युहन्‍ना 8 - Dhimal NT

कासिबिरि बेबाल कालाउ येसु

¹ कालाउ न्हुसो येसु जैतुन तिकारता ताइको चात्यागेलाइ दोफा हानिहि।

² येसु आरोङ न्हु दिना ह्रिमाङ मुन्दिरको सालेङता हानिहि, कालाउ हेन्जा द्‍याङगेलाइ वाकोता लोहि, कालाउ येसु योम्तेङ इम्बालाइहेङ सिक्स्या पिहि।

³ येसु सिक्स्या पिकाताङ पालाउ व्यवस्था धिरपाका द्‍याङगेलाइ कालाउ फारिसिगेलाइ कासिबिरिता रिम निन्चाका एमि बेबालहेङ चुमाहि, वासेहेङ झाराङको आगाता जाअ्पाहि।

⁴ इम्बालाइ येसुहेङ दोअ्हि, “गुरु ज्यु, इदोइ बेबाल कासिबिरि पालाउ रिम निन्चाहि।

⁵ मोसाको व्यवस्थाता इन्सिका बेबालाइहेङ सेअ्लिको भाअ्सिङ उन्ठुइहोइ तोअ्लि गोइखे दोअ्का आग्या पिका हि। नाअ् हाइ दोअ्ताना कि केलाइ हाइ पालि गोयाङ?”

⁶ कालाउ इम्बालाइ येसुहेङ जाचिलिको भाअ्सिङ, कालाउ वाको ह्रुता दुसिलि द्वाङबे दोअ्तेङ एन्सा दोअ्का हिघाहि। कालाउ येसु तुघुरतेङ भोनोइता आङगुलिहोइ लेखेलि तेङहि।

⁷ जेलाउ इम्बालाइ येसुहेङ हिअ्तेङसाङ हि, कालाउ येसु जाअ्तेङ इम्बालाइहेङ दोअ्हि, “नेलाइता जाइ हेलाउ बुङ पाप पाका मान्थु, वा दोङ झाराङ खान्तेङ लाम्फा इदोइ बेबालहेङ उन्ठुइ तोकाको।”

⁸ कालाउ आरोङ तुघुरतेङ येसु भोनोइता आङगुलिहोइ लेखेलि तेङहि।

⁹ कालाउ जेलाउ इम्बालाइ इदोइ हिङहि, कालाउ बार्कासो म्हुइका थेकापा एमि-एमि पातेङ हानिहि इदोइ सोचितेङ हानिहि कि, केलाइ झाराङ पापि हिनाहि। कालाउ येसु एक्लाङ जेङहि, कालाउ उङको बेबाल चाहि येसुको आगाता जाअ्तेङ हिघाहि।

¹⁰ येसु जाअ्हि कालाउ उङको बेबालहेङ खाङतेङ दोअ्हि, ओइ बेबाल इम्बालाइ हिसो हानिहि? हाइ पालि हासु बुङ नासेहेङ दन्ड मापिहि?

¹¹ उङको बेबाल दोअ्हि, “प्रभु, हासु बुङ मापिहि।” येसु दोअ्हि, “का बुङ नासेहेङ दन्ड माप्याङका एला सिता हाने, कालाउ आरोङ पापता जिबन माजियाइ।”

येसु सुमिङको फाइसालामका

¹² येसु आरोङ इम्बालाइहेङ दोअ्हि, “का सुमिङको फाइसालामका हिघा। कासेहेङ पिताइकालाइ कितिकितिकाता माहिगिल्लाङ, कालाउ वाको इङको फाइसालामका निनाङ जाइ दोङ आनान्त जिबनको पिखे।”

¹³ कालाउ फारिसिगेलाइ वासेहेङ दोअ्हि, “नाअ् ताइको बिसोइता ताइमिङ साक्सि पिखेना, ओदोङ भाअ्सिङ नाङको साक्सि सत्ये मान्थु।”

¹⁴ येसु उत्तारा पिहि, का ताइको बिसोइता साक्सि पिलाउ बुङ काङको साक्सि सत्ये हि। हाइपालिपानु, का हितासो लोका हिघा, कालाउ का हिसो हानाङका। कालाउ नेलाइ मागिसुखेना, का हितासो ल्वाङका, कालाउ का हिसो हानाङका।

