हिब्रु 2 - Dhimal NT

चेताउनि

¹ ओदोङ भाअ्सिङ केलाइ धिरका काथागेलाइ केम्लिको भाअ्सिङ हेन्जा ध्यान पिलि गोइखे। कालाउकि केलाइ सत्येको दामासो बहकितेङ माअ्न्हाङ।

² परमेस्वर स्वर्गदुतगेलाइ पाहासो दोअ्का व्यवास्था जेलाउ बुङ सत्ये साबित जेङका हि, जाइ वाको आनुसरन मापाहि माकुनु आग्या माकेम्हि, वा परमेस्वरसो निङलि गोइका दन्ड निङहि।

³ ओदोङ भाअ्सिङ पाक्का दोङ केलाइ बुङ साजाइ निनाङ, जेसापा इङको माहान मुक्तिहेङ वास्ता मापान्हाहि पानु। प्रभु येसु दोङ ताइमिङ लाम्फा इदोइ मुक्तिको बारेता केलाइहेङ दोअ्हि, कालाउ प्रभुहेङ हिङका चात्यागेलाइ इदोइ सत्ये हि दोअ्तेङ केलाइहेङ प्रमानित पिहि।

⁴ कालाउ परमेस्वर ताइको इच्छा आन्सार इदोइ सन्देसहेङ चिन्हागेलाइ कालाउ आचाम्माको कामगेलाइ पाहासो कालाउ हेन्जाङ खाल-खाल्को सरबुङसाइका कामगेलाइ पातेङ कालाउ पबित्तरो आत्माको बरदानगेलाइ पितेङ सत्ये साबित पाहि।

ख्रिस्ट मुक्ति दाता

⁵ केलाइ काथा पाकाताङ लोका इङको सुमिङहेङ परमेस्वर स्वर्गदुतगेलाइको आधिनता माताहि, भरु चानको आधिनता ताअ्हि।

⁶ धर्मसास्तरता हिदोइ बुङ एनोङ थामेता हासु बुङ परमेस्वरहेङ एसा दोअ्तेङ साक्सि पिका हि, हिदोइ बुङ द्‍याङ वाको बारेता वास्ता पालि योग्य मान्थु, कालाउ उङको द्‍याङ वाको वास्ता पालि योग्यको मान्थु।

⁷ नाअ् परमेस्वर आले सोमोइको भाअ्सिङ द्‍याङगेलाइहेङ स्वर्गदुतगेलाइ खान्तेङ आतुइसा सरबुङसाइका बानाइन्हा, कालाउ नाअ् वासेहेङ राजा कोनिङ महिमा कालाउ आदार पिन्हा।

⁸ नाअ् गोताङ काथा वाकोङ आधिनता ताअ्पिन्हा, कालाउकि वा गोताङ आमेने ह्रुता सासन पालि द्वाको। परमेस्वर गोताङ काथागेलाइ द्‍याङगेलाइको आधिनता ताअ्पिहि। याको माने हि कि, इसिका हिदोइ बुङ काथा मान्थु, जेदोङ वाको आधिनता मान्थु। कालाउ बर्तमान सोमोइता केलाइ खाङलि द्वाङ कि, गोताङ काथा द्‍याङको आधिनता मान्थु।

⁹ कालाउ सत्ये इदोइ दोङ हि कि, आले सोमोइको भाअ्सिङ येसु ख्रिस्ट स्वर्गदुतगेलाइ खान्तेङ आतुइसा म्हुइका जेङपिहि, कालाउ परमेस्वरको आनुग्रहहोइ येसु सुमिङको गोताङ द्‍याङगेलाइको भाअ्सिङ कस्ट भोगिहि कालाउ सिहि। ओदोङ भाअ्सिङ परमेस्वर वासेहेङ महिमा कालाउ आदार पिहि।

¹⁰ परमेस्वर गोताङ आनेमाने सिरजाइहि, कालाउ गोताङ आनेमाने वाको दोङ हि। ओदोङ भाअ्सिङ हेन्जा द्‍याङगेलाइहेङ वाकोङ महिमाता झ्वाइलि चुम्पुलिको भाअ्सिङ परमेस्वर निर्नय पाहि, कि प्रभु येसुहेङ दुख भोगिकासो सिद्द पालि उचित हि। हाइपालिपानु येसु दोङ द्‍याङगेलाइहेङ मुक्ति पिखे।

¹¹ हाइपालिपानु पापसो सुद्द बानाइका कालाउ पापसो सुद्द जेङकालाइ झाराङको आबा परमेस्वर, वा खिनिङ एमि हि, ओदोङ भाअ्सिङ येसु इम्बालाइहेङ ताइको ओने दोअ्लि मालेदेरखे।

¹² कालाउ ख्रिस्ट परमेस्वरहेङ एसा दोअ्खे: “का ताइको द्‍याङगेलाइहेङ नाअ् दोङ काङको भाअ्सिङ पाका रेम्का काम दोअ्ताङका, इम्बालाइको सभाता आराधाना पालिको भाअ्सिङ जोम्लाउ का नाङको बाखानाइ पाङका।”

¹³ कालाउ आरोङ वा दोअ्खे, का वाको ह्रुता काङको भोरोसा ताअ्ताङका कालाउ आरोङ वा दोअ्खे, “परमेस्वर कासेहेङ पिका द्‍याङगेलाइ दोफा इता हिघा, एबालाइ काङको चान-चामिन्दिगेलाइ भाइका दोङ हि।”

¹⁴ हाइपालिपानु परमेस्वर जाइहेङ चान-चामिन्दिगेलाइ दोअ्हि, इम्बालाइ द्‍याङगेलाइ हि, येसु ख्रिस्ट गोताङ खाल्कोहोइ केलाइ भाइकाङ द्‍याङ जेङतेङ लोहि। कालाउकि वाको सिका पाहासो, सिका ह्रुता खाबारा हिका साइतानहेङ नासा पालि द्वाको।

¹⁵ कालाउ एसापा सिलि गोइखे दोअ्का थितेङ गोताङ सोमोइ बान्धाइतिगेलाइ कोनिङ जेङतेङ बान्चिका द्‍याङगेलाइहेङ येसु मुक्ति पितेङ लाअ्पाहि।

¹⁶ हाइपालिपानु जातिङकोङ प्रभु येसु स्वर्गदुतगेलाइहेङ माको, भरु आब्राहामको हारागुटियागेलाइको वास्ता पाखे।

¹⁷ ओदोङ भाअ्सिङ वा गोताङ काथाता बो द्‍याङगेलाइ भाइपा जेङलि गोइहि, कालाउकि वा परमेस्वरको आगाता केलाइको दायालु कालाउ भर परिका प्राधान पुजारि जेङलि द्वाको। कालाउ द्‍याङगेलाइको पाप ल्होपालिको भाअ्सिङ वा दोङ ताइमिहेङ बलिको रुपता आर्पन पालि द्वाको।

¹⁸ हाइपालिपानु वा कस्ट कालाउ जाच भोगिहि, वा दोङ जाचता परिका गोताङ द्‍याङगेलाइहेङ साघाइलि गिखे।