युहन्‍ना 9 - Dhimal NT

जोलोम सोङ को कान्हाँ तिङलि दोका

¹ जेलाउ येसु कालाउ वाको चात्या इन्तासो हानिकाताङ पालाउ, वा एमि जोलोम सोङ कान्हाँ द्‍याङहेङ तिङहि।

² येसुको चात्यागेलाइ वासेहेङ हिअ्हि, “गुरु ज्यु इदोइ द्‍याङ जोलोम सोङ कान्हाँ दोङ हि, हासुको पापहोइ वा कान्हाँ जेङहि? वाको ताइकोङ पापहोइ या वाको आमाइ-आबाको पापहोइ?”

³ येसु उत्तारा पिहि, “या ना ते वा पाप पाहि ना ते वाको आमाइ-आबा पाप पाहि, कालाउ वा ओदोङ भाअ्सिङ कान्हाँ जोलोमहि कालाउकि परमेस्वरको सरबुङ वाकोता तिनाको दोअ्तेङ।

⁴ जाइ कासेहेङ दिङगिल्हि, वाको कामगेलाइ केलाइ धेमाङ दोङ पालि गोइखे। इङको बेला लोलि तोम्का हि इङको बेलाकाता हासु बुङ काम पालि मादोअ्खे।

⁵ जेलाउ थेकापा का सुमिङता ह्याङका, एन्सालाउ थेकापा का सुमिङको फाइसालामका दोङ।”

⁶ एसा दोअ्लि दोअ्तेङ, येसु भोनोइता थोअ्हि कालाउ इन्तासो आतुइसा भोनोइसो खेचा बानाइहि कालाउ येसु उङको कान्हाँ द्‍याङको मिसियाँता लागाइपिहि।

⁷ कालाउ येसु उङको द्‍याङहेङ दोअ्हि, “हाने सिलोआमको धोबेलेङता हानितेङ मिधु (सिलोआमको माने जेङखे दिङगिल्का) कालाउ उङको द्‍याङ धोबेलेङता हानिहि कालाउ मिधुहि कालाउ एला वा तिङलि दोका जेङतेङ लोहि।

⁸ कालाउ वाको देरागेलाइ कालाउ आरु द्‍याङगेलाइ जाइ लाम्फा उङको द्‍याङहेङ भिख ह्रेगिल्का तिङकालाइ ता-ताइता दोअ्हि, इदोइ उङको द्‍याङ माको रो? जाइ जेलाउ बुङ योम्तेङ भिख ह्रेघाहि?”

⁹ आधिमि दोअ्हि, एइ उङको ओदोङ दोङ कालाउ आरु द्‍याङगेलाइ दोअ्हि, वा उङको द्‍याङ माको, कालाउ इन्सिकाङ भाइका तिङका खिनिङ। कालाउ उङको द्‍याङ दोअ्हि, “का ओदोङ द्‍याङ दोङ।”

¹⁰ कालाउ इम्बालाइ हिअ्हि, “नाअ् हेसा तिङलि दोका जेङन्हा?”

¹¹ उङको द्‍याङ उत्तारा पिहि, येसु मिङ हिका द्‍याङ भोनोइहेङ खेचा बानाइहि कालाउ काङको मिसियाँता लागाइपिहि, कालाउ वा कासेहेङ दोअ्हि, सिलोआमको धोबेलेङता हाने कालाउ मिधु। कालाउ का धोअ्बेलेङता हानिघा कालाउ मिधुघा, कालाउ का तिङलि तेङघा।

¹² कालाउ द्‍याङगेलाइ उङको द्‍याङहेङ हिअ्हि, उङको द्‍याङ हिसो हि? उङको द्‍याङ दोअ्हि, “कासेहेङ थाहा मान्थु।”

फारिसिगेलाइसो हिअ्का-भोका

^13-14 जेदोङ दिना येसु भोनोइहेङ खेचा बानाइतेङ उङको द्‍याङहेङ एल्पाहि इङको दिना परमेस्वरको पबित्तरो दिना हिघाहि। ओदोङ भाअ्सिङ द्‍याङगेलाइ उङको द्‍याङहेङ फारिसिगेलाइकोता चुम्पुहि।

¹⁵ आरोङ फारिसिगेलाइ बुङ उङको द्‍याङहेङ हिअ्हि, “हेसा नाअ् तिङलि दोका जेङन्हा?” उङको द्‍याङ दोअ्हि, “वा दोङ भोनोइको खेचा बानाइतेङ काङको मिसियाँता लागाइपिहि कालाउ का मिधुघा कालाउ तिङलि तेङघा।”

¹⁶ आधिमि फारिसिगेलाइ दोअ्हि, उङको द्‍याङ परमेस्वरसो लोका माको, हाइपालिपानु वाते परमेस्वरको पबित्तरो दिनाको नियम पालन माकेम्हि। कालाउ आरुगेलाइ दोअ्हि, या भाइका पापि द्‍याङ एसापा इसिका चिन्हा पालि द्वाङ? एसापा इम्बालाइको माझाता खेङन्हाहि।

¹⁷ फारिसिगेलाइ आरोङ बुङ एखे उङको कान्हाँ द्‍याङहेङ हिअ्हि, “इदोइ द्‍याङ नासेहेङ एल्पाहि कालाउ नाअ् दोअ्खेना। नाअ् वाको बिसोइता हाइ दोअ्ताना?” वा दोअ्हि, “वाते एमि परमेस्वरको बक्ता हि।”

¹⁸ कालाउ यहुदि आगुवागेलाइ उङको कान्हाँ द्‍याङ जातिङकोङ तिङलि दोका काथा माअ्साहि, ओदोङ भाअ्सिङ इम्बालाइ वाको आमाइ-आबाहेङ काइतेङ हिअ्हि।

¹⁹ हाइ या नेलाइकोङ चान दोङ हि? हाइ या जोलोम सोङ कान्हाँ हिघाहि? कालाउ वा एला हेसा तिङलि दोहि कुनु?

²⁰ वाको आमाइ-आबा उत्तारा पिहि, “एइ केलाइ गिनाखे इदोइ केलाइकोङ चान दोङ कालाउ या जोलोम सोङ कान्हाँ हिघाहि।

²¹ कालाउ एला वा हेसा तिङलि दोखे केलाइ मागिनाखे, हासु वासेहेङ मिसियाँ एल्पा पिहि। वासेहेङ हिअ्सु, एला वा बार्का जेङका हि कालाउ ताइको बिसोइता उत्तारा ताइमिङ दोङ पिलि द्वाङ।”

²² वाको आमाइ-आबा यहुदि आगुवागेलाइसो थिनाङ एन्सा दोअ्का, हाइपालिपानु यहुदि आगुवागेलाइ लाम्फोरति निर्नय पालि दोका हिघाहि कि, जाइ-जाइ येसुहेङ ख्रिस्ट हि दोअ्खे खाङधुरि पाखे उङकोहेङ यहुदिगेलाइको चाउघारा साअ्सो ओल्लापाङ।

²³ ओदोङ भाअ्सिङ वाको आमाइ-आबा दोअ्हि, एला वा बार्का जेङका हि कालाउ ताइको बिसोइता ताइमिङ उत्तारा पिलि द्वाङ।

²⁴ कालाउ यहुदि आगुवागेलाइ उङको कान्हाँ द्‍याङहेङ आरोङ बुङ काइतेङ दोअ्हि, “नाअ् परमेस्वरको आगाता बाचा पाअ्‌ कि नाअ् सत्ये धुइयाना, हाइपालिपानु केलाइ गिनाखे कि जाइ नासेहेङ एल्पाहि उङको द्‍याङ पापिहि।”

²⁵ उङको द्‍याङ उत्तारा पिहि, “वा पापि दोङ हि याते मान्थु दोअ्तेङ का मागिखा कालाउ का इदोइ झोको खिनिङ गिघाखा का कान्हाँ हिघाखा कालाउ एला का तिङलि दोअ्का जेङका हिघा।”

²⁶ यहुदि आगुवागेलाइ हिअ्हि, “वा नासेहेङ हाइ पाहि? वा नाङको मिसियाँ हेसा एल्पाहि?”

