युहन्‍ना 6 - Dhimal NT

येसु ना हाजार द्याङगेलाइहेङ चापाहि

¹ इदोइ काथा न्हुसो येसु गालिल समुन्द्रको ओदोइ पार हानिहि, जाइहेङ तिबेरियासको समुन्द्र बुङ दोअ्खे।

² कालाउ एनोङ बार्का जेर वाको न्हु-न्हु हानिलि तेङहि, हाइपालिपानु वा मासाधेकागेलाइहेङ एल्पाका, इम्बालाइ भारभुसाइका चिन्हागेलाइ तिङका हिघाहि।

³ येसु तिकार ह्रुता ताङहि, कालाउ इन्ता ताइको चात्यागेलाइ दोफा योम्हि।

⁴ यहुदिगेलाइको निस्तार पार्बा भेरपाङ लोका हिघाहि।

⁵ कालाउ येसु ताइको कोरपाङ खाङलाउ एनोङ बार्का जेर ताइकोभारि लोका तिङतेङ फिलिपहेङ दोअ्हि, “इम्बालाइहेङ चापालिको भाअ्सिङ केलाइ हिसोसो तोले चोल्लि?”

⁶ येसु उङकोहेङ जाचिलिको भाअ्सिङ इदोइ काथा दोअ्का हिघाहि, हाइपालिपानु वा जेदोङ पालि तोम्का हिघाहि वा इदोइ गिका हिघाहि।

⁷ फिलिप वासेहेङ उत्तारा पिहि, “झाराङ आतु-आतुइसा निङलाउ बुङ न्हे साइ चान्दिको थुरिहोइ चोल्लाउ बुङ तोले इम्बालाइहेङ माथेमाङ।”

⁸ वाको चात्यागेलाइसो एमि, सिमोन पतरुसको ओने आन्द्रियास दोअ्हि,

⁹ “इता एमि जामाल हि, वाको दोफा जौको नालोङ तोले कालाउ न्हेनोङ हाया हि। कालाउ बुङ इदोइ हेन्जाङ द्‍याङगेलाइको भाअ्सिङ इदोइ झोको हाइ थेमावा रो?”

¹⁰ येसु दोअ्हि, “द्‍याङगेलाइहेङ योम्पासु इन्ता हेन्जाङ घासि हिका चाउर हिघाहि।” कालाउ ना हाजार झोको वाबाल द्‍याङगेलाइ इन्ता हिघाहि।

¹¹ कालाउ येसु तोले चुम्तेङ, परमेस्वरहेङ धन्यबाद पितेङ योम्कालाइहेङ बाख्राइलि पिहि, कालाउ एन्साङ पातेङ हाया बुङ बाख्राइहि। कालाउ इम्बालाइ गोइका झोको चाहि।

¹² कालाउ जेलाउ इम्बालाइ हामु भेल्पाङ चाअ्हि, कालाउ वा ताइको चात्यागेलाइहेङ दोअ्हि, “दाइका दुइका तोलेको पोङन्हाका टुक्रागेलाइ जोम्पासु, कालाउ हाइ दोङ मानासाताको।”

¹³ चाअ्का सो दाइका जौको इङको नालोङ तोलेको पोङन्हाकागेलाइ इम्बालाइ जोम्पालाउ तेन्हे दाल्हो जेङहि।

¹⁴ ओदोङ भाअ्सिङ वा पालि दोका इदोइ भारभुसाइका चिन्हा तिङतेङ उङको द्‍याङगेलाइ दोअ्हि, सुमिङता लोका परमेस्वरको बक्ता जातिङकोङ वा दोङ जेङ।

¹⁵ इम्बालाइ लोतेङ वासेहेङ हेसा पालाउ बुङ चुम्पुतेङ राजा बानाइलि खाङखे दोअ्का काथा गितेङ येसु आरोङ एक्लाङ तिकारता हानिहि।

येसु चि ह्रुता तेहि

¹⁶ बेल्लालि तोम्लाउ येसुको चात्यागेलाइ गालिल समुन्द्रको काम्भेता हानिहि।

¹⁷ कालाउ नाउता धोल्तेङ इम्बालाइ गालिल समुन्द्रको ओदोइ पार कर्फनहुम सहर भारि हानिलि तोम्हि। ओदोङ बेला माचेल मुचुल्लि दोका हिघाहि, कालाउ येसु एन्सालाउ थेकापा बुङ इम्बालाइकोता थुकालि लोका मान्थुघाहि।

¹⁸ कालाउ बार्का दुरभेरमा दोलाइन्हाका हिघाहि, समुन्द्रको साल उल्लाउ-उल्लाउ हि।

¹⁹ ना तु किलो मिटर झोको नाउ ख्याइतेङ हानिलि दोका हिघाखे। न्हुसो इम्बालाइ येसुहेङ समुन्द्र ह्रुता-ह्रुता तेतेङ नाउ भारि लोका तिङतेङ इम्बालाइ थिहि।

