युहन्‍ना 13 - Dhimal NT

प्रभु भोज

¹ निस्तार पार्बाको खान्तेङ लाम्फा येसु ताइमिङ सुमिङसो लाअ्तेङ आबाकोता घुरिका सोमोइ लोलि तोम्का दोअ्का काथा येसुहेङ थाहा हिघाहि। वा दोङ सुमिङता हिका ताइमिहेङ लेसारा पिताइकालाइहेङ प्रेम पाघाखे कालाउ ओबालाइहेङ पुरा प्रेम पातेङ हि।

² येसु ताइको चात्यागेलाइ दोफा दिलिमाको उम चाघाहि। इङको बेला साइतान सिमोनको चान यहुदा इस्कोरियतको मनता येसुहेङ धोका पिका बिचार लाम्फासोङ मनता ह्वापिका हिघाहि।

³ आबा परमेस्वर कासेहेङ गोताङ आनेमाने ह्रुता खाबारा पिका हि दोअ्का काथा येसुहेङ थाहा हिघाहि, कालाउ परमेस्वरसो लोतेङ परमेस्वरकोताङ घुरिदोङखा दोअ्का काथा बुङ येसुहेङ थाहा हिघाहि।

⁴ कालाउ येसु चाअ्लि दोतेङ ल्होहि, कालाउ बाहारको धाबा एपाहा ताअ्तेङ कालाउ एनोङ ताउलि ताइको केङखेनेता तेअ्हि।

येसु ताइको चात्यागेलाइको खोकोइ झापिहि

⁵ कालाउ येसु भान्डाता चि धुम्तेङ चात्यागेलाइको खोकोइ झालि तेङहि, कालाउ एमि बान्धाइति जेङतेङ ताइमिको तेका ताउलिहोइ ओबालाइको खोकोइ योपिहि।

⁶ जेलाउ येसु सिमोन पतरुसकोता लोहि, पतरुस वासेहेङ दोअ्हि, प्रभु, हाइ नाअ् काङको खोकोइ झाका?

⁷ येसु पतरुसहेङ जोबाफ पिहि, का हाइ पादोङखा नाअ् याको आर्था एला माबुझियाना, कालाउ न्हुसो नाअ् बुझियाना।

⁸ पतरुस येसुहेङ दोअ्हि, नाअ् काङको खोकोइ हेलाउ बुङ झालि माएल, येसु वासेहेङ जोबाफ पिहि, जेसापा का नाङको खोकोइ माझानुते नाअ् काङको चात्या माको।

⁹ कालाउ सिमोन पतरुस येसुहेङ दोअ्हि, एन्सा पानु हे प्रभु काङको खोकोइ खिनिङ माको, कालाउ काङको खुर कालाउ पुरिङ सुधाङ झापि।

¹⁰ येसु पतरुसहेङ दोअ्हि, एमि चिउलि दोअ्का द्‍याङहेङ खोकोइबाहेक आरु हाइ दोङ झालि मागोइखे, वाको गोताङ जिउ जाहाँका जेङखे। एमिहेङ लाअ्तेङ नेलाइ झाराङ जाहाँका हिसुना।

¹¹ हाइपालिपानु वासेहेङ धोका पिलि खाङकाहेङ येसु नाल्का हिघाहि। ओदोङ भाअ्सिङ वा दोअ्का हिघाहि, नेलाइ झाराङ जाहाँका मान्थुसुना।

खोकोइ झाकाको आर्था

¹² जेलाउ येसु चात्यागेलाइको खोकोइ झालि दोअ्तेङ वा दोङ आरोङ ताइको बाहारको धाबा लागाइतेङ वा भोजता योम्हि। कालाउ वा ओबालाइहेङ दोअ्हि, हाइ नेलाइ गिसुखेना, का नेलाइको भाअ्सिङ हाइ पाघा?

¹³ नेलाइ कासेहेङ गुरु ज्यु कालाउ प्रभु दोअ्सुखेना, इङको नेलाइ थिकोङ दोअ्सुखेना हाइपालिपानु का नेलाइको गुरु ज्यु कालाउ प्रभु दोङ हिघा।

¹⁴ जेसापा का नेलाइको प्रभु कालाउ गुरु ज्यु जेङतेङ बुङ नेलाइको खोकोइ झाका हिघा पानु नेलाइ बुङ ताइमिहेङ मोनोइ जेङतेङ एमिसो-भेनेङको खोकोइ झालि गोइखे।

¹⁵ हाइपालिपानु का नेलाइहेङ उधाहरन तिङपाका हिघा, कालाउ जेसाङ का नेलाइको भाअ्सिङ पाघा, नेलाइ बुङ एन्साङ पासु।

¹⁶ जातिङ भारि का नेलाइहेङ दोअ्खा, बान्धाइति ताइको गिह्रि खान्तेङ माबाराखे, कालाउ बानाल चुम्पुका बानाल पिगिल्का खान्तेङ माबाराखे।

¹⁷ जेसापा नेलाइ इदोइ काथा गिसुना, इङको पासु कालाउकि नेलाइ धन्यको जेङस्वाना।

येसुहेङ रिम्चापाका चात्या

¹⁸ का नेलाइहेङ गोताङको बिसोइता दोअ्तेङ हिका माको, का साल्कालाइहेङ नाल्खा। कालाउ इदोइ कारनसो जेङका हि कालाउकि, धर्मसास्तरता जेदोङ लेखेका हि इङको पुरा ज्याको। एसापा दोअ्का हि, जाइ का दोफा चाहि वा दोङ कासेहेङ धोका पिहि।

