हिब्रु 6 - Dhimal NT

¹ ओदोङ भाअ्सिङ एला केलाइ ख्रिस्टको बारेता धिरका प्रार्थामिक सिक्स्याहेङ खिनिङ मानितेङ खाङधुरिता परिपक्का बानाइका सिक्स्या भारि लागियाइने, प्रार्थामिक सिक्स्याहेङ एनोङ बार्का जग भाइपा माकिताइने, हाइपालिपानु इङको सिक्स्या ते परमेस्वरता खाङधुरि पाका कालाउ पापमय कामसो पासताइ पापाका को बारेता खिनिङ हि, जाइहोइ सिका भारि चुम्पुखे।

² कालाउ हेन्जाङ खाल-खाल्को बप्तिस्ताको बारेता सिक्स्या, जेसाङ द्‍याङगेलाइ ह्रुता खुर ताअ्का, बिसेस पातेङ सिकालाइको सिन्चाल्का कालाउ आनान्त दन्ड भाइका काथागेलाइता खिनिङ हितेङ खाङधुरिको जग आरोङ योम्पाका सिक्स्या भारि लागितेङ माह्याइने।

³ का परमेस्वर नेलाइहेङ खाङधुरिता परिपक्का जेङका सिक्स्या प्याङका।

⁴ हाइपालिपानु जाइ ताइको खाङधुरि लाअ्खे इम्बालाइहेङ आरोङ पाप लाअ्पाका परिस्थिता चुमालि मादोखे। इम्बालाइ एखे परमेस्वरको सत्येताहेङ नाल्तेङ कालाउ स्वर्गसो बरदान निङहि कालाउ इम्बालाइ आरु दोफाङ पबित्तरो आत्मा निङका हि।

⁵ कालाउ इम्बालाइ आनुभब पाका हिघाहि कि, परमेस्वरसो लोका सन्‍देस रेम्का कालाउ इम्बालाइ भबिस्यता लोलि खाङका सोमोइको सरबुङको आनुभब पाका हिघाहि।

⁶ इम्बालाइहेङ आरोङ घुरिपातेङ चुमाका हिदोइ बुङ तरिका मान्थु, हाइपालिपानु या इम्बालाइ ताइमिङ आरोङ परमेस्वरको चान येसु ख्रिस्टहेङ क्रुसता तोइका भाइका हि, कालाउ बो द्‍याङगेलाइ ख्रिस्टको खिल्लि उराइपाखे।

⁷ रेम्का सिक्स्या ग्रहन पाका द्‍याङ मिलिङ भाइका हि, जेदोङता वाइ लोखे। जेसापा मिलिङ रेम्का हि पानु, इङको किसानहेङ रेम्का बालि पिखे कालाउ इङकोता परमेस्वरको आसिस हिखे।

⁸ बो द्‍याङगेलाइ इङको मिलिङ भाइकाङ हि, जाइ चुइ कालाउ चुइ हिका झुन्जिगेलाइ खिनिङ योपाहि पानु कालाउ इङको मिलिङ बेकारको हिखे। इन्सिका मिलिङता ते परमेस्वरको साराप परिलि द्वाङ कालाउ इङको मेहोइ नासाखे।

⁹ आनाउ सानाइतिगेलाइ, केलाइ इदोइ प्रकारहोइ काथा पालाउ बुङ, केलाइ बास्ताबता खाङधुरि मापानाखे कि, या नेलाइको भाअ्सिङ हि केलाइ खाङधुरि पानाखे कि नेलाइ आसल काम पासुखेना, जेदोङ काथा मुक्ति दोफाङ लोखे।

¹⁰ जेसाङ नेलाइ आसल कामगेलाइ पाका हिसुना कालाउ एला परमेस्वरको मिङता परमेस्वरको द्‍याङगेलाइको भाअ्सिङ प्रेम दोफाङ सेवाको काम पाकाताङ हिसुना, परमेस्वर नेलाइहेङ मानिल्याङ। हाइपालिपानु वा धर्मि हि।

^11-12 केलाइको बार्का चाहाना इदोइ हि कि, नेलाइ बान्चिपा भरि दाया कालाउ मायारुको कामगेलाइ पातेङ हिसु, इदोइ निसित पालिको भाअ्सिङ कि, नेलाइको आस पाका काथा पुरा जेनावा। कालाउ नेलाइ आल्सि माजेङस्वाना। भरु नेलाइ इङको द्‍याङगेलाइको उधारन आनुसरन पास्वाना, जाइ खाङधुरि कालाउ ह्रुमतेङ हिका कारन नेलाइ परमेस्वरको प्रतिग्या निङस्वाना।

परमेस्वरको प्रतिग्याको निसित

¹³ परमेस्वर आब्राहाम दोफा प्रतिग्या पालाउ वा ताइको केरा चाहि, हाइपालिपानु वा खान्तेङ बार्का आरु हासु बुङ मान्थु, जाइको मिङ ह्रुतेङ वा केरा चालि दोअ्धावा।

¹⁴ परमेस्वर दोअ्हि, “का नासेहेङ निसित आसिस प्याङका, कालाउ नाङको हारागुटियाहेङ बाढे पाप्याङका।”

¹⁵ आब्राहाम सुकापा ह्रुम्तेङ परमेस्वरको पाका प्रतिग्याको काथा पुरा पालि ह्रुम्हि कालाउ वा इङको निङहि।

¹⁶ जेलाउ केरा चालाउ द्‍याङ ताइमि खान्तेङ बार्काको मिङ ह्रुखे, कालाउ केरा चाकाहोइ प्रामानित पाखे कि, इम्बालाइ जेदोङ दोअ्खे इङको सत्ये हि, कालाउ इङकोहोइ गोताङ काथा पोसुका दोपाखे।

¹⁷ ओदोङ भाअ्सिङ परमेस्वर बुङ केरा चाहि, कि इदोइ पाहासो वा प्रतिग्या निङका द्‍याङगेलाइहेङ झालाफालापा तिङपालि भोघाखे कि वा ताइको प्रतिग्या पुरा पाङ।

¹⁸ कालाउ इदोइ न्हेनोङ काथागेलाइ हि: वाको प्रतिग्या कालाउ वाको केरा चाका, जाइ हेलाउ बुङ फेरिलि मादोअ्खे, हाइपालिपानु परमेस्वर हेलाउ बुङ धाताइलि माद्वाङ। ओदोङ भाअ्सिङ जाइ केलाइ परमेस्वरको भेरपा सुरुक्सिया निङलिको भाअ्सिङ लोका हिन्हाहि, कालाउ जेदोङ आस वा केलाइहेङ पिका हि, इङकोहेङ हेन्जाङ साहाससोङ थामितेङ ताअ्का हिनाहि।

¹⁹ केलाइको दोफा हिका इदोइ आस बल्लियाका हि कालाउ यासेहेङ हेङगालाइलि मादोअ्खे, कालाउ या केलाइहेङ परमेस्वरसो दुरे चुम्पुलि मादोखे, भरु या केलाइहेङ परमेस्वरको मुन्दिर लिताको परम पबित्तरो थामेता चुमाखे।

²⁰ केलाइको भाअ्सिङ येसु केलाइ खान्तेङ लाम्फाङ दोङ इङको स्वर्गको थामेता हानितेङ योम्का हि। मल्किसेदेक प्राधान पुजारि भाइपा वा बुङ जेलाउलाउको भाअ्सिङ प्राधान पुजारि जेङका हि।