²⁰ कालाउ येसु इम्बालाइहेङ दोअ्हि, “का दोङ हिघा, माअ्थिसु।”

²¹ इम्बालाइ वासेहेङ नाउता धोल्हि दोअ्हि, कालाउ ओदोङ घुरिङताङ ओबालाइको हानिका थामेता नाउ काम्भेता थुकाल्हाहि।

²² न्हु दिना समुन्द्र ओदोइ पार हिका जेरहेङ थाहा जेङहि कि, इन्ता एनोङ खिनिङ नाउ हिघाहि, कालाउ येसु ताइको चात्यागेलाइ दोफा नाउता धोल्का मान्थुघाहि, कालाउ वाको चात्यागेलाइ खिनिङ हानिका हिघाहि।

²³ कालाउ तेबेरियासो आरोङ नाउगेलाइ इङको थामेको भेरपा लोहि, जेता प्रभु धन्यबाद पितेङ कालाउ न्हुसो, इम्बालाइ तोले चाका हिघाहि।

²⁴ येसु कालाउ वाको चात्यागेलाइ इन्ता मान्थुका तिङतेङ द्‍याङगेलाइ येसुहेङ भोलि नाउता धोल्तेङ कर्फनहुम सहर भारि हानिहि।

येसु जिबन पिका तोले

²⁵ इम्बालाइ येसुहेङ समुन्द्रको ओदोइ पार दुसुतेङ वासेहेङ हिअ्हि, “गुरु ज्यु, नाअ् इता हेलाउ लोन्हा?”

²⁶ येसु इम्बालाइहेङ उत्तारा पितेङ दोअ्हि, “जातिङ भारि का नेलाइहेङ दोअ्खा, नेलाइ भारभुसाइका चिन्हगेलाइ तिङतेङ माको, कालाउ घाइपाङ तोले चालि निङनाङ कासेहेङ भोसुखेना।

²⁷ नासाका जेङका चाका आनेमानेको भाअ्सिङ मेहेनत मापासु, भरु आनान्त जिबन थेकापा हिका चालि-आम्लिको भाअ्सिङ मेहेनत पासु, का द्‍याङको चान जाइ नेलाइहेङ इङको चाका आमेने प्याङका, हाइपालिपानु आबा परमेस्वर दोङ कासेहेङ इसिका पालि खाबारा पिका हि।”

²⁸ इम्बालाइ वासेहेङ दोअ्हि, परमेस्वरको चिताइका काम पालिको भाअ्सिङ केलाइ हाइ पालि गोयाङ?

²⁹ येसु इम्बालाइहेङ उत्तारा पिहि, “परमेस्वरको काम इदोइ हि, कि नेलाइ का ह्रुता खाङधुरि पासु जाइहेङ वा दोङ दिङगिल्का हि।”

³⁰ ओदोङ भाअ्सिङ इम्बालाइ वासेहेङ दोअ्हि, नाअ् इसिका हाइ चिन्हा तिङपाना कालाउ केलाइ नासेहेङ खाङधुरि पाङ? नाअ् हाइ पाखेना?

³¹ केलाइको पुर्खागेलाइ चाका-मान्दा थामेता मन्ना चाअ्हि, जेसापा धर्मसास्तरता लेखेका हि, “परमेस्वर इम्बालाइहेङ स्वर्गसो तोले चाअ्लि पिहि।”

³² येसु इम्बालाइहेङ दोअ्हि, जातिङ भारि का नेलाइहेङ दोअ्खा, नेलाइहेङ स्वर्गसो तोले पिका मोसा माको, कालाउ स्वर्गसो नेलाइहेङ जातिङको तोले पिका काङको आबा परमेस्वर हि।

³³ हाइपालिपानु जेदोङ तोले परमेस्वर पिखे इङको वा दोङ हि, स्वर्गसो खुतेङ लोका कालाउ सुमिङको द्‍याङगेलाइहेङ जिबन पिखे।

³⁴ इम्बालाइ वासेहेङ दोअ्हि, “प्रभु, इदोइ तोले केलाइहेङ दिनाङ पि।”

³⁵ येसु इम्बालाइहेङ दोअ्हि, आनान्त जिबन पिका तोले का दोङ हिघा, काङकोता लोकालाइ हेलाउ बुङ माम्हितुताङ, कालाउ कासेहेङ खाङधुरि पाकालाइ हेलाउ बुङ चि आम्लि माकिताङ।