²⁷ उङको द्‍याङ उत्तारा पिहि, “का नेलाइहेङ लाम्फा दोअ्लि दोअ्का हिघा, कालाउ नेलाइ माहिङ पिसुना। हाइ पालि नेलाइ आरोङ ओदोङ काथा हिङलि खाङसुखेना? हाइ नेलाइ बुङ वाको चात्यागेलाइ जेङलि खाङसुखेना?”

²⁸ यहुदि आगुवागेलाइ मारेम्फाङ चेर ताम्पातेङ उङको द्‍याङहेङ चेरकाताङ दोअ्हि, नाअ् उङको द्‍याङको चात्या हिना, केलाइ मोसाको चात्यागेलाइ दोङ।

²⁹ केलाइ गिनाखे कि परमेस्वर मोसा दोफा नुइ धुइका हिघाहि, कालाउ केलाइ उङको द्‍याङको बिसोइता हाइ दोङ मागिनाखे, वा हिसोसो लोका हि।

³⁰ उङको द्‍याङ उत्तारा पिहि, “इदोइ हिस्का भारभुसाइका काथा हि, येसु हिसोसो लोहि, नेलाइ मागिसुखेना, कालाउ बुङ वा काङको मिसियाँ एल्पा पिहि।

³¹ केलाइ झाराङ गिनाखे कि परमेस्वर, पापिगेलाइको काथा माहिङ पिखे कालाउ बुङ वा परमेस्वरको आराधाना पाकालाइहेङ कालाउ वाको इच्छा आन्सार काम पाकालाइको खिनिङ काथा हिङपिखे।

³² जेलाउसो सुमिङ सिरजाइन्हाहि एन्सालाउसो एला थेकापा जोलोम सोङ कान्हाँहेङ हासु बुङ एल्पाका हेलाउ बुङ हिङका मान्थुन्हाहि।

³³ जेसापा वा परमेस्वरसो मालोकानु वा दोङ इस्का हिदोइ बुङ काम पालि मादोधाङ।”

³⁴ यहुदि आगुवागेलाइ वासेहेङ उत्तारा पिहि, “नाअ् पापसो जोलोम जेङतेङ केलाइहेङ धिर्पालि भोखेना?” दोअ्काताङ उङको द्‍याङहेङ इम्बालाइ यहुदिगेलाइको चाउघारा साअ्सो ओल्लेपाहि।

आत्मिकि कान्हाँ

³⁵ यहुदि आगुवागेलाइ उङको द्‍याङहेङ ओल्ला पागिल्का येसु हिङहि, कालाउ येसु उङको द्‍याङहेङ दुसुतेङ हिअ्हि, हाइ नाअ् द्‍याङको चान ह्रुता खाङधुरि पाखेना?

³⁶ उङको द्‍याङ दोअ्हि, “नेउ कासेहेङ दोअ्पि परमेस्वरको चान हासुको? कालाउकि का वासेहेङ खाङधुरि पालि द्वाको।”

³⁷ येसु उङको द्‍याङहेङ दोअ्हि, का परमेस्वरको चान हिघा, नाअ् कासेहेङ लाम्फाङ तिङलि दोका हिना कालाउ का वाआङ दोङ जाइ दोफा एला नाअ् काथा पातेङ हिना।

³⁸ उङको द्‍याङ दोङ दोअ्हि, एइ प्रभु, का नाअ् ह्रुता खाङधुरि पाङका। कालाउ उङको न्हुसो येसुहेङ तुघुरतेङ आराधाना पाहि।

³⁹ येसु दोअ्हि, “का इदोइ न्यायको भाअ्सिङ सुमिङता लोघा कि, मातिङकालाइ तिनाको कालाउ तिङकालाइ कान्हाँ जेनाको।”

⁴⁰ जाइ फारिसिगेलाइ वाको दोफा हिघाहि, इम्बालाइ येसुहेङ हिङका काथा दोअ्हि, “केलाइ बुङ कान्हाँ हिनाहि दोअ्तेङ नाअ् दोअ्तेङ हिना।”

⁴¹ येसु इम्बालाइहेङ दोअ्हि, “जेसापा नेलाइ कान्हाँ जेङका नु नेलाइ पापि माजेङधास्वाना, कालाउ एला नेलाइ तिङखा दोसुखेना, ओदोङ भाअ्सिङ नेलाइको पाप स्यामा माअ्पापियाङ।”