हिब्रु 7 - Dhimal NT

प्राधान पुजारि मल्किसेदेक

^1-3 इदोङ मल्किसेदेक सालोम सहरको राजा कालाउ सर्बोच्च परमेस्वरको प्राधान पुजारि हिघाहि। इङको मिङको माने “न्यायसो सासन पाका राजा” हि, कालाउ सालेम राजाको माने “सान्तिको राजा” हि। धर्मसास्तरता वाको आबा, वाको आमाइ कालाउ पुर्खागेलाइ माकुनु वाको जोलोम माकुनु वाको सिकाको बारेता हिदोइ बुङ काथा लेखेका मान्थु। वा जेलाउलाउको भाअ्सिङ पुजारि हि। ओदोङ भाअ्सिङ वा परमेस्वरको चान भाइका हि। जेलाउ आब्राहाम धुमसो द्‍यामि राजाहेङ सेअ्तेङ घुरितेङ लोदोङघाखे, ओदोङ बेला दामाता मल्किसेदेक आब्राहामहेङ दुसुहि कालाउ आब्राहामहेङ आसिरबाद पिहि। कालाउ आब्राहाम धुमसो जितितेङ निङका गोताङ आमेनेको दसाङसा पिहि।

⁴ एला बिचार पासु, मल्किसेदेक हिसिका माहान वाबाल हिघाहि, जाइहेङ केलाइको पुर्खा आब्राहाम धुम पातेङ जितिकाको निङका गोताङ आमेनेको दसाङसा को भाग पिहि।

⁵ मोसाको व्यवस्था धिरपाखे कि लेबि हारागुटियाको पुजारिगेलाइ, जाइ पुजारि जेङखे वा एस्राएल सारभिको ताइको द्‍याङगेलाइसो दसाङसा को भाग ह्रुलि गोइखे। कालाउ उङको पुजारिगेलाइ कालाउ आरु द्‍याङगेलाइ वाको दादा-ओनेगेलाइ भाइका दोङ हि, हाइपालिपानु इम्बालाइ झाराङ आब्राहामकोङ सान्तानगेलाइ दोङ हि।

⁶ कालाउ उङको चाहि मल्किसेदेक, जाइ लेबि हारागुटियाको बुङ मान्थुघाखे, कालाउ बुङ वा आब्राहामसो दसाङसा ह्रुका हि। कालाउ परमेस्वरको प्रतिग्या निङका आब्राहाम हिलाउ बुङ मल्किसेदेक आब्राहामहेङ आसिरबाद पिहि।

⁷ कालाउ केलाइ इदोइ पक्का गिनाखे कि आसिस पिका, आसिस निङका खान्तेङ बार्का हिखे।

⁸ एसापा दसाङसा निङका पुजारि द्‍याङगेलाइ हि जाइ सितेङ हानिका, कालाउ आब्राहामसो दसाङसा निङका मल्किसेदेक जेलाउ बुङ सिन्हुका हि, जेसाङ धर्मसास्तरता लेखेका हि।

^9-10 द्‍याङगेलाइसो दसाङसा को भाग ह्रुका लेबि आब्राहामको हारागुटिया हिघाहि, ओदोङ भाअ्सिङ जेलाउ आब्राहाम मल्किसेदेकहेङ भेतिहि कालाउ वासेहेङ दसाङसा पिहि, कालाउ केलाइ इदोइ दोअ्लि द्वाङ कि लेबि बुङ मल्किसेदेकहेङ आब्राहामसो दसाङसा पिका हिघाखे।

¹¹ द्‍याङगेलाइहेङ पुजारिगेलाइको चलनको आधारता व्यवस्था पिका हिघाखे, जाइ हारुनको हारागुटियासो लेबि कुलको हिघाहि, कालाउ इम्बालाइ इङको चलन पाहासो सिद्द जेङलि मादोहि। ओदोङ भाअ्सिङ भेनेङ पुजारि लोलि आवस्यक हिघाहि, कालाउ उङको पुजारि हारुन भाइका माको भरु मल्किसेदेक भाइकाङ हिलि गोइधाङ।

¹² हाइपालिपानु जेलाउ पुजारि पद फेरेखे, कालाउ व्यवस्था बुङ फेरेलि दोङ गोइखे।

¹³ केलाइ इदोइ काथा ख्रिस्टको बारेता दोअ्तेङ हिनाहि, जाइ भेनेङ कुलको हिघाहि। इङको कुलसो हासु बुङ हेलाउ बुङ बेदिता पुजारिको रुपता सेवा पाका मान्थुघाखे।

¹⁴ हाइपालिपानु इदोइ झाराङहेङ थाहा हि कि, केलाइको प्रभु येसु यहुदाको हारागुटिया हि, कालाउ मोसा यहुदाको हिदोइ बुङ हारागुटिया पुजारि जेङका काथाको बारेता हाइ दोङ मादोअ्हि कालाउ यहुदाको हिदोइ बुङ हारागुटिया हेलाउ बुङ पुजारि जेङका मान्थु।

मल्किसेदेक कोनिङ भेनेङ पुजारि

¹⁵ का हाइ काथा दोअ्तेङ हिघा दोअ्तेङ एला नेलाइ झालाफालापा गिस्वाना कि मोसाको व्यवस्थाता पुजारिगेलाइ लाम्फाङ दोङ फेरिलि दोका हि, हाइपालिपानु भेनेङ पुजारि लोका हि, कालाउ वा मल्किसेदेक भाइकाङ हि।

¹⁶ येसु लेबि कुलको हिनाङ पुजारि जेङका माको, भरु वाते पुजारि जेङलि व्यवस्थाता लेखेका जेदोङ हि इङको काम पुरा पानाङ पुजारि जेङहि।

¹⁷ हाइपालिपानु धर्मसास्तरता परमेस्वर वाको बारेता साक्सि पिका हि, मल्किसेदेक प्राधान पुजारि भाइपा वा बुङ जेलाउलाउको भाअ्सिङ प्राधान पुजारि जेङका हि।

¹⁸ हाइपालिपानु पुर्ना व्यवस्था हाइ दोङ पालि मादोका कालाउ काम मालागिका जेङनाङ खारेज पाका हि।

¹⁹ हाइपालिपानु मोसाको व्यवस्थाहोइ ते हाइ दोङ सिद्द पालि मादोहि, कालाउ केलाइ दोफा एमि बार्का आसल आस हि, कालाउ केलाइको भाअ्सिङ इङको आस येसु ख्रिस्ट दोङ हि। जाइ केलाइहेङ परमेस्वरको भेरपाङ थुका पापुखे।

²⁰ कालाउ परमेस्वर येसु ख्रिस्टहेङ केरा चापातेङ पुजारि बानाइका हि।

²¹ कालाउ लेबिको हारागुटियागेलाइहेङ चाहि परमेस्वर केरा चापातेङ पुजारि बानाइका मान्थुघाहि, भरु येसु ख्रिस्ट चाहि केरा चातेङ पुजारि जेङहि, कालाउ वाको बिसोइता परमेस्वर दोअ्खे, “का परमेस्वरसो केरा चाका हिघा, ओदोङ भाअ्सिङ का ताइको मन हेलाउ बुङ माबदलियाङका, कालाउ नाअ् जेलाउलाउको भाअ्सिङ पुजारि हिना।”

²² ओदोङ भाअ्सिङ येसु दोङ केलाइहेङ एनोङ उत्तम कारार पुरा पालि पाक्का भोरोसा पिका हि।

²³ येसु पुजारि जेङका भेनेङ फाइदा चाहि लाम्फाको पुजारिगेलाइ ताइको काम लागातार पालि मादोहि, हाइपालिपानु इम्बालाइ झाराङ सितेङ हानिहि। ओदोङ भाअ्सिङ लाम्फाको पुजारिगेलाइको सङख्या हेन्जाङ जेङका हिघाहि।

²⁴ कालाउ येसु आनान्तको हिकानाङ वा जेलाउलाउको भाअ्सिङ पुजारि ह्याङ।

²⁵ ओदोङ भाअ्सिङ येसु पाहासो परमेस्वरको भेरपा लोकालाइहेङ वा जेलाउ बुङ उद्दार पालि द्वाङ, हाइपालिपानु इम्बालाइको भाअ्सिङ मध्येस्ताको प्रार्थाना चढाइलि वा जेलाउ बुङ सिन्हुतेङ हिखे।

²⁶ हाइपालिपानु येसु ख्रिस्ट केलाइहेङ गोइका प्राधान पुजारि राजा हिका हि। वा पबित्तरो, मादुसिका, सुद्द हि। कालाउ परमेस्वर वासेहेङ पापि द्‍याङगेलाइसो लाअ्पातेङ झाराङ खान्तेङ ह्रुता स्वर्गता ताअ्हि।

²⁷ कालाउ हारुनको हारागुटियाको प्राधान पुजारिगेलाइ भाइपा लाम्फा ताइकोङ पापको भाअ्सिङ कालाउ न्हुसो द्‍याङगेलाइको पापको भाअ्सिङ येसु ख्रिस्ट दोङ दिनाङ-दिनाङ भोग चढाइतेङ हिलि मागोइखे। भरु येसु ताइमिहेङ द्‍याङगेलाइको पापको भाअ्सिङ भोगको रुपता आर्पन पातेङ वा इदोइ काम एखेताङ जेलाउलाउको भाअ्सिङ पुरा पाहि।

²⁸ हाइपालिपानु मोसाको व्यवस्थाहोइ ते कमजोर द्‍याङगेलाइहेङ प्राधान पुजारि नियुक्ति पाहि, कालाउ मोसाको व्यवस्था खान्तेङ न्हुसो लोका केरा चाकाहोइ परमेस्वरको चानहेङ प्राधान पुजारि नियुक्ति पाका हिघाहि। कालाउ वा जेलाउलाउको भाअ्सिङ सिद्द प्राधान पुजारि जेङका हि।