युहन्‍ना 4 - Dhimal NT

येसु कालाउ सामारि बेबाल

¹ जेलाउ येसुहेङ थाहा जेङहि कि, युहान्‍ना खान्तेङ येसु हेन्जा चात्यागेलाइ बानाइकाताङ कालाउ बप्तिस्ता बुङ पिदोङघाहि दोअ्का काथा फारिसिगेलाइ हिङहि।

² येसु ताइमिङ बप्तिस्ता मापिहि, कालाउ वाको चात्यागेलाइ बप्तिस्ता पिघाहि।

³ जेलाउ येसु इदोइ काथा थाहा गिहि, येसु यहुदिया जिल्ला लाअ्तेङ आरोङ गालिल जिल्लाता ताइको चात्यागेलाइ दोफा घुरेहि।

⁴ वासेहेङ सामारिया जिल्ला पाहासो जेङतेङ हानेलि गोइघाहि।

⁵ ओदोङ भाअ्सिङ वा सामारिया जिल्लाता हिका सुखार दोअ्का देराता थुकालि लोहि। कालाउ इङको देराता याकुब ताइको चान योसेफहेङ पिका मिलिङ भेरपाङ हिघाहि।

⁶ एला बुङ याकुबको तोअ्का चुवा इन्ता हि। येसु लोकाताङ पालाउ दामाता माइका हिघाहि। कालाउ इङको चुवाको भेरपा हानितेङ योम्हि। कालाउ आधाबेला जेङका हिघाहि।

⁷ एन्सालाउ एमि सामारि बेबाल चि इलि इन्ता लोहि। येसु वासेहेङ दोअ्हि, “कासेहेङ चि आम्लि पि।”

⁸ हाइपालिपानु वाको चात्यागेलाइ सहरता चाअ्का आमेनेगेलाइ चोल्लि हानिका हिघाहि।

⁹ कालाउ सामारि बेबाल वासेहेङ दोअ्हि, नाअ् एनोङ यहुदि हिना कालाउ का एमि सामारि बेबाल हिघा, नाअ् का दोफा चि हाइ पालि ह्रेखेना? हाइपालिपानु यहुदिगेलाइ सामारिगेलाइ दोफा हिदोइ बुङ सामान्दा माताखे।

¹⁰ येसु वासेहेङ जोबाफ पिहि, “नाअ् मागिखेना कि नासेहेङ परमेस्वर हाइ पिलि खाङखे। कालाउ नाअ् या बुङ मागिखेना कि नाअ् दोफा हासु चि ह्रेखे। जेसापा नाअ् थाहा गिनु इङको का दोफा ह्रेधाना कालाउ का नासेहेङ जिबनको चि पिधाङका जेदोङ जिबन पिखे।”

¹¹ उङको बेबाल वासेहेङ दोअ्हि, “नेउ, नाङको दोफा इका दोल बुङ मान्थु, कालाउ चुवा बुङ हेन्जाङ चिल्वाङवाङका हि। कालाउ नाअ् हितासो इङको जिबन पिका चि चुमाना?

¹² हाइ नाअ् केलाइको पुर्खागेलाइ याकुब खाङतेङ बार्का हिना? जाइ दोङ केलाइहेङ इदोइ चुवा बानाइ पिहि, वा ताइमिङ कालाउ वाको सान्तान कालाउ वाको गुपुसगेलाइ इदोइ दोङ चुवाको चि आम्हि।”

¹³ येसु वासेहेङ जोबाफ पिहि, “इदोइ चि आम्का झाराङ आरोङ चि आम्लि किताङ।

¹⁴ कालाउ जाइ-जाइ काङको पिका चि आम्खे उङको हेलाउ बुङ चि आम्लि माकिताङ। जेदोङ चिका प्याङका, इङको चि वासेहेङ आनान्त जिबनको भाअ्सिङ मुर्तेङ हिका चिको मुहान जेनाङ।”

¹⁵ उङको बेबाल वासेहेङ दोअ्हि, “नेउ, कासेहेङ इङको चि पि कालाउ का चि आम्लि माकिताङका कालाउ इता चि इलि लोतेङ हिलि मागोइयाङका।”

¹⁶ येसु उङकोहेङ दोअ्हि, “हाने, कालाउ नाङको के हेङ इता काइतेङ चुमा।”

¹⁷ उङको बेबाल जोबाफ पिहि, काङको के मान्थु येसु उङकोहेङ दोअ्हि, “नाङको के मान्थु दोअ्तेङ नाअ् थिकोङ दोअ्न्हा,

¹⁸ हाइपालिपानु नाङको नामि के जेङलि दोहोइ, कालाउ जेदोङ द्‍याङ एला नाअ् दोफा हि, उङको नाङको के माको। नाअ् दोङ इदोइ जातिङकोङ दोअ्खेना।”

¹⁹ उङको बेबाल वासेहेङ दोअ्हि, नेउ, नाअ् परमेस्वरको बक्ता दोङ दोअ्तेङ का थाहा गिघा।

²⁰ केलाइको सामारि पुर्खागेलाइ इदोङ तिकारता परमेस्वरको आराधाना पाघाहि, “कालाउ नाअ् यहुदिगेलाइ दोअ्सुखेना, आराधाना पाका थामे यरुसेलेम दोङ।”

²¹ येसु उङकोहेङ दोअ्हि, ओइ बेबाल, कासेहेङ खाङधुरि पाअ्‌, इङको सोमोइ लोदोङखे, जेलाउ नेलाइ ना ते इदोइ तिकारता, ना ते यरुसेलेमता आबाहेङ आराधाना पास्वाना।

²² नाअ् सामारिगेलाइ जेदोङ आराधाना पासुखेना इङको मागिसुखेना। केलाइ यहुदि जेदोङ आराधाना पानाखे इङको गिनाखे, हाइपालिपानु मुक्ति चाहि यहुदिगेलाइसो लोखे।

²³ कालाउ सोमोइ लोदोङखे, कालाउ इङको सोमोइ एलाङ दोङ लोलि दोहोइ, जेलाउ जातिङकोङ आराधाना पाकालाइ आबाहेङ आत्मा कालाउ सत्येता आराधाना पाखे। हाइपालिपानु आबा इस्काङ आराधाना पाकालाइहेङ भोअ्खे।

²⁴ परमेस्वर आत्मा हि, ओदोङ भाअ्सिङ वाको आराधाना पाकालाइ आत्मा कालाउ सत्येता आराधाना पालि गोइखे।

²⁵ उङको बेबाल वासेहेङ दोअ्हि, “का गिखा, मसिह लोदोङखे (जाइहेङ ख्रिस्ट बुङ दोअ्नाखे) कालाउ जेलाउ वा ल्वाङ, कालाउ वा दोङ केलाइ झाराङहेङ गोताङ काथा बुझिपावा।”

²⁶ येसु वासेहेङ दोअ्हि, “नाअ् दोफा धुइका का ओदोङ ख्रिस्ट दोङ।

²⁷ ओदोङ घुरि वाको चात्यागेलाइ लोहि, कालाउ वासेहेङ एमि बेबाल दोफा काथा पातेङ हिका तिङतेङ सक्क परेहि, कालाउ नाअ् हाइ चाहिखेना? कालाउ नाअ् उङको बेबाल दोफा हाइ पालि काथा दोअ्खेना?” दोअ्तेङ हासु बुङ माहिअ्हि।

²⁸ कालाउ उङको बेबाल ताइको घाल्से सिधितेङ देरा भारि हानिहि, कालाउ द्‍याङगेलाइहेङ दोअ्हि,

²⁹ “लोसु, एमि द्‍याङहेङ खाङसु, का जेदोङ पाघा वा दोङ कासेहेङ गोताङ दोअ्पिहि हाइ वा दोङ ख्रिस्ट ते माको रो?”

³⁰ कालाउ इम्बालाइ देरासो ओल्लितेङ येसुहेङ खाङलि लोहि।

³¹ ओदोङ माझाता चात्यागेलाइ वासेहेङ एसा दोअ्तेङ सेउपाहि, “गुरु ज्यु हाइ दोङ चाअ्।”

³² कालाउ येसु इम्बालाइहेङ दोअ्हि, “का दोफा चालिको भाअ्सिङ चाका-आम्का हि, कालाउ इङको नेलाइहेङ थाहा मान्थु।”

³³ ओदोङ भाअ्सिङ चात्यागेलाइ ता-ताइमिता दोअ्हि, “हाइ हासु बुङ वासेहेङ चाका-आम्का पिपाहि कि नाअ् हेसा?”

³⁴ येसु इम्बालाइहेङ दोअ्हि, काङको चाका-आम्का चाहि कासेहेङ दिङगिल्का परमेस्वरको आग्या किलि दोङ कालाउ वाको काम पुरा पालि दोङ जेदोङ वा कासेहेङ पिका हि।

³⁵ नेलाइ दोअ्सुखेना सिसा मिङलि द्‍या माइना लागियाङ कालाउ का नेलाइहेङ दोअ्खा, “मिसियाँ ल्हेतेङ मिलिङता खाङ सिसा मिङलि दोहोइ कालाउ चेका सोमोइ जेङलि दोहोइ।

³⁶ जाइ सिसा चेखे वा दोङ ज्याला निङखे, कालाउ आनान्त जिबनको भाअ्सिङ सिसा जोम्पाखे, कालाउ बिकालाइ कालाउ चेकालाइ ए-दोफाङ हाउसाइखे।

³⁷ हाइपालिपानु एमि बिखे, कालाउ भेनेङ द्‍याङ चेखे, दोअ्का निङपिका सत्ये जेङखे।

³⁸ का नेलाइहेङ इन्ता चेलि दिङगिल्घा, जेता नेलाइ मेहेनत पाका मान्थु सुन्हा। भेनेङ द्‍याङगेलाइ मेहेनत पाका हि, कालाउ इम्बालाइको मेहेनतको फल नेलाइ दोङ निङका हिसुना।”

³⁹ “का जेदोङ पाघा वा दोङ कासेहेङ गोताङ काथा दोअ्पिहि” दोअ्का उङको बेबालको दोअ्का काथाहोइ इङको देराको हेन्जा जोसो सामारिगेलाइ येसु ह्रुता खाङधुरि पाहि।

⁴⁰ ओदोङ भाअ्सिङ जेलाउ सामारिगेलाइ वाकोता लोहि, कालाउ इम्बालाइ वासेहेङ केलाइ दोफा हिलि बिन्ति पाहि, कालाउ येसु न्हेनि थेकापा इन्ताङ हि।

⁴¹ कालाउ येसुको दोअ्का सन्‍देस हिङतेङ आरोङ हेन्जाङ सामारिगेलाइ वा ह्रुता खाङधुरि पाहि।

⁴² उङको बेबालहेङ इम्बालाइ दोअ्हि, “एला नाङको दोअ्का काथाता खिनिङ माको, कालाउ केलाइ ताइमि दोङ वाको सन्‍देस हिङका कारनसो केलाइ खाङधुरि पाङ। जातिङकोङ वा दोङ सुमिङको मुक्ति दाता दोअ्तेङ केलाइ गिका हिनाहि।”

सारकारि कर्मचारिको चान एल्हि

⁴³ न्हेनि न्हुसो इन्तासो ओल्लेतेङ येसु गालिल जिल्लाता हानिहि।

⁴⁴ हाइपालिपानु येसु ताइमिङ दोअ्हि, कि परमेस्वरको बक्ताहेङ ताइकोङ सारभिको द्‍याङगेलाइ चाहि वास्ता मापाखे।

⁴⁵ जेलाउ वा गालिल जिल्लाता लोहि, कालाउ वा यरुसेलेमता पार्बाको दिनाता जेदोङ पाका हिघाहि इङको गोताङ काम तिङका हिघाहि। ओदोङ भाअ्सिङ गालिलगेलाइ वासेहेङ स्‍वागत पाहि, हाइ दोनु इम्बालाइ बुङ पार्बाता हानिका हिघाहि।

⁴⁶ कालाउ न्हुसो येसु आरोङ गालिल जिल्लाको कान्हा नगरता लोहि, जेता वा दोङ चिहेङ दाखरस बानाइका हिघाहि। कालाउ इन्ता एमि सारकारि आधिकारि कर्फनहुम सहरता हिघाहि, जाइको चान मासाधिका हिघाहि।

⁴⁷ येसु यहुदिया जिल्लासो गालिल जिल्लाता लोका हि, दोअ्का हिङतेङ उङको द्‍याङ वाकोता लोहि, कालाउ काङको सिलि तोम्का चानहेङ लोतेङ एल्पापि दोअ्तेङ सेउपाहि।

⁴⁸ येसु उङकोहेङ दोअ्हि, “नेलाइ चिन्हा कालाउ आचाम्माको कामगेलाइ मातिम्पाभरि नेलाइ हेलाउ बुङ खाङधुरि मापास्वाना।”

⁴⁹ उङको सारकारि आधिकारि वासेहेङ दोअ्हि, “नेउ नाअ् काङको चान सिलि खान्तेङ लाम्फा दोङ लोपि।”

⁵⁰ येसु वासेहेङ दोअ्हि, “हाने, नाङको चान बान्चिका हि। येसु उङकोहेङ दोअ्का बचनता खाङधुरि पाहि, कालाउ ताइको दामा चाहि।

⁵¹ कालाउ उङको द्‍याङ दामाता हानिकाताङ पालाउ वाको चाकारियागेलाइ उङकोहेङ दुसुतेङ दोअ्हि नाङको चान एल्होइ।

⁵² हिदोइ सोमोइसो काङको चान एल्हि दोअ्तेङ चाकारियागेलाइहेङ हिअ्हि? इम्बालाइ वासेहेङ दोअ्हि आन्जि नितिमा ए बजेसो वासेहेङ मिसा लाअ्हि।”

⁵³ येसु वासेहेङ नाङको चान बान्च्याङ दोअ्का सोमोइसोङ एल्हि दोअ्का थाहा गिहि। कालाउ वा ताइमिङ कालाउ वाको गोताङ जाहान दोङ ख्रिस्टा खाङधुरि पाहि।

⁵⁴ यहुदिया जिल्लासो गालिल जिल्लाता येसु धुरितेङ लोलाउ पाका इदोइ न्हेतेङ चिन्हा हिघाहि।