गलाति 6 - Dhimal NT

झाराङको भालाइ पासु

¹ खान्धुराइ ओनेगेलाइ, नेलाइ पबित्तरो आत्माको आगुवाइसो तेअ्कालाइ, जेसापा हिदोइ बुङ खान्धुराइ पाप पालाउ रिमनिन्चानु वासेहेङ मोनोइ जेङतेङ सुध्राइलि गोइखे। कालाउ ताइमि बुङ पापता माफोस्याइने दोअ्तेङ होसियार हिलि गोइखे।

² एमिसो-भेनेङको दुखता साघाइलि गोइखे, एन्सा पान्हाहि पानु केलाइ ख्रिस्टको व्यवस्थाहेङ केम्न्हाखे।

³ जेसापा हासु बुङ ताइमिङहेङ का हाइ दोङ हिघा दोअ्का सम्झिखे कालाउ बास्ताबता हाइ बुङ मान्थुखे पानु, वा ताइमिहेङ धोका पिखे।

⁴ झाराङ ताइकोङ कामको जाच पाको, जेसापा रेम्का हि पानु, आरु हासु बुङ दोफा तुलाना मापातेङ ताइमिको पाका कामता गर्ब पाको।

⁵ हाइपालिपानु केलाइ झाराङ ता-ताइको कामको जिम्माबारि हिन्हाहि।

⁶ जाइ परमेस्वरको बचन धिरखे वा ताइमिहेङ धिरपाका दोफा गोताङ आसल काथागेलाइ बाखाराइयाको।

⁷ ताइमिहेङ धोका मापि, हासु बुङ परमेस्वरहेङ ठोगिलि माद्वाङ। हाइपालिपानु द्‍याङ जेदोङ थिङखे इङकोङ चेखे।

⁸ हाइपालिपानु जेसापा हासु बुङ ताइको जिउको पापमय इच्छा पुरा पालि खाङखे पानु, वा आनान्ताको सिका निनावा। कालाउ जेसापा वा पबित्तरो आत्माको इच्छा पाहासो काम पाखे पानु, वा दोङ आनान्त जिबन निनावा।

⁹ केलाइ रेम्का काम पालि निरास माजेनाइने, हाइपालिपानु जेसापा केलाइ हिम्मत माहारेहे पानु, परमेस्वरको ताइको सोमोइता केलाइ इनाम निनाङ।

¹⁰ ओदोङ भाअ्सिङ माउका मिलिनासाङ केलाइ झाराङ द्‍याङगेलाइहेङ साघाइलि गोइखे, बिसेस पातेङ ख्रिस्टता खाङधुरि पाकालाइहेङ।

नावा सिरजाइका

¹¹ खाङसु, का ताइकोङ खुरहोइ बा-बार्का आक्सरता नेलाइहेङ या लेखेदोङखा।

¹² यहुदिगेलाइ नेलाइहेङ सुइकार पाको दोअ्तेङ, इम्बालाइ नेलाइहेङ खाताना पालि कर लागाइखे। इम्बालाइ एसा दोअ्खे, कालाउकि हासु बुङ इम्बालाइहेङ मासाताइयाको, हाइपालिपानु येसु ख्रिस्ट जाइ क्रुसता सिहि वाको ह्रुता खाङधुरि पातेङ खिनिङ परमेस्वर केलाइहेङ बान्चिपालि द्वाङ दोअ्तेङ इम्बालाइ प्राचार पाखे।

¹³ खाताना जेङका यहुदि खान्धुराइगेलाइ बुङ गोताङ मोसाको व्यवस्था माकेम्खे, कालाउ इम्बालाइ भोखे कि, नेलाइ खाताना पासु, कालाउकि इम्बालाइ आरु यहुदिगेलाइको आगाता घमन्ड पाको, कि इम्बालाइको कारनहोइ नेलाइ खाताना पासुन्हा।

¹⁴ कालाउ का चाहि आरु काथाता माको, भरु प्रभु येसु ख्रिस्ट क्रुस्टता सिका काथाता खिनिङ गर्ब पाङका। हाइपालिपानु वाको सिकासो का एला सुमिङको इच्छाको बान्धाइति मान्थुघा कालाउ सुमिङको हिदोइ बुङ सरबुङहोइ काङको ह्रुता सासन पालि माद्वावा।

¹⁵ हाइपालिपानु ना ते खातानाको हाइ दोङ महत्व पुर्न हि, ना ते खाताना माजेङका कालाउ परमेस्वर पबित्तरो आत्मासो नेलाइहेङ नावा द्‍याङ बानाइका हि इङको चाहि महत्व पुर्न हि।

¹⁶ परमेस्वर उङको झाराङहेङ सान्ति, क्रिपा कालाउ आसिस प्याको, जाइ वा आग्यागेलाइ किखे। इम्बालाइ परमेस्वरको द्‍याङगेलाइ दोङ हि।

¹⁷ एला इता हासु बुङ कासेहेङ हेन्जा कस्ट माप्याको, हाइपालिपानु येसुको छाल्का चात्या जेङका तिङपालि चोतको दागिगेलाइ का काङको जिउता फुका हिघा।

¹⁸ खान्धुराइ ओनेगेलाइ, का प्रार्थाना पाखा कि, केलाइको प्रभु येसु ख्रिस्टको आनुग्रह नेलाइ झाराङ दोफा हितेङ ह्याको। आमेन।