युहन्‍ना 3 - Dhimal NT

निकोदेमसहेङ येसुको सिक्स्या

¹ निकोदेमस मिङ पाका एमि द्‍याङ हिघाहि। वा यहुदिगेलाइको धार्मिक आगुवा हिघाहि कालाउ फारिसि हिघाहि।

² निकोदेमस न्हिसिनता येसुकोता लोहि कालाउ वासेहेङ दोअ्हि, “गुरु ज्यु, केलाइ गिनाखे परमेस्वर नासेहेङ केलाइहेङ धिर्पालि दिङगिल्का हि। हाइपालिपानु परमेस्वर नासेहेङ मासाघाइपा भरि नाअ् दोङ पाका चिन्हागेलाइ हासु बुङ पालि माद्वाङ।”

³ येसु उङकोहेङ उत्तारा पिहि, “जातिङ भारि का नासेहेङ दोअ्खा, हासु बुङ नावा जेन्तेङ जोलोम माजेङनु वा परमेस्वरको सासन आनुभब पालि माद्वाङ।”

⁴ निकोदेमस येसुहेङ दोअ्हि, “द्‍याङ बुरातेङ हेसा जोलोम जेङलि द्वाङ? हाइ उङको ताइको आमाइको हामुता दुल्तेङ आरोङ न्हे पल्ति जोलोम जेङलि द्वाङ रो? माको मादोखे।”

⁵ येसु उत्तारा पिहि, “जातिङ भारि का नासेहेङ दोअ्खा, चि कालाउ आत्मासो जोलोम माजेङपा थेकापा हासु बुङ परमेस्वरको सासनता दुल्लि माद्वाङ।

⁶ द्‍याङ खिनिङ जिउहेङ जोलोम पिलि दोअ्खे, कालाउ पबित्तरो आत्मा स्वर्गसो नावा जिबन पिखे।

⁷ का नासेहेङ नावा जेङतेङ जोलोमलि गोयाङ दोअ्काता माआवाइ।

⁸ भेरमा जिसो मन्ताचाखे ओसोङ दोलाइखे। नाअ् भेरमाको गाला हिङखेना, कालाउ इङको हिसोसो लोखे कालाउ हिसो हानेखे, इङको मागिस्वाना। पबित्तरो आत्मासो जोलोम जेङका गोताङ द्‍याङ इन्सिकाङ जेङखे।”

⁹ निकोदेमस येसुहेङ हिअ्हि, “या हेसा ज्याङ कुनु?”

¹⁰ येसु निकोदेमसहेङ जोबाफ पिहि, “नाअ् इस्राएल सारभिता माहान गुरु हिना, नाअ् बास्ताबता इदोइ काथा बुझिलि गोयाना।”

¹¹ जातिङ भारि का नासेहेङ दोअ्खा, केलाइ जेदोङ गिनाखे इङकोङ दोअ्नाखे, कालाउ केलाइ जेदोङ तिङका हिनाहि इङको कोङ साक्सि पिन्हाखे, कालाउ नेलाइ केलाइको दोअ्का काथाता खाङधुरि मापा सुखेना।

¹² का नेलाइहेङ सुमिङता हिका काथागेलाइ दोअ्लाउ बुङ नेलाइ खाङधुरि मापा सुखेना, झन स्वर्गको बारेता काथा दोअ्नु हेसापा खाङधुरि पास्वाना?

¹³ स्वर्गसो खुअ्तेङ लोका का द्‍याङको चान बाहेक आरु हासु बुङ स्वर्गता हानिका मान्थु।

¹⁴ जेसाङ मोसा चाका-मान्दा थामेता पितलको पुय्याँहेङ तोल्हि, एन्साङ पातेङ का द्‍याङको चान बुङ तोल्हिन्हालि गोयाङ।

¹⁵ कालाउ जाइ-जाइ का ह्रुता खाङधुरि पाखे, इम्बालाइ दोङ आनान्त जिबन निनावा।

¹⁶ “हाइपालिपानु परमेस्वर सुमिङको द्‍याङगेलाइहेङ इसिका प्रेम पाहि, कालाउ वा दोङ ताइको एमि खिनिङ चान पिहि। कालाउकि वासेहेङ खाङधुरि पाकालाइ हासु बुङ नास माज्याको, भरु वा दोङ आनान्त जिबन निनाको।

¹⁷ हाइपालिपानु परमेस्वर ताइको चानहेङ सुमिङको द्‍याङगेलाइहेङ दन्ड पिलि माको, भरु सुमिङको द्‍याङगेलाइहेङ बान्चिपालि दोअ्तेङ दिङगिल्हि।

¹⁸ जाइ परमेस्वरको चान ह्रुता खाङधुरि पाखे, इम्बालाइ दन्ड मानिनाङ, भरु वाको ह्रुता खाङधुरि मापाकालाइ चाहि लाम्फाङ दुसिका जेङका हि। हाइपालिपानु इम्बालाइ परमेस्वरको एमि खिनिङ चान ह्रुता खाङधुरि पाका मान्थु।

¹⁹ न्ययाको कारन चाहि इदोइ दोङ, थास्साइका चाहि सुमिङता लोका हि। कालाउ द्‍याङगेलाइ थास्साइका खाङतेङ भरु कितिकितिका रेम्नाङ गिखे, हाइपालिपानु इम्बालाइको काम दुस्ट हि।

²⁰ हाइपालिपानु दुस्ट काम पाकालाइ झाराङ थास्साइका मन्दा माताखे। कालाउ थास्साइकाता इम्बालाइको पाका कामगेलाइ तिनाङ दोअ्तेङ थितेङ इम्बालाइ थास्साइकाता मालोखे।

²¹ कालाउ सत्येता तेअ्का द्‍याङ चाहि थास्साइकाता लोखे कालाउकि परमेस्वरको आग्या केम्तेङ पाका वाको कामगेलाइ द्‍याङगेलाइ खानाको।”

येसुको बिसोइता बप्तिस्ता पिका युहान्नाको साक्सि

²² कालाउ न्हुसो येसु कालाउ वाको चात्यागेलाइ यहुदिया जिल्लाता हानिहि कालाउ इन्ता इम्बालाइ दोफा कोम्हा सोमोइको भाअ्सिङ इन्ताङ बासा हि, कालाउ द्‍याङगेलाइहेङ बप्तिस्ता पिहि।

²³ युहान्‍ना बुङ सामारिया प्रेदेसता परिका सालिम नगरको भेरपा एनोन दोअ्का देराता बप्तिस्ता पिघाहि, हाइपालिपानु इन्ता हेन्जा चि हिघाहि कालाउ इन्ता द्‍याङगेलाइ बप्तिस्ता ह्रुलि लोघाखे।

²⁴ ओदोङ बेला थेकापा युहान्‍ना झ्यालखानाता परेका मान्थुघाहि।

²⁵ कालाउ युहान्नाको चात्यागेलाइसो एमि यहुदि दोफा धार्मिक मुन्धुम चोख्याइलिको बिसोइता तर्क-वितर्क पालि तेङहि।

²⁶ युहान्नाको चात्यागेलाइ लोतेङ युहान्नाहेङ दोअ्हि, गुरु ज्यु, यर्दन झोराको ओदोइ पार जाइ नाङको दोफा हिघाहि, जाइको बारेता नाअ् साक्सि पिन्हा, “खाङसु, वा बप्तिस्ता पिदोङखे कालाउ झाराङ वाकोता हानिदोङखे।”

²⁷ युहान्‍ना जोबाफ पिहि, हिदोइ बुङ द्‍याङगेलाइ स्वर्गसो मापिपा धाउ वा दोङ हाइ दोङ निङलि माद्वावा।

²⁸ का ख्रिस्ट माको, कालाउ का ते वा खाङतेङ लाम्फा दिङगिल्का खिनिङ हिघा। काङको दोअ्का काथा नेलाइ ताइमिङ हिङका हिसुना।

²⁹ दारा दरवाइनि दोफा बिहु पाखे, कालाउ दाराको लोकोन्दि जाअ्तेङ दाराको काथा हिङतेङ खुसि जेङखे, एसापा दोङ काङको ह्रदय आनन्दहोइ एला भरि पुर्न जेङका हि।

³⁰ येसु हेन्जा बारालि गोयाङ कालाउ का चाहि आसा कोम्लि गोयाङका हि।

³¹ स्वर्गसो लोका चाहि झाराङ खाङतेङ माहान हि। प्रिथिबिता जोलोम जेङका द्‍याङगेलाइ चाहि प्रिथिबिता हिखे कालाउ प्रिथिबिकोङ काथा दोअ्खे। कालाउ स्वर्गसो लोका झाराङ खाङतेङ माहान हि।

³² वा जेदोङ तिङका कालाउ हिङका हि, इङको साक्सि वा पिखे कालाउ वाको साक्सि हेन्जाङ द्‍याङगेलाइ माह्रुखे।

³³ कालाउ जाइ वाको साक्सि ह्रुका हि, वा चाहि परमेस्वर सत्ये हि दोअ्का काथाको प्रमान पिखे।

³⁴ हाइपालिपानु जाइहेङ परमेस्वर दिङगिल्हि, वा दोङ परमेस्वरको काथा धुइखे, हाइपालिपानु वासेहेङ परमेस्वर पबित्तरो आत्मा भरि पुर्न पिका हि।

³⁵ आबा परमेस्वर चानहेङ प्रेम पाखे कालाउ गोताङ आनेमाने वाकोङ खुरता पिका हि।

³⁶ जाइ परमेस्वरको चान ह्रुता खाङधुरि पाखे, वाको दोफा आनान्त जिबन हि। जाइ परमेस्वरको चानको आग्या माकिखे वा आनान्त जिबन मानिनाङ, कालाउ परमेस्वरको दन्ड वाको ह्रुता परियावा।