¹⁵ नेलाइ द्‍याङगेलाइको न्याय बाहार रुप खाङतेङ पासुखेना। कालाउ का हासुको बुङ न्याय मापाङका।

¹⁶ का न्याय पालाउ खाङधुरि योग्य जेनाङका। हाइपालिपानु का एक्लाङ मान्थुघा, कालाउ कासेहेङ दिङगिल्का आबा परमेस्वर का दोफा हि।

¹⁷ नेलाइको मोसाको व्यवस्थाता बुङ लेखेका हि, न्हेमि द्‍याङको साक्सि सत्ये दोङ जेनावा।

¹⁸ ताइको बिसोइता का ताइमिङ साक्सि पिखा, कालाउ कासेहेङ दिङगिल्का आबा परमेस्वर बुङ काङको बिसोइता साक्सि पिखे।

¹⁹ इम्बालाइ येसुहेङ दोअ्हि, नाङको आबा परमेस्वर हिसो हि? येसु उत्तारा पिहि, नेलाइ ना ते कासेहेङ नाल्सुखेना नाअ् काङको आबा परमेस्वरहेङ, जेसापा नेलाइ कासेहेङ नाल्कानु काङको आबा परमेस्वरहेङ बुङ नाल्सुधाना।

²⁰ इदोइ काथा वा मुन्दिरता सालेङता सिक्स्या पिलाउ भेति ल्होपाका भेरपा दोअ्हि। कालाउ हासु बुङ वासेहेङ मारिम्हि, हाइपालिपानु वाको दुख ल्होपाका कालाउ सिका सोमोइ एला थेकापा लोका मान्थुघाहि।

ताइको बिसोइता येसु दोअ्लि खाङका

²¹ येसु आरोङ इम्बालाइहेङ दोअ्हि, “का हानाङका, कालाउ नेलाइ कासेहेङ भोअ्स्वाना, कालाउ नेलाइ ताइको पाप स्यामा मानिङतेङ सिस्वाना। कालाउ जेता का हानिखा, नेलाइ इन्ता लोलि मादोस्वाना।”

²² या हिङतेङ यहुदि आगुवागेलाइ दोअ्हि, हाइ वा ताइमिहेङ सेअ्ताङ? हाइपालिपानु वा दोअ्खे, जेता का हानिखा नेलाइ इन्ता लोलि मादोस्वाना।

²³ कालाउ येसु इम्बालाइहेङ दोअ्हि, नेलाइ इदोइ सुमिङता जोलोम जेङका हिघासुखेना, कालाउ का स्वर्गसो लोका हिघा। नेलाइ इदोइ सुमिङको हिसुना कालाउ का चाहि इदोइ सुमिङको माको।

²⁴ का दोङ नेलाइहेङ दोअ्घा, नेलाइ ताइको पाप स्यामा मानिङसिङ सिस्वाना। जेसापा का ह्रुता खाङधुरि मापा सुखेना कि का हासु, नेलाइ गिस्वाना, कालाउ नेलाइको पाप स्यामा मापापियाङ।

²⁵ यहुदि आगुवागेलाइ वासेहेङ हिअ्हि, “नाअ् हासु कुनु?” येसु इम्बालाइहेङ दोअ्हि, “का वाआङ दोङ, जेदोङ का नेलाइहेङ सुरुसोङ दोअ्दोङखा।

²⁶ का नेलाइको न्याय पालि हेन्जाङ काथागेलाइ दोअ्लि हि। कालाउ कासेहेङ दिङगिल्का सत्ये हि, कालाउ वाकोसो का जेदोङ हिङघा इङकोङ काथा का सुमिङको द्‍याङगेलाइहेङ दोअ्खा।”

²⁷ आबा परमेस्वरको बिसोइता येसु दोअ्का हि दोअ्तेङ इम्बालाइ माबुझिहि।

²⁸ ओदोङ भाअ्सिङ येसु दोअ्हि, “जेलाउ नेलाइ का द्‍याङको चानहेङ क्रुसता तोइस्वाना, का वाआङ दोङ दोअ्तेङ नेलाइ दोङ थाहा गिस्वाना, कालाउ का ताइमिङ हाइ दोङ मापाङका, कालाउ आबा परमेस्वर धिर्पाका काथागेलाइ धुइखा।

²⁹ कालाउ कासेहेङ दिङगिल्का का दोफा हि, वा दोङ कासेहेङ एकालाङ लाअ्धिका मान्थु, हाइपालिपानु का जेलाउ बुङ वासेहेङ खुसि बानाइका काम खिनिङ पाखा।”

³⁰ येसु दोअ्काताङ पाका इदोइ काथागेलाइ हिङतेङ हेन्जाङ द्‍याङगेलाइ वाको ह्रुता खाङधुरि पाहि।

आब्राहामको हारागुटिया

³¹ कालाउ येसु ताइ ह्रुता खाङधुरि पाका यहुदिगेलाइहेङ दोअ्हि, नेलाइ काङको बचनता हितेङ हिसुना पानु, नेलाइ जातिङको काङको चात्या दोङ।

³² कालाउ नेलाइ दोङ सत्ये हाइ दोअ्तेङ गिस्वाना, कालाउ सत्येहोइ नेलाइहेङ स्वतन्तरो पावा।

³³ इम्बालाइ येसुहेङ उत्तारा पिहि, केलाइ आब्राहामको हारागुटियासो कालाउ एला थेकापा हासुकोङ बुङ बान्धाइति जेङका मान्थुन्हाहि। कालाउ नेलाइ स्वतन्तरो जेङवास्ना दोअ्तेङ हेसा दोअ्लि दोअ्सुखेना?

³⁴ येसु इम्बालाइहेङ दोअ्हि, जातिङ भारि का नेलाइहेङ दोअ्खा, पाप पाकालाइ पापको खाबाराता हि।

³⁵ कालाउ बान्धाइति जेलाउ बुङ साअ्ता माहिखे, कालाउ चान जेलाउ बुङ साअ्ता हिखे।

³⁶ ओदोङ भाअ्सिङ का चान नेलाइहेङ पापसो स्वतन्तरो पाहि पानु नेलाइ जातिङ भारि स्वतन्तरो जेङस्वाना।

³⁷ का गिखा, नेलाइ आब्राहामको हारागुटियासो हिसुना। कालाउ बुङ नेलाइ कासेहेङ सेअ्लि भोसुखेना, हाइपालिपानु नेलाइ काङको सिक्स्या सुइकार मापा सुखेना।

³⁸ का चाहि आबा परमेस्वरको दोफा हिलाउ तिङका काथागेलाइको बारेता दोअ्खा। कालाउ बुङ नेलाइ नेलाइकोङ आबासो हिङका काथागेलाइ दोङ पासुखेना।

³⁹ इम्बालाइ वासेहेङ उत्तारा पिहि, “केलाइको पुर्खा आब्राहाम हिघाहि। येसु इम्बालाइहेङ दोअ्हि, नेलाइ आब्राहामको हारागुटियासो हिनुते नेलाइ जेदोङ आब्राहाम पाघाहि ओदोङ काम पासुध्वाना।

⁴⁰ कालाउ एला नेलाइ कासेहेङ सेअ्लि खाङसुखेना, हाइपालिपानु का परमेस्वरसो हिङका, सत्ये बचन नेलाइहेङ दोअ्का हिघा, इस्का कामते आब्राहाम मापाहि।

⁴¹ नेलाइको आबा जेदोङ पाहि नेलाइ ओदोङ काम पासुखेना।” इम्बालाइ येसुहेङ दोअ्हि, “केलाइ कासिबिरिसो जोलोम जेङका माको! केलाइको आबा एमि खिनिङ कालाउ वा परमेस्वर हि।”

दुस्टको सान्तान

⁴² येसु इम्बालाइहेङ दोअ्हि, परमेस्वर नेलाइको आबा हिका हिनुते नेलाइ कासेहेङ प्रेम पासुध्वाना, हाइपालिपानु का परमेस्वरसो लोका हिघा। का ताइमिङ लोका माको कालाउ आबा परमेस्वर दोङ कासेहेङ दिङगिल्का हि।

⁴³ का जेदोङ दोअ्का नेलाइ हाइ पालि माबुझिसुखेना? हाइपालिपानु नेलाइ काङको सन्‍देस सुइकार पालिसो इन्कार पासुखेना।

⁴⁴ नेलाइ ताइको आबा साइतानसो हिसुना, कालाउ नेलाइ ताइको आबाको इच्छा पुरा पालि खाङसुखेना। इङकोते लाम्फासोङ ज्यान मारा हिघाहि, कालाउ वा हेलाउ बुङ सत्येबादि मान्थुघाहि। हाइपालिपानु वाकोता सत्ये मान्थुघाहि। ताइको स्वभाव आन्सार धाताइखे, हाइपालिपानु इङको धातुवा दोङ हि, हाइपालिपानु वाते धातुवाको आबा दोङ हि।

⁴⁵ का सत्ये धुइखा, कालाउ बुङ नेलाइ कासेहेङ खाङधुरि मापा सुखेना।

⁴⁶ नेलाइ मध्येसो हासु कासेहेङ पाप पाका दुसिलि लागाइलि द्वावा? जेसापा का सत्ये धुइखा पानु, हाइ पालि नेलाइ का ह्रुता खाङधुरि मापा सुखेना?

⁴⁷ जाइ परमेस्वर दोफा सामान्दा ताअ्खे, वा परमेस्वरको काथा हिङखे। नेलाइ परमेस्वरसो माको, ओदोङ भाअ्सिङ नेलाइ माहिङसुखेना।

येसु कालाउ आब्राहाम

⁴⁸ यहुदि आगुवागेलाइ येसुहेङ उत्तारा पिहि, केलाइको दोअ्का ठिक हि, नाअ् एमि सामारि हिना कालाउ नासेहेङ भुत-आत्मा धेल्का हि।

⁴⁹ येसु उत्तारा पिहि, “कासेहेङ भुत-आत्मा धेल्का मान्थु, का ताइको आबा परमेस्वरको आदार पाखा, कालाउ नेलाइ काङको आनादार पासुखेना।

⁵⁰ कालाउ का ताइकोङ आदार माभोखा, कालाउ एमि हि जाइ भोखे कि काङको आदार जेनाको। कालाउ वा दोङ न्याय पावा।

⁵¹ जातिङ भारि का नेलाइहेङ दोअ्खा, जेसापा हासु बुङ काङको बचन केम्खे पाखे पानु उङको आनान्त काल थेकापा मासियाङ।”

⁵² यहुदि आगुवागेलाइ येसुहेङ दोअ्हि, “एला केलाइहेङ जातिङको थाहा जेङहि, नासेहेङ भुत-आत्मा धेल्का दोङ हि। आब्राहाम सिहि, परमेस्वरको बक्तागेलाइ बुङ सिहि, कालाउ नाअ् दोअ्खेना हासु बुङ काङको दोअ्का बचन केम्खे पानु उङको आनान्त काल थेकापा मासियाङ।

⁵³ हाइ केलाइको पुर्खा आब्राहाम खान्तेङ नाअ् माहान हिना? वा सिहि कालाउ परमेस्वरको बक्तागेलाइ बुङ सिहि। नाअ् ताइमिहेङ हाइ सम्झिखेना?”

⁵⁴ येसु उत्तारा पिहि, जेसापा का ताइकोङ आदार पाखा पानु काङको आदार ब्यर्थ जेनावा। कासेहेङ आदार पिका काङको आबा हि, कालाउ नेलाइ दोअ्सुखेना कि वा नाङको परमेस्वर हि।

⁵⁵ कालाउ नेलाइ वासेहेङ नाल्का मान्थु सुन्हा, का वासेहेङ नाल्खा। जेसापा का वासेहेङ मानाल्खा दोअ्खा पानु, का नेलाइ भाइपा धातुवा भायाङका। कालाउ का वासेहेङ नाल्खा, कालाउ वाको बचनको आग्या केम्खा।

⁵⁶ नेलाइको पुर्खा आब्राहाम काङको लोका दिना खाङलि इच्छा हिघाहि, कालाउ वा तिङहि कालाउ मेनाङ हाउसाइहि।

⁵⁷ ओदोङ भाअ्सिङ यहुदि आगुवागेलाइ येसुहेङ दोअ्हि, नाअ् एला बुङ न्हे कुरि ते बासार थुकाका मान्थुना। कालाउ नाअ् हेसा आब्राहामहेङ तिङका हिना?

⁵⁸ येसु उत्तारा पिहि, जातिङ भारि का नासेहेङ दोअ्खा, आब्राहामको जोलोम जेङका खान्तेङ का लाम्फा दोङ हिघा।

⁵⁹ या काथाता द्‍याङगेलाइ वासेहेङ सेअ्लिको भाअ्सिङ उन्ठुइ तोल्हेहि, कालाउ येसु म्होतेङ मुन्दिरसो बाहार ओल्लेहि।