युहन्‍ना 11 - Dhimal NT

लाजरस सिका

¹ बेथानिया देराता लाजरस मिङ पाका एमि द्‍याङ मासाधेका हिघाहि, इङकोङ देराता मरियम कालाउ वाको बाइ मार्था हिघाहि।

² उङको ओदोङ मरियम हि जाइ न्हुसो हानितेङ प्रभुको खोकोइता जाङका आत्तर हुपितेङ ताइकोङ पुसुङहोइ योपिका हिघाहि। याकोङ ओने लाजरस मासाधेका हिघाहि।

³ मार्था कालाउ मरियम प्रभु जाइहेङ नाअ् मायारु पाखेना, वा मासाधेका हि, दोअ्का बानाल येसुकोता पिगिल्हि।

⁴ कालाउ इदोइ हिङतेङ येसु दोअ्हि, “इदोइ मासाधिकाहोइ सिका माचुमाङ, कालाउ या परमेस्वरको महिमाको भाअ्सिङ हि, कालाउकि इदोइ पाहासो दोङ का परमेस्वरको चानको महिमा ज्याको।”

⁵ येसु मार्था, मरियम कालाउ वाको ओने लाजरसहेङ मायारु पाघाहि।

⁶ कालाउ बुङ लाजरस मासाधिका हि दोअ्का हिङतेङ येसु जेता हिघाहि आरोङ झन न्हेनि थेकापा इन्ताङ हि।

⁷ न्हेनि न्हुसो येसु चात्यागेलाइहेङ दोअ्हि, एला, केलाइ आरोङ यहुदिया जिल्लाता घुरितेङ हानाइने यहुदि जिल्लाको बेथानिया देराता लाजरस हिघाहि।

⁸ चात्यागेलाइ वासेहेङ दोअ्हि, “गुरु ज्यु एनाङ खिनिङ यहुदि आगुवागेलाइ नासेहेङ उन्ठुइहोइ तोअ्तेङ सेअ्लि खाङघाहि, कालाउ हाइ आरोङ नाअ् इन्ताङ हानिलि भोअ्खेना?”

⁹ येसु उत्तारा पिहि, “हाइ दिन्ता तेन्हे घान्टा मान्थुखेरो? कालाउ दिन्ता हिगिल्का द्‍याङगेलाइ माबोखेखे, हाइपालिपानु वा इदोइ सुमिङको सान्हेको फाइसालामका तिङखे।

¹⁰ कालाउ न्हिसिन्ता हिगिल्कालाइ बोअ्खेखे, हाइपालिपानु उङको द्‍याङगेलाइ दोफा हाइ दोङ फाइसालामका मान्थुखे।”

¹¹ इङको न्हुसो येसु इम्बालाइहेङ दोअ्हि, “केलाइको सानाइति लाजरस निन्धाता परिका हि, कालाउ उङकोहेङ जागिपालि का इन्ता हानाङका।”

¹² चात्यागेलाइ येसुहेङ दोअ्हि, “प्रभु, उङको निन्धाता परिका हि पानु उङको एलाङ।”

¹³ येसु लाजरसको सिका बिसोइता दोअ्का हिघाहि, कालाउ चात्यागेलाइ चाहि लाजरस जातिङकोङ जिम्का खिनिङ हि दोअ्का फोम पाका हिघाहि।

¹⁴ ओदोङ भाअ्सिङ येसु इम्बालाइहेङ झालाफालापा दोअ्पिहि, “लाजरस सिका हि।

¹⁵ नेलाइ खाङधुरि पासु दोअ्तेङ नेलाइको भाअ्सिङ का इन्ता माहिकाता खुसि हिघा। हाइ दोङ जेङलाउ बुङ केलाइ वाकोता हानाइने।”

¹⁶ कालाउ चात्यागेलाइ मध्ये दिदुमस दोअ्का थोमा बुङ ताइको सानाइति चात्यागेलाइहेङ दोअ्हि, “ते केलाइ बुङ हानाइने, कालाउ वा दोफा सियाइने।”

येसु सिन्हुका कालाउ जिबन हि

¹⁷ जेलाउ येसु कालाउ वाको चात्यागेलाइ बेथानिया देराता लोहि, कालाउ लाजरसहेङ तोम्ता लिका द्‍यानि जेङका थाहा गिहि।

¹⁸ बेथानिया देरा यरुसेलेम सहरसो लगभग सुम किलो मिटर दुरे हिघाहि।

¹⁹ हेन्जाङ यहुदि द्‍याङगेलाइ मार्था कालाउ मरियमकोता वाको सिका ओनेको बिसोइता इम्बालाइहेङ सान्त्वाना पिलि लोका हिघाहि।

²⁰ जेलाउ येसु लोकाताङ पाका हिघाहि दोअ्का हिङतेङ मार्था हानिहि कालाउ वासेहेङ दामाता दुसुहि। कालाउ मरियम चाहि साअ्ताङ योम्तेङ हि।

²¹ कालाउ मार्था येसुहेङ दोअ्हि, “प्रभु, नाअ् इता हिलि गोइधाना कालाउ काङको ओने मासिधाङ।

²² कालाउ एला बुङ का गिखा, नाअ् जेदोङ परमेस्वर दोफा ह्रेखेना, परमेस्वर नासेहेङ पिखे।”

²³ येसु मार्थाहेङ दोअ्हि, “नाङको ओने आरोङ सिन्हुताङ।”

²⁴ मार्था येसुहेङ दोअ्हि, “का गिखा, लाजरस इङको न्यायको दिनाता जेलाउ झाराङ सिकासो सिन्हुतेङ ल्होकाङ कालाउ वा बुङ आरोङ सिन्हुताङ।”

²⁵ येसु मार्थाहेङ दोअ्हि, “का ओदोङ हिघा जाइ सिका द्‍याङगेलाइहेङ आरोङ जिबन पिखे। जाइ कासेहेङ खाङधुरि पाखे, जेसापा वा सिलाउ बुङ आरोङ सिन्हुताङ।

²⁶ कालाउ जाइ कासेहेङ खाङधुरि पातेङ बान्चिखे वा आरोङ हेलाउ बुङ मास्याङ, हाइ नाअ् या काथाता खाङधुरि पाना?”

²⁷ मार्था येसुहेङ दोअ्हि, “नेउ प्रभु, का खाङधुरि पाखा, नाअ् सुमिङता लोका परमेस्वरको चान ख्रिस्ट हिना।”

लाजरस सिन्हुहि

²⁸ एसा दोअ्तेङ मार्था हानिहि, कालाउ ताइको ओने मरियमहेङ सुतुक्क काइतेङ दोअ्हि, “गुरु ज्यु लोहोइ, कालाउ नासेहेङ काइखे।”

²⁹ इदोइ हिङतेङ मरियम जुरुक्पा ल्होतेङ येसुहेङ भेतिलि हानिहि।

³⁰ इङको बेला थेकापा येसु देरासो बाहार हिघाहि, कालाउ वा इङको थामेता हिघाहि जेता मार्था वासेहेङ दुसुका हिघाहि।

³¹ साअ्ता मरियमहेङ सान्त्वाना पिलि लोका यहुदिगेलाइ मरियम जुरुक्पा ल्होतेङ बाहार हानिका तिङतेङ, वा इङको तोम्ता खार्हि हानिकाबे दोअ्तेङ वाको न्हु-न्हु हानिहि।

³² जेलाउ मरियम येसु हिका थामेता थुकाल्हाहि कालाउ वासेहेङ तिङहि, कालाउ एसा दोकाताङ वा येसुको खोकोइता तुघुरतेङ दोअ्हि, हे प्रभु, नाअ् इता हिनुते काङको ओने मासिधाङ।

³³ जेलाउ येसु मरियमहेङ कालाउ वाको दोफा लोका यहुदिगेलाइहेङ बुङ खार्तेङ हिका तिङतेङ, येसु दायाहोइ पोङघातेङ दुखित जेङहि।

³⁴ येसु इम्बालाइहेङ हिअ्हि, नेलाइ लाजरसहेङ हिदोइ थामेता ताअ्का हिसुना, इम्बालाइ वासेहेङ दोअ्हि, “प्रभु, लोतेङ खाङ।”

³⁵ कालाउ येसु खार्हि।

³⁶ ओदोङ भाअ्सिङ यहुदिगेलाइ दोअ्हि, “खाङ, वा लाजरसहेङ हेथे मायारु पाघाखे।”

³⁷ कालाउ आधिमि दोअ्हि, वा दोङ कान्हाँहेङ एल्पाहि। वा लाजरसहेङ बुङ सिकासो बान्चिपालि दोअ्धावा।

³⁸ कालाउ येसु आरोङ मेनाङ दुखित जेङहि कालाउ तोम्ता हानिहि। इङको एनोङ घोपा हिघाहि कालाउ इङको को नुइ एनोङ बार्का उन्ठुइहोइ थुम्का हिघाहि।

³⁹ येसु दोअ्हि, “उन्ठुइ लापासु।” सिका द्‍याङको बाइ मार्था वासेहेङ दोअ्हि, हे प्रभु, एला थेकापा ते न्हाम्लि दोहोइ वाला हाइपालिपानु उङको सिका द्‍यानि जेङहोइ।

⁴⁰ येसु उङकोहेङ दोअ्हि, “हाइ का नासेहेङ दोअ्का माको, नाअ् खाङधुरि पान्हा पानु परमेस्वरको महिमा तिनाना?”

⁴¹ कालाउ इम्बालाइ उन्ठुइ लाअ्पाहि, कालाउ येसु ह्रुता म्हाल्तेङ दोअ्हि, “हे आबा, का नासेहेङ धन्यबाद पिखा, हाइपालिपानु नाअ् काङको बिन्ति हिङना।

⁴² का गिघाखा कि नाअ् काङको बिन्ति जेलाउ बुङ हिङखेना। कालाउ इता जाअ्तेङ हिका द्‍याङगेलाइ खाङधुरि पाको दोअ्तेङ का दोङ बार्का गालाहोइ दोअ्घा, कि नाअ् कासेहेङ दिङगिल्का हिना।”

⁴³ कालाउ इदोइ काथा दोअ्लि दोअ्तेङ न्हुसो येसु बार्का गालासो काइहि, “लाजरस, बाहार ओल्लेतेङ लौउ।”

⁴⁴ कालाउ लाजरस खुर-खोकोइ धाबाहोइ जिङन्हाकाङ कालाउ वाको ह्राइ धाबाहोइ लुन्धाइनाकाङ बाहार ओल्लेतेङ लोहि। कालाउ येसु इम्बालाइहेङ दोअ्हि, “इङको को धाबा खाइपिसु, कालाउ उङकोहेङ हानिलि पिसु।”

येसुहेङ सेअ्लिको भाअ्सिङ दाउ

⁴⁵ कालाउ मरियमहेङ भेतिलि लोका हेन्जाङ यहुदिगेलाइ येसुको पाका काम तिङतेङ वासेहेङ खाङधुरि पाहि।

⁴⁶ कालाउ इम्बालाइसो आधिमि द्‍याङ फारिसिगेलाइकोता हानिहि, कालाउ येसुको पाका कामगेलाइको बारेता दोअ्पिहि।

⁴⁷ कालाउ मुलि पुजारिगेलाइ कालाउ फारिसिगेलाइ माहासभाको सदस्यगेलाइहेङ काइतेङ उङकोहेङ दोअ्हि, “एला केलाइ हाइपाङ? इदोइ द्‍याङते हेन्जाङ भारभुसाइका चिन्हागेलाइ पातेङ हिखे।”

⁴⁸ जेसापा केलाइ वासेहेङ एलाङ मारोकिहे पानु, झाराङ द्‍याङगेलाइ वासेहेङ ख्रिस्टको दोअ्तेङ खाङधुरि पावा कालाउ रोमिगेलाइ लोतेङ केलाइको मुन्दिर कालाउ केलाइको द्‍याङगेलाइ नासा पावा।

⁴⁹ कालाउ माहासभाको सदस्यगेलाइ मध्ये एमि, कैयाफा मिङ हिका द्‍याङ हिघाहि। जाइ इङको बासारको प्राधान पुजारि हिघाहि। वा इम्बालाइहेङ दोअ्हि, “नेलाइ हाइ दोङ मागिसुखेना!

⁵⁰ केलाइको गोताङ द्‍याङगेलाइ नास जेङका खान्तेङते भरु केलाइ झाराङको भाअ्सिङ एमि द्‍याङ खिनिङ सिलि रेम्का हि दोअ्का काथा नेलाइ माबुझिसुखेना?”

⁵¹ इदोइ काथा येसु ताइ पाहा दोअ्का मान्थुघाहि, इङको बासारको प्राधान पुजारि जेङकानाङ येसु इस्राएललिगेलाइको भाअ्सिङ सियाङ दोअ्का आगमबानि पाका हिघाहि।

⁵² कालाउ इस्राएललिगेलाइको भाअ्सिङ खिनिङ माको कालाउ इदोइ सुमिङता आउलि गिल्का परमेस्वरको आरु सान्तानगेलाइहेङ ए दोफाङ जोम्पालि येसु सियाङ दोअ्का हिघाहि।

⁵³ ओदोङ भाअ्सिङ इङको दिनासो यहुदि आगुवागेलाइ येसुहेङ सेअ्लि योजाना पालि तेङहि।

⁵⁴ ओदोङ भाअ्सिङ येसु आरोङ यहुदिगेलाइको माझाता भाइ-भाइपा माहिगिल्हि। कालाउ वा इन्तासो चाका-मान्दा थामेको भेरपाङ हिका एफ्राइम दोअ्का देराता हानिहि, कालाउ इन्ताङ ताइको चात्यागेलाइ दोफा हि।

⁵⁵ यहुदिगेलाइको निस्तार पार्बाको सोमोइ भेरपाङ लोलि तोम्का हिघाहि, कालाउ हेन्जाङ द्‍याङगेलाइ पार्बा लोका खाङतेङ लाम्फा दोङ ता-ताइमिहेङ इम्बालाइको मुन्धुम आन्सार सुद्द बानाइलि यरुसेलेम मुन्दिरता हानिहि।

⁵⁶ इम्बालाइ येसु ल्वाङ दोअ्तेङ दामा खाङतेङ हिघाहि। मुन्दिरता जोम्लाउ इम्बालाइ ता-ताइमिता एसा दोअ्लि तेङहि, “नाङको हाइ बिचार हि? हाइ वा पार्बाता ल्वाङ कि माल्वाङ?”

⁵⁷ कालाउ मुलि पुजारिगेलाइ कालाउ फारिसिगेलाइ आग्या पिका हिघाखे कि जेसापा हासु बुङ येसु हिसो हि दोअ्तेङ थाहा गिहेपानु, केलाइकोता बानाल चुमालि गोइस्वाना कालाउकि केलाइ येसुहेङ रिम्लि द्वाङ।