याकुब 1 - Dhimal NT1 का याकुब परमेस्वर कालाउ प्रभु येसु ख्रिस्टको बान्धाइति इदोइ पात्तारा इस्राएल सारभिको तेन्हे कुलहेङ लेखेदोङखा, जाइ सारभिगेलाइ भरि चार-बिराइतेङ हिका उङको झाराङहेङ का सेउपाखा। कस्ट कालाउ जाचगेलाइ 2 काङको खान्धुराइ ओनेगेलाइ, नेलाइकोता भेनेङ-भेनेङ खाल्को जाच लोलाउ इङकोहेङ पुरा आनान्दको काथा फोम पाअ्सु। 3 हाइपालिपानु नेलाइ गिसुखेना, कि जेलाउ नेलाइको खाङधुरिको जाच जेङखे कालाउ नेलाइ साबित पास्वाना कि नेलाइ एला बुङ परमेस्वरता भोरोसा पासुखेना, ओदोङ भाअ्सिङ नेलाइ धर्य सोङ दुख सहिसुखेना। कालाउ जाइ नेलाइहेङ धर्य दोफा दुख पालि सहिलि धिरपाखे। 4 नेलाइ गोताङ काथा सहिलि धिरलि गोइखे, कालाउकि नेलाइकोता हिदोइ बुङ रेम्का गुनगेलाइको आभाब माजेनाको कालाउ नेलाइ गोताङ आत्माता परिपक्का कालाउ पुर्न जेङसु। 5 कालाउ जेसापा नेलाइसो हासुहेङ बुङ बुद्दिको खाचो हिनु उद्दार चित्ताहोइ मादुसिका परमेस्वर दोफा वा ह्रेकाको, कालाउ वा वासेहेङ इङको प्यावा। 6 कालाउ वा हेथे बुङ साङखा मापासिङ खाङधुरिसोङ ह्रेकाको, हाइपालिपानु साङखा पाका चाहि इस्थिर माजेङखे, कालाउ इम्बालाइ भेरमाहोइ तोलिन्हातेङ उराइपाकाताङ फेन्हापाकाताङ पाका समुन्द्रको छाल्काका चि भाइपा जेनावा। 7 इन्सिका द्याङ या मासम्झ्याको, कि वा प्रभुसो हाइ दोङ निनाको। 8 हाइपालिपानु न्हेनोङ मन हिका द्याङको वाको गोताङ आनिबानिता आस्थिर हिखे। गरिब कालाउ धनि 9 जेसापा हिदोइ बुङ खान्धुराइगेलाइ गरिब हि पानु, खुसि हिलि गोइखे, कि इम्बालाइ परमेस्वरको भाअ्सिङ महत्वय पुर्न हि। 10 कालाउ धनि खान्धुराइगेलाइ खुसि हिलि गोइखे, हाइपालिपानु परमेस्वर इम्बालाइहेङ मोनोइ बानाइका हि। हाइपालिपानु द्याङ घासिको ल्हे भाइपा चुतेङ हानावा। 11 जेसापा ओपाका धाङकासो सान्हे ल्होखे, कालाउ घासिहेङ चुपापिखे। ल्हे हुल्खे कालाउ वाको सोबाइका नासाखे। एन्सा पाङ धनि द्याङ बुङ ताइको काम धान्दाता ब्यस्त जेङतेङ दोङ सिखे। 12 उङको द्याङ धन्यको हि, जाइ जाचता स्थिर हिखे, हाइपालिपानु ताइको खाङधुरि प्रमानित पालि दोतेङ वा आनान्त जिबनको इनाम निनावा, जाइ परमेस्वर वासेहेङ प्रेम पाका झाराङहेङ पिका प्रतिग्या पाका हि। 13 जाचिलाउ हासु बुङ इसिका माअ्दोताको, “परमेस्वरसो काङको जाच जेङहि।” हाइपालिपानु परमेस्वरको हिदोइ बुङ खाराब काथासो जाच जेङलि मादोखे, ना ते परमेस्वर हासुहेङ बुङ जाच पाखे। 14 कालाउ द्याङ ताइकोङ खाराब इच्छासो आवाइ तुगुल्तेङ जाचता परिखे। या एनोङ गुपुस भाइका हि, जाइ लासा भारि तानिन्हाखे। 15 कालाउ इम्बालाइको खाराब इच्साहोइ पाप पालि लागाइखे, जेलाउ इम्बालाइ लागातार पाप पातेङ हिखे इङकोहोइ आनान्तको सिका चुमाखे। 16 काङको आनाउ खान्धुराइ ओनेगेलाइ, परमेस्वर नेलाइहेङ जाचिखे दोअ्तेङ धोकाता मापरेसु। 17 हाइपालिपानु हिदोइ बुङ रेम्का कालाउ सिद्द बरदान परमेस्वरसोङ लोखे, इदोइ बरदान फाइसालामकाको आबासो लोखे। परमेस्वर जेलाउ बुङ ए सामान हिखे कालाउ वा स्याइरे भाइका आदलबदल माजेङखे। 18 वा ताइकोङ इच्छासो सत्येको बचनसो केलाइहेङ नावा जिबन पिहि, कालाउकि केलाइ वा दोङ सिरजाइका सेकाको लाङ फल भाइपा जेङलि द्वाइने। हिङलि कालाउ पालि 19 काङको आनाउ खान्धुराइ ओनेगेलाइ, इदोइ काथा गिसु: झाराङ द्याङ हिङलि धेमा, नुइ धुइलि लेद्रापा कालाउ चेरताम्पालि धिला जेङलि गोइखे। 20 हाइपालिपानु जेलाउ हिदोइ बुङ द्याङ चेरताम्खे, वा धर्मि जेङतेङ जियाइलि माद्वावा कालाउ परमेस्वरहेङ खुसि माबानाइखे। 21 ओदोङ भाअ्सिङ गोताङ आखेका काथा कालाउ गोताङ दुस्टताहेङ हाताइ, कालाउ नेलाइको हृदयता ताअ्का परमेस्वरको बचन मोनोइतेङ ग्रहन पासु, जाइ दोङ नेलाइको प्रानहेङ आनान्तको दन्डसो बान्चिपालि द्वावा। 22 कालाउ परमेस्वरको बचन केम्का जेङसु, कालाउ हिङतेङ खिनिङ ताइमिहेङ धोका मापिसु। 23 हाइपालिपानु हिदोइ बुङ द्याङ बचन हिङखे कालाउ माकेम्खे पानु, उङको एनोङ इसिका द्याङ भाइका जेनावा जाइ ताइको ह्राइ आइनाता खाङखे, 24 हाइपालिपानु वा ताइमिहेङ खाङखे कालाउ वा हानेखे कालाउ उङको ताइमिङ हिसिका हिघाखे, उङको एघुरिङताङ निल्खे। 25 कालाउ उङको द्याङ जाइ पापसो स्वतन्तरता पाका सिद्द व्यवस्थाहेङ ध्यान पितेङ आध्यान पाखे, कालाउ इङकोताङ लागितेङ हिखे कालाउ हिङका काथा मानिल्खे कालाउ जेदोङ धिरखे इङको पालि केम्खे, कालाउ वाको पाका कामता परमेस्वर आसिस प्यावा। 26 जेसापा हिदोइ बुङ द्याङ ताइमिहेङ धर्मि सम्झिखे, कालाउ वा ताइको धुइतेङ हिका काथा काबुता माअ्ताखे, कालाउ ताइको ह्रदयहेङ धोका पिहे पानुते उङको द्याङको धर्म ब्यर्थ जेङखे। 27 आबा परमेस्वरको आगाता सुद्द कालाउ पबित्तरो धर्म इदोइ दोङ हि: माउरिया कालाउ के सिकालाइहेङ इम्बालाइको दुखता खाङलि गोइखे कालाउ ताइमिहेङ सुमिङको मारेम्का काथागेलाइसो फारापा हिलि गोइखे। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation