युहन्ना 15 - Dhimal NTआङगुरको सिङ कालाउ दालेङगेलाइ 1 जातिङ भारि का आङगुरको सिङ भाइका हिघा, कालाउ काङको आबा किसान दोङ हि। 2 गोताङ डालेङ जाइ काङको दोफा तेअ्का हिखे कालाउ फल मासेपाखे पानु इङकोहेङ वा पाल्पिखे। कालाउ जाइ फल पिखे इङकोहेङ वा धाइखे कालाउकि आरोङ हेन्जा फल सेपाको दोअ्तेङ। 3 का दोङ नेलाइहेङ दोअ्का काङको सिक्स्याहोइ नेलाइ लाम्फा दोङ सुद्द जेङलि दोअ्का हिसुना। 4 नेलाइ का दोफा हिसु कालाउ का नेलाइ दोफा ह्याङका। जेसापा डालेङ सिङता माहिनु इङको ताइमिङ फल सेपालि मादोअ्खे, एन्साङपा नेलाइ का दोफा माहिसुना पानु हाइ बुङ आसाल पालि मादोस्वाना। 5 आङगुरको सिङ भाइका का दोङ हिघा कालाउ नेलाइ चाहि दालेङगेलाइ हिसुना। जेसापा हासु बुङ का दोफा हिखे पानु, कालाउ का वाकोता ह्याङका, वा हेन्जा आसाल काम पावा। हाइपालिपानु काङकोसो खेङतेङ हिनु नेलाइ हाइ दोङ पालि मादोस्वाना। 6 हिदोइ बुङ द्याङ का दोफा माहिनु, इङको पालन्हाका डालेङ भाइपा बाहार थाइगिलाङ, जेलाउ इङको दालेङगेलाइ सेनावा इङकोहेङ जोम्पातेङ मेता दुकावा। 7 नेलाइ का दोफा हिसुना पानु, कालाउ काङको सिक्स्यागेलाइ बुङ नेलाइ दोफा हिहे पानु, नेलाइ जेदोङ आनेमाने ह्रेसुना पानु नेलाइको भाअ्सिङ का इङको पाअ्प्याङका। 8 जेसापा नेलाइ हेन्जा आसल काम पासुना पानु इङको काथाहोइ काङको आबाहेङ महिमा पाखे कालाउ नेलाइ काङको चात्या जेङस्वाना। 9 जेसाङ आबा कासेहेङ प्रेम पाका हि, एन्साङ पातेङ का बुङ नेलाइहेङ प्रेम पाका हिघा। नेलाइ बुङ का दोफा काङको प्रेमता हितेङ हिसु। 10 जेसापा नेलाइ काङको आग्यागेलाइ केम्सुना पानु, नेलाइ का दोफा काङको प्रेमता हितेङ हिस्वाना, जेसाङ का काङको आबाको आग्यागेलाइ केम्का हिघा, कालाउ वाको दोफा प्रेमता ह्याङका। 11 का इदोइ काथा नेलाइहेङ ओदोङ भाअ्सिङ दोअ्का हिघा, कालाउकि नेलाइकोता बुङ ओदोङ आनान्द ह्याको, जेदोङ काङको दोफा हि। कालाउ नेलाइको आनान्द परिपुर्न ह्याको। चात्याको एमिसो-भेनेङ दोफा सम्बन्ध 12 काङको आग्या इदोइ दोङ हि, का नेलाइहेङ जेसाङ प्रेम पाघा, नेलाइ बुङ एमिसो-भेनेङहेङ एन्साङ दोङ प्रेम पासु। 13 हिदोइ बुङ द्याङ ताइको सानाइतिगेलाइहेङ मायारु पाखा दोअ्तेङ तिङपालिको भाअ्सिङ ताइमि सिपिलि खान्तेङ बारका प्रेम आरु हाइ दोङ मान्थु। 14 का नेलाइहेङ जेदोङ आग्या पाखा इङको केम्सुना पानु नेलाइ काङको सानाइति दोङ। 