हिब्रु 12 - Dhimal NT

परमेस्वरको साजाइ

¹ केलाइको कोरपाहाङ इदोइ द्‍याङगेलाइको खाङधुरिको साक्सि नुगामारि हि, ओदोङ भाअ्सिङ लोसु, केलाइको दामाता आइ परिका बाधागेलाइ कालाउ केलाइहेङ रिम्तेङ ताअ्का पापगेलाइहेङ केलाइ पान्छाइने कालाउ केलाइको आगाता हिका धाअ्का काम धैर्य सोङ ह्रुम्तेङ धाअ्ताइने।

² केलाइको खाङधुरि सुरु पाका कालाउ सिद्द बानाइका येसुहेङ खाङतेङ ह्याइने, वा दोङ भबिस्यता निङका आनान्दको भाअ्सिङ आपामानहेङ हाइ दोङ भाइपा माथानिसिङ क्रुसको कस्ट भोगिहि कालाउ परमेस्वरको सिङहासनको दाम्पाहा भारि झाउका साम्मानको थामेता बिराजमान हितेङ हि।

³ ओदोङ भाअ्सिङ येसुको उधारनको बारेता बिचार पासु, वासेहेङ मान्दा माताका पापि द्‍याङगेलाइसो वा दोङ ओसारापा बिरोध हेसा सहिहि वाला, ओदोङ भाअ्सिङ नेलाइ माइतेङ हारेस माचासु।

⁴ नेलाइ पापको बिरोधता पाका सङघर्सता, द्‍याङगेलाइ नेलाइहेङ सेअ्का आबास्था थेकापा ते सहिलि गोइका मान्थु।

⁵ परमेस्वरको चान-चामिन्दिगेलाइ कोनिङ नेलाइहेङ एसापा परमेस्वरसो हाउसाइका सब्दगेलाइ दोअ्का नेलाइ निल्सुन्हा। “हे काङको चान, परमप्रभु नाङको पाका गल्ति तिङपा पिहि पानु ध्यान पि, कालाउ वा नेलाइहेङ नाइलाउ बुङ सुइकारसु।”

⁶ हाइपालिपानु जाइहेङ परमप्रभु प्रेम पाखे वासेहेङ, वाको पाका गोल्ति बुङ तिङपाखे, “कालाउ ताइको चानको रुपता ग्रहन पाकालाइहेङ वा साजाइ बुङ पिखे।”

⁷ काङकोङ आबा दोङ साजाइ पिका दोअ्का फोम पातेङ नेलाइ दुख सहिसु। परमेस्वर नेलाइहेङ चानहेङ भाइपाङ ब्याभार पाखे, हाइपालिपानु गोताङ आबा ताइको चान-चामिन्दिगेलाइहेङ ताइमि गोइका आन्सार काम पालि धिरपाखे।

⁸ कालाउ जेसापा झाराङ जोम्काता जेङका इङको आनुसासन नेलाइ निङका मान्थु सुन्हा पानुते नेलाइ ताइको आबाको हेलाउ बुङ खास चानगेलाइ माको, कालाउ नेलाइ बास्ताबता परमेस्वरको चान-चामिन्दिगेलाइ माको।

⁹ कालाउ केलाइको जिउको आबागेलाइ बुङ केलाइहेङ साजाइ पिहि, कालाउ केलाइ वाको आदार पान्हाहि। कालाउ केलाइ केलाइको स्वर्गिय आबाको झन हेथे हेन्जा आदार पालि गोइखे कालाउकि वा दोङ सुधार पाका बेला वासेहेङ हिङतेङ जेलाउलाउ बुङ को भाअ्सिङ सिन्हुतेङ हिलि द्वाइने।

¹⁰ हाइपालिपानु केलाइको जिउको आबागेलाइ ते इम्बालाइहेङ ठिक लागेका आन्सार आले दिना थेकापा केलाइहेङ आनुसासनता ताअ्हि, कालाउ परमेस्वर केलाइको भालाइको भाअ्सिङ केलाइहेङ साजाइ पिखे, कालाउकि वा केलाइहेङ ताइमि भाइपा पबित्तरो बानाइयाको।

¹¹ कालाउ केलाइहेङ आनुसासनता ताअ्का मन मापरिखे, भरु दुख पिका भाइका लागिखे, कालाउ ओदोङ कस्टगेलाइसो धिरलि दोतेङ न्हुसो इम्बालाइ सान्ति कालाउ धार्मिकता दोअ्का फल निनावा।

¹² ओदोङ भाअ्सिङ माइका खुरगेलाइ तोल्हेसु कालाउ लोकोबोकोका तिरुगेलाइ आरोङ बल्लियाका बानाइसु।

¹³ कालाउ इसो-उसो खाङलि खाङतेङ भरु सिधा दामाता तेतेङ ह्याइने, जाइ येसुको भेरपा हानिखे, कालाउकि केलाइ मध्ये आत्मिक रुपता हुइकालाइ दामा माआवाइयाको, भरु इम्बालाइको खाङधुरि बल्लियाका जेनाको।

परमेस्वरहेङ इन्कार मापाका चेताउनि

¹⁴ झाराङ द्‍याङगेलाइ दोफा सान्तिता हिलि कालाउ पबित्तरो जिबन जियाइतेङ हिका कोसिस पासु, पबित्तरो बिना हिदोइ बुङ द्‍याङगेलाइ प्रभुहेङ तिङलि माद्वावा।

¹⁵ चङख हिसु, कि हिदोइ बुङ द्‍याङ परमेस्वरको आनुग्रह निङलिसो आसफल माजेनाको, “कालाउ हासु बुङ नेलाइको माझाता समस्या माचुमाको, इन्सिका खाल्को द्‍याङ नेलाइ हेन्जाङहेङ झुकिपावा।”

