युहन्‍ना 12 - Dhimal NT

बेथानिया देराता येसुको आदार

¹ निस्तार पार्बाको तुनि लाम्फा येसु बेथानिया देराता लोका हिघाहि। जेता येसु दोङ सिका लाजरसहेङ सिन्हु पाका हिघाहि।

² इम्बालाइ येसुको भाअ्सिङ इन्ता भोज तियार पाहि। येसुहेङ साम्मान पालिको भाअ्सिङ मार्था सेवा पादोङघाहि। कालाउ लाजरस येसु दोफा चालि योम्कासो एमि हिघाहि।

³ कालाउ मरियम आधा लिटर झोको हेन्जा जाङका जट्टामसिको मालामालाका आत्तर चुम्तेङ येसुको खोकोइता हुपिहि कालाउ ताइको पुसुङहोइ योअ्पिहि। कालाउ आत्तरको मालामालाकाहोइ साअ् दोङ पोङघाहि।

⁴ कालाउ वाको चात्यागेलाइ मध्येसो एमि यहुदा इस्कोरियत मिङ हिका द्‍याङ इन्ता हिघाहि। वा येसुहेङ रिम्पालि खाङका हिघाहि, कालाउ वा दोअ्हि,

⁵ इदोइ आत्तर सुमसाइ ताका चान्दिको थुरिसो पितेङ इङको ताका गरिबगेलाइहेङ पिलाउ माजेङधाङ।

⁶ कालाउ वा गरिबगेलाइको ख्याल पातेङ इदोइ दोअ्का मान्थुघाहि, हाइपालिपानु उङको चोर हिघाहि, कालाउ ताकाको सिपि वा ताअ्घाहि कालाउ इन्तासो खुघाहि।

⁷ येसु दोअ्हि, वासेहेङ हाइ दोङ मादोअ्सु, हाइपालिपानु सोमोइ लोलि खान्तेङ लाम्फा दोङ कासेहेङ लिअ्लि तियार भाअ्सिङ वा एन्सा पादोङखे।

⁸ हाइपालिपानु गरिबगेलाइते जेलाउ बुङ नेलाइ दोफा ह्यावा, “कालाउ का ते नेलाइ दोफा जेलाउ बुङ माह्याङका।”

लाजरसहेङ सेअ्लि खाङका दाउ

⁹ जेलाउ यहुदि द्‍याङगेलाइ हिङहि, कि येसु इन्ता हिघाहि कालाउ द्‍याङगेलाइको बार्का जेर इन्ता लोहि। इम्बालाइ येसुहेङ खिनिङ माको कालाउ लाजरसहेङ बुङ खाङलि लोका हिघाहि, जाइहेङ वा दोङ सिकालाइसो सिन्हु पाका हिघाहि।

¹⁰ कालाउ मुलि पुजारिगेलाइ लाजरसहेङ बुङ सेअ्लि योजाना पाहि।

¹¹ हाइपालिपानु लाजरस सिन्हुकानाङ हेन्जा यहुदिगेलाइ यहुदि आगुवागेलाइहेङ इन्कार पातेङ येसुता खाङधुरि पालि तेङहि।

यरुसेलेमता येसुहेङ स्‍वागत पाका

¹² पार्बाको न्हु दिना येसु यरुसेलेम सहरता ल्वाङ दोअ्का काथा बार्का जेरगेलाइ हिङहि।

¹³ कालाउ द्‍याङगेलाइ खजुरको दालेङगेलाइ चुमातेङ ह्रिकाइकाताङ दोअ्हि, “जय ज्याको परमप्रभुको मिङता लोका” इस्राएल सारभिको राजा दोअ्काताङ स्‍वागत पाहि।

¹⁴ कालाउ एनोङ गधाको चान निङतेङ जेलाउ येसु यरुसेलेम सहरता लोहि वा गधा ह्रुता धोल्तेङ योम्हि, जेसाङ धर्मसास्तरता लेखेका हिघाहि एन्साङ दोङ जेङहि,

¹⁵ “हे यरुसेलेमको द्‍याङगेलाइ माअ्थिसु, खाङसु, नेलाइको राजा गधाको चान ह्रुता सवार जेङतेङ लोदोङखे।”

¹⁶ येसुको चात्यागेलाइ इदोइ काथा लाम्फाङ माबुझिहि। कालाउ येसु महिमाता घुरितेङ लोलाउ इम्बालाइहेङ फोम लोहि कि जेदोङ येसु दोफा जेङहि। इङको ठिक इन्सिकाङ जेङहि जेसाङ धर्मसास्तरता वाको बिसोइता दोअ्का हिघाहि।

¹⁷ कालाउ येसु लाजरसहेङ तोमसो काइतेङ सिकासो सिन्हु पाका तिङका जेरको द्‍याङगेलाइ इदोइ काथाको साक्सि आरुहेङ पिलि तेङहि।

¹⁸ हेन्जा द्‍याङगेलाइ येसुहेङ भेतिलि लोहि, हाइपालिपानु इम्बालाइ इङको भारभुसाइका चिन्हाको बारेता हिङका हिघाहि।

¹⁹ फारिसिगेलाइ जेलाउ एमिसो-भेनेङहेङ दोअ्लि तेङहि, “खाङसु, नेलाइसो हाइ दोङ पालि माद्वाङ। तिङसुखेना गोताङ सुमिङको द्‍याङगेलाइ वाको लेसारा पिताइलि दोहोइ।”

परदेसिगेलाइ येसुहेङ भोका

²⁰ इन्ता आधिमि ग्रिकगेलाइ बुङ हिघाहि जाइ निस्तार पार्बाको बेलाता आराधाना पालिको भाअ्सिङ यरुसेलेमता लोका हिघाहि।

²¹ इम्बालाइ गालिल जिल्लाको बेथसेदा देराको द्‍याङ फिलिपकोता लोतेङ बिन्ति पातेङ दोअ्हि, “नेउ, केलाइ येसुहेङ भेतिलि खाङनाखे।”

²² फिलिप हानितेङ आन्द्रियासहेङ दोअ्हि, कालाउ आन्द्रियास कालाउ फिलिप हानितेङ येसुहेङ दोअ्हि।

²³ येसु इम्बालाइहेङ उत्तारा पिहि, एला का द्‍याङको चानको महिमित जेङका सोमोइ लोका हि।

²⁴ जातिङ भारि का नेलाइहेङ दोअ्खा, गहमको गेरा मिलिङता हुल्तेङ मासिहि पानु इङको एकलाङ हिखे। कालाउ मिलिङता परितेङ सिहि पानु इङको दोङ फल सेपाखे। एन्साङ दोङ काङको दोफा जेनाङ।

²⁵ ताइको जिबनको मायारु पाकालाइ आनान्त जिबन मोअ्पावा, कालाउ ताइको जिबनहेङ इदोइ सुमिङता हाइ दोङ मासम्झिखे वा चाहि आनान्त जिबन जोगाइतेङ ताअ्तावा।

²⁶ हासु बुङ काङको सेवा पाखे पानु, का दोफा लोसु कालाउ काङको चात्या जेङसु। कालाउ का जेता ह्याङका, इन्ताङ काङको सेवक ह्यावा। हासु बुङ काङको सेवा पाहे पानु काङको आबा वाको आदार पावा।

ताइको सिकाको बारेता येसुको आगमबानि

²⁷ एला का हेन्जा चिल्लि-बिल्लि जेङका हिघा, कालाउ का हाइ दोअ्लि? हे आबा, कासेहेङ इदोइ दुखको सोमोइसो बान्चिपा? कालाउ का इदोइ सुमिङता लोघा कालाउकि दुख भोगिलि कालाउ सिलि।

²⁸ हे आबा देखाल पाकि नाअ् हेथे महिमित हिना। “कालाउ आकाससो इसिका एनोङ गाला लोहि, का दोङ देखाल पाका हिघा कि का हेथे महिमित हिघा, कालाउ का आरोङ यासेहेङ देखाल पाङका।”

²⁹ इन्ता जाअ्तेङ हिका जेर इङको गाला हिङतेङ दोअ्हि, इदोइ बादेलको गड्याङगुडुङ दोङ हि। आरुगेलाइहेङ दोअ्हि स्वर्गदुत वाको दोफा नुइ धुइका!

³⁰ येसु जोबाफ पिहि, या गाला काङको भाअ्सिङ जेङका माको, कालाउ नेलाइको फाइदाको भाअ्सिङ दोअ्का दोङ हि।

³¹ एला इदोइ सुमिङको द्‍याङगेलाइहेङ परमेस्वरको न्याय पाका सोमोइ लोका हि। कालाउ येसु साइतानको सरबुङहेङ नासा पाका सोमोइ बुङ लोका हि, जाइ इदोइ सुमिङको सासक हि।

³² कालाउ का प्रिथिबिता तोलिन्हातेङ का गोताङ द्‍याङगेलाइहेङ ताइमि भारि चुमाङका।

³³ वा हेसा सिलि गोइका हिघाहि दोअ्तेङ येसु दोङ या साङकेत पाहि।

³⁴ कालाउ जेरगेलाइ वासेहेङ दोअ्हि, ख्रिस्ट जेलाउ बुङ सिन्हुतेङ ह्याङ दोअ्तेङ धर्मसास्तर दोअ्खे। कालाउ द्‍याङको चान तोलिन्हालि गोयाङ दोअ्तेङ नाअ् हेसा दोअ्लि द्वाना? कालाउ का द्‍याङको चान चाहि हासु कुनु?

³⁵ येसु ओबालाइहेङ दोअ्हि, आले बेर थेकापा फाइसालामका नेलाइको माझाता ह्यावा। फाइसालामका हिपा थेकापा हिगिल्सु, कालाउकि कितिकितिकाहोइ नेलाइहेङ माठुमाको। आधिमि कितिकितिकाता हिगिल्खे पानु, वा ताइमिङ हिसो हानिखा दोअ्तेङ थाहा मागिखे।

³⁶ जेलाउ थेकापा फाइसालामका नेलाइ दोफा हि फाइसालामकाहेङ खाङधुरि पासु, कालाउ नेलाइ फाइसालामकाको सान्तान जेङसु। या काथा दोअ्लि दोअ्तेङ न्हुसो, येसु इन्तासो हानिहि, कालाउ इम्बालाइसो म्होतेङ हि।

आगमबानि पुरा जेङका

³⁷ येसु ओबालाइको आगाता इदोइ झोको सरबुङसाइका चिन्हागेलाइ पाका हिघाहि, कालाउ बुङ ओबालाइ वासेहेङ खाङधुरि मापाहि।

³⁸ या ओदोङ भाअ्सिङ जेङहि कि, यासाइया परमेस्वरको बक्ता जेदोङ दोअ्का हिघाहि इङको काथा सत्ये ज्याको। वा दोङ दोअ्हि, हे प्रभु, हासु बुङ केलाइको सन्देसहेङ खाङधुरि मापाहि, कालाउ हासु बुङ या बुझिलि माद्वाङ कि या नाङको सरबुङसाइका सरबुङ हि।

³⁹ ओदोङ भाअ्सिङ इम्बालाइ खाङधुरि पालि मादोहि, हाइपालिपानु यासाइया परमेस्वरको बक्ता आरोङ एसा दोअ्का हि,

⁴⁰ परमेस्वर ओबालाइको मिसियाँ कान्हाँ बानाइपापिका हि कि, कालाउकि ओबालाइ तिङलि माद्वाको, कालाउ ओबालाइको मन राङका पापिका हि, कालाउकि माबुझ्याको, माकुनुते ओबालाइ काङकोता घुरिधावा कालाउ का ओबालाइहेङ एल्पाधाङका।

⁴¹ यासाइया परमेस्वरको बक्ता इदोइ काथा वाको बिसोइता दोअ्हि, हाइपालिपानु वा येसुको महिमा सोमोइ खान्तेङ लाम्फा तिङका हिघाहि।

⁴² कालाउ बुङ हेन्जाङ जोसो यहुदि आगुवागेलाइ येसु ह्रुता खाङधुरि पाहि, कालाउ फारिसिगेलाइसो थिकानाङ कि ओबालाइ यहुदिगेलाइको चाउघारा साअ्सो ओल्ला पापियाङ दोअ्तेङ इङको सुइकार मापाहि।

⁴³ हाइपालिपानु परमेस्वरको बाखिन खान्तेङ द्‍याङगेलाइसो निङका बाखिन ओबालाइ हेन्जा मन्दा ताघाखे।

फाइसालामकाता तेअ्लि

⁴⁴ येसु जेरहेङ तिराराइका गालाहोइ दोअ्हि, कासेहेङ खाङधुरि पाकालाइ कासेहेङ माको, भरु कासेहेङ दिङगिल्का परमेस्वरहेङ खाङधुरि पाखे।

⁴⁵ कालाउ जाइ कासेहेङ तिङखे, वा कासेहेङ दिङगिल्का परमेस्वरहेङ बुङ तिङखे।

⁴⁶ का सुमिङको फाइसालामका भाइतेङ लोका हिघा, कालाउकि कासेहेङ खाङधुरि पाकालाइ हासु बुङ कितिकितिकाता माह्याको।

⁴⁷ हासु बुङ काङको बचन हिङतेङ इङको पालन मापाखे पानु, का वाको न्याय मापाङका। हाइपालिपानु का सुमिङको न्याय पालि लोका माको, भरु सुमिङको द्‍याङगेलाइहेङ बान्चिपालि लोका हिघा।

⁴⁸ जाइ कासेहेङ इन्कार पावा कालाउ काङको बचनको आग्या माकेम्नु वाको भाअ्सिङ एमि न्याय पाका हि। जेदोङ बचन का दोअ्घा इङको बचनहोइ आन्तको दिनाता वासेहेङ न्याय पावा।

⁴⁹ हाइपालिपानु का ताइकोङ खाबारासो दोअ्का माको, भरु कासेहेङ दिङगिल्का आबा परमेस्वर ताइमिङ कासेहेङ आग्या पिका हि। कि का हाइ दोअ्लि कालाउ हेसा दोअ्लि।

⁵⁰ का गिखा कि, वाको आग्या केम्नाङ आनान्त जिबन पिखे। ओदोङ भाअ्सिङ का ओदोङ धुइखा जेदोङ आबा परमेस्वर कासेहेङ दोअ्खे।