हिब्रु 11 - Dhimal NT

खाङधुरिको उधारन

¹ खाङधुरि पालि दोअ्का चाहि, आस पाका काथाता ढुक्‍क हिलि कालाउ मातिङका काथाता पाक्का निसित ताअ्लि।

² केलाइको पुर्खागेलाइ इसिका खाङधुरि पाका हिघाहि, ओदोङ भाअ्सिङ परमेस्वर इम्बालाइ दोफा खुसि हिघाखे दोअ्का तिङपाहि।

³ खाङधुरि पाहासो केलाइ बुझिनाखे कि, परमेस्वरको ताइको बचन पाहासो सुमिङ सिरजाइहि, कालाउ वा दोङ केलाइहेङ तिङलि दोका आमेने बानाइलिको भाअ्सिङ मातिङका आमेनेको प्रयोग पाहि।

⁴ खाङधुरि पाहासो आदमको चान हाबिल परमेस्वरहेङ ताइको दादा कयिन खान्तेङ आझाइ ग्रहन योग्य भोग पिहि, कालाउ इङको भोग पाहासो दोङ परमेस्वर हाबिलहेङ धर्मि द्‍याङको रुपता ग्रहन पाहि, कालाउ हाबिलको चढाइका भोग पाहासो चाहि परमेस्वर खुसि जेङहि दोअ्तेङ तिङपाहि। कालाउ हाबिल सिलाउ बुङ परमेस्वरता खाङधुरि पाकाको बारेता एला बुङ वा केलाइहेङ धिरपाखे।

⁵ हनोक मिङ हिका द्‍याङको खाङधुरि पाहासो परमेस्वर वासेहेङ सिन्हुकाङ हिलाउ स्वर्ग ह्रुता तोल्हेतेङ चुम्पुहि, कालाउ वा मासिहि कालाउ वासेहेङ हासु बुङ मानिङहि। हाइपालिपानु स्वर्गता तोल्हेतेङ चुम्पुलि खान्तेङ लाम्फा हनोक परमेस्वरहेङ लेङचापाका हिघाहि, एसापा धर्मसास्तरता लेखेका हि।

⁶ वाकोता खाङधुरि हिनु खिनिङ द्‍याङ परमेस्वरहेङ लेङचापालि द्वाङ, हाइपालिपानु परमेस्वरकोता लोकालाइ खाङधुरि पालि गोइखे, कि परमेस्वर हि कालाउ जातिङको वासेहेङ भोकालाइहेङ वा इनाम प्याङ।

⁷ खाङधुरि पाहासो नुहा मिङ पाका द्‍याङ हेलाउ बुङ मातिङका बानेको बारेता परमेस्वरसो चेताउनि निङतेङ वाको आग्या केम्तेङ ताइको जाहानहेङ बान्चिपालि एनोङ बारका जाहाज बानाइहि। हाइपालिपानु नुहा खाङधुरि पाहि, वा आरु खाङधुरि मापाका द्‍याङगेलाइहेङ दुसिका थोहोरिहि, कालाउ खाङधुरि पाहासो परमेस्वर नुहाहेङ धर्मि बानाइहि।

⁸ खाङधुरि पाहासो आब्राहाम दोअ्का द्‍याङ परमेस्वर दोङ काइका बेला वाको आग्या केम्हि कालाउ हाने दोअ्का थामे भारि हानिहि, जेदोङ थामे परमेस्वर उत्तराधिकारको रुपता वासेहेङ न्हुसो पिधावा, कालाउ हिसो हानेलि थाहा मानिङसिङ वा ताइको सारभि लाअ्तेङ हानिहि।

⁹ परमेस्वर प्रतिग्या पाका थामेता आब्राहाम एमि परदेसि कोनिङ भाइपा खोपारागेलाइ बानाइतेङ हि, कालाउ आब्राहाम दोफाङ वाको चान इसाहाक कालाउ वाको चु याकुब बुङ परमेस्वरसो ओदोङ प्रतिग्या निङहि कालाउ एन्साङ पातेङ खोपारा बानाइतेङ हि।