¹⁶ कालाउ हासु बुङ कासिबिरि माकुनु आब्राहामको चु एसाब भाइपा आधर्मि माजेनाको, हाइपालिपानु वा जेठा चान हिघाखे, कालाउ वासेहेङ बिसेस सम्पतिको उत्तराधिकारि जेङका खाबारा हिघाखे। कालाउ वा ताइमि जोलोम सोङ जेठाको चानको खाबाराको साम्मान मापाहि, ओदोङ भाअ्सिङ वा ताइको कान्छा ओने याकुबहेङ ए सान्जा उम चालिको भाअ्सिङ ताइको जोलोम सोङ निङका जेठा चानको खाबारा दोङ पिइहि।

¹⁷ नेलाइहेङ थाहा दोङ हि, न्हुसो वा ताइको आबासो आसिरबाद निङलि भोहि, कालाउ वा इङको मानिङहि, मिति ह्यापालाउ बुङ इङको आसिस चाहिलाउ बुङ वा ताइमिङ लाम्फा पाका काथागेलाइ बदलेलि हाइ दोङ पालि मादोहि।

¹⁸ नेलाइ एनोङ सिनाइ हेमाधेङग्रा भाइका थामेता लोका मान्थु सुन्हा, जाइ तिङलि कालाउ साइलि दोखे इन्ता हिदोइ बुङ मे तितेङ दाल्दालाइका माकुनु ओसारापाङ वाङखाराका दाकिलकिल्का, माकुनु दुम भेरमा मान्थु। भरु वा उङको द्‍याङगेलाइ भाइका थामेता हिघाहि, जेता परमेस्वर इम्बालाहेङ ताइको व्यवस्था पिहि।

¹⁹ इता इम्बालाइते म्होअ्का सानाइ कालाउ एनोङ बार्का गाला हिङका हिघाहि, एला इसिका गाला हिङलाउ इम्बालाइ कालाउ एला आरोङ इङको गाला हेलाउ बुङ हिङलि मागोयाको दोअ्तेङ बिन्ति पाका हिघाहि।

²⁰ कालाउ इम्बालाइ एसा दोअ्हि, हाइपालिपानु परमेस्वर इम्बालाइहेङ दोअ्का इदोइ आग्या इम्बालाइ सहिलि मादोहि, “जेसापा हिदोइ बुङ गुपुस इङको हेमाधेङग्रा साइहि पानु इङकोहेङ उन्ठुइहोइ तोतेङ सेअ्सु।”

²¹ इन्ताको द्रिरिस्य इसिका थिलि भायानाक हिघाहि, कि मोसा बुङ दोअ्हि, “का थिकाहोइ लुकुलुकुपा फिरतेङ हिघा।”

²² कालाउ नेलाइते सियोन तिकारता लोका हिसुना, जेता स्वर्गिय यरुसेलेम हि, जेदोङ सिन्हुका परमेस्वरको सहर हि, जेता लाख-लाख स्वर्गदुतगेलाइ जोम्तेङ आनान्दहोइ-उत्साह मानाइखे।

²³ नेलाइ परमेस्वरको जेठा चानगेलाइको मन्डलिता लोका हिसुना, जाइको मिङ स्वर्गता लेखेका हि, स्वर्गता हिका इम्बालाइ धर्मि जनको आत्मा दोङ हि, जाइहेङ एला सिद्द बानाइका हि। नेलाइ ताइमिङ परमेस्वरकोता लोका हिसुन्हा, जाइ झाराङ द्‍याङगेलाइको न्याय कर्ता हि।

²⁴ नेलाइ परमेस्वर कालाउ द्‍याङगेलाइको मध्यस्ताता नावा कारारता धेउपिका येसु कालाउ सिरकाइका हितिता लोका हिसुन्हा, जाइ हाबिलको हिति खान्तेङ आझाइ आसल बचन धुइखे दोअ्खे।

²⁵ चङख हिसु, जाइ नुइ धुइदोङखे वाको दोअ्का काथा हिङलिसो मानाइ मापासु, हाइपालिपानु जेसापा प्रिथिबिता चेताउनि पिका मोसाहेङ इन्कार पाका इस्राएल सारभिको द्‍याङगेलाइ परमेस्वरको दन्डसो माबान्चिहि पानु, कालाउ स्वर्गसो चेताउनि पिका परमेस्वरको दोअ्का काथा हिङलि माकिहि पानु केलाइ जातिङ भारि इङको दन्डसो बान्चिलि माद्वाङ।

²⁶ सिनाइ रा सो परमेस्वर नुइ धुइलाउ प्रिथिबि दोङ डागमागाइका हिघाहि, कालाउ एलाते वाते एसा प्रतिग्या पाका हि, “आरोङ एखे प्रिथिबि खिनिङ माको, भरु का स्वर्ग सुधाङ हेङगालाइ प्याङका।”

²⁷ “एला आरोङ एखे” दोअ्का बचनहोइ या तिङपाखे, कि सिरजाइन्हाका गोताङ आमेनेगेलाइ हेङगालाइलि लाअ्पावा, कालाउकि हेङगालाइलि मादोका काथागेलाइ स्थिर ह्यावा,

²⁸ ओदोङ भाअ्सिङ हेङगालाइलि मादोका राइजि निङकाता केलाइ धन्यबादि जेनाइने, कालाउ केलाइ भक्ति कालाउ थिकाताङ परमेस्वरहेङ ग्रहन योग्य जेङका आराधाना पाइने।

²⁹ हाइपालिपानु केलाइको परमेस्वर दन्ड पिलाउ ओपाका मे भाइका जेङखे,