¹⁹ इदोइ जेङलि लाम्फा दोङ एलाङ दोङ का नेलाइहेङ दोअ्खा, कालाउकि जेलाउ इङको जेङलि ल्वाङ, का वाआङ दोङ दोअ्तेङ नेलाइहेङ खाङधुरि पालि द्वाको।

²⁰ जातिङ भारि का नेलाइहेङ दोअ्खा, जाइहेङ का दिङगिल्खा, वासेहेङ आदार पाकालाइ, कासेहेङ आदार पाखे, कालाउ कासेहेङ आदार पाकालाइ कासेहेङ दिङगिल्काहेङ बुङ आदार पाखे।

²¹ इदोइ काथा दोअ्लि दोअ्तेङ येसु आत्माता मेनाङ दुखि जेङहि, कालाउ वा ताइको चात्यागेलाइहेङ दोअ्हि, जातिङ भारि का नेलाइहेङ दोअ्खा, नेलाइ मध्येसो एमि कासेहेङ धोका प्यावा।

²² येसु हासुको बिसोइता दोअ्का वाला दोअ्तेङ माबुझितेङ चात्यागेलाइ एमिसो भेनेङहेङ खाङसुहि।

²³ येसुको चात्या मध्ये येसुहेङ मायारु पाका चात्या चाहि येसुको भेरपा योम्तेङ हिघाहि।

²⁴ कालाउ सिमोन पतरुस वासेहेङ इसारा पातेङ हिअ्हि, “येसु हासुको बिसोइता दोअ्का वाला?”

²⁵ उङको चात्या येसुको भेरपा हानितेङ हिअ्हि, प्रभु, उङको हासु?

²⁶ येसु जोबाफ पिहि, जाइहेङ का तोलेको टुक्रा सारता चोतेङ पिखा, काङको दोअ्का द्‍याङ उङको दोङ। कालाउ येसु तोलेको टुक्रा सारता चोबेहि, कालाउ सिमोनको चान यहुदा इस्कोरियतहेङ पिहि।

²⁷ जेसाङ यहुदा तोलेको टुक्रा चातेङ न्हुसो, येसु वासेहेङ दोअ्हि, नाअ् जेदोङ पालि खाङखेना इङको धेमाङ पाअ्‌। कालाउ न्हुसो यहुदाता साइतान दुल्हि।

²⁸ कालाउ येसु हाइ पालि वासेहेङ एसा दोअ्हि दोअ्तेङ चालि योम्कालाइ हासु बुङ माबुझिहि।

²⁹ हाइपालिपानु यहुदा दोफा ताकाको तोपाला हिघाहि, सोचिहि कि, ओदोङ भाअ्सिङ आधिमि सोचिहि कि, येसु वासेहेङ दोअ्हि कि जेदोङ बुङ केलाइहेङ पार्बाको भाअ्सिङ गोइका आनेमाने चोल, माकुनु गरिबगेलाइहेङ हाइ दोङ पि।

³⁰ कालाउ तोलेको टुक्रा चाअ्लि दोतेङ यहुदा एस्कोरियत एन्सालाउ दोङ बाहार ओल्लेहि। ओदोङ बेला बेल्हाका हिघाहि।

येसु एनोङ नावा आग्या पिहि

³¹ जेलाउ यहुदा बाहार हानिहि कालाउ येसु दोअ्हि, एला का द्‍याङको चान महिमित जेङका हि, कालाउ परमेस्वर वाकोता महिमित जेङका हि।

³² परमेस्वर ताइको चानहेङ महिमित पावा, कालाउ वा एन्सालाउ दोङ महिमित पावा।

³³ ओइ काङको आनाउगेलाइ, कोम्हा थेकापा का नेलाइ दोफा ह्याङका, नेलाइ कासेहेङ भोस्वाना, कालाउ जेसा का यहुदिगेलाइहेङ दोअ्घा, एला का नेलाइहेङ बुङ दोअ्खा, जेता का हानिदोङखा, इन्ता नेलाइ हानिलि मादोस्वाना।

³⁴ का नेलाइहेङ एनोङ नावा आग्या पिखा, नेलाइ एमिसो भेनेङहेङ प्रेम पासु। जेसाङ का नेलाइहेङ प्रेम पाका हिघा, नेलाइ बुङ एमिसो भेनेङहेङ इन्सिकाङ प्रेम पासु।

³⁵ जेसापा नेलाइ एमिसो भेनेङहेङ प्रेम पास्वाना पानु इदोइ पाहासो झाराङ ग्यावा, कि नेलाइ काङको चात्यागेलाइ दोङ।

पतरुसको इन्कारको बारेता आगमबानि

³⁶ सिमोन पतरुस वासेहेङ दोअ्हि, हे प्रभु, नाअ् हिसो हानिदोङखेना? कालाउ येसु जोबाफ पिहि, “का जेता हानिदोङखा, एला नाअ् कासेहेङ पिताइलि माद्वाना, कालाउ न्हुसोते नाअ् इन्ता ल्वाना।”

³⁷ पतरुस येसुहेङ दोअ्हि, “प्रभु, हाइ पालि का एलाङ दोङ नासेहेङ पिताइलि माद्वाङका रो? नाङको भाअ्सिङ का सिलि बुङ तियार हिघा।”

³⁸ येसु जोबाफ पिहि, “हाइ नाअ् काङको भाअ्सिङ सिलि द्वाना? जातिङ भारि का नासेहेङ दोअ्खा, नाअ् कासेहेङ धाङगाइ किया ओअ्लि खान्तेङ लाम्फा कासेहेङ सुम्खे इन्कार पाना।”