गलाति 4 - Dhimal NT

¹ काङको दोअ्का को मतलब या हि, कि चान ताइको आबाको सम्पतिको ग्रिहि जेङखे, कालाउ वा जेलाउ थेकापा जामाल दोङ हिखे, वा बान्धाइति भाइकाङ हि। वा दोफा एला थेकापा खाबारा मान्थु जेलाउ कि वाको आबाको गोताङ काथागेलाइ वाकोङ दोङ।

² कालाउ आबा दोङ थोहोराइका उमेर मापुगिपा धाउ वा सामाराइकाको कालाउ सिक्स्यकको आधिनता हिखे।

³ एन्साङ दोङ केलाइ बुङ जामाललाइ भाइका हिघान्हाहि, कालाउ इदोइ सुमिङको बेक्कारको मुन्धुम कालाउ नियमको आधिनता हिघान्हाहि।

⁴ कालाउ जेलाउ ठिक सोमोइ लोहि, परमेस्वर ताइको चानहेङ इदोइ सुमिङता दिङगिल्हि, कालाउ वाको जोलोम एमि बेजानसो जेङहि। कालाउ वा यहुदि जेङतेङ जोलोमहि, कालाउ मोसाको व्यवस्था केम्हि।

⁵ कालाउकि मोसाको व्यवस्थाको आधिनता हिकालाइहेङ लाअ्पालि द्वाको, कालाउ केलाइ वाको सान्तान जेङलि द्वाको।

⁶ हाइपालिपानु केलाइ वाको सान्तान हिनाहि, परमेस्वर ताइको चानको आत्मा केलाइको ह्रदयता दिङगिल्पिहि, जाइ “हे आबा” दोअ्तेङ दोअ्खे।

⁷ ओदोङ भाअ्सिङ, एला नेलाइ बान्धाइति माको, भरु परमेस्वरको सान्तान हिसुना, कालाउ जेसापा सान्तान दोङ नुते, वा केलाइहेङ इङको गोताङ प्याङ जेदोङ वाको सान्तानको दोङ हि।

⁸ लाम्फा जेलाउ नेलाइ परमेस्वरहेङ नाल्का मान्थु घासुखेना, कालाउ नेलाइ इङको इस्वरको बान्धाइति हिघासुखेना, जाइ बास्ताबता सत्ये परमेस्वर दोङ माको।

⁹ कालाउ एलाते नेलाइको सामान्दा परमेस्वर दोफा हि माकुनु का दोअ्लि द्वाङका कि परमेस्वर नेलाइहेङ ताइको सान्तान बानाइका हि। आरोङ हाइ पालि नेलाइ इन्सिका हुइका बेक्कारको सिक्स्या भारि घुरिलि भोसुखेना, कालाउ आरोङ हाइ नेलाइ इम्बालाइकोङ बान्धाइति जेङलि भोसुखेना?

¹⁰ का हिङदोङखा, कि नाअ् गैर-यहुदि खान्धुराइगेलाइ यहुदि तिथिगेलाइ, माइनागेलाइ, रितुगेलाइ, कालाउ बासारगेलाइ मानिदोङसुखेना या सोचितेङ कि इदोइ पाहासो परमेस्वर खुसि जेनावाबे।

¹¹ नेलाइको काम पाका तिङतेङ कासेहेङ इन्ता लागितेङ हि, कि का नेलाइको भाअ्सिङ पाका गोताङ परिस्रोम ब्यर्थ जेङहि।

¹² खान्धुराइ ओनेगेलाइ, का बिन्ति पाखा, कि का भाइकाङ ताइमिहेङ बुङ व्यवस्थासो स्वतन्तरो बानाइसु, हाइपालिपानु का बुङ नाअ् गैर-यहुदि कोनिङ व्यवस्थासो स्वतन्तरो जेङका हिघा। नेलाइ लाम्फासोङ कासेहेङ रेम्का पाका हिसुना।

¹³ नेलाइहेङ फोम दोङ हि वाला, कि का मासाधिका हिलाउ लाङ पोल्ति नेलाइकोता सुसमाचार प्राचार पालि लोघा।

¹⁴ ओदोङ बेला काङको मिसाहोइ नेलाइहेङ आप्थ्यारोता पाका हिघाहि वाला कालाउ बुङ नेलाइ कासेहेङ मासिकासुन्हा माकुनु मालाअ्सुन्हा। कालाउ परमेस्वरको स्वर्गदुत माकुनु येसु ख्रिस्टहेङ भाइपा कासेहेङ बुङ स्‍वागत पासुन्हा।

¹⁵ ओदोङ बेला नेलाइ मेनाङ लेङचातेङ हिघासुखेना! एला नेलाइको लेङचाका हिसो हि? का या पाक्का दोअ्लि द्वाङका, कि नेलाइ काङको भाअ्सिङ ताइको मिसियाँ ओल्ला पातेङ कासेहेङ पिलि गोइलाउ बुङ नेलाइ तियार हिघासुखेना।

¹⁶ कालाउ हाइ एला का नेलाइहेङ सत्ये काथा दोअ्कानाङ का नेलाइको सतुरु जेङका हिघा?