³⁶ कालाउ का इम्बालाइहेङ लाम्फा दोङ दोअ्का हिघा, नेलाइ कासेहेङ तिङका हिसुना, कालाउ बुङ का ह्रुता खाङधुरि मापा सुखेना।

³⁷ आबा परमेस्वर कासेहेङ पिकागेलाइ झाराङ काङकोता ल्वाङ, कालाउ काङकोता लोकालाइहेङ का हेलाउ बुङ इन्कार मापाङका।

³⁸ ताइको इच्छा पुरा पालि का स्वर्गसो लोका माको, कालाउ कासेहेङ दिङगिल्काको इच्छा पुरा पालिको भाअ्सिङ का लोका हिघा।

³⁹ कालाउ कासेहेङ दिङगिल्काको इच्छा इदोइ दोङ हि, कि कासेहेङ पिकागेलाइमध्ये हासुहेङ बुङ का नासालि माप्याङका कालाउ इम्बालाइहेङ न्हुसोको दिनाता आनान्त जिबन पिलि सिकासो सिन्चाल्पाङका।

⁴⁰ हाइपालिपानु काङको आबा परमेस्वरको इच्छा इदोइ दोङ हि, कि का चानहेङ खाङका कालाउ का ह्रुता खाङधुरि पाका झाराङ आनान्त जिबन निनाको, कालाउ का वासेहेङ आन्त्यको दिनाता सिकासो सिन्हु पाङका।

⁴¹ यहुदि आगुवागेलाइ येसुको बिरोधता गनगनाइलि तेङहि, हाइपालिपानु वा दोअ्हि, “स्वर्गसो लोका तोले का दोङ हिघा।”

⁴² इम्बालाइ दोअ्हि, या योसेफको चान येसु दोङ हि, कालाउ याको आबा कालाउ आमाइहेङ केलाइ नाल्न्हाखे। कालाउ या हेसा का स्वर्गसो खुअ्तेङ लोका दोअ्तेङ दोअ्खे?

⁴³ येसु इम्बालाइहेङ उत्तारा पिहि, नेलाइ हिदोइ बुङ काथाता ता-ताइमिता मागनगनाइसु।

⁴⁴ कासेहेङ दिङगिल्का आबा परमेस्वर का दोफा लोलि मन मापिनु हासु बुङ काङकोता लोलि माद्वाङ, कालाउ काङकोता लोका जतिहेङ का सुमिङको आन्त्यको दिनाता सिकासो सिन्हु पाङका।

⁴⁵ कालाउ इम्बालाइ झाराङहेङ परमेस्वर पाहासो धिरपावा दोअ्तेङ परमेस्वरको बक्तागेलाइको धर्मसास्तरता लेखेका हि। कालाउ झाराङ जाइ आबा परमेस्वरसो हिङखे कालाउ धिरखे उङको काङकोता लोखे।

⁴⁶ आबा परमेस्वरहेङ हिदोइ बुङ द्‍याङ तिङका मान्थु, कालाउ आबा परमेस्वरसो का एमि खिनिङ वासेहेङ तिङका हिघा।

⁴⁷ “जातिङ भारि का नेलाइहेङ दोअ्खा, जाइ का ह्रुता खाङधुरि पाखे वाको दोफा आनान्त जिबन हि।

⁴⁸ जिबन पिका तोले का दोङ हिघा।

⁴⁹ नेलाइको पुर्खागेलाइ चाका-मान्दा थामेता मन्ना चाहि कालाउ बुङ इम्बालाइ सितेङ हानिहि।

⁵⁰ जेदोङ तोलेको बारेता का दोअ्खा, इङको स्वर्गसो खुअ्तेङ लोका तोले इदोइ दोङ हि, जाइ इदोइ चाखे उङको मास्याङ।

⁵¹ स्वर्गसो खुअ्तेङ लोका जिबन पिका तोले का दोङ हिघा। हासु बुङ इदोइ तोले चानु उङको जेलाउ बुङ बान्च्याङ। कालाउ जेदोङ तोले का सुमिङता जिबनको भाअ्सिङ प्याङका, उङको चाहि काङको जिउ।”

⁵² कालाउ यहुदि आगुवागेलाइ ता-ताइमिता तर्क-विर्तक पालि तेङहि, “इदोइ द्‍याङ हेसा केलाइहेङ ताइको जिउ चाअ्लि पिलि द्वाङ?”

⁵³ येसु इम्बालाइहेङ दोअ्हि, “जातिङ भारि का नेलाइहेङ दोअ्खा, नेलाइ का द्‍याङको चानको जिउ माचासुन्हा पानु, कालाउ हिति माआम्सुना पानु, नेलाइता जिबन मान्थुवाङ।

⁵⁴ काङको जिउ चाअ्का कालाउ काङको हिति आम्कालाइ दोफा आनान्त जिबन हि, कालाउ आन्ताको दिनाता का वासेहेङ सिकालाइसो सिन्हु पाङका।

⁵⁵ हाइपालिपानु काङको जिउ जातिङकोङ चाका आमेने दोङ, कालाउ काङको हिति जातिङको आम्का आमेने दोङ।

⁵⁶ काङको जिउ चाअ्का, कालाउ काङको हिति आम्का चाहि काङकोता ह्यावा कालाउ का वाकोता ह्याङका।

⁵⁷ जेसाङ कि सिन्हुका आबा परमेस्वर कासेहेङ दिङगिल्हि, कालाउ का आबा परमेस्वरको कारनसो बान्चिखा, एन्सा पातेङ कासेहेङ चाअ्का बुङ काङको कारनसो बान्चियावा।

⁵⁸ स्वर्गसो लोका तोले इदोइ दोङ हि। या नेलाइको पुर्खागेलाइ चाअ्का तोले भाइका माको। इम्बालाइ इङको चाअ्हि कालाउ सिहि, कालाउ काङको पिका तोले चाअ्का द्‍याङ चाहि जेलाउ बुङ बान्चितेङ ह्याङ।”

⁵⁹ येसु इदोइ काथा कर्फनहुम सहरको यहुदिगेलाइको चाउघारा साअ्ता सिक्स्या पिकाताङ दोअ्का हिघाहि।

आनान्त जिबन पिका सिक्स्या

⁶⁰ इदोइ काथागेलाइ हिङतेङ न्हुसो येसुको चात्यागेलाइ मध्येसो हेन्जा द्‍याङगेलाइ दोअ्हि, इदोइ सिक्स्या थाङका हि, हासु इदोइ मानिलि द्वाङ रो?

⁶¹ कालाउ वाको चात्यागेलाइ इदोइ बिसोइता गनगनाइतेङ हि दोअ्का गिअ्तेङ येसु इम्बालाइहेङ दोअ्हि, “हाइ इदोइ काथाहोइ नेलाइहेङ का ह्रुता खाङधुरि पालि रोकियावा?

⁶² नेलाइ का द्‍याङको चानहेङ जेता का लाम्फा हिघाखा इन्ता ताङकाताङ पाका तिङन्हा पानु हाइ पाना?

⁶³ कालाउ जिबन पिका आत्मा हि, जिउसो हिदोइ बुङ फाइदा माजेङखे। जेदोङ काथा का नेलाइ दोफा धुइका हिघा, इङको आत्मा कालाउ जिबन दोङ।

⁶⁴ कालाउ नेलाइ मध्येसो हेथे झना कासेहेङ खाङधुरि मापाखे।” हाइपालिपानु खाङधुरि मापाकालाइ हासु-हासु वाला कालाउ कासेहेङ धोका पितेङ रिम्पाका हासु ज्याङ वाला दोअ्तेङ येसु लाम्फासोङ थाहा गिका हिघाहि।

⁶⁵ कालाउ येसु दोअ्हि, “ओदोङ भाअ्सिङ का नेलाइहेङ दोअ्का हिघा, जेसापा कासेहेङ दिङगिल्का आबा परमेस्वरसो का दोफा लोका मन मापिनु हासु बुङ द्‍याङ काङकोता लोलि माद्वाङ।”

पतरुसको खाङधुरि

⁶⁶ कालाउ इङको सोमोइसो येसुको चात्यागेलाइ मध्ये हेन्जाङ वासेहेङ पिताइलि लाअ्हि।

⁶⁷ येसु तेन्हे झना चात्यागेलाइहेङ हिअ्हि, “हाइ नेलाइ बुङ कासेहेङ लाअ्तेङ हानिस्वाना?”

⁶⁸ कालाउ सिमोन पतरुस जोबाफ पिहि, हे प्रभु, केलाइ हासुकोता हानिलि? नाअ् दोफा आनान्त जिबनको बचन हि।

⁶⁹ कालाउ केलाइ खाङधुरि पाका हिनाहि कालाउ गिका हिनाहि, नाअ् दोङ परमेस्वरको जन हिना।

⁷⁰ येसु इम्बालाइहेङ जोबाफ पिहि, “हाइ का ताइमिङ नेलाइ तेन्हे झनाहेङ साल्का माको रो? कालाउ बुङ नेलाइ मध्येसो एमि चाहि साइतानको खाबाराता हि।”

⁷¹ येसु इदोइ काथा सिमोन इस्कोरियतको चान यहुदाको बिसोइता दोअ्का हिघाहि, हाइपालिपानु तेन्हे झना चात्यागेलाइ मध्येसो येसुहेङ धोका पितेङ रिम्पापिका उङकोङ हिघाहि।