युहन्ना 17 - Dhimal NTताइको भाअ्सिङ येसुको प्रार्थाना 1 येसु इदोइ काथा ताइको चात्यागेलाइहेङ दोअ्लि दोअ्तेङ न्हुसो, येसु आकास भरि म्हाल्तेङ खाङहि कालाउ दोअ्हि, हे आबा, सोमोइ लोलि दोहोइ, का चानहेङ महिमित पाअ्, कालाउकि का चान नाङको महिमा पालि द्वाको। 2 हाइपालिपानु नाअ् कासेहेङ गोताङ द्याङगेलाइ ह्रुता खाबारा पिका हिना, कालाउकि नाङको पिका गोताङ द्याङगेलाइहेङ का आनान्त जिबन प्याङका। 3 कालाउ आनान्त जिबन इदोइ दोङ कि द्याङगेलाइ नासेहेङ एमि खिनिङ सत्ये परमेस्वर दोअ्तेङ नाल्लि द्वाको, कालाउ कासेहेङ येसु ख्रिस्ट जाइ नाअ् दोङ दिङगिल्का हि दोअ्तेङ इम्बालाइ नाल्लि द्वाको। 4 जेदोङ काम कासेहेङ नाअ् पिना, इङको पुरा पातेङ का दोङ नासेहेङ प्रिथिबिता महिमित बानाइका हिघा। 5 एला हे आबा, नाअ् दोङ लोकाता काङको महिमा पि, जेदोङ महिमा सुमिङ सिर्जाइनालि खान्तेङ लाम्फाङ नाङको दोफा हिलाउ का दोफा हिघाना। चात्यागेलाइको भाअ्सिङ येसुको प्रार्थाना 6 सुमिङसो जेदोङ द्याङ नाअ् कासेहेङ पिका हिघाखेना, इम्बालाइहेङ का नाअ् हासु दोअ्तेङ नाल्पाका हिघा। इम्बालाइ नाङको द्याङ हिघाहि, कालाउ नाअ् दोङ इम्बालाइहेङ कासेहेङ पिन्हा। कालाउ इम्बालाइ नाङको सिक्स्या केम्का हि। 7 एला इम्बालाइहेङ थाहा जेङका हि, कि नाअ् कासेहेङ पिका गोताङ काथा नाङकोसो लोका हि। 8 हाइपालिपानु जेदोङ सन्देस नाअ् कासेहेङ पिन्हा, का इम्बालाइहेङ पिका हिघा, कालाउ इम्बालाइ इङको सन्देस सुइकार पाका हि। का नाङकोसो लोका हिघा दोअ्का इम्बालाइ जातिङकोङ गिका हि, कालाउ नाअ् कासेहेङ दिङगिल्का दोअ्तेङ इम्बालाइ खाङधुरि पाका हि। 9 इम्बालाइको भाअ्सिङ का प्रार्थाना पाखा, कालाउ सुमिङको सामान्दा ताअ्का द्याङको भाअ्सिङ का प्रार्थाना मापाङका। भरु इम्बालाइको भाअ्सिङ, जाइहेङ नाअ् कासेहेङ पिका हिना। हाइपालिपानु इम्बालाइ नाङको दोङ हि। 10 काङको गोताङ जेदोङ हि नाङको दोङ, कालाउ नाङको जेदोङ हि काङको दोङ। काङको महिमा इम्बालाइता देखाल जेङका हि। 11 एला का इदोइ सुमिङता माह्याङका, कालाउ का नाङकोता लोदोङखा कालाउ काङको चात्यागेलाइ एला बुङ इदोइ सुमिङता हि। हे पबित्तरो आबा नाअ् दोङ कासेहेङ पिका द्याङगेलाइहेङ ताइको सरबुङहोइ इम्बालाइहेङ जोगाइतेङ ताअ् कालाउ इम्बालाइ बुङ केलाइ भाइपाङ एनोङ दोङ ज्याको। 12 जेलाउ थेकापा का इम्बालाइ दोफा हिघाखा, हे पबित्तरो आबा नाअ् दोङ कासेहेङ पिका ताइको सरबुङहोइ का इम्बालाइहेङ जोगाइतेङ ताअ्घा। कालाउ का इम्बालाइहेङ सामाराइतेङ ताअ्घा। कालाउ नास हिका द्याङगेलाइ बाहेक का हासुहेङ बुङ नासालि मापिघा। कालाउकि धर्मसास्तरता लेखेका काथा पुरा ज्याको। 