याकुब 4 - Dhimal NT

परमेस्वरता समर्पन

¹ नेलाइको माझाता धुम कालाउ झगडागेलाइ हिदोइ काथासो लोखे? इङकोते स्वार्थ लान्छाहोइ लोखे जाइ नाङको मन लिता सङघरस पाखे।

² नेलाइ इच्छाते पासुखेना, कालाउ नेलाइ मानिङसुखेना। ओदोङ भाअ्सिङ नेलाइ मारा कालाउ लोभ पासुखेना, कालाउ नेलाइ आरुगेलाइ दोफा हिका काथाको भाअ्सिङ बारका इच्छा पासुखेना, कालाउ नेलाइको भोका हाइ दोङ निङलि मादोसुखेना। ओदोङ भाअ्सिङ नेलाइ धुम कालाउ झागडा पासुखेना। नेलाइ मानिङस्वाना, हाइपालिपानु नेलाइ इङको को भाअ्सिङ परमेस्वर दोफा माह्रेसुखेना।

³ नेलाइ ह्रेसुखेना कालाउ मानिङसुखेना, हाइपालिपानु ताइको लान्सा पुरा पालिको भाअ्सिङ मारेम्का इच्छाहोइ ह्रेसुखेना।

⁴ ओइ परमेस्वरको खाङधुरि योग्य मान्थुका द्‍याङगेलाइ, इदोइ सुमिङको काथागेलाइको सानाइति परमेस्वर दोफाको सतुरु दोङ दोअ्का काथा हाइ नेलाइहेङ थाहा मान्थु? ओदोङ भाअ्सिङ जाइ सुमिङ दोफा सानाइति जेङलि भोखे वा दोङ ताइमिहेङ परमेस्वरको सतुरु बानाइखे।

⁵ हाइ नेलाइ या फोम पासुखेना, कि पबित्तरो धर्मसास्तर दोङ ब्यर्थता एसा दोअ्खे, कि केलाइकोता परमेस्वर ताअ्का आत्माको भाअ्सिङ वा ओसारापाङ बारका इच्छा ताअ्खे।

⁶ कालाउ वा झन हेन्जाङ आनुग्रह पिखे ओदोङ भाअ्सिङ पबित्तरो धर्मसास्तरता एसा लेखेका हि, “परमेस्वर घमन्डिगेलाइको बिरोध पाखे, कालाउ मोनोइगेलाइहेङ आनुग्रह पाखे।”

⁷ ओदोङ भाअ्सिङ ताइमिहेङ परमेस्वरको खाबाराता ताअ्सु। साइतानको बिरोध पासु, कालाउ इङको नेलाइसो थितेङ खातावा।

⁸ परमेस्वरको भेरपाङ लोसु, कालाउ वा नेलाइको भेरपाङ लावा। पापिगेलाइ! ताइको जिबनसो पाप पालि लाअ्पासु। न्हेनोङ मन हिका द्‍याङगेलाइ! नेलाइको हृदय सुद्द पासु।

⁹ ताइको पापको कारन दुखि जेङसु, सोक पासु, कालाउ खारसु। नेलाइको लेङचाका सोकता, कालाउ नेलाइको आनान्दता दुखता परिबर्तन ज्याको।

¹⁰ प्रभुको आगाता ताइमिहेङ मोनोइ बानाइ, कालाउ वा नेलाइहेङ साम्मान प्यावा।

¹¹ खान्धुराइ ओनेगेलाइ, एमिसो-भेनेङको बिरोधता मारेम्का काथा मापासु। जाइ ताइको खान्धुराइ ओनेको बिरोधता खाराब धुइखे, माकुनु ताइको खान्धुराइ ओनेहेङ दुसिखे, इङको व्यवस्थाको बिरोधता धुइखे, कालाउ वा व्यवस्थाको दुसिका तिङपाखे। कालाउ जेसापा नाअ् व्यवस्थाको दुसिका तिङपाखेना दोअ्नुते नाअ् व्यवस्था आन्सारको चलिका माजेङसुन्हा, कालाउ व्यवस्थाको न्याय कार्ता कि जेङसुन्हा।

¹² व्यवस्था पिका कालाउ न्याय पाकाते एमि खिनिङ हि, कालाउ वा चाहि परमेस्वर हि। जाइ बान्चिपालि कालाउ नासा पालि बुङ द्वावा। नाअ् ताइमिहेङ हासु दोअ्तेङ सोचिखेना, कि नाअ् आरुगेलाइहेङ दुसिका लागाइखेना?

¹³ नानि माकुनु जुम्नि केलाइ फालाना सहरता हानाङ, इन्ता ए बासार बितिपाङ कालाउ ब्यपार पातेङ नाफा ओल्लापाङ दोअ्कालाइ,

¹⁴ एला हिङसु, जुम्नि हाइ जेनाङ नेलाइ मागिसुखेना। नाङको जिन्दगि हाइ हि रो? नेलाइते कुकुवा तुकागेलाइ भाइका, जाइ एघिरिङको भाअ्सिङ तिङखे, कालाउ राम्खे।

¹⁵ ओदोङ भाअ्सिङ नेलाइ इसिका दोअ्लि गोइका, जेसापा परमेस्वरको इच्छा जेङहि पानु केलाइ बान्च्याङ कालाउ इसिका उसिका पाङ।

¹⁶ कालाउ एला नेलाइ ताइको आहाङकारि योजानागेलाइको बारेता घमन्ड पासुखेना। इसिका गोताङ घमन्ड मारेम्का हि।

¹⁷ ओदोङ भाअ्सिङ जाइ भलाइ पालि गितेङ बुङ मापाखे वा पाप पाखे।