याकुब 5 - Dhimal NT

धनिगेलाइहेङ चेताउनि

¹ ओइ धनि द्‍याङगेलाइ हिङसु! नेलाइ ह्रुता आइ परिका कस्टगेलाइको भाअ्सिङ खारसु कालाउ मन आउलि पासु।

² नेलाइको धन सम्पति नासाताङ, कालाउ नेलाइको लोखोन धाबागेलाइ पेसामाकारागेलइ पाचिपाका हि।

³ नेलाइको सोना चान्दिता कासि लागिका हि, कालाउ इङकोङ कासि नेलाइको बिरोधता साक्सि जेनावा, कालाउ इङकोङ कासिहोइ नेलाइको जिउ मेहोइ भाइपा ओपावा। कालाउ नेलाइ न्हुसोको भाअ्सिङ धन सम्पति थुबाराइतेङ ताअ्का हिसुना।

⁴ जेदोङ खेतालागेलाइ नेलाइको मिलिङको सिसा चेका हि, नेलाइ धोकाबाजि पातेङ इम्बालाइको ज्याला मापिनाङ खेतालागेलाइ नेलाइको बिरोधता परमेस्वरहेङ पुकारा पाका हि, कालाउ इङको खेतालागेलाइको पुकारा सेनागेलाइको प्रभु परमेस्वर हिङपिका हि।

⁵ नेलाइ इदोइ प्रिथिबिको सुख-बिलास कालाउ मोज्माज्जाता मस्त रामाइतेङ हिसुना। इसिका पातेङ नेलाइ इङको गुपुसगेलाइ भाइका दोङ हिसुना, जाइहेङ चाअ्लिको भाअ्सिङ सेअ्लि खान्तेङ लाम्फा तोइका बानाइखे। इङको गुपुसगेलाइ भाइपा नेलाइहेङ बुङ थाहा मान्थु कि नेलाइको न्याय भेरपाङ हि।

⁶ नेलाइको बिरोध मापाका निर्दुसिहेङ दुसितेङ नेलाइ सेअ्का हिसुना।

कस्टगेलाइता धिरोज

⁷ ओदोङ भाअ्सिङ खान्धुराइ ओनेगेलाइ, प्रभुको आगमन मालोपा ह्रुम्तेङ हिसु। जेसाङ मिलिङसो हेन्जा सेकाको आस पातेङ किसान लाङति बासार कालाउ न्हु बासारको बार्सा माजेङपा भरि धिरोजसो ह्रुम्तेङ हिखे।

⁸ एन्साङ पातेङ नेलाइ बुङ ह्रुम्तेङ हिसु, कालाउ आस पालि माअ्लासु हाइपालिपानु प्रभु धेमाङ लोदोङखे।

⁹ ओइ खान्धुराइ ओनेगेलाइ, एमिसो-भेनेङहेङ मादुसिसु, माकुनुते नेलाइ दुसिका जेङस्वाना, खाङसु, प्रभु झाराङको न्याय पालि लोलिको भाअ्सिङ तियार हि।

¹⁰ खान्धुराइ ओनेगेलाइ, कस्ट भोगिका कालाउ धिरोजको उधाहरन हिसिका हिलि गोइका हि, इङको प्रभुको मिङता दोअ्का परमेस्वरको बक्तागेलाइहेङ खाङसु।

¹¹ खाङसु, धिरोज पाकागेलाइहेङ केलाइ धन्यको दोअ्न्हाखे। नेलाइ आय्युब मिङ हिका द्‍याङको धिरोजको बारेता हिङका हिसुना, कालाउ प्रभुको बारेता हिङका हिसुना, कि प्रभु हिसिका करुनामय कालाउ दायालु हि।

¹² काङको खान्धुराइ ओनेगेलाइ, गोताङ काथा खान्तेङ लाम्फा स्वर्गको माकुनु प्रिथिबिको माकुनु आरु हिदोइ बुङ काथाको केरा माचासु, कालाउ नेलाइ परमेस्वरसो दुसिका माजेङलिको भाअ्सिङ नेलाइको “एइनु-एइ जेनाको” कालाउ “माकुनु-माको जेनाको।”

खाङधुरिको प्रार्थाना

¹³ हाइ नेलाइता हासु बुङ कस्ट भोगितेङ हि? वा प्रार्थाना पाको, हाइ हासु बुङ आधिमि आनन्दित हि? वा बाखिनको ले लेका को।

¹⁴ हाइ नेलाइको माझाता आधिमि मासाधिका हिसुना? वा दोङ मन्डलिको आगुवागेलाइहेङ कायाको। इम्बालाइ प्रभुको मिङता वासेहेङ चुइतिसो आबिसेक पापितेङ वाको भाअ्सिङ प्रार्थाना पापियाको।

¹⁵ कालाउ खाङधुरिको प्रार्थाना पाकासो मासाधिकालाइहेङ बान्चि पावा, कालाउ प्रभु वासेहेङ एल्पावा, कालाउ जेसापा वा पाप पाका हिहे पानु बुङ वाको पाप स्यामा जेनावा।

¹⁶ ओदोङ भाअ्सिङ नेलाइ एमिसो-भेनेङ दोफा ताइ-ताइको पाप सुइकार पासु। नेलाइ एल्लिको भाअ्सिङ एमिसो-भेनेङको भाअ्सिङ प्रार्थाना पासु। धर्मि द्‍याङको प्रार्थाना सरबुङसाइका कालाउ हेन्जाङ प्रभाबसालि जेङखे।

¹⁷ परमेस्वरको बक्ता एलियाबुङते केलाइ भाइकाङ द्‍याङ हिघाखे। वा वाइ माल्वाको दोअ्तेङ पुरा ह्रदयसोङ प्रार्थाना पाका हिघाहि, कालाउ सुम बासार तु माइना थेकापा प्रिथिबिता वाइ मालोहि।

¹⁸ एलिया आरोङ प्रार्थाना पाहि, कालाउ आकाससो वाइ लोहि, कालाउ मिलिङ सिङजालजाल हि।

¹⁹ काङको खान्धुराइ ओनेगेलाइ, जेसापा नेलाइ मध्येसो एमि खान्धुराइ सत्येसो आवाइतुकाताङ हानिलाउ हासु बुङ वासेहेङ घुरिपातेङ चुमाहे पानु,

²⁰ वा ग्याको कि जाइ एमि पापिहेङ वाको पाप पालिसो लाअ्पालि साघाइखे, वासेहेङ आनान्त सिकासो बान्चि पावा, कालाउ परमेस्वर वाको गेनेगेल्का पापहेङ स्यामा पापियावा।