हिब्रु 4 - Dhimal NT

परमेस्वरको जनगेलाइहेङ माइसाका दिना

¹ हाइपालिपानु केलाइहेङ परमेस्वर माइसाका थामेता हानाना दोअ्तेङ पाका प्रतिग्या एला बुङ हि। ओदोङ भाअ्सिङ चङख हिसु, कालाउकि माइसाका थामेता नेलाइ मध्ये दुल्लि मानिङका हासु बुङ माह्याको।

² जेसाङ केलाइ बुङ येसु ख्रिस्टको बारेता सुसमाचार हिङका हिन्हाहि। इन्सिकाङ एस्राएल सारभिको द्‍याङगेलाइ बुङ परमेस्वरको माइसाका थामेता दुल्का “सुसमाचार” हिङका हिघाहि, कालाउ बुङ इम्बालाइ इङकोता खाङधुरि मापाहि। ओदोङ भाअ्सिङ इङको सन्‍देस इम्बालाइको भाअ्सिङ हाइ दोङ काम मालागिका जेङहि।

³ कालाउ केलाइ परमेस्वरको दोअ्का काथाता खाङधुरि पाकालाइ माइसाका थामेता दुलाङ। कालाउ बो द्‍याङगेलाइको भाअ्सिङ बुङ परमेस्वर दोअ्का हि, “ओदोङ भाअ्सिङ का ताइको चेरचुङता एसापा केरा चाघा, काङको माइसाका थामेता इम्बालाइ हेलाउ बुङ मादुल्लाङ।” कालाउ केलाइ गिनाखे इङको माइसाका थामे जेदोङ इन्ता एला हि, इङको सुमिङ सिरजाइन्हाका सोङ इङको इन्ताङ हिघाहि।

⁴ हाइपालिपानु आथार दिनाको बारेता परमेस्वर धर्मसास्तरता एसापा दोअ्का हि, “परमेस्वर गोताङ कामगेलाइसो आथार दिनाता माइसा चाहि।”

⁵ केलाइ बुङ इदोइ पढेनाखे, कि वा आरोङ दोअ्हि नेलाइ माइसाका थामेता हेलाउ बुङ दुल्लि मानिङस्वाना।

⁶ लाम्फाङ एस्राएल सारभिको द्‍याङगेलाइ जाइ सुसमाचार हिङहि, ओबालाइ काङको आग्या केम्लि माकिनाङ माइसाका थामेता दुल्लि मादोहि। कालाउ बुङ इङको माइसाका थामेता दुल्लिको भाअ्सिङ आझाइ बुङ इम्बालाइहेङ माउका हि।

⁷ ओदोङ भाअ्सिङ परमेस्वर वाको माइसाका थामेता दुल्लिको भाअ्सिङ आरोङ भेनेङ बिसेस सोमोइ तोकिहि, कालाउ इङको सोमोइ चाहि “नानि” दोङ हि। हेन्जाङ बासार न्हुसो केलाइको पुर्खागेलाइ परमेस्वरको बिरोध पाहि, वा लाम्फाङ लेखेका काथा राजा दाउदहेङ दोअ्लि लागाइहि, “नानि नेलाइ परमेस्वरको गाला हिङसुन्हा पानु वाको आग्या किलि नेलाइ इन्कार मापासु।”

⁸ केलाइ या बुङ गिनाखे कि परमेस्वरको प्रतिग्या पाका माइसाका थामे कानान सारभि माको, जेता केलाइको पुर्खागेलाइहेङ हानिलिको भाअ्सिङ यहोसु आगुवाइ पाका हिघाहि। जेसापा इङको थामे कानान सारभि नुते परमेस्वर न्हुसो सो भेनेङ दिनाको बिसोइता मादोधावा।

⁹ परमेस्वरको द्‍याङगेलाइको भाअ्सिङ एला बुङ इङको इसिका थामे हि, जेता इम्बालाइ पुरा रुपहोइ माइसालि द्वावा। जेसाङ परमेस्वर न्हि दिनाता काम पाकासो माइसा चाका कोनिङ इम्बालाइ बुङ माइसा चाङ।

¹⁰ हाइपालिपानु परमेस्वर ताइको काम पालि दोतेङ न्हुसो माइसा चाहि। कालाउ इङको झाराङ दोफा इन्सिकाङ हिखे, जाइ परमेस्वर दोफा माइसा चाकाता दुल्खे। इम्बालाइ ताइको काम पालि दोतेङ माइसा चाखे।

¹¹ ओदोङ भाअ्सिङ केलाइ झाराङ इङको माइसा चाका थामेता दुल्लि कोसिस पाइने, कालाउ हासु बुङ परमेस्वरको आग्या केम्लि इन्कार पाका द्‍याङगेलाइहेङ नामुना मा-मान्याको। कालाउ खिनिङ केलाइ इङको माइसा चाका थामेता दुल्लि द्वाङ।

¹² परमेस्वरको बचन ते काम पातेङ हिका कालाउ हुसि हिका हि, कालाउ वाको बचन न्हेपाहाङ धार हिका कात्ति खान्तेङ बुङ चुका हि। इङकोहोइ लिता हानितेङ प्रान कालाउ आत्माहेङ खेङन्हा पापिखे। इङकोहोइ जोरनि कालाउ हारा सुधाङ पाल्खे। इङको परमेस्वरको बचनहोइ द्‍याङगेलाइको ह्रदयको बिचार कालाउ इच्छाहेङ झोअ्तेङ जाचिखे।

¹³ परमेस्वरको नजरता हिदोइ बुङ द्‍याङ म्होन्हाका मान्थु। कालाउ वा दोङ हि, जाइहेङ केलाइको जिबन भरि पाका गोताङ कामको लेखाजोखा पिलि गोइखे, हाइपालिपानु वाको आगाता गोताङ काथा झालाफालापा कालाउ धाइधाइपा हि।

येसु माहान प्रधान पुजारि

¹⁴ ओदोङ भाअ्सिङ स्वर्गता हानिका परमेस्वरको चान येसु दोङ हि, वा केलाइको माहान प्राधान पुजारि हि। ओदोङ भाअ्सिङ केलाइ गोताङ द्‍याङगेलाइको आगाता ग्रहन पाका खाङधुरिहेङ थामितेङ बल्लियाका जेनाइने।

¹⁵ केलाइ खाङधुरिहेङ थामितेङ ताअ्ताइने हाइपालिपानु केलाइको प्राधान पुजारि जाइ येसु ख्रिस्ट हि, वा केलाइको गोताङ कमजोरिगेलाइ बुझिपिखे, केलाइहेङ भाइपा साइतान येसुहेङ गोताङ काथाता जाचिहि, कालाउ बुङ वा हिदोइ बुङ पाप मापाहि।

¹⁶ ओदोङ भाअ्सिङ साहाससोङ केलाइ परमेस्वरको आगाता हानाइने, जाइ आनुग्रहहोइ भरिका हि। इन्ता केलाइ खाचोता परिका बेला दायाका कालाउ आनुग्रह निनाङ।