हिब्रु 9 - Dhimal NT

द्याङगेलाइको बानाइका बासा हिका थामेता आराधाना

¹ कालाउ हेन्जाङ सोमोइ लाम्फा एस्राएल सारभिको द्‍याङगेलाइहेङ मोसा पाहासो पिका परमेस्वरको कारारता हेसा आराधाना पालि दोअ्तेङ निर्देसनगेलाइ पिका हिघाहि, कालाउ इम्बालाइ दोफा द्‍याङगेलाइ पाहासो बानाइका एनोङ आराधानाको बासा हिका थामे बानाइका हिघाहि।

² या बासा हिका थामे गुपुसको धालेसो बानाइका हिघाहि, कालाउ इङको बासा हिका माझाता इम्बालाइ पारदा ताङगाइतेङ न्हेनोङ कोठा बानाइका हिघाहि, लाङ कोठाता न्हि लोङ दालेङगेलाइ हिका चेरादानि हिघाहि, कालाउ इन्ता एनोङ चाङ चाउकि हिघाहि, इङकोता परमेस्वरहेङ चढाइका तोले हिघाहि, इङको कोठाहेङ पबित्तरो थामे दोअ्घाखे।

³ बासा हिका थामे लिता पारदाको न्हुपाहाको न्हेतेङ कोठाहेङ माहा पबित्तरो थामे दोअ्घाखे।

⁴ इङको कोठाता धुमाना धोअ्का सोनाको बेदि ताअ्का हिघाहि, कालाउ इन्ता एनोङ कारारको सन्दुक बुङ हिघाहि, इङको लिता कालाउ बाहार सोनाहोइ बानाइका हिघाहि, कालाउ इङको सन्दुकता सुमनोङ आमेनेगेलाइ हिघाहि: कालाउ एनोङ मन्न ताअ्का सोनाको हान्डि, भेनेङ चाहि भारलि तोम्का हारुनको एनोङ लाठि कालाउ परमेस्वर मोसाहेङ पिका तेलोङ आग्याको न्हेनोङ उन्ठुइको पाटिगेलाइ हिघाखे।

⁵ सन्दुकको ह्रुता न्हेनोङ महिमामय करुबगेलाइ हिघाहि, जेदोङ इङको काथाको साङकेत हिघाहि कि, परमेस्वर इन्ता हिका हि, इङको करुबगेलाइको पाखेनागेलाइहोइ इङको थामे थुम्खे जेता प्राधान पुजारि लोतेङ द्‍याङगेलाइको पापको भाअ्सिङ परमेस्वर दोफा स्यामा ह्रेपिखे, कालाउ एला केलाइ इदोङ काथागेलाइको बारेता सारिपा काथा पालि मादोनाखे।

⁶ एसापा दोङ इङको खोपारा तियार पाका हिघाहि। जेलाउ बुङ पुजारिगेलाइ ताइको काम पालि इन्ता लोघाखे, कालाउ इम्बालाइ लाङ कोठाता दोङ हानिघाखे।

⁷ कालाउ बासारता एखे खिनिङ प्राधान पुजारि माहा पबित्तरो थामेता हानिघाखे, जेलाउ वा लिता हानिघाखे कालाउ वा ताइमि दोफा गुपुसको हिति चुम्पुतेङ हानिघाखे, कालाउ वा इङको हिति ताइको पाप स्यामाको भाअ्सिङ कालाउ द्‍याङगेलाइको मागिसिङ पाका पापको भाअ्सिङ परमेस्वर दोफा बिन्ति चाढाइका काम पाघाखे।

⁸ इसिकाङ खाल्को मुन्धुमगेलाइ पाहासो पबित्तरो आत्माहोइ केलाइहेङ इदोइ बुझिका बानाइखे कि, जेलाउ थेकापा बासा हिका थामे हि कालाउ इन्सिका मुन्धुमगेलाइ इदोइ प्रिथिबिता पालाना जेङदोङखे, स्वर्गको माहा पबित्तरो थामेता परमेस्वरकोता हानिका दामा माहेअ्नाङ।

⁹ इङको बासा हिकाको लाङ कोठाते ख्रिस्टको कारनहोइ पुरा जेङका काथागेलाइको एनोङ उधाहरन खिनिङ जेङका हि, हाइपालिपानु परमेस्वरको आराधाना पाकालाइको चढाइका भेति कालाउ भोगगेलाइ पाहासो द्‍याङगेलाइको बुद्दि कालाउ ह्रदय सुद्द जेङलि मादोखे।

¹⁰ हाइपालिपानु इम्बालाइको बाहारको जिबनको नियमगेलाइता खिनिङ आधारित हि, जिसिकाङ चाका-आम्का कालाउ खाल-खाल्को मुन्धुम जेसाङ चिउलि। एसापा परमेस्वर द्‍याङगेलाइ दोफा नावा कारार जिङतेङ खिनिङ या पुरा हिलि आवस्यक हिघाहि।

ख्रिस्टको हिति

¹¹ ओदोङ भाअ्सिङ येसु ख्रिस्ट एला इता हिका गोताङ रेम्का काथागेलाइ ह्रुता प्राधान पुजारि जेङका हि, वा स्वर्गता हिका झन माहान कालाउ सिद्द खोपाराता दुल्का हि। जेदोङ द्‍याङगेलाइहोइ बानाइका माको कालाउ इदोइ सुमिङको बुङ माको।

¹² ख्रिस्ट स्वर्गता हिका माहा पबित्तरो थामेता जेलाउलाउको भाअ्सिङ एखेताङ दुल्हि, वा ताइमि दोफा बोका मेसा कालाउ बाच्छागेलाइको हिति चुम्पुतेङ लिता मादुल्हि। भरु वाको बलि वाको ताइकोङ हिति हिघाहि। कालाउ वा दोङ इदोइ पाहासो केलाइहेङ पापसो जेलाउलाउको भाअ्सिङ लाअ्पाहि।

¹³ मोसाको व्यवस्थाको मुन्धुम आन्सार आसुद्द द्‍याङगेलाइ परमेस्वरको आराधाना पालि योग्यको माजेङखे, कालाउ उङको द्‍याङगेलाइ ह्रुता जेसापा बोका मेसा कालाउ साँढे पियाको हिति कालाउ मेता मेहोइ ओपाका बाछाको बुसुरि उलि दोतेङ इम्बालाइ सुद्द मानिघाखे।

¹⁴ या सोचिसु कि सिका भारि चुम्पुका कामगेलाइसो ख्रिस्टको हितिहोइ केलाइको ह्रदयहेङ ते झन हेथे हेन्जा सुद्द बानाइलि दोखे, कालाउकि केलाइ सिन्हुका परमेस्वरको आराधाना पालि द्वाको, हाइपालिपानु आनान्त आत्माको सरबुङ पाहासो ताइमिहेङ केलाइको पापको भाअ्सिङ एमि सिद्द भोगको रुपता परमेस्वरहेङ चाढाइहि।

¹⁵ ओदोङ भाअ्सिङ ख्रिस्ट द्‍याङगेलाइ दोफा नावा कारार धेउका हि, कालाउकि परमेस्वर पाहासो काइन्हाका द्‍याङगेलाइ वाको पाका प्रतिग्यासो आनान्तको भाअ्सिङ आसिस निङलि द्वाको। एसा बुङ जेङलि द्वाङ कि, हाइपालिपानु इम्बालाइ लाङ कारारता हिलाउ पाका पापको दन्डसो स्वतन्तरो पालिको भाअ्सिङ ख्रिस्ट सिहि।

¹⁶ उधारनको भाअ्सिङ, केलाइ गिनाखे कि हिदोइ बुङ द्‍याङ सिलि खान्तेङ लाम्फा ताइको सम्पति हासुहेङ पिलि दोअ्तेङ इच्छा पात्तारा लेखेखे पानु, वाको इच्छा पात्तारा आन्सार जेङलिको भाअ्सिङ इच्छा पात्तारा लेखेका द्‍याङ सितेङ खिनिङ उङको द्‍याङको सम्पति होक निङलि दोअ्खे।

¹⁷ हाइपालिपानु सम्पतिको ग्रिहि बान्चिपा भरि इङको इच्छा पात्ताराको हिदोइ बुङ महत्व माजेङखे, जेलाउ उङको द्‍याङ सितेङ हानावा कालाउ खिनिङ इङको इच्छा पात्ताराको महत्व जेङखे।

¹⁸ ओदोङ भाअ्सिङ लाङ कारार बुङ हिति माकोसिङ सुरु जेङलि मादोहि, जेदोङहोइ सिका तिङपाखे।

¹⁹ लाम्फा मोसाको व्यवस्थाता लेखेका गोताङ आग्यागेलाइ द्‍याङगेलाइहेङ हिङपाहि। कालाउ न्हुसो वा बाछाको कालाउ बोका मेसागेलाइको हिति चुम्पुतेङ चि दोफा मिसालाइहि, कालाउ न्हुसो वा इ:का उन हिसपको सिङको दालेङता धेउहि कालाउ हितिता चोबिहि कालाउ व्यवस्थाको कितापता कालाउ गोताङ द्‍याङगेलाइता इङको हिति सिरकाइहि।

²⁰ कालाउ मोसा इदोइ पाकाताङ पालाउ, वा द्‍याङगेलाइहेङ दोअ्हि, “इदोइ हितिहोइ परमेस्वरको कारार पाक्का पाखे, जेदोङ परमेस्वर नेलाइहेङ बचन केम्सु दोअ्तेङ आग्या पिका हिघाहि।”

²¹ एसाङ पातेङ मोसा पबित्तरो थामे ह्रुता कालाउ आराधानाता चालाइका गोताङ भान्डा-कुन्डागेलाइ ह्रुता इन्सिकाङ पातेङ हिति सिरकाइहि।

²² कालाउ मोसाको व्यवस्था दोअ्खे कि माकुलाउ बुङ गोताङ आमेनेगेलाइ हितिहोइ सिरकाइतेङ सुद्द बानाइलि गोइखे, कालाउ हिति माचढाइसिङ हिदोइ बुङ पाप स्यामा जेङलि मादोखे, भरु जेदोङहोइ सिका तिङपाखे।

²³ ओदोङ भाअ्सिङ इङको खोपाराहेङ कालाउ इङकोता हिका गोताङ आमेनेगेलाइहेङ गुपुसको भोगको मुन्धुम आन्सार चोख्याइलि गोइका आवस्यक हिघाहि, कालाउ इदोङ स्वर्गिय आमेनेगेलाइको नक्कल खिनिङ हि, भरु स्वर्गता हिका आमेनेगेलाइ मुन्धुम आन्सार चोख्याइलिको भाअ्सिङ गुपुसगेलाइको हिति खान्तेङ आझाइ झन रेम्का भोगको खाचो हिघाहि।

²⁴ ओदोङ भाअ्सिङ येसु ख्रिस्ट द्‍याङगेलाइको बानाइका इङको खोपाराता मान्हेहि, हाइपालिपानु जेदोङ चाहि खास काथाको नक्कल खिनिङ हि, कालाउ वाते सकलि थामे स्वर्गता हानिहि, कालाउकि वा केलाइको फाइदाको भाअ्सिङ परमेस्वरको आगाता हानिलि द्वाको।

^25-26 प्राधान पुजारि बासार किपाङ गुपुसको भोगको हिति चुम्तेङ माहा पबित्तरो थामेता हानिघाखे, कालाउ ख्रिस्ट घुरि-घुरि ताइमिङ भोग जेङलि मान्हेहि। जेसापा वा एन्सा पालि गोइनु, वा दोङ सुमिङको सिरजाइकासोङ घुरि-घुरि दुख भोगिलि गोइधावा, भरु इदोइ आखिरि दिनागेलाइता, ताइको भोग पाहासो पापको सरबुङ जेलाउलाउको भाअ्सिङ मोअ्पालि ख्रिस्ट एखेताङ झाराङको भाअ्सिङ लोहि।

²⁷ झाराङ द्‍याङ एखे सिलि गोयाङ, कालाउ सितेङ परमेस्वर गोताङ द्‍याङको न्याय पाङ।

²⁸ एसा पासोङ हेन्जा द्‍याङगेलाइको पाप ल्होपातेङ चुम्पुलिको भाअ्सिङ ख्रिस्ट ताइमिहेङ एखे भोग पिहि, कालाउ वा आरोङ ल्वाङ, इङको बेला ताइमिहेङ पापको भोगको भाअ्सिङ माको, भरु वाको लोका दामा खाङतेङ हिकालाइहेङ बान्चिपालिको भाअ्सिङ ल्वाङ।