युहन्‍ना 19 - Dhimal NT

येसुहेङ क्रुसता तोइका आग्या

¹ कालाउ पिलातस सिपालाइहेङ आदेस पिहि कि, येसुहेङ चुम्पुतेङ हानिसु कालाउ द्वालिहोइ म्हेसु।

² कालाउ सिपालाइ येसुहेङ चुइको मुकुट कालाउ गाङगाउरा रङको राजाको होङका भाइका धाबा लागाइपिहि।

³ कालाउ वाको भेरपा लोतेङ दोअ्हि, यहुदिगेलाइको राजाको जय ज्याको! दोअ्काताङ इम्बालाइ येसुहेङ चाउरेलि तेङहि।

⁴ आरोङ बाहार ओल्लेतेङ पिलातस द्‍याङगेलाइहेङ दोअ्हि, खाङ, का येसुहेङ नेलाइकोता बाहार चुमादोङखा, नेलाइहेङ गिपालि भोखा, का याको हाइ दोङ गल्ति मातिङघा।

⁵ कालाउ चुइको मुकुट कालाउ नेल्पा रङगको धाबा होम्पातेङ येसुहेङ बाहार ओल्लेपातेङ चुमाहि। कालाउ पिलातस इम्बालाइहेङ दोअ्हि, खाङसु इदोइ द्‍याङहेङ!

⁶ जेलाउ मुलि पुजारिगेलाइ कालाउ मुन्दिरको पालेगेलाइ येसुहेङ तिङहि कालाउ ह्रिकाइकाताङ दोअ्हि, उङकोहेङ क्रुस्टा तोइसु, उङकोहेङ क्रुस्टा तोइसु! कालाउ पिलातस इम्बालाइहेङ दोअ्हि, “नेलाइ दोङ यासेहेङ चुम्पुतेङ क्रुस्टा तोइसु, हाइपालिपानु का याकोता हाइ दोङ गल्ति मानिङघा!”

⁷ यहुदि आगुवागेलाइ पिलातसहेङ उत्तारा पिहि, केलाइको बुङ एनोङ व्यवस्था हि, कालाउ इङको व्यवस्था आन्सार इदोइ सिलि गोयाङ हाइपालिपानु या दोङ ताइमिहेङ परमेस्वरको चान दोअ्का हि।

⁸ इदोइ काथा हिङतेङ पिलातस हेन्जा थिहि।

⁹ कालाउ पिलातस आरोङ दरबार लिता दुल्तेङ येसुहेङ हिअ्हि, नाअ् हिसोको हिना? कालाउ येसु पिलातसहेङ हिदोइ बुङ उत्तारा मापिहि।

¹⁰ ओदोङ भाअ्सिङ पिलातस दोअ्हि, हाइ नाअ् काङको दोफा काथा पालि माचाहिखेना? नासेहेङ लाअ्पिका खाबारा कालाउ नासेहेङ क्रुस्टा तोइका खाबारा बुङ का दोफा हि दोअ्का नासेहेङ थाहा मान्थु?

¹¹ येसु उतारा पिहि, नासेहेङ परमेस्वरसो खाबारा मापिकानु काङको ह्रुता नाङको हाइ दोङ खाबारा माजेङधाङ। ओदोङ भाअ्सिङ जाइ कासेहेङ नाङकोता सुम्पिका हि, झन हेन्जा पापको दुसिका हि।

¹² इङको उत्तारा हिङतेङ पिलातस येसुहेङ लाअ्पिलि हेन्जा कोसिस पाहि। कालाउ यहुदि आगुवागेलाइ एसा दोकाताङ ह्रिकाइहि, जेसापा नाअ् दोङ या द्‍याङहेङ लाअ्पिलि खाङहे पानु नाअ् रोमि साम्रातको सानाइति मान्थुना। ताइमिहेङ राजा दोङ दोअ्तेङ दाबि पाका गोताङ रोमि साम्रातको बिरोध पाखे।

¹³ पिलातस इदोइ काथा हिङतेङ येसुहेङ बाहार चुमाहि, कालाउ वा उन्ठुइको पाति दोअ्का थामेता न्याय आसनता योम्हि। (जाइहेङ हिब्रु भासाता गलगाथा दोअ्खे)

¹⁴ इङको आथार निस्तार पार्बा मानाइका आथार हिघाहि। कालाउ परमेस्वरको पबित्तरो दिनाको तियारको दिना बुङ हिघाहि। कालाउ पिलातस यहुदि आगुवागेलाइ दोअ्हि, खाङसु, नेलाइको राजा इता हि!

¹⁵ कालाउ इम्बालाइ एसा दोअ्काताङ ह्रिकाइलि तेङहि, उङकोहेङ सेअ्लि गोयाङ सेअ्लि गोयाङ क्रुस्टा तोइलि गोयाङ! पिलातस इम्बालाइहेङ दोअ्हि, “हाइ का नेलाइको राजाहेङ क्रुस्टा तोयाङका?” मुलि पुजारिगेलाइ उत्तारा पिहि, रोमि साम्रात बाहेक केलाइको राजा आरु हासु बुङ मान्थु।

¹⁶ कालाउ पिलातस दोङ येसुहेङ क्रुस्टा तोइलि इम्बालाइहेङ सुम्पिहि।

येसु क्रुसता

¹⁷ कालाउ सिपालाइ येसुहेङ, ताइको खाबाराता ताअ्हि कालाउ येसुहेङ ताइको क्रुस ताइमिहेङ दोङ फाअ्लि लागाइहि। कालाउ इम्बालाइ येसुहेङ यरुसेलेम सहरसो बाहार ख्प्परे दोअ्का थामेता चुम्पुहि। जाइहेङ हिब्रु भासाता गलगथा दोअ्खे।

¹⁸ इङको थामेता इम्बालाइ येसुहेङ क्रुस्टा तोइहि, कालाउ वा दोफा आरु न्हेमिहेङ बुङ तोइहि, एमिहेङ येसुको दाम्पाहा कालाउ भेनेङहेङ येसुको केपाहा कालाउ माझाता येसुहेङ।

¹⁹ पिलातस एनोङ दुसिका पात्तारा बुङ लेखेहि, कालाउ क्रुस ह्रुता तोइपिहि। इङकोता इस्का लेखेका हिघाहि “नासरत देराको येसु, यहुदिगेलाइको राजा।”

²⁰ हेन्जा यहुदिगेलाइ इदोइ दुसिहि पात्तारा पढेहि, हाइपालिपानु येसु क्रुस्टा तोइन्हाका थामे यरुसेलेम सहरको भेरपाङ हिघाहि, इदोइ हिब्रु, ल्यातिन कालाउ ग्रिक भासाता लेखेका हिघाहि।

²¹ यहुदिगेलाइको मुलि पुजारिगेलाइ पिलातसहेङ दोअ्हि, यहुदिगेलाइको राजा दोअ्का माको? कालाउ वा दोङ यहुदिगेलाइको राजा दोङ दोअ्हि दोअ्तेङ लेखेसु।

²² पिलातस उत्तारा पिहि, का जेदोङ लेखेघा-लेखेघा, एला इङको माबद्लियाङ।

²³ जेलाउ सिपालाइ येसुहेङ क्रुस्टा तोइहि दोतेङ इम्बालाइ वाको लोखोन चुम्तेङ द्‍यामि सिपालाइहेङ ए-ए भाग पातेङ बाख्राइहि। कालाउ वाको बाहारको लोखोन बुङ होतेङ चुम्पुहि, कालाउ बाहारको इङको लोखोन चाहि लेतासो-ह्रुता थेकापा जोलि मागोइपा पुइका हिघाहि।

²⁴ ओदोङ भाअ्सिङ सिपालाइ ता-ताइमिङता दोअ्हि, इदोइ चाहि माथेताइने, कालाउ इदोइ हासुको भागता जेङलि दोअ्खे चिट्ठा लागाइने। धर्मसास्तरता लेखेका पुरा ज्याको दोअ्तेङ इदोइ जेङका हिघाहि। सिपालाइ काङको लोखोनता-ताइमिता बाख्राइहि, कालाउ बाहारको लोखोनता चाहि चिट्ठा लागाइहि।

²⁵ ओदोङ भाअ्सिङ सिपालाइ इदोइ काम पाहि। कालाउ येसुको क्रुसको भेरपा वाको आमाइ दोफा लोका आमाइको ओने, क्यालोपासको बे मरियम कालाउ मग्दल देरासो मरियम लोतेङ इन्ताङ जाअ्तेङ हिघाहि।

²⁶ जेलाउ येसु ताइको आमाइहेङ कालाउ वाको मायारु पाका चात्या भेरपा जाअ्तेङ हिका तिङहि, कालाउ वा ताइको आमाहेङ दोअ्हि, आमाइ खाङ, नाङको चानहेङ।

²⁷ कालाउ न्हुसो येसु उङको चात्यागेलाइहेङ बुङ दोअ्हि, खाङसु वा नाङको आमाइ! इङको बेलासोङ उङको चात्या वासेहेङ ताइको साअ्को सदस्य पातेङ ताइको साअ्ता चुम्पुहि।

येसुको सिका

²⁸ इङको न्हुसो येसु गोताङ काथा एला दोअ्लि दोहोइ दोअ्का गितेङ धर्मसास्तरता लेखेका काथा पुरा ज्याको दोअ्तेङ दोअ्हि, का चि आम्लि किघा।

²⁹ इन्ता एनोङ चुकहोइ पोङघाका एनोङ भान्डा ताअ्का हिघाहि। ओदोङ भाअ्सिङ हासु बुङ चुकहोइ पोङघाका चेन्थ्राको एनोङ हिसपको लागासिता खोइतेङ इम्बालाइ येसुको नुइता युपिहि।

³⁰ जेलाउ येसु चुक चाखिहि, कालाउ वा दोअ्हि, एला दोहोइ, कालाउ वा पुरिङ तुघुरपातेङ सिहि।

³¹ इङको दिना तियारिको दिना हिघाहि। कालाउ न्हु दिना परमेस्वरको पबित्तरो दिना कालाउ निस्तार पार्बा हिघाहि। या यहुदिगेलाइको भाअ्सिङ बिसेस दिना हिघाहि। कालाउ इम्बालाइ इङको दिनाता सिका जिउ क्रुस्टा ताअ्तेङ ताअ्लि माभोअ्घाखे। ओदोङ भाअ्सिङ इम्बालाइ पिलातसहेङ दोअ्हि, इम्बालाइको खोकोइ थुरपिसु कालाउकि इम्बालाइ धेमाङ स्याको कालाउ इम्बालाइको सिका जिउ क्रुस्सो लेता खुपाको।

³² कालाउ सिपालाइ लोतेङ येसु दोफा क्रुस्टा तोइन्हाकालाइको खोकोइ थुरपिहि, लाम्फा एमिको इङको न्हुसो भेनेङको।

³³ कालाउ इम्बालाइ येसुकोता लोहि इम्बालाइ तिङहि, कि येसु सिलि दोका हिघाहि, ओदोङ भाअ्सिङ इम्बालाइ वाको खोकोइ माठुरहि।

³⁴ कालाउ सिपालाइ मध्येसो एमि येसुको केङखेनेता खापर बाअ्हि, कालाउ एन्सालाउ केङखेनेसो हिति कालाउ चि होहि।

³⁵ जेदोङ द्‍याङ इदोइ गोताङ काथा तिङहि, वा साक्सि पिहि, कालाउकि नेलाइ बुङ येसुता खाङधुरि पालि दोअ्सु। कालाउ वाको साक्सि सत्ये हि। कालाउ वा गिखे कि वा सत्ये धुइका हि।

³⁶ हाइपालिपानु वाको हिदोइ बुङ हारा मार्थुराङ दोअ्का धर्मसास्तरता लेखेका इङको काथागेलाइ पुरा ज्याको दोअ्तेङ एसा जेङका हि।

³⁷ कालाउ आरोङ भेनेङ थामेता धर्मसास्तरता एसापा लेखेका हि, जाइ इम्बालाइ दोङ बाका हि इम्बालाइहेङ वा दोङ खानावा।

येसुहेङ लिका

³⁸ इङको न्हुसो आरिमाथिया देराको योसेफ, जाइ यहुदि आगुवागेलाइहेङ थितेङ म्होतेङ येसुको चात्या जेङका हिघाहि, उङको द्‍याङ पिलातसहेङ येसुको सिका जिउ चुम्पुलि निनाको दोअ्तेङ सेउपाहि। पिलातस दोङ आनुमति पिहि। कालाउ वा लोतेङ येसुको सिका जिउ चुम्पुहि।

³⁹ कालाउ लाम्फा येसुकोता न्हिसिन्ता लोका निकोदेमस बुङ लगभग ए कुरि ते सुम किलो झोको मुर्रा कालाउ एलवा सिङसो बानाइका ताअ्का मालामालाका बासाना लोका मलम चुम्तेङ इन्ता लोहि।

⁴⁰ एसापा इम्बालाइ यहुदिगेलाइको मुन्धुम आन्सार मालामालाका बासाना लोका आनेमाने धाबाता सिरकितेङ येसुको सिका जिउहेङ लुन्धाइहि कालाउ तोम्ता ताअ्लि तियार पाहि।

⁴¹ जेदोङ थामेता येसुहेङ क्रुस्टा तोइहि, इङको थामे भेरपा एनोङ बागाइचा हिघाहि। बागाइचाता एनोङ नावा तोम हिघाहि। हिदोइ बुङ सिका जिउहेङ हेलाउ बुङ लाम्फा इन्ता ताअ्का मान्थुघाहि।

⁴² ओदोङ भाअ्सिङ इम्बालाइ येसु सिका जिउहेङ ओदोङ तोम्को घोअ्पाता ताअ्हि। हाइपालिपानु इङको थामे भेरपाङ हिघाहि, कालाउ इङको दिना यहुदिगेलाइको परमेस्वरको पबित्तरो दिनाको तियारिको दिना हिघाहि।