गलाति 5 - Dhimal NT

ख्रिस्टता स्वतन्तरो

¹ ख्रिस्ट केलाइहेङ मोसाको व्यवस्थासो स्वतन्तरो बानाइहि, ओदोङ भाअ्सिङ नेलाइहेङ थाहा जेनाको नेलाइ स्वतन्तरो जेङका हिसुन्हा। कालाउ आरोङ ताइमिहेङ व्यवस्था केम्लि बान्धाइति माबानाइसु।

² का पावल नेलाइहेङ हाइ दोअ्लि भोखा ध्यान पितेङ हिङसु, नेलाइ परमेस्वरसो धर्मि जेङलि खाताना पासुन्हा पानु, ख्रिस्ट नेलाइको भाअ्सिङ पाका कामको हिदोइ बुङ फाइदा मान्थु।

³ का नेलाइहेङ आरोङ चेताउनि पिखा, कि जेसापा हासु बुङ का परमेस्वर पाहासो धर्मि जेनाङका दोअ्तेङ खाताना पाका हि पानु, वा मोसाको व्यवस्थाहोइ दोअ्का गोताङ काथा केम्लि गोइखे।

⁴ नेलाइ जाइ मोसाको व्यवस्था मानितेङ धर्मि जेङलि खाङसुखेना, नेलाइ ख्रिस्टसो खेङन्हाका हिसुन्हा। कालाउ परमेस्वरको आनुग्रहसो दुरे जेङका हिसुन्हा।

⁵ का एसा दोअ्खा हाइपालिपानु केलाइहेङ पबित्तरो आत्मासो पुरा खाङधुरि हि, कि परमेस्वर केलाइहेङ धर्मि कोनिङ सुइकार पावा, हाइपालिपानु केलाइ ख्रिस्टता खाङधुरि पान्हाखे।

⁶ जेसापा नेलाइ येसु ख्रिस्टको खान्धुराइगेलाइनु खाताना पालाउ बुङ मापालाउ बुङ हिदोइ बुङ फरक माजेङखे। कालाउ मुलि काथा या कि केलाइ ख्रिस्टता खाङधुरि पान्हाखे, कालाउ परमेस्वर कालाउ आरु द्‍याङहेङ बुङ प्रेम पान्हाखे।

⁷ नेलाइ ख्रिस्टको खाङधुरिता रेम्कासो बाराकाताङ हानिघा सुखेना। एला हासु नेलाइहेङ सत्ये मानिलिसो रोकिदोङखे?

⁸ इदोइ सिक्स्या ते नेलाइहेङ ताइको सान्तान जेङलि काइका परमेस्वरसो माको।

⁹ चङख हिसु, हाइपालिपानु इदोइ भनाइ सत्ये हि कि, “आतुइसा साउरिहोइ गोताङ तोलेहेङ फुलिका बानाइखे।”

¹⁰ का प्रभुता भोरोसा पाखा, कि वा नेलाइहेङ धाताइका सिक्स्यागेलाइसो फारापा ताअ्तावा। कालाउ नेलाइहेङ आवाइतुपाका हासुहेङ लाउ बुङ परमेस्वर वासेहेङ दन्ड प्याङ।

¹¹ खान्धुराइ ओनेगेलाइ, जेसापा का द्‍याङगेलाइको खाताना हिलि गोयाङ दोअ्तेङ प्राचार पाकानु, का समस्याता मापरिधाङका। कालाउ जेसापा का ख्रिस्टको क्रुसको बिसोइहेङ लाअ्तेङ द्‍याङगेलाइको खाताना हिलि गोयाङ दोअ्का बिसोइता प्राचार पाकानु, का यहुदिगेलाइहेङ चेर माताम्पापिधाङका।

¹² का चाहिखा कि नेलाइहेङ आवाइ तुपाकालाइ ते ताइको आङग पोलाबुङ जेङधावा।

¹³ खान्धुराइ ओनेगेलाइ, परमेस्वर नेलाइहेङ स्वतन्तरो जेङलि काइका हि, ओदोङ भाअ्सिङ एला नेलाइहेङ मोसाको व्यवस्था मानितेङ हिलि मागोइयाङ। कालाउ इङको स्वतन्तरहेङ ताइको पापमय जिउको स्वभाव आन्सार काम पालि मापि, भरु ताइको स्वतन्तरोता एमिसो-भेनेङहेङ प्रेम पालि कालाउ साघाइलि प्रयोग पासु।

¹⁴ हाइपालिपानु गोताङ व्यवस्था एनोङ आग्याता सान्तिका हि, “ताइमिहेङ भाइपा ताइको देरागेलाइहेङ बुङ प्रेम पासु।”

¹⁵ कालाउ ता-ताइमिता चेरसुतेङ कालाउ दानाइसुतेङ हिसुना पानु, होस पासु, माकुनुते ता-ताइमिताङ नेलाइ नासास्वाना।

पबित्तरो आत्मा कालाउ द्याङको स्वभाव

¹⁶ कालाउ का दोअ्खा, नेलाइ पबित्तरो आत्माको आगुवाइ आन्सार जियाइसु, कालाउ नेलाइ ताइको जिउको पापमय स्वभाबको इच्छा पुरा मापासु।

¹⁷ हाइपालिपानु केलाइको जिउको पापमय स्वभाबको लान्छाहोइ पबित्तरो आत्माको बिरोध पाखे, एन्साङ दोङ पबित्तरो आत्मा चाहि केलाइको जिउको पापमय स्वभाबको लान्छाको बिरोध पाखे। हाइपालिपानु इङको न्हेमि दोङ एमिसो भेनेङको सतुरु दोङ हि, ओदोङ भाअ्सिङ जेदोङ आसल काम नेलाइ पालि भोसुखेना इङको काम पालि मादोसुखेना।

¹⁸ कालाउ जेसापा नेलाइ पबित्तरो आत्माको आगुवाइ आन्सार जियाइसुन्हा पानु, नेलाइ मोसाको व्यवस्थाको आधिनता मान्थु सुन्हा।

¹⁹ जिउको पापमय स्वभाबको कामगेलाइ इदोइ दोङ हि: कासिबिरि, मारेम्का काम, माएल्का बिचार,

²⁰ मुर्ति पुजा, जादु-तुना, दुस्मनि, दानाइसुका, मि तुपाका, चेरचुङ, ताइको खिनिङ भोलो सोचिका, खेङन्हाका, मारेम्का पालि जोम्का,

²¹ डाहा, गोरा चि आम्तेङ म्हाका, मोजमाज्जा पाका, कालाउ इन्सिकाङ माएल्का काम पाका। इन्सिका काम पाकालाइ परमेस्वरको सासनको हकवाला जेङलि मानिनाङ दोअ्तेङ का लाम्फा बुङ चेताउनि पिका हिघाखा कालाउ एला बुङ पिदोङखा।

²² कालाउ पबित्तरो आत्मा केलाइ लिता उब्जाइ पाका गुनगेलाइ इदोइ दोङ हि: प्रेम, आनान्द, सान्ति, धैर्य, दाया, भालाइ, खाङधुरि योग्य,

²³ मोनोइ कालाउ ताइमिहेङ काबुता ताअ्लि। इसिका काथागेलाइको बिरोधता पाका हिदोइ बुङ व्यवस्थाता मान्थु।

²⁴ कालाउ येसु ख्रिस्टता हिकालाइ ताइको इच्छा कालाउ ताइको जिउको पापमय स्वभाबगेलाइ क्रुस्टता सेअ्का हि।

²⁵ जेसापा पबित्तरो आत्मा पाहासो केलाइ नावा जिबन निङका हिनाहि पानु, वाकोङ दोअ्का आन्सार जियाइलि गोइखे।

²⁶ केलाइ घमन्डि माजेनाइने, एमिसो-भेनेङहेङ चेर मातामपा प्याइने कालाउ एमिसो-भेनेङको मि मातुपाइने।