13 कालाउ एला का नाङकोता लोदोङखा। सुमिङता हिलाउ का इदोइ काथा दोअ्खा, कि इम्बालाइ काङको आनान्दहोइ भरि पुर्न ज्याको। 14 का इम्बालाइहेङ नाङको सन्देस पिघा, कालाउ सुमिङको द्याङगेलाइ इम्बालाइहेङ मन्दा माताहि, हाइपालिपानु इम्बालाइ सुमिङ दोफा सामान्दा माअ्ताघाहि, जेसाङ का बुङ सुमिङ दोफा सामान्दा माअ्ताघा। 15 इम्बालाइहेङ नाअ् सुमिङसो चुम्पुवाको दोअ्तेङ का प्रार्थाना मापाखा, भरु इम्बालाइहेङ साइतानसो जोगाइतेङ तापिसु। 16 इम्बालाइ सुमिङ दोफा सामान्दा माताअ्खे, जेसाङ का बुङ सुमिङ दोफा सामान्दा माताअ्खा। 17 इम्बालाइहेङ सत्येसो पबित्तरो पाअ्पि, हाइपालिपानु नाङको बचन सत्ये हि। 18 जेसाङ नाअ् कासेहेङ सुमिङता दिङगिल्ना, का बुङ इम्बालाइहेङ सुमिङता दिङगिल्का हिघा। 19 इम्बालाइको फाइदाको भाअ्सिङ का ताइमिहेङ दोङ पबित्तरो बानाइखा, कालाउकि इम्बालाइ बुङ सत्येसो पबित्तरो जेनाको। झाराङ खान्धुराइगेलाइको भाअ्सिङ येसुको प्रार्थाना 20 का इदोइ चात्यागेलाइको भाअ्सिङ खिनिङ प्रार्थाना मापाखा, कालाउ एबालाइकोङ सिक्स्याहोइ पातेङ का ह्रुता खाङधुरि पाकालाइको भाअ्सिङ बुङ का प्रार्थाना पाखा। 21 इम्बालाइ झाराङ ए जेनाको, हे आबा, जेसाङ नाअ् काङकोता हिखेना, कालाउ का बुङ नाङको दोफा हिखा, एसापाङ इम्बालाइ बुङ केलाइता ह्याको, कालाउ नाअ् दोङ कासेहेङ दिङगिल्का दोअ्तेङ सुमिङको द्याङगेलाइ खाङधुरि पाको। 22 जेदोङ महिमा नाअ् कासेहेङ पिका हिना, ओदोङ महिमा का बुङ इम्बालाइहेङ पिका हिघा, जेसाङ नाअ् कालाउ का ए जेनाइने एन्साङ पातेङ इम्बालाइ बुङ केलाइ भाइपाङ एनोङ दोङ ज्याको। 23 का इम्बालाइ दोफा कालाउ नाअ् का दोफा हिना। कालाउकि इम्बालाइ पुर्न रितिसो ए जेङलि द्वाको। कालाउ एसासोङ नाअ् दोङ कासेहेङ दिङगिल्का हिना कालाउ कासेहेङ प्रेम पाका भाइपा ओबालाइहेङ बुङ प्रेम पाखे दोअ्तेङ सुमिङको द्याङगेलाइ ग्याको। 24 हे आबा का मन पाखा कि नाअ् कासेहेङ पिका द्याङगेलाइ का जेता हिघा काङको दोफा ह्याको, कालाउ नाङको पिका महिमा इम्बालाइ तिङलि द्वाको। जेदोङ महिमा नाअ् दोङ सुमिङ सिर्जाइनालि खान्तेङ लाम्फा कासेहेङ प्रेम पाकानाङ नाअ् कासेहेङ पिका हिघाखेना। 25 हे धर्मि न्याय पाका आबा, सुमिङको द्याङगेलाइ नासेहेङ मानाल्खे, कालाउ का चाहि नासेहेङ नाल्खा, कालाउ नाअ् कासेहेङ दिङगिल्का हिना दोअ्तेङ या दोङ चात्यागेलाइ गिखे। 26 का दोङ इम्बालाइहेङ देखाल पिघा, कि नाअ् हासु हिना कालाउ नाल्पातेङ ह्याङका। कि नाअ् कासेहेङ पाका प्रेम इम्बालाइ दोफा बुङ हिलि द्वाको कालाउ का बुङ इम्बालाइ दोफा हिलि द्वाको। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation