यहुदा 1 - Dhimal NT

धतुवा सिक्स्यकगेलाइ

¹ इदोइ पात्तारा का यहुदासो हि, का येसु ख्रिस्टको बान्धाइति कालाउ याकुबको ओने हिघा। का इदोइ पात्तारा परमेस्वरता खाङधुरि पाका वाको पाहासो काइका द्‍याङगेलाइहेङ लेखेदोङखा। नेलाइहेङ परमेस्वर केलाइको आबा प्रेम पाखे कालाउ येसु ख्रिस्टता रेम्फा ताअ्का हि।

² का प्रार्थाना पाखा कि परमेस्वर नेलाइहेङ क्रिपा, सान्ति कालाउ गेनेगेल्पा प्रेम प्याको।

³ काङको आनाउ सानाइतिगेलाइ, नेलाइ झाराङ झ्वाइनाका येसु ख्रिस्ट पाहासो लोका केलाइको मुक्ति कालाउ नावा जिबनको बारेता लेखेलि का दोका थेकापा गोताङ कोसिस पादोङघाखा। कालाउ एला का इदोइ पात्ताराको माध्यामसो नेलाइहेङ हाउसाइलि आनुरोध पाखा, कालाउकि नेलाइ ख्रिस्टियन खाङधुरिहेङ ताअ्तेङ ताअ्लि आझाइ थाङका परिस्रोम पालि दोसु। परमेस्वर ताइको द्‍याङगेलाइहेङ इदोइ खाङधुरि एखेताङ पिका हि, कालाउ इङकोहेङ फेरिलि मादोखे।

⁴ का इदोइ लेखेदोङखा हाइपालिपानु आधिमि द्‍याङगेलाइ नेलाइको मन्डलिता नेलाइ दोफा झ्वाइनाका हि, जाइ येसु ख्रिस्टता खान्धुराइ जेङका तिङपाखे। इम्बालाइ परमेस्वरको आदार मापाखे कालाउ इम्बालाइ गलत धिरपाखे कि, हाइपालिपानु परमेस्वर ताइको आनुग्रह पाहासो केलाइको पाप स्यामा पाखे। केलाइ आनाइतिक जिबन बितिपालि द्वाङ। इम्बालाइ येसु ख्रिस्टहेङ इन्कार पाखे, जाइ केलाइको एमि खिनिङ ग्रिहि कालाउ प्रभु हि, हेन्जा सोमोइ लाम्फा, धर्मसास्तर दोअ्खे कि परमेस्वर इन्सिका द्‍याङगेलाइहेङ साजाइ प्याङ।

⁵ नेलाइ इदोइ गोताङ काथा गिका हिसुना, कालाउ बुङ एला का नेलाइहेङ फोमपापिलि भोखा, प्रभु इस्राएलिगेलाइहेङ बान्धाइतिसो लाअ्पाहि, कालाउ इम्बालाइहेङ मिस्रो सारभिसो बाहार ओल्लेपाहि, कालाउ न्हुसो वाकोता खाङधुरि मापाका झाराङहेङ वा चाका-मान्दा थामेता सेअ्हि।

⁶ नेलाइ उङको स्वर्गदुतगेलाइको बारेता बुङ सोचिलि गोइखे जाइ परमेस्वर इम्बालाइहेङ पिका खाबाराता सन्तुस्ति मान्थुघाखे, कालाउ स्वर्गता हिका थामेहेङ इम्बालाइ लाअ्हि। परमेस्वर इङको दुतगेलाइहेङ आनान्तको झिन्झिरिहोइ धेउतेङ कितिकितिकाता ताअ्का हि, जेता वा इम्बालाइहेङ इङको माहान दिनाको भाअसिङ ताअ्का हि, जेलाउ वा इम्बालाइहेङ आनान्त दन्ड प्याङ।

⁷ इदोङ इस्राएललिगेलाइ कालाउ स्वर्गदुतगेलाइ भाइपाङ सोदोम कालाउ गमोरा सहरगेलाइता कालाउ इङको भेरपाको सहरगेलाइता हिका, द्‍याङगेलाइहेङ जेङका काथा फोम पासु। द्‍याङगेलाइ आनाइतिक जेङका हिघाहि कालाउ गोताङ खाल्को कासिबिरिहोइ भरिका हिघाहि। ओदोङ भाअ्सिङ परमेस्वर इम्बालाइहेङ मेता दुहि। इम्बालाइ दोफा हिका काथा धाताइका सिक्स्यकगेलाइको भाअ्सिङ चेताउनि जेङका हि कि, इम्बालाइहेङ आनान्त थेकापा मेता साजाइ प्याङ।

⁸ इङको उधारनगेलाइ थाहा गितेङ बुङ परमेस्वरको आग्या माकिका द्‍याङगेलाइ दर्सन तिङका हि दोअ्तेङ इम्बालाइ इन्सिकाङ पाप पाखे। ओबालाइ ताइको जिउहेङ आसुद्द बानाइखे, प्रभुको खाबाराहेङ इन्कार पाखे कालाउ स्वर्गता हिका महिमित प्रानिगेलाइको निन्दा पाखे।

⁹ मिखाएल बुङ इङको को बिरोधता मारेम्का काथा दोअ्हि, जाइ परमेस्वरको स्वर्गदुतगेलाइ मध्येको एमि हि। हाइपालिपानु जेलाउ साइतान वाको दोफा चेरसुतेङ परमेस्वरको बक्ता मोसाको जिउहेङ ह्रुलि दोका वाको खाबाराहेङ चुनाउति पाहि, मिखाएल या महसुस मापाहि कि वाको दोफा साइतानहेङ मारेम्का तरिकाको सब्द होइ दुसिका खाबारा हि। भरु वा दोअ्हि, “प्रभु नासेहेङ नाइयाको।”

¹⁰ कालाउ इदोइ द्‍याङगेलाइ मागिका काथागेलाइको बिरोध, आनादारको सब्दगेलाइ प्रयोग पाखे। कालाउ माबुझिका गुपुस भाइपा ताइमि मागिका काथागेलाइ पाखे, इन्सिका काम पातेङ इम्बालाइ ताइमिहेङ हान्ति पाखे।

¹¹ नेलाइको भाअ्सिङ हेथे थिलि गोइका हि, नेलाइ आदमको चान कयिनको भाइपा ताइको जिबन मारेम्का तरिकाहोइ जियाइका हिसुना, जाइ ताइको ओनेहेङ मारा पाका हिघाहि। हाइपालिपानु वा डाहाहोइ पोङघाका हिघाहि, ओदोङ भाअ्सिङ परमेस्वर वाको ओनेको भोग सुइकार हि, कालाउ वाको भोग चाहि मासुइकार हि। इम्बालाइ हातारहोइ इङकोङ गल्ति पाका हि, जेदोङ बालाम ताका निङलिको भाअ्सिङ बो द्‍याङगेलाइहेङ पाप पालि लागाइका हिघाहि। जेसाङ कोरह ताइको बिद्रोहको कारन नासाका हिघाहि, उङको द्‍याङगेलाइ प्रभुको बिरोधता बिद्रोह पाकाको कारन नासातावा।

¹² जेसाङ समुन्द्रता म्होन्हाका उन्ठुइ जाहाजको भाअ्सिङ खातारा हिखे, इदोङ द्‍याङगेलाइ प्रेमको भोजता नेलाइको भाअ्सिङ थिलि गोइका हिखे। इम्बालाइ इङको भातियारता लेदेर लुका काम पाहि कालाउ बुङ इम्बालाइ माथिखे माकुनु ताइको लेदेर लुका कामता मालेदेरखे। इम्बालाइ ताइको खिनिङ सामाराइका लाखुरिगेलाइ भाइका हि, इम्बालाइ आरु द्‍याङगेलाहेङ मासाघाइखे। इम्बालाइ सेङका भोनोइ ह्रुता भेरमाहोइ उराइपातेङ हिका चि मापिका बादेल भाइका खिनिङ हि। इम्बालाइ हेन्जा प्रतिग्या पाखे, कालाउ हाइ दोङ मापिखे। इम्बालाइ सेका बेलाको इङको सिङसोङ भाइका हि, जाइता हिदोइ बुङ फल माजेङखे कालाउ जारिसोङ उन्हाका हिखे, इङको दोअ्का इम्बालाइ झाराङ सिलि दोका हि।

¹³ जेसाङ समुन्द्रको बल्लियाका उलाउ-उल्लाउका छाल्कागेलाइहोइ नाका चिहोइ थोसिको फिज भाइका चुमाखे, इङको द्‍याङगेलाइ लेदेर लुका कामगेलाइ पाखे। जेसाङ आधे फुरुगेलाइ दामा आवाइगिल्का हिखे कालाउ इङकोगेलाइता भर परिलि मादोखे, एन्साङ दोङ नेलाइ उङको द्‍याङगेलाइहेङ पिताइलि माएल। ओदोङ भाअ्सिङ जेलाउलाउको भाअ्सिङ कितिकितिकाता परमेस्वर इम्बालाइको भाअ्सिङ ए थामे ताअ्का हि, जेता हिदोइ बुङ थाअ्साइका मान्थुखे।

¹⁴ आदमसो न्हितेङ पुस्ता जोलोमका हनोक इदोइ द्‍याङगेलाइको बारेता एसा दोअ्तेङ आगमबानि पाका हिघाहि, “खाङसु, प्रभु निसित दोङ ताइको हेन्जाङ पबित्तरो दुतगेलाइ दोफा ल्वाङ।

¹⁵ वा गोताङ द्‍याङगेलाइको न्याय पाङ कालाउ इम्बालाइ परमेस्वरको बिरोध पाका गोताङ दुस्ट कामगेलाइ कालाउ वाको बिरोधता इम्बालाइको दोअ्का ओसारापा थिलि गोइका सब्दगेलाइको दन्ड प्याङ।”

¹⁶ इदोइ द्‍याङगेलाइ जेलाउ बुङ परमेस्वरको बिरोधता नुइ धुइखे कालाउ आरु द्‍याङगेलाइता खिनिङ दुसिका निङखे। इम्बालाइको ह्रदयहोइ गोइका आन्सार इम्बालाइ निरन्तर कु-काम पाखे। इम्बालाइ ताइमि दोङ ताइको बारेता घमन्ड काथागेलाइ पाखे, कालाउ ताइको फाइदाको भाअ्सिङ आरु द्‍याङगेलाइको भाअ्सिङ भानाइदारि पाखे।

चेताउनि जेङका सिक्स्या

¹⁷ कालाउ आनाउ सानाइतिगेलाइ, नेलाइ चाहि केलाइको प्रभु येसु ख्रिस्टको छाल्का चात्यागेलाइ आन्चा दोङ दोअ्का काथागेलाइ फोम पासु।

¹⁸ इम्बालाइ दोअ्का हिघाहि, “आखिरि दिनागेलाइता प्रभु कालाउ वाको द्‍याङगेलाइको खुजालाइका जेनावा। उङकोङ द्‍याङगेलाइको जिबन ताइको लान्छाहोइ काबुता जेङका हिखे।”

¹⁹ नेलाइहेङ ए जुट जेङलि मापिका द्‍याङगेलाइ एबालाइ दोङ हि। इम्बालाइ ताइको जिउको इच्छा आन्सार ब्यभार पाखे, कालाउ इम्बालाइता पबित्तरो आत्मा मान्थुखे।

²⁰ कालाउ काङको आनाउ सानाइतिगेलाइ, एमिसो भेनेङहेङ नेलाइ खाङधुरि पाका वथे पबित्तरो सत्येता बाढेलिको भाअ्सिङ साघाइलि गोइखे। नेलाइ पबित्तरो आत्माको सरबुङको आगुवाइता प्रार्थाना पालि गोइखे।

²¹ केलाइको प्रभु येसु ख्रिस्ट नेलाइहेङ ताइको क्रिपाता आनान्त जिबन पिलिको भाअ्सिङ नेलाइ ह्रुम्काताङ पालाउ नेलाइको भाअ्सिङ परमेस्वरको प्रेम आनुभब पाकाताङ हानेसु।

²² खाङधुरिता इस्थिर मान्थुका द्‍याङगेलाइहेङ दाया तिम्पासु,

²³ आधिमि द्‍याङगेलाइ, जाइ नरक हानाङ दोअ्तेङ नेलाइहेङ थाहा दोङ हि। इम्बालाइहेङ आनान्तको मेसो मार्फा हाइतेङ बान्चिपासु। कालाउ आरु द्‍याङगेलाइहेङ दाया तिङपासु। कालाउ इन्सिकाङ खाल्को पापसो बान्चेसु। नेलाइ ताइको पापमय दाग लागिका धाबा सुधाङ सिकासु।

²⁴ परमेस्वर नेलाइहेङ बान्चिपालि द्वाङ कालाउकि नेलाइ पापता जिबन जियाइलिको भाअ्सिङ धोकाता मापरिसु। वा महिमित परमेस्वर नेलाइहेङ निस्कलङ कालाउ आनान्दहोइ भरिका बानाइलि नेलाइहेङ ताइमिकोता घुरिपातेङ चुमालि द्वाङ।

²⁵ वा एमि खिनिङ परमेस्वर हि, कालाउ केलाइको प्रभु येसु ख्रिस्ट केलाइको भाअ्सिङ पाका काम पाहासो दोङ मुक्ति पिका हि। येसु ख्रिस्ट केलाइको प्रभु द्‍याङगेलाइहेङ आदार कालाउ बाखानाइ पिका बानाइयाको। इम्बालाइ या बुझिलि द्वाको कि वाको दोफा लाम्फासोङ नानि कालाउ जेलाउलाउको भाअ्सिङ सरबुङ कालाउ खाबारा हि। आमेन।