¹⁷ नेलाइहेङ ताइको पक्स्यता चुमालि इङको धातुवा सिक्स्यकगेलाइ खुब कोसिस पादोङखे, रेम्का मनसाय होइते माको, हाइपालिपानु इम्बालाइ कासो नेलाइहेङ खेङलि भोखे कालाउ ताइको चात्या बानाइलि भोखे।

¹⁸ आसल आभिप्रायको भाअ्सिङ हाउसाइलि आसल हि, कालाउ का नेलाइको माझाता हिलाउ खिनिङ हाउसाइलि रेम्का माको।

¹⁹ काङको आनाउ जामाललाइ, जेसाङ एमि बेबाल जामालहेङ जोलोम पिलाउ तु-निन्चाखे एन्साङ दोङ का आरोङ नेलाइको भाअ्सिङ दुख ल्होपातेङ हिघा। जेलाउ थेकापा नेलाइ ख्रिस्टता परिपक्का माजेङस्वाना एन्सालाउ थेकापा का इङको कस्टता ह्याङका।

²⁰ का भोखा, कि का इन्ता हिका नु का एसापा काथा पालि मागोइधाङका। हाइपालिपानु नेलाइको बिसोइता का चिन्ता पातेङ हिघा।

हागार कालाउ सारा

²¹ नेलाइ मोसाको व्यवस्था मानिलि खाङकालाइ कासेहेङ दोअ्सु, मोसाको व्यवस्थाहोइ केलाइहेङ हाइ दोअ्लि खाङखे बिचार पासु।

²² हाइपालिपानु धर्मसास्तरता इसिका लेखेका हि, इङको आब्राहामको न्हेमि चानगेलाइ हिघाहि, एमि चान चाहि हागार बान्धाइतिसो जोलोमका हिघाहि, कालाउ भेनेङ चान चाहि सारा पाहासो जोलोमका हिघाहि जाइ बान्धाइति मान्थुघाहि।

²³ बान्धाइतिको चान चाहि द्‍याङको योजानासो जोलोमका हिघाहि, कालाउ साराको चान चाहि परमेस्वरको बाचा पुरा पालि जोलोमका हिघाहि।

²⁴ उङको न्हेमि बेबालको तुलाना परमेस्वरको न्हेनोङ बाचा दोफा पालि द्वाङ। एनोङ चाहि सिनै लाखता परमेस्वर इस्राएललिगेलाइहेङ व्यवस्था पिलाउ इम्बालाइ दोफा पाका बाचा हागारको भाइकाङ दोङ हि। वाको सान्तानगेलाइ दोङ बान्धाइतिगेलाइ जेङहि।

²⁵ हागार चाहि सिनै लाखहेङ जानाइखे, जेदोङ आरब सारभिता हि। वा नानिको यरुसेलेम सहर भाइका दोङ हि, जाइको द्‍याङगेलाइ मोसाको व्यवस्थाको बान्धाइति हि।

²⁶ कालाउ स्वर्गको यरुसेलेम आब्राहामको बे सारा भाइका हि कालाउ वाको सान्तानगेलाइ बान्धाइति माको। या यरुसेलेम केलाइको आमाइ भाइका हि, जाइ खाङधुरि पाखे।

²⁷ हाइपालिपानु धर्मसास्तरता परमेस्वरको बक्ता यासाइया लेखेका हि, “ओइ गान्धि तेअ्लि मादोका बेबालाइ, लेङचासु, ओइ तु-निन्चाका थाहा मागिका बेबालाइ, लेङचासु कालाउ ह्रिकाइसु, हाइपालिपानु के हिका बेबाल खान्तेङ गान्धि तेअ्लि मादोका बेबालाइको हेन्जा सान्तानगेलाइ हि।”

²⁸ ओइ खान्धुराइ ओनेगेलाइ, इसाहाक भाइकाङ केलाइ बुङ परमेस्वर आब्राहामहेङ बाचा पाका सान्तानगेलाइ दोङ हिनाहि।

²⁹ ओदोङ बेला द्‍याङको योजानासो जोलोम जेङका चान परमेस्वरको आत्माको सरबुङ आन्सार जोलोम जेङका चानहेङ साताइघाखे। एन्साङ दोङ परमेस्वरसो धर्मि जेङलि खाङका कालाउ मोसाको व्यवस्था मानिका द्‍याङगेलाइसो नेलाइ समस्या भोगिदोङसुखेना।

³⁰ कालाउ धर्मसास्तर दोअ्खे, “बान्धाइति कालाउ वाको चानहेङ दिङगिल्सु, हाइपालिपानु बान्धाइतिको चान ताइको आबाको सम्पति मानिङखे, इङकोते स्वतन्तरो बेबालको चान खिनिङ निङखे।”

³¹ ओदोङ भाअ्सिङ ओइ खान्धुराइ ओनेगेलाइ का दोअ्लि खाङका काथा या दोङ हि कि, केलाइ बान्धाइति बेबाल माकुनु व्यवस्थाको सान्तान माको, भरु स्वतन्तरो बेबाल माकुनु खाङधुरिको सान्तान हिनाहि।