15 एला का नेलाइहेङ बान्धाइति मादोअ्ताङका, हाइपालिपानु वाको गिह्रि हाइ पाखे बान्धाइति मागिखे। कालाउ का नेलाइहेङ सानाइति दोअ्का हिघा, हाइपालिपानु जेदोङ का काङको आबासो हिङघा, का इङको गोताङ काथागेलाइ नेलाइहेङ दोअ्का हिघा। 16 कासेहेङ नेलाइ मासाल्सुना, भुरु का दोङ नेलाइहेङ साल्घा, कालाउ नियुक्त पाघा, कालाउकि नेलाइ हानिसु कालाउ आसाल काम पासु, कालाउ नेलाइको आसाल काम हितेङ ह्यावा। एसापा नेलाइ आबा दोफा जेदोङ ह्रेस्वाना वा नेलाइहेङ इङको प्यावा। हाइपालिपानु नेलाइ काङको चात्या हिसुना। 17 का नेलाइहेङ इदोइ आग्या पिखा, कि नेलाइ एमिसो भेनेङहेङ प्रेम पासु। सुमिङसो साताइका 18 जेसापा सुमिङको द्याङगेलाइ नेलाइहेङ मन्दा माताखे पानु, नेलाइ गिसु कि, नेलाइहेङ मन्दा मातालि खान्तेङ वा कासेहेङ मन्दा माताका दोङ। 19 जेसापा नेलाइ इदोइ सुमिङको द्याङगेलाइ भाइका नुते सुमिङको द्याङगेलाइ नासेहेङ ताइको दोअ्तेङ प्रेम पाधावा। कालाउ नेलाइ इदोइ सुमिङको माको। का नेलाइहेङ सुमिङसो साल्घा, ओदोङ भाअ्सिङ सुमिङ नेलाइहेङ मन्दा माताखे। 20 का नेलाइहेङ धिरपाका सिक्स्या फोम ताअ्सु, बान्धाइति ताइको गिह्रि खान्तेङ माबाराखे। इम्बालाइ कासेहेङ सान्ताइनु नेलाइहेङ बुङ सान्ताइयावा। इम्बालाइ काङको सिक्स्या केम्पिनु नेलाइको धिर्पाका सिक्स्या बुङ कितावा। 21 कालाउ इम्बालाइ, नेलाइहेङ साताइयावा हाइपालिपानु नेलाइ काङको चात्या हिसुना। कालाउ इम्बालाइ कासेहेङ दिङगिल्का परमेस्वरहेङ मानाल्खे। 22 जेसापा का मालोकानु कालाउ नेलाइहेङ माअ्दोपिनु, कालाउ इम्बालाइ पापको दुसिका माजेङधास्वाना। कालाउ एला ताइको पापको भाअ्सिङ इम्बालाइ दोफा हाइ दोङ बाहाना मान्थु। 23 जाइ कासेहेङ मन्दा माअ्ताखे, वा काङको आबाहेङ बुङ मन्दा माअ्ताखे। 24 जेसापा आरु हासु बुङ मापाका सरबुङसाइका चिन्हा का ओबालाइको माझाता मापाकानु ओबालाइ पापको दुसिका माजेङधावा। कालाउ का दोङ पाका सरबुङसाइका चिन्हागेलाइ तिङतेङ बुङ ओबालाइ कासेहेङ कालाउ काङको आबा न्हेमिहेङ मन्दा माताखे। 25 इदोइहोइ इम्बालाइको धर्मसास्तरता लेखेका काथा पुरा पाखे। या दोअ्खे, इम्बालाइ कासेहेङ बिना कारन मन्दा माताहि। 26-27 का नेलाइको भाअ्सिङ आबासो साल्लाहाकार दिङगिल्लाङका वा इङको आत्मा हि जेदोङ आबासो लोखे, कालाउ जेदोङ सत्ये हि इङकोहेङ देखाल पाखे। जेलाउ वा ल्वाङ वा काङको बारेता दोअ्तावा। कालाउ नेलाइ इदोइ सुमिङको द्याङगेलाइहेङ काङको बारेता दोअ्स्वाना, हाइपालिपानु लाम्फासोङ नेलाइ का दोफा हिघासुखेना। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation