याकुब 3 - Dhimal NT

देतोङहेङ तहता ताअ्लि

¹ ओइ खान्धुराइ ओनेगेलाइ, नेलाइकोसो हेन्जा झना परमेस्वरको बचनको सिक्स्यक माजेङसु, हाइपालिपानु नेलाइ गिसुखेना, केलाइ सिक्स्या पिकालाइको न्याय आरुगेलाइको खाङतेङ झन थाङका रुपहोइ जेनावा।

² केलाइ झाराङ हेन्जा काम बिगिर पानाखे, कालाउ जेदोङ द्‍याङ ताइमिङ दोअ्का काथाता गल्ति मापाखे, वा ताइमिङहेङ पुर्न रुपहोइ काबुता ताअ्लि दोखे कालाउ उङको द्‍याङ सिद्द जेङखे।

³ जेसापा ओह्याँगेलाहेङ ताइको कब्जाता ताअ्लि इम्बालाइको नुइता लागाम लागाइस्वाना पानु, इम्बालाइको गोताङ जिउहेङ जेता मन जेङखे ओसोङ चुम्पुलि दोस्वाना।

⁴ खाङसु जाहाजगेलाइ जेदोङ बार्का भेरमासो चोलिखे, इङको बा-बारका हिलाउ बुङ एनोङ म्हुइका पतवारहोइ चालाइका द्‍याङ ताइको इच्छा आन्सारसो जेता मन जेङखे ओताङ चुम्पुखे।

⁵ इन्सिकाङ देतोङ बुङ एनोङ म्हुइका आङग जेङतेङ बा-बारका काथाको घमन्ड पाखे। खाङसु, एनोङ म्हुइका मेको झिल्काहोइ बारका झारहेङ बुङ मे लागाइखे।

⁶ देतोङ बुङ एनोङ मेदोङ भाइका हि, या जिउको आङगगेलाइ मध्ये हि जेदोङ हेन्जा दुस्ट हि। या दोङ केलाइको गोताङ जिउहेङ नासा पाखे कालाउ गोताङ जिबनहेङ दोङ मे जोलाइ पिखे कालाउ नरकको मेता उङको ओतावा!

⁷ हिदोइ बुङ खाल्को गुपुस, जिहाँ-जुइलेङ, पोम्भेलेतेङ तेअ्का जन्तु कालाउ समुन्द्रको जिब जन्तुगेलाइहेङ तह लागाइलि दोखे, कालाउ द्‍याङको जातिसो दोङ इम्बालाइहेङ तह लागाइका हि।

⁸ कालाउ देतोङहेङ हिदोइ बुङ द्‍याङ तह लागाइलि मादोखे। या पुह्याँको बिस भाइकाङ हेन्जा हान्ति पाका कालाउ चिका न्हाका दुस्ट हिखे।

⁹ देतोङ पाहासो केलाइ प्रभु कालाउ आबाको बाखिन पान्हाखे, कालाउ इदोइसोङ परमेस्वरको स्वरुपता बानाइका द्‍याङगेलाइको बिरोधता केलाइ मारेम्का धुइनाखे।

¹⁰ एनोङ दोङ नुइसो बाखिन कालाउ मारेम्का काथा ओल्हिखे। काङको खान्धुराइ ओनेगेलाइ, एसा माजेङलि गोइका हि।

¹¹ जातिङकोङ दोङ एनोङ चिको मुलसो न्हेनोङ दोङ ताअ्का चि कालाउ खाका चि ओल्लेलि मादोखे।

¹² काङको खान्धुराइ ओनेगेलाइ, हाइ लाब्राको सिङता जैतुन माकुनु आङगुरको सिङता लाब्रा सेलि द्वावा रो? इन्सिकाङ ताइका चिको मुलसो ताअ्का चि ओल्लेलि मादावा।

न्हे खाल्को बुद्दि

¹³ नेलाइ मध्येसो बुद्दिमान कालाउ ग्यानि द्‍याङ हासु हि? जेसापा नेलाइ बुद्दिमानि कालाउ ग्यानि हिसुना पानु मोनोइ दोफा रेम्का कामगेलाइ पातेङ तिङपासु।

¹⁴ कालाउ जेसापा नेलाइको हृदयता हेन्जा आरिस कालाउ स्वार्थ हि पानु घमन्ड मापासु, कालाउ सत्येको बिरोधता माधाताइसु।

¹⁵ या बुद्दि परमेस्वरसो लोका बुद्दि माको, कालाउ याते सुमिङ, द्‍याङको बिचारसो कालाउ साइतानसो दोङ लोका हि।

¹⁶ हाइपालिपानु जेता आरिस कालाउ स्वार्थ हिखे, इन्ता चेरसुका-फेसुका कालाउ गोताङ खाल्को भ्रस्ट काम जेङका हिखे।

¹⁷ कालाउ जेदोङ बुद्दि परमेस्वरसो लोखे इङको लाम्फाङ सुद्द हिखे, कालाउ इङको सान्तिप्रिय, मोनोइ, मिलिका, दायाहोइ कालाउ रेम्का कामहोइ भरिका, पक्स्य पात मान्थुका कालाउ छल माकोसिङ हिखे।

¹⁸ कालाउ सान्ति ताअ्का झाराङ सान्तिको चालाइ बिखे कालाउ इम्बालाइ धार्मिकताको सिसा जोम्पाखे।