत्मा ओल्लेपालि दोतेङ उङको द्‍याङ नुइ धुइलि तेङहि। इन्सिका तिङतेङ द्‍याङगेलाइ भाङ-भाङहि।

¹⁵ कालाउ आधिमि द्‍याङगेलाइ मध्येसो दोअ्हि, साइतानको गिह्रिको सरबुङसो वा भुत-आत्मागेलाइ खाअ्पाखे।

¹⁶ हेथेते द्‍याङगेलाइ बुङ येसुहेङ जाचिलि मन पाकाताङ दोअ्हि, “इदोइ काम परमेस्वरको सुरबुङसो पाकानु केलाइहेङ स्वर्गसो एनोङ चिन्हा तिङपा पि।

¹⁷ कालाउ इम्बालाइको बिचार थाहा गिअ्तेङ येसु इम्बालाइहेङ दोअ्हि गोताङ सारभि खेङन्हाखे पानु, कालाउ उङको एमि-भेनेङ दोफा फेसुहेपानु उङको ताइमिङ नासातावा। एन्साङ दोङ एनोङ जाहानता ता-ताइमिता फेसुहेपानु इङको साअ् बुङ एन्साङ नासातावा।

¹⁸ जेसापा साइतान बुङ ता-ताइमिता लाअ्न्हानु, वाको सासन हेसा तिक्यावा? हाइपालिपानु नेलाइ दोअ्सुखेना कि का साइतानसो भुत-आत्मा दिगिल्खा।”

¹⁹ जेसापा का साइतानसो भुत-आत्मागेलाइहेङ ओल्लेपानु, नेलाइको चानगेलाइ चाहि हासु पाहासो ओल्लेपाखे? ओदोङ भाअ्सिङ ओबालाइ दोङ नेलाइको न्याय कर्ता जेनावा।

²⁰ जेसापा का परमेस्वरको आत्मासो भुत-आत्मागेलाइहेङ ओल्लेपानु परमेस्वरको सासन नेलाइकोता लोहोइ दोअ्तेङ गिसु।

²¹ येसु इता साइतानको तुलाना एमि बल्लियाका द्‍याङ दोफा पाका हि, जेलाउ हिदोइ बुङ बल्लियाका द्‍याङ हेन्जा दाब्या दुफेगेलाइ चुम्तेङ साअ्को पाले पाखे, वाको साअ्को गोताङ आनेमानेगेलाइ सुरुक्स्या ह्यावा।

²² कालाउ वा खान्तेङ बल्लियाका द्‍याङ लोतेङ वाको ह्रुता धुम पातेङ वासेहेङ जितिनु कालाउ वा भर परेका वाको गोताङ दाब्या दुफेगेलाइ घिङतेङ चुम्पावा कालाउ आनेमाने बुङ खुतेङ वाको सानाइतिगेलाइ दोफा बाखाराइयावा।

²³ जाइ काङको दोफा मान्थु, वा काङको बिरोधता हि, कालाउ जाइ का दोफा माजोम्पाखे, वा राइखे।

²⁴ हिदोइ बुङ द्‍याङसो जेलाउ भुत-आत्मा ओल्लेतेङ इङको थाइ-थाइका थामे भोलि द्‍यापाहाङ हानितेङ सुकापा हिलि दोका थामे भोकाताङ हिगिल्हि।

²⁵ जेलाउ वा इन्सिका थामे हिसो बुङ मानिङलाउ लाम्फाको हिका द्‍याङकोता हानाङका दोअ्तेङ वा घुरिखे। इन्ता लोलाउ उङको द्‍याङको जिबन एनोङ साफा साअ् भाइका निङखे।

²⁶ कालाउ वा हानेतेङ झन ताइमि खान्तेङ दुस्ट भुत-आत्मागेलाइ चुमातेङ उङको द्‍याङ लिता दुल्तेङ हिखे। कालाउ उङको द्‍याङको लाम्फाको खान्तेङ न्हुसोको दासा झन मारेम्का जेनावा।

²⁷ जेलाउ येसु इङको काथागेलाइ दोअ्काताङ पाघाखे, हिदोइ बुङ एमि बेबाल एसा दोअ्तेङ बार्का गालाहोइ ह्रिकाइतेङ, दोअ्हि, धन्य उङको बेबाल जाइ नासेहेङ जोलोम पाका कालाउ दुदु चुपाका।

²⁸ कालाउ वा दोअ्हि, “धन्य द्‍याङगेलाइ जाइ परमेस्वरको बचनगेलाइ हिङखे, कालाउ केम्खे।”

योनाको चिन्ह

²⁹ द्‍याङगेलाइको जेर आल्हो-आल्होपा पाकाताङ बाढेकाताङ हानिहि, येसु दोअ्हि, इदोइ युगता हिका पुस्ता दुस्ट पुस्तागेलाइ हि। इम्बालाइ चिन्हाको रुपता परमेस्वरको सरबुङ भोखे, कालाउ बुङ हिदोइ बुङ चिन्हा इम्बालाइहेङ माप्याङ, खिनिङ योनाकोता हिका चिन्हा खिनिङ प्याङ।

³⁰ योना निनवेको सहरको द्‍याङगेलाइको भाअ्सिङ चिन्हा हिघाहि, एसापा वा इदोइ पुस्ताको भाअ्सिङ का द्‍याङको चान बुङ चिन्हा जेनाङका।

³¹ न्यायको दिनाता माहेको रानि एलाको द्‍याङगेलाइहेङ दुसियावा, हाइपालिपानु राजा सोलोमोनको बुद्दिको काथा हिङलि हेन्जा दुरेसो लोका हिघाहि। खाङसु, राजा सोलोमोन खान्तेङ गोताङ काथा गिका एमि द्‍याङ इता हि। नेलाइ चाहि पाप पालिसो लाअ्लि इन्कार पासुखेना।

³² निनवे सहरको द्‍याङगेलाइ न्यायको दिनाता इदोइ पुस्ता दोफा जाअ्लि गोयावा, कालाउ वासेहेङ इम्बालाइ, नेलाइहेङ दुसिलि तेनावा, हाइपालिपानु इम्बालाइ योनासो सुसमाचार हिङतेङ ताइको पापसो पाप पालि लाअ्हि।

जिबनको गेसा

³³ हिदोइ बुङ द्‍याङ गेसा जोलाइतेङ पाथि लिता माअ्ताखे, याते माअ्म्होखे। भरु लिता दुल्काताङ पालाउ झाराङ तिनाको दोअ्तेङ इङको गेसा चेरादानि ह्रुता ताअ्खे।

³⁴ नाङको मिसियाँ जिउको भाअ्सिङ गेसा भाइका हि, जेसापा नाङको मिसियाँ रेम्का हिनुते नाङको गोताङ जिउ थास्साइका जेनावा, कालाउ इङको मिसियाँ देलदेलकानु नाङको गोताङ जिउ दोङ कितिकितितावा।

³⁵ ओदोङ भाअ्सिङ चङख हिसु, नाङकोता हिका फाइसालामका कितिकितिका माजेनाको।

³⁶ जेसापा नाङको गोताङ जिउ फाइसालामका हि पानु, कालाउ वाको हिदोइ बुङ भाग कितिकितिका मान्थुनु इङको गोताङ चिल्कातावा, जेसाङ गेसाको किरन नाङको दोफा चिल्कातेङ ह्यावा।

फारिसिगेलाइहेङ नाङको भाअ्सिङ थिलि गोइका हि

³⁷ येसु काथा पालि दोतेङ, एमि फारिसि वासेहेङ ताइको साअ्ता उम चालि काइहि, कालाउ येसु हानिहि कालाउ चाअ्लि योम्हि।

³⁸ कालाउ उम चाअ्लि खान्तेङ लाम्फा येसु खुर माझाहि कालाउ इङको तिङतेङ फारिसिगेलाइ भारभुसाइहि।

³⁹ इङकोता प्रभु येसु दोअ्हि, नाअ् फारिसिगेलाइ बात्ति कालाउ थालि बाहार खिनिङ मान्झिसुखेना, कालाउ लिता चाहि नेलाइ दिकाहोइ, खुकाहोइ कालाउ दुस्ट मनहोइ पोङघाका हिसुखेना।

⁴⁰ ओइ मुर्ख द्‍याङगेलाइ, जाइ बाहारको भाग बानाइहि, वा दोङ लिताको बुङ बानाइका माको रो?

⁴¹ ओदोङ भाअ्सिङ जेदोङ हि उङको गरिब द्‍याङगेलाइहेङ पिसु कालाउ न्हुसो नाअ् बुङ जोल्न्हातेङ जाहाँका जेनाना।

⁴² नेलाइको भाअ्सिङ हेथे थिलि गोइका हि! नेलाइहेङ, व्यवस्था धिरपाका द्‍याङगेलाइ कालाउ फारिसिगेलाइ, नेलाइते कपटिगेलाइ! नेलाइ पुदिना, सम्पोइ, कालाउ खाल्खाल्को ओसेरेपैतिको दसाङसा परमेस्वरहेङ पिसुखेना। कालाउ व्यवस्थाको मुख्य न्याय, दायाको आस ताअ्सुखेना। कालाउ खाङधुरि योग्य भाइका काथागेलाइहेङ हेला पासुखेना। भरु इङको आरु काथागेलाइ दोफाङ न्याय, प्रेम कालाउ खाङधुरि योग्य जेङतेङ हिसु।

⁴³ नेलाइको भाअ्सिङ हेथे थिलि गोइका हि! नाअ् फारिसिगेलाइहेङ नाअ् चाउघारा साअ्गेलाइता मुख्य-मुख्य योमका थामेगेलाइ खिनिङ भोसुखेन्हा। एन्साङ दोङ हाते बाजारगेलाइता हानिलाउ द्‍याङगेलाइ केलाइहेङ सेउपाको दोअ्तेङ मन पासुखेन्हा।

⁴⁴ नेलाइको भाअ्सिङ हेथे थिलि गोइका हि, नाअ् फारिसिगेलाइहेङ! हाइपालिपानु नेलाइ हासु बुङ फोम मापाका तोमगेलाइ भाइकाङ हिसुन्हा, द्‍याङगेलाइ थाहा मागिसिङ इङको ह्रुता तेतेङ हानिखे।

⁴⁵ व्यवस्था धिरपाका द्‍याङगेलाइ मध्येसो एमि येसुहेङ दोअ्हि, हे गुरु, जेलाउ नाअ् इदोइ काथा पाखेना, नाअ् केलाइहेङ बुङ निन्दा पाखेना।

⁴⁶ येसु जोबाफ पिहि, नेलाइको भाअ्सिङ हेथे थिलि गोइका हि। नाअ् व्यवस्था धिरपाका द्‍याङगेलाइ! नेलाइ द्‍याङगेलाइहेङ पालाना पालि मादोका नियमगेलाइ बानाइ पिसुखेना, नेलाइ द्‍याङगेलाइहेङ इङको नियम केम्लि गोयाङ दोअ्तेङ बाध्ये पासुखेना। कालाउ नेलाइ ताइमिङ चाहि इङको नियमगेलाइ केम्लि गोयाङ दोअ्तेङ आगाल माधासुखेना।

⁴⁷ नेलाइको भाअ्सिङ हेथे थिलि गोइका हि! हाइपालिपानु नेलाइ परमेस्वरको बक्तागेलाइको भाअ्सिङ रेम-रेम्का तोमगेलाइ बानाइसुखेना, कालाउ उङको बक्तागेलाइहेङ जाइ नेलाइको पुर्खागेलाइ सेअ्का हिघाहि।

⁴⁸ या एसापा कि नेलाइ ताइको पुर्खागेलाइ पाका कामगेलाइता भागि जेङका हिसुन्हा। इम्बालाइ, परमेस्वरको बक्तागेलाइहेङ सेअ्का हिघाहि, कालाउ नेलाइ परमेस्वरको बक्तागेलाइको भाअ्सिङ तोम बानाइस्वाना।

⁴⁹ ओदोङ भाअ्सिङ परमेस्वरको बिबेकहोइ दोअ्हि, का नेलाइकोता परमेस्वरको बक्तागेलाइ कालाउ साल्न्हाका चात्यागेलाइ इम्बालाइको भाअ्सिङ दिङगिल प्याङका। कालाउ इम्बालाइ आधिमिहेङ सेअ्तावा कालाउ आधिमिहेङ साताइयावा।

⁵⁰ ओदोङ भाअ्सिङ सुमिङको सुरुसोङ एला थेकापा सेअ्न्हाका परमेस्वरको बक्तागेलाइको सेअ्का को हितिको दुसिकाको लेखा इदोइ पुस्ताको द्‍यायाङगेलाइ दोङ पिलि गोयाङ। एइ का दोअ्खा हाबिलको बेलासोङ मुन्दिर कालाउ बेदिको माझाता,

⁵¹ जकरियाको थेकापाको, गोताङ धर्मि द्‍याङगेलाइको सेअ्का को हितिको दुसिका नेलाइको ह्रुता परियावा। का नेलाइहेङ जातिङ भारि दोअ्खा, इदोइ गोताङको साअ्का को दुसिका इदोङ पुस्ताको ह्रुता आइलागियावा।

⁵² “ओइ कपटिगेलाइ व्यवस्था धिरपाका द्‍याङगेलाइ कालाउ फारिसिगेलाइ! नेलाइ ह्रुता बिपति लोलि द्वाङ नेलाइ दोङ द्‍याङगेलाइहेङ परमेस्वरको सासनता दुल्लि आनुमति मापिसुखेना। नेलाइ ताइमि बुङ मादुल्सुखेना कालाउ दुल्लि खाङकालाइहेङ बुङ दुल्लि मापिसुखेना।”

⁵³ जेलाउ येसु हानिलि तोमलाउ, व्यवस्था धिरपाका द्‍याङगेलाइ कालाउ फारिसिगेलाइ हेन्जा कस्ट पिहि, वासेहेङ रिम्लि दाउ भोतेङ हिघाहि।

⁵⁴ वाको नुइसो ओल्लेका काथाता हाइ दोङ गोल्ति दोअ्ताङ कि, दोअ्तेङ इम्बालाइ जालेता देपालि दाउ भोअ्घाखे।