¹⁰ हाइपालिपानु वा जेलाउबुङको भाअ्सिङ हिका जगता बनिका सहरता हिलि ह्रुमतेङ हिघाहि, जाइहेङ बानाइका कालाउ सिरजाइ पाका परमेस्वर दोङ हि।

¹¹ खाङधुरि दोङ पाहासो आब्राहामको बे सारा बुङ ताइको उमेर हानिलि दोअ्तेङ बुङ गान्धितेका सरबुङ निङहि, हाइपालिपानु परमेस्वर ताइको प्रतिग्या पुरा पाङ दोअ्तेङ आब्राहाम खाङधुरि पाका हिघाहि।

¹² वाराङ जेङतेङ सिलि तोम्का आब्राहामसो बुङ आकासको फुरु कोनिङ हेन्जा कालाउ समुन्द्रको काम्भेको बालासरि गान्दिलि मादोका सान्तानको जोलोम जेङहि।

¹³ इदोइ गोताङ परमेस्वरता खाङधुरि पाका द्‍याङगेलाइ परमेस्वरको प्रतिग्या पाका काथा मानिङतेङ सिहि, कालाउ इम्बालाइ परमेस्वरको भबिस्यता पाका कामगेलाइ बुझितेङ खुसि जेङहि, कालाउ इम्बालाइ या बुङ बुझिहि कि, इम्बालाइ इदोइ प्रिथिबिता परदेसि कालाउ सरनार्थि खिनिङ हिघाहि।

¹⁴ इसिकाङ काथा दोअ्का द्‍याङगेलाइ इदोइ झालाफालापा तिङपाखे कि, इम्बालाइ ताइको भाअ्सिङ एनोङ सारभि भोतेङ हि, जेदोङ नेलाइको जेनावा।

¹⁵ जेदोङ सारभिसो इम्बालाइ ओल्लेतेङ हानिका हिघाहि, इम्बालाइ ओदोङ सारभिको बिसोइता सोचितेङ माहि:हि, माकुनुते इम्बालाइहेङ घुरितेङ हानेका माउका मिलिधाङ।

¹⁶ कालाउ इम्बालाइ आझाइ एनोङ उत्तम सारभि, एनोङ स्वर्गिय सारभिको इच्छा पाखे। ओदोङ भाअ्सिङ का इम्बालाइको परमेस्वर हिघा दोअ्तेङ परमेस्वर गर्ब पाधाङ, हाइपालिपानु वा इम्बालाइको भाअ्सिङ एनोङ सहर बानाइ पिका हि।

¹⁷ खाङधुरि पाहासो ताइको जाच जेङलाउ आब्राहाम ताइको चान इसाहाकहेङ भोग पिहि, जेलाउ कि परमेस्वर आब्राहामहेङ जेदोङ चानको प्रतिग्या पाका हिघाखे, कालाउ बुङ वा ताइको एमि खिनिङ चानहेङ भोग पिलि राजि जेङहि।

¹⁸ परमेस्वर वासेहेङ दोअ्का हिघाहि, “का प्रतिग्या पाका आन्सार इसाहाकसो दोङ नाङको सान्तान हेन्जा जेनाङ।”

¹⁹ परमेस्वर द्‍याङगेलाइहेङ सिकालाइसो बुङ आरोङ सिन्हुपालि दोखे दोअ्का काथा आब्राहाम सोचिका हिघाहि, कालाउ ए खाल्होइ वा इसाहाकहेङ सिकासो सिन्चाल पाका भाइकाङ दोङ आरोङ निङहि।

²⁰ खाङधुरि पाहासोङ इसाहाक ताइको न्हेमि चानगेलाइ याकुब कालाउ एसाबहेङ प्रतिग्या पाका भबिस्यको आसिसको बारेता आसिरबाद पिहि।

²¹ खाङधुरि पाहासोङ सिलि तोम्का बेलाता याकुब योसेफको न्हेमि चानहेङ आसिरबाद पिहि कालाउ ताइको लाठिता आडितेङ परमेस्वरको आराधाना पाहि।

²² खाङधुरि पाहासो योसेफ ताइमि सिलि तोम्लाउ धुक्क जेङतेङ इस्राएललिगेलाइ मिस्रो सारभि लाअ्का बारेता दोअ्का हिघाहि, कालाउ मिस्रो सारभि लाअ्तेङ हानिलाउ वा इम्बालाइहेङ ताइको हारा बुङ दोफाङ चुम्पुलिको भाअ्सिङ दोअ्का हिघाहि।

²³ जेलाउ मिस्रो सारभिको राजा इस्राएललिगेलाइको चानगेलाइहेङ जोलोमनासिङ सेअ्का आदेस पिहि, कालाउ खाङधुरि पाहासोङ मोसा जोलोमलाउ वाको आमाइ-आबा वासेहेङ सुम माइना थेकापा म्होतेङ ताअ्हि, हाइपालिपानु इम्बालाइ ताइको जामालहेङ खास हि दोअ्तेङ तिङहि कालाउ इम्बालाइ राजाको आदेस पिलाउ बुङ माथिहि।

²⁴ मिस्रो सारभिको राजा फारोहको चामिन्दि मोसाहेङ पोसेहि। जेलाउ मोसा बारातेङ धाना जेङहि, कालाउ ताइको खाङधुरि पाहासो दोङ वा माकिहि कि द्‍याङगेलाइ वासेहेङ राज कुमारिको चान दोअ्ताको दोअ्तेङ।

²⁵ एघिरिङको भाअ्सिङ पापको आनान्द भोगिलि खान्तेङ भरु मोसा परमेस्वरको द्‍याङगेलाइ दोफा दुख भोगिलि छाल्हि।

²⁶ मोसा मिस्रो सारभिको धन सम्पति खान्तेङ ख्रिस्टको भाअ्सिङ खाङलि माकिका जेङलि वा झन बार्का सम्पति थानिहि। हाइपालिपानु वा ताइको इनाम निङका दामा खाङतेङ हिघाहि।

²⁷ राजाको चेर दोफा माअ्थिसिङ खाङधुरि पाहासो दोङ वा मिस्रो सारभि लाअ्हि, हाइपालिपानु वासेहेङ थाहा जेङतेङ बुङ तिङलि मादोअ्का परमेस्वरहेङ तिङका कोनिङ भाइपा पाट्ताक्काइ न्हु माघुरिहि।

²⁸ खाङधुरि पाहासो दोङ मोसा इस्राएल सारभिको द्‍याङगेलाइहेङ फिनुता भोग पिकाको हिति सिरकाइतेङ निस्तार-पार्बा मानिलि आग्या पिहि, कालाउकि परमेस्वरको दिङगिल्का सेअ्का दुत इस्राएललिगेलाइको जेठा चानगेलाइहेङ माअ्सेताको।

²⁹ कालाउ खाङधुरि पाहासो दोङ सेङका मिलिङ कोनिङ भाइपा तेतेङ मिस्रो सारभिको द्‍याङगेलाइ लाल समुन्द्रता तेतेङ पाराहि। कालाउ इस्राएल सारभिको द्‍याङगेलाइ चाहि एन्साङ पातेङ समुन्द्र पारालि भोलाउ चिता वाङतेङ सिहि।

³⁰ इस्राएल सारभिको द्‍याङगेलाइ परमेस्वरता खाङधुरि पाका कारन दोङ न्हि दिना थेकापा यरिहो सहरको बेरेमहेङ ओबालाइ कोर्पाहाङ घुराइतेङ हि, कालाउ न्हुसो इङको बेरेम भापाहि।

³¹ खाङधुरिकोङ भरता राहाब दोअ्का एमि बेस्या बुङ परमेस्वरको आग्या माकिकालाइ दोफा मानासाहि, हाइपालिपानु वा म्होतेङ यरिहो सहर खाङलि लोका इस्राएल सारभिको जासुसगेलाइहेङ स्‍वागत पाका हिघाहि।

³² इदोइ खान्तेङ हेन्जा काथा दोअ्लि जरुरि मान्थु, हाइपालिपानु गिदोन, बाराक, सिमसन, यिप्ता, राजा दाउद, सामुएल भाइका द्‍याङगेलाइ कालाउ परमेस्वरको बक्तागेलाइको बारेता दोअ्तेङ हिलि कासेहेङ सोमोइ मान्थु।

³³ खाङधुरि पाहासोङ इम्बालाइ राइजिगेलाइ कब्जा पाहि, कालाउ न्याय दोफा राज्य पाहि, कालाउ परमेस्वर दोङ प्रतिग्या पाका काथागेलाइ बुङ निङहि, खुहाँगेलाइ इम्बालाइहेङ माचाहि।

³⁴ मेको तिका दाल्दालाइका ज्वालाहोइ इम्बालाइ माओहि, कालाउ तरवारहोइ इम्बालाइहेङ मापाल्हि, इम्बालाइ हुइका हिघाहि कालाउ एला बल्लियाका जेङका हि, धुमता बिर जेङका हि, कालाउ इम्बालाइ ताइको सतुरुगेलाइको सिपालाइहेङ खाअ्पाहि।

³⁵ आधिमि बेबालाइ ताइको सिकागेलाइहेङ आरोङ सिन्चाल्का पाहासो सिन्हुका निङहि, हेथेते द्‍याङगेलाइ दानाइ निन्चाकाताङ-निन्चाकाताङ सितेङ हानिहि, कालाउ बुङ इम्बालाइ ताइको खाङधुरि लाअ्लि माभोहि, कालाउकि इम्बालाइ सितेङ न्हुसो आरोङ आझाइ रेम्का जिबन निङलि द्वाको।

³⁶ हेथेते द्‍याङगेलाइ खुजालाइका सहिलि गोइहि, हेथेते द्वालिहोइ म्हेका चालि गोइहि, कालाउ हेथेते झिन्झिरिहोइ धेउनातेङ कैदि जेङलि गोइहि।

³⁷ कालाउ इङको मध्ये आधिमि द्‍याङगेलाइहेङ उन्ठुइहोइ तोतेङ सेअ्हि, कालाउ हेथेहेङ आराहोइ चिरितेङ न्हे चिरा पातेङ चिरिहि, इम्बालाइ हेथेहेङ तरवारहोइ पाल्तेङ सेअ्हि। इम्बालाइ गरिब हिघाहि, कालाउ इम्बालाइहेङ कस्ट पिहि कालाउ मारेम्का ब्यभार पाहि। कालाउ इम्बालाइ भेडा कालाउ मेसाको धालेगेलाइ होङतेङ जोसो-उसोङ घुराइतेङ हिगिल्घाहि।

³⁸ या मारेम्का सुमिङ उङको खान्धुराइगेलाइको भाअ्सिङ योग्यको मान्थुघाहि, इम्बालाइ चाका-मान्दा थामेगेलाइ, रागेलाइ, कालाउ आरधाङगागेलाइ, कालाउ घारागेलाइ कालाउ प्रिथिबिको तिकार दोलागेलाइ भारि घुराइगिल्तेङ हिगिल्लि गोइहि।

³⁹ इम्बालाइ झाराङ खाङधुरि पाकानाङ परमेस्वर इम्बालाइ दोफा लेङचाका हि। कालाउ बुङ परमेस्वर इम्बालाइहेङ प्रतिग्या पाका काथा हासु बुङ मानिङहि।

⁴⁰ हाइपालिपानु परमेस्वर दोफा इम्बालाइको भाअ्सिङ खिनिङ माको, भरु केलाइको भाअ्सिङ बुङ झन रेम्का योजाना हि, परमेस्वर इम्बालाइहेङ केलाइ दोफा खिनिङ सिद्द बानाइलि चाहिखे।