युहन्‍ना 18 - Dhimal NT

येसुहेङ रिम्का

¹ जेलाउ प्रार्थाना पालि दोलि दोअ्तेङ येसु ताइको चात्यागेलाइ दोफा क्रिदोन खोल्साको ओदोइ पार हानिहि। इन्ता एनोङ बागाइचा हिघाहि। इम्बालाइ इङको बागाइचा लिता हानिहि।

² कालाउ येसुहेङ रिम्चापालि खाङका यहुदा बुङ इङको थामे नाल्का हिघाहि, हाइपालिपानु येसु ताइको चात्यागेलाइ दोफा इन्ता हानिघाखे।

³ कालाउ मुलि पुजारिगेलाइ, फारिसिगेलाइ, सिपालाइ, कालाउ मुन्दिरको पालेगेलाइ यहुदा इस्कोरियत दोफा इन्ता थुकाहि। कालाउ इम्बालाइ ताइमि दोफा पुल्तिङ, उका, कालाउ हातियारगेलाइ चुम्पुतेङ बागाइचाता लोहि।

⁴ कालाउ ताइ ह्रुता आइपरिलि तोम्का गोताङ काथा गितेङ येसु आगाता लोहि कालाउ उङको द्‍याङगेलाइहेङ दोअ्हि, नेलाइ हासुहेङ भोसुखेना?

⁵ इम्बालाइ वासेहेङ उत्तारा पिहि, नासरत देराको येसुहेङ। येसु इम्बालाइहेङ दोअ्हि, का उङकोङ दोङ। “कालाउ येसुहेङ रिम्पाका यहुदा बुङ इम्बालाइ दोफा जाअ्तेङ हिघाहि।

⁶ जेलाउ येसु इम्बालाइहेङ का उङकोङ दोङ दोअ्हि कालाउ इम्बालाइ आसा पासाइहि, कालाउ भोनोइता लोङहि।

⁷ आरोङ येसु इम्बालाइहेङ हिअ्हि, नेलाइ हासुहेङ खोदाइसुखेना, इम्बालाइ दोअ्हि नासरत देराको येसुहेङ।

⁸ येसु उत्तारा पिहि, का दोअ्लि दोहोइका का उङको दोङ। जेसापा नेलाइ कासेहेङ भोअ्कानु इदोइ द्‍याङगेलाइहेङ चाहि हानिलि पिसु।”

⁹ इसिका ओदोङ भाअ्सिङ जेङहि कालाउकि येसु लाम्फाङ दोङ दोअ्का काथा सत्ये ज्याको: नाअ् दोङ कासेहेङ पिका सरबुङहोइ उङको द्‍याङगेलाइहेङ जोगाइतेङ ताअ्घा।

¹⁰ कालाउ सिमोन पतरुस ताइमि दोफा हिका दाब्बिया ओल्पातेङ प्राधान पुजारिको चाकारियाको दाम्पाहाको न्हातोङ पुक्कापा पाल्पिहि। उङको चाकारियाको मिङ माल्खस हिघाहि।

¹¹ येसु पतरुसहेङ दोअ्हि, नाङको दाब्बिया दाबिता घे। हाइ आबा कासेहेङ पिका कस्टको जाम बात्ति माआमका रो?

येसुहेङ हान्नासकोता चुम्पुहि

¹² इङको न्हुसो सिपालाइ कालाउ इम्बालाइको कप्तान, कालाउ यहुदि आगुवागेलाइको मुन्दिरको पालेगेलाइ दोङ येसुहेङ रिम्तेङ राहि।

¹³ कालाउ लाम्फा इम्बालाइ येसुहेङ हन्नासकोता चुम्पुहि, जाइ इङको बासारको प्राधान पुजारि कैयाफाको जुवा हिघाहि।

¹⁴ इदोइ उङको प्राधान पुजारि कैयाफा हिघाहि, जाइ यहुदिगेलाइको भाअ्सिङ एमि द्‍याङ खिनिङ सिलि रेम्का हि दोअ्तेङ यहुदि आगुवागेलाइहेङ साल्लाहा पिका हिघाहि।

पतरुस येसुहेङ मानाल्खा दोअ्का

¹⁵ सिमोन पतरुस कालाउ भेनेङ एमि चात्या येसुहेङ पिताइहि। उङको भेनेङ चात्याको चाहि प्राधान पुजारि दोफा रेम्फा नाल्सुका हिघाहि। ओदोङ भाअ्सिङ वा येसु दोफा प्राधान पुजारिको सालेङता दुल्हि।

¹⁶ कालाउ पतरुस बाहार फिनुता जाअ्तेङ हिघाहि। उङको भेनेङ चात्या जाइ प्राधान पुजारिहेङ नाल्घाखे वा बाहार ओल्लेहि कालाउ फिनुता पाले हिका बेजानहेङ दोअ्तेङ पतरुसहेङ लिता चुमाहि।

¹⁷ कालाउ फिनुता योम्तेङ हिका उङको पाले बेजान पतरुसहेङ दोअ्हि, “हाइ नाअ् बुङ इदोइ द्‍याङको चात्यागेलाइसो एमि माको?” पतरुस जोबाफ पिहि, “का वाको चात्या माको।”

¹⁸ इन्ता बान्धाइतिगेलाइ कालाउ मुन्दिरको पालेगेलाइ मे एम्तेङ जाअ्तेङ हिघाहि, हाइपालिपानु चुङका हिघाहि। कालाउ पतरुस बुङ इम्बालाइ दोफा जाअ्तेङ मे एम्लि तेङहि।

येसुहेङ प्राधान पुजाहारिको प्रस्न

¹⁹ कालाउ प्राधान पुजारि येसुहेङ कालाउ वाको चात्यागेलाइहेङ कालाउ वाको सिक्स्याको बिसोइता हिअ्हि।

²⁰ येसु उङकोहेङ उत्तारा पिहि, का दोङ झाराङको माझाता सार्बाजानिक रुपता दोअ्घाखा, का जेलाउ बुङ यहुदिगेलाइको चाउघारा साअ्ता कालाउ मुन्दिरता सिक्स्या पिका हिघाखा। जेता झाराङ यहुदिगेलाइ जोम्खे। कालाउ का दोङ म्होतेङ हाइ दोङ काथा दोअ्का मान्थुघा।

²¹ नाअ् हाइ पालि कासेहेङ इदोइ प्रस्न हिअ्खेना? काङको सिक्स्या हिङकालाइहेङ दोङ हिअ्सु। का दोअ्का गोताङ काथागेलाइ इम्बालाइहेङ थाहा हि।

²² येसु इदोइ काथा दोअ्काताङ पालाउ भेरपा जाअ्तेङ हिका मुन्दिरको पाले येसुहेङ चाउरेतेङ दोअ्हि, हाइ नाअ् प्राधान पुजारिहेङ एसापा जोबाफ घुरिपाखेना?

²³ येसु उङकोहेङ उत्तारा पिहि, जेसापा का आखेका काथा दोअ्कानु कासेहेङ प्रामान पि हाइ मारेम्का दोअ्घा? जेसापा का थिकोङ दोअ्का हिघा पानु कासेहेङ हाइ पालि दानाइसुखेना?

²⁴ कालाउ हन्नास दोङ येसुहेङ राअ्काङ आवस्थाता प्राधान पुजारि कैयाफासकोता दिङगिल्हि।

पतरुस येसुहेङ आरोङ मानाल्खा दोअ्का

²⁵ एन्सालाउ थेकापा बुङ सिमोन पतरुस जाअ्तेङ मे एम्तेङ हिघाहि। कालाउ मे एम्कालाइ पतरुसहेङ दोअ्हि, हाइ वाको चात्यागेलाइ माझासो एमि नाअ् बुङ माको रो? पतरुस इन्कार पातेङ दोअ्हि, “का वाको चात्या माको।”

²⁶ कालाउ प्राधान पुजारिको बान्धाइतिगेलाइ मध्येसो एमि जाइ वाको ताइको द्‍याङ हिघाहि वाको न्हातोङ पतरुस पुक्कापा पाल्पिका हिघाहि। वा हिअ्हि “हाइ का नासेहेङ येसु दोफा बागाइचाता मातिङघारो?”

²⁷ कालाउ आरोङ पतरुस इन्कार पाहि। कालाउ ओदोङ घुरि धाङगाइ ओहि।

पिलातसको आगाता येसु

²⁸ कालाउ इम्बालाइ येसुहेङ कैयाफासको साअ्सो पिलातसको दरबारता पिपुहि, इङको बेला ह्रिमा जेङका हिघाहि। कालाउ इम्बालाइ आसुद्द जेनाङ कालाउ निस्तार पार्बाको तोले चालि मानिनाङ दोअ्तेङ इम्बालाइ दरबार लिता मादुल्हि (पिलातस गैर-यहुदि हिघाहि)।

²⁹ ओदोङ भाअ्सिङ पिलातस इम्बालाइकोता बाहार ओल्लेहि। वा इम्बालाइहेङ दोअ्हि, इदोइ द्‍याङको बिरोधता नेलाइ हाइको दुसिका लागाइसुखेना?

³⁰ इम्बालाइ वासेहेङ उत्तारा पिहि, इदोइ द्‍याङ आपाराधि माकुनुते केलाइ यासेहेङ नाङकोता माचुमाधाङ।

³¹ पिलातस इम्बालाइहेङ दोअ्हि, नेलाइ यासेहेङ चुम्पुसु कालाउ नेलाइको ताइकोङ व्यवस्था बमोजिम याकोङ इन्साफ पासु। यहुदि आगुवागेलाइ पिलातसहेङ दोअ्हि, केलाइहेङ हिदोइ बुङ द्‍याङगेलाइहेङ सेअ्लि खाबारा मान्थु।

³² ताइमि हेसा सिलि गोयाङ दोअ्तेङ येसु ताइमिङ दोअ्का काथा पुरा जेङलि एसा जेङहि।

³³ कालाउ पिलातस आरोङ राजदरबार लिता हानिहि कालाउ येसुहेङ काइतेङ हिअ्हि, हाइ नाअ् यहुदिगेलाइको राजा दोङ?

³⁴ येसु उत्तारा पिहि, हाइ नाअ् ताइमिङ एन्सा दोअ्खेना याते काङको बिसोइता नासेहेङ आरु हासु दोङ दोअ्हि?

³⁵ पिलातस जोबाफ पिहि, “नाअ् गिखेना कि का यहुदि माको। नाङकोङ जाति कालाउ मुलि पुजारिगेलाइ नासेहेङ काङकोता सुम्पिका हि। नाअ् हाइ आपाराध पाना?

³⁶ येसु उत्तारा पिहि, काङको सासन इदोइ सुमिङको माको। जेसापा काङको सासन इदोइ सुमिङको हिनुते कासेहेङ पिताइकालाइ कासेहेङ यहुदि आगुवासो मारिम्धावा। कालाउ काङको सासन इदोइ सुमिङको माको?”

³⁷ पिलातस येसुहेङ हिअ्हि, “हाइ नाअ् राजा दोङ?” कालाउ येसु उत्तारा पिहि का राजा दोङ दोअ्तेङ नाअ् दोङ दोअ्खेना। का जोलोमलिको कालाउ इदोइ सुमिङता लोकाको कारन इदोइ हि कि का सत्येको बिसोइता धिरपालि द्वाको। इङको गोताङ जाइ कासेहेङ पिताइखे कालाउ सत्येको पालन पाखे।

³⁸ पिलातस येसुहेङ हिअ्हि, सत्ये हाइ? इदोइ हिअ्लि दोअ्तेङ पिलातस बाहार ओल्लेतेङ यहुदि आगुवागेलाइहेङ दोअ्हि, का याकोता हाइ दोङ दुसिका मातिङघा।

येसु माकुनु बारब्बा

³⁹ कालाउ नेलाइको मुन्धुम आन्सार का निस्तार पार्बाता नेलाइको भाअ्सिङ एमिहेङ लाअ्पिखा। ओदोङ भाअ्सिङ हाइ का उङको यहुदिगेलाइको राजाहेङ लाअ्प्या कुनु?

⁴⁰ कालाउ इम्बालाइ आरोङ एसा दोअ्तेङ ह्रिकाइहि, “यासेहेङ माको भरु केलाइको भाअ्सिङ बारब्बाहेङ लाअ्पिसु।” बारब्बा चाहि डाकु